Sikolwa Semsebenti WemaKhristu
Injongo: Kucecesha bamemeteli kutsi babe bashumayeli nebafundzisi betindzaba letimnandzi labaphumelelako.
Sikhatsi Lesitsatfwako: Sichutjwa njalo.
Indzawo: LiHholwa leMbuso lendzawo.
Loko Lokudzingekako: Bonkhe labahlanganyela njalo nelibandla, labavumelana netimfundziso teliBhayibheli nalabaphila ngekuvumelana netimiso tebuKhristu, bangasingenela.
Indlela Yekusingenela: Umbonisi weSikolwa Semsebenti WemaKhristu nguye lobhalisa bafundzi.
Sharon, lokhubatekile lonesifo lesihlasela imisipha yengcondvo neyemgogodla, lesibitwa ngekutsi yi-amyotrophic lateral sclerosis (ALS), utsi: “Sikolwa Semsebenti WemaKhristu singifundzise indlela yekucwaninga nekwetfula indzaba ngendlela lenengcondvo. Ngifundze nekutsi nginake sidzingo salabanye sekufuna kwati Nkulunkulu—hhayi sami kuphela.”
Arnie, losanesikhatsi lesidze angumbonisi lojikeletako, utsi: “Ngesikhatsi ngisakhula benginenkinga yekungingita nangikhuluma futsi ngehluleka nekubuka umuntfu emehlweni. Lesikolwa singisite ngakhona kutetsemba futsi ngatibona ngibalulekile. Ngelusito lwaJehova asebentisa lokuceceshwa, ngifundze kunakisisa nekulawula indlela lengiphefumula ngayo. Ngijabula kakhulu ngekutsi nginelilungelo lekudvumisa Nkulunkulu ebandleni nasensimini.”
Sikolwa Salabasandza Kufika EBethel
Injongo: Lesikolwa sisita labo labafikako kutsi baphumelele emsebentini wabo waseBethel.
Sikhatsi Lesitsatfwako: Imizuzu lengu-45 maviki onkhe kute kube ngemaviki langu-16.
Indzawo: EBethel.
Loko Lokudzingekako: Kuba lilunga lasikhatsi sonkhe lemndeni waseBethel nobe sisebenti sekutitsandzela lesemukelwe kutsi sitewukhonta eBethel umnyaka munye nobe ngetulu.
Indlela Yekusingenela: Emalunga lamasha emndeni waseBethel avele afakwe kuso.
Demetrius, lowaya kulesikolwa ngabo-1980, utsi: “Lemfundvo yangisita ngatfutfukisa indlela lengitadisha ngayo ngaphindze ngakulungela kuhlala sikhatsi lesidze eBethel. Ngatfola siciniseko kubothishela, kuloko lengakufundza neteluleko letilusito sekutsi Jehova uyangitsandza futsi unesifiso sekungisita ngiphumelele njengobe ngikhonta eBethel.”
Kaitlyn, utsi: “Ngasitwa kutsi nginake loko lokubaluleke kakhulu—kuba ngumuntfu lowenta tintfo ngendlela yaJehova. LeSikolwa singente ngabonga Jehova, ngajabulela kuhlala endlini yakhe nekuba senhlanganweni yakhe.”
Sikolwa Semsebenti WeMbuso
Injongo: Kucecesha babonisi labajikeletako, labadzala ngalesinye sikhatsi netinceku letisebentako, kute banakekele imisebenti labanayo enhlanganweni. (Imis. 20:28) Kucocwa ngetintfo letenteka emabandleni netidzingo letiphutfumako temabandla. Lesikolwa sichutjwa njalo ngemuva kweminyaka lembalwa kuye ngaloko lokuncunywe Sigungu Lesibusako.
Sikhatsi Lesitsatfwako: Kuleminyaka yamuva, besichutjwa emalanga lamabili nobe lamabili nencenye kubabonisi labajikeletako, lilanga linye nencenye kulabadzala bese kuba lilanga linye kulabo labatinceku letisebentako.
Indzawo: Kuvame kuba liHholwa leMbuso nobe liHholwa leMhlangano.
Loko Lokudzingekako: Kuba ngumbonisi lojikeletako, ngulomdzala welibandla nobe inceku lesebentako.
Indlela Yekusingenela: Labadzala netinceku letisebentako batfola simemo lesivela kumbonisi wesifundza. Lihhovisi leligatja limema babonisi labajikeletako.
“Ngisho nobe lesikolwa sicoca ngetintfo letinyenti ngesikhatsi lesincane, sisita labadzala belibandla kutsi balondvolote injabulo futsi bachubeke ‘babe ngemadvodza’ emsebentini labawunikwe nguJehova. Bazalwane lasebanesikhatsi bangulabadzala belibandla nalabo labasandza kucala, bafundza tindlela tekwelusa ngemphumelelo baphindze bapheleliswe ‘embonweni munye.’”—Quinn.
“Lokuceceshwa kuyasisita kutsi siticondze kancono tintfo letimayelana nekukholwa kwetfu, kusecwayise ngetingoti futsi kusinike netindlela letisebentako tekunakekela umhlambi. Simbonga kakhulu Jehova ngelusito lasiniketa lona.”—Michael.
Sikolwa Semsebenti Semahlahlandlela
Injongo: Kusita emahlahlandlela kutsi ‘awufeze wonkhe’ umsebenti wawo.—2 Thim. 4:5.
Sikhatsi Lesitsatfwako: Emaviki lamabili.
Indzawo: Ikhetfwa lihhovisi leligatja, kodvwa kuvame kuba liHholwa leMbuso.
Loko Lokudzingekako: Kufanele kube ngemahlahlandlela lavamile lasakhonte umnyaka nobe ngetulu.
