Loko Lokushoko Akube Liciniso

YINI lengabangela kutsi umKhristu akhulume intfo lengasilo liciniso? Kungenteka kutsi umane uphindza nje intfo layivile, angakayihlolisisi kutsi iliciniso yini. Kungenteka nekutsi ente intfo ibe yinkhulu kunaloko lengiko, abe angakanaki, ngenca yekutsi akakawufundzi kahle umtfombo wayo. Nangabe sinakisisa kutsi tintfo lesitikhulumako tiliciniso, ngisho naleto letincane, labo labasilalele bangatetsemba netintfo letibalulekile lesitishoko kutsi tiliciniso.

Emsebentini Wekushumayela. Nababona kutsi kusekunyenti lokufanele bakufundze, bantfu labanyenti babese bayesaba kuba bamemeteli. Nanobe kunjalo, masinyane bayakhona kuniketa bufakazi ngisho nobe banelwati lolusisekelo nje kuphela. Basitwa yini? Kulungiselela.

Ngembikwekutsi uye ensimini, kwati kahle loko lofuna kukhuluma ngako. Yetama kucabanga ngemibuto bantfu labangase bakubute yona. Funa timphendvulo letisekelwe eBhayibhelini. Loku kutakusita kutsi unikete timphendvulo letiliciniso, ube ukhululekile. Kutsiwani nangabe uyochuba sifundvo seliBhayibheli? Kubukete kahle loko leniyofundza ngako. Ciniseka kutsi uyayicondza imiBhalo lesekela timphendvulo temibuto.

Kutsiwani nangabe umnikati welikhaya nobe umuntfu losebenta naye akubuta umbuto longakakulungeli kuwuphendvula? Nangabe ungaciniseki, ungacageli. “Umuntfu lolungile ucabanga kucala angakaphendvuli.” (Taga 15:28) Ungalutfola lusito encwadzini letsi “Ukubonisana NgemiBhalo” nobe encenyeni letsi “Tihloko TeliBhayibheli Tekucocisana,” nangabe loku kutfolakala ngelulwimi lwakho. Nawungakatiphatsi letintfo, cela kuyokwenta lucwaningo bese ubuya nemphendvulo. Nangabe loyo muntfu lokubute umbuto alufuna mbamba lwati, ngeke abe nenkinga yekulindza imphendvulo leliciniso. Ecinisweni kutfobeka kwakho kutamtsintsa kakhulu.

Kuhamba nebamemeteli labanalokuhlangenwe nako ensimini kungakusita kutsi ube nelikhono lekuphatsa liVi laNkulunkulu ngendlela lefanele. Naka kutsi ngumiphi imibhalo labayisebentisako nekutsi bayichaza kanjani. Yemukele ngekutfobeka nobe yini labayishoko nobe lusito labakunika lona. Apholosi, umfundzi lokhutsele wazuza ngelusito lalutfola kulabanye. Lukha wamchaza ngekutsi “abesikhulumi lesihle,” ‘ayati imibhalo,’ futsi “avutsa emoyeni,” “akhuluma futsi afundzisa kahle ngetintfo letimayelana naJesu.” Kodvwa bekukhona tintfo labengaticondzi kahle. Ngesikhatsi boPhrisila na-Akhwila bakubona loko, “bamtsatsa bamchazela kahle indlela yaNkulunkulu.”​—Imis. 18:24-28.

‘Bambelela Emavini Letsembekile.’ Tinkhulumo lesitetfula emihlanganweni kufanele tikhombise kutsi siyayihlonipha indzima yelibandla yekuba ‘yinsika nesisekelo seliciniso.’ (1 Thim. 3:15) Kuze sibambelele ecinisweni, kubalulekile kutsi siyicondze kahle imibhalo lesihlela kuyisebentisa etinkhulumeni. Cabanga ngengcikitsi kanye nenjongo yayo.

Loko lokusho emhlanganweni welibandla bantfu bangaphindze bakusho. Kuliciniso kutsi “sonkhe siyona tikhatsi letinyenti.” (Jak. 3:2) Kodvwa kungakusita kwetayela tintfo letikwenta kutsi ukhulume liciniso. Ngekuhamba kwesikhatsi, bazalwane labanyenti lababhalise eSikolweni Semsebenti WemaKhristu batawuba ngulabadzala. Kulindzeleke “lokukhulu kakhulu” kulabo labaniketwe loyo msebenti. (Luk. 12:48) Nangabe ngekunganaki, lomdzala aniketa seluleko lesingasiso, lesibangela kutsi emalunga elibandla angene etinkingeni letinkhulu, loyo mzalwane angase angemukeleki kuNkulunkulu. (Mat. 12:36, 37) Ngako-ke, umzalwane lofanelwe kuba ngulomdzala kudzingeka “abambelele emavini letsembekile mayelana nelikhono lakhe lekufundzisa.”​—Thit. 1:9.