Indlela Yekusingenela: Emahlahlandlela lafanelekako avele afakwe kulesikolwa bese atiswa ngumbonisi wawo wesifundza ngaloku.
Lily, utsi: “Lesikolwa singisitile ngakhona kubeketelela tinkinga ensimini nasekuphileni kwami. Seyitfutfuke kakhulu indlela yami yekutadisha, yekufundzisa neyekusebentisa liBhayibheli. Ngihlale ngikulungele kusita labanye, kusekela labadzala belibandla nekuba nencenye ekutfutfukiseni kukhula kwelibandla.”
Brenda, lowaya kulesikolwa kabili, utsi: “Lesikolwa singisitile ngatati kancono tintfo letimayelana nekukhonta Nkulunkulu, kucinisa nembeza wami nekufuna kusita labanye. Kuyacaca kutsi Jehova unemusa!”
Sikolwa Salabadzala Belibandla
Injongo: Kusita labadzala kutsi banakekele imisebenti yabo ebandleni futsi bacinise buhlobo babo naJehova.
Sikhatsi Lesitsatfwako: Ngemalanga lasihlanu.
Indzawo: Ikhetfwa lihhovisi leligatja, kodvwa kuvame kuba liHholwa leMbuso lelisedvute nobe liHholwa leMhlangano.
Loko Lokudzingekako: Kuba ngulomdzala welibandla.
Indlela Yekusingenela: Lihhovisi leligatja limema labadzala belibandla.
Fundza loko lokushiwo ngulabanye labaya ekilasini lesi-92 eMelika:
“Ngizuze kakhulu kulesikolwa, singisitile ngakhona kutihlola ngabona nekutsi ngingatinakekela njani timvu taJehova.”
“Sengikulungele kubakhutsata bonkhe ngisebentisa emaphuzu labalulekile lasemiBhalweni.”
“Ngitakusebentisa kuphila kwami konkhe loko lengikufundze kulesikolwa.”
Sikolwa Sebabonisi Labajikeletako Kanye Nemakhosikati Abo
Injongo: Kusita babonisi betifundza nebetigodzi kutsi baphumelele kakhulu ekukhonteni emabandla, njengobe basebenta kamatima ‘ekushumayeleni nasekufundziseni.’—1 Thim. 5:17; 1 Phet. 5:2, 3.
Sikhatsi Lesitsatfwako: Tinyanga letimbili.
Indzawo: Ikhetfwa lihhovisi leligatja.
Loko Lokudzingekako: Umzalwane kufanele abe ngumbonisi wesifundza nobe wesigodzi.
Indlela Yekusingenela: Lihhovisi leligatja limema babonisi labajikeletako kanye nebafati babo.
“Itfutfukisiwe indlela lesikhombisa ngayo kubonga ngebunhloko baJesu enhlanganweni. Sibone sidzingo sekukhutsata bazalwane lesibakhontako nekucinisa bunye belibandla. Lemfundvo isente sabona kutsi ngisho nobe umbonisi lojikeletako aniketa seluleko nesiyalo ngaletinye tikhatsi, umgomo wakhe loyinhloko kusita bazalwane babone kutsi Jehova uyabatsandza.”—Joel, lowaya ekilasini lekucala, nga-1999.
Sikolwa Lesisekelwe EBhayibhelini Sebazalwane Labangakashadi
Injongo: Kusita labadzala kanye netinceku letisebentako letingakashadi kutsi tilungele imisebenti leyengetiwe enhlanganweni yaJehova. Linyenti lalabo labaphotfulako litawutfola sabelo sekuyewukhonta eveni labo, nobe ngukuphi lapho kunesidzingo khona. Labanye bangase babelwe kulelinye live nangabe batenta batfolakale. Labanye labaphotfulile bangakhonta njengemahlahlandlela lakhetsekile esikhashana kute bacale nobe batfutfukise umsebenti wekushumayela etindzaweni letikhashane.
Sikhatsi Lesitsatfwako: Tinyanga letimbili.
Indzawo: Ikhetfwa lihhovisi leligatja, kodvwa kuvame kuba seHholweni leMhlangano nobe eHholweni leMbuso.
Loko Lokudzingekako: Kuba bazalwane labangakashadi labasemkhatsini weminyaka lengu-23 nalengu-62 budzala, labanemphilo lenhle futsi labafuna kukhonta lapho kunesidzingo khona. (Mak. 10:29, 30) Kufanele babe sebakhonte njengemahlahlandlela lavamile lokungenani iminyaka lemibili futsi babe sebakhonte njengetinceku letisebentako nobe labadzala lokungenani iminyaka lemibili lelandzelanako.
Indlela Yekusingenela: Emihlanganweni yesifundza kuba nemhlangano loniketa kwatiswa lokubanti kulabo labanesifiso sekuya kuso.
Rick lobekasekilasini lesi-23 eMelika, utsi: “Kuba matasatasa ngalemfundvo kwente kutsi umoya waJehova wente lushintjo lolukhulu kimi. Jehova nakakunika sabelo uyakusekela kuso. Ngifundze kutsi nangabe nginaka intsandvo yaNkulunkulu kunekutsi ngitinake mine, yena utangicinisa.”
Andreas lokhonta eJalimane, utsi: “Ngafundza kutsi indlela inhlangano yaNkulunkulu lesebenta ngayo lamuhla iyamangalisa. Lokuceceshwa kwangisita ngawulungela umsebenti lowawukhona. Tibonelo letinyenti teliBhayibheli taphindze tangifundzisa nali liciniso lelibalulekile: Kukhonta bazalwane bami naJehova kuletsa injabulo sibili.”
Sikolwa Lesisekelwe EBhayibhelini