Kufanele uciniseke kutsi loko lokushoko kuyavumelana nesibonelo “semavi laphilile” latfolakala kuwo onkhe emaciniso emiBhalo. (2 Thim. 1:13) Loku akukafaneli kukwetfuse. Mhlawumbe kusafanele ucedze kulifundza lonkhe liBhayibheli. Nangabe kunjalo, chubeka ulifundza. Kodvwa njengobe usalifundza, naka kutsi lamaphuzu lalandzelako angakusita njani kutsi uhlatiye kwatiswa locabanga kukusebentisa nawufundzisa.

Kwekucala, tibute: ‘Loku kuyavumelana yini naloko lesengikufundze eBhayibhelini? Kutawukwenta labo labangilalele basondzele kuJehova yini nobe kutawugcamisa kuhlakanipha kwalelive, kukhutsate bantfu kutsi bacondziswe ngiko?’ Jesu watsi: “Livi lakho liliciniso.” (Joh. 17:17; Dut. 13:1-5; 1 Khor. 1:19-21) Lokulandzelako kutsi utisebentise kahle tincwadzi letivela esisebentini lesetsembekile nalesihlakaniphile. Letincwadzi ngeke tigcine ngekukusita kutsi uyicondze kahle imibhalo, kodvwa titakusita nekutsi ukhone kuyisebentisa ngendlela lefanele nalekhombisa kucondza. Nangabe tinkhulumo takho utisekela “esibonelweni semavi laphilile,” futsi wetsembela eluhlelweni Jehova lalusebentisako kuze asifundzise nawuchaza imibhalo kanye nendlela lengasetjentiswa ngayo, loko lokushoko kutawuba liciniso.

Kuhlola Kutsi Kwatiswa Kuliciniso Yini. Tindzaba letisematseni, kucaphuna emavi latsite, kanye nalokuhlangenwe nako kungakusita nawenta umfanekiso futsi ukhombisa kutsi liphuzu lelitsite lingasetjentiswa njani. Ungaciniseka njani kutsi loku kuliciniso? Lenye indlela kutsi ukutsatse emitfonjeni leyetsenjwako. Khumbula kuhlola kutsi loko kwatiswa kuhambisana nesikhatsi yini. Tinombolo kanye naloko lokutfolwa bososayensi kuvame kuphelelwa sikhatsi, futsi njengobe bantfu bawucondza kancono umlandvo netilwimi tasendvulo, kuye kudzingeke kutsi kubuketwe tiphetfo lebekufikwe kuto. Kufanele ucaphele kakhulu nangabe ucabanga kusebentisa kwatiswa lokutfolakala kumaphephandzaba, ku-TV, emsakatweni, emilayetweni letfunyelwa ngetintfo tebuchwepheshe, nobe ku-Internet. Taga 14:15 tiyaseluleka titsi: “Umuntfu lonengcondvo lencane wetsemba yonkhe intfo; kodvwa lohlakaniphile indlela yakhe uyayibukisisa angakacali kuhamba ngayo.” Tibute: ‘Lomtfombo lengiwusebentisako watiwa ngekutsi uhlale ukhuluma tintfo letiliciniso yini? Tikhona yini letinye tindlela lengingacinisekisa ngato kutsi lokwatiswa kuliciniso?’ Nangabe ungaciniseki ngekuba liciniso kwentfo letsite, ungayisebentisi.

Ngetulu kwekuhlola kutsi wetsembekile yini umtfombo lotawusebentisa, cabangisisa ngekutsi utakusebentisa njani loko kwatiswa. Nawusebentisa emavi lacashuniwe netinombolo, ciniseka kutsi kuyavumelana nengcikitsi yaloko lokutsetfwe kuko. Nawetama kugcizelela liphuzu lelitsite, ciniseka kutsi ungashintji emavi latsi “bantfu labambalwa” kuvakale shengatsi atsi “linyenti lebantfu,” nemavi latsi “bantfu labanyenti” evakale shengatsi atsi “bonkhe bantfu,” kanye nalatsi “kuletinye timo” evakale shengatsi atsi “ngaso sonkhe sikhatsi.” Kwenta indzaba ibe yinkhulu kunaloko lengiko, kuhlanganise nemibiko letsintsa tinombolo, lizinga nobe kubaluleka kwentfo, kungenta bantfu bangasakwetsembi.

Nangabe loko lokushoko kuhlale kuliciniso ngaso sonkhe sikhatsi, utawukwatiwa njengemuntfu lolihloniphako liciniso. Loko kwakha sitfombe lesihle ngabo bonkhe BoFakazi BaJehova. Ngetulu kwako konkhe, kudvumisa Jehova ‘Nkulunkulu lowetsembekile.’​—Hla. 31:5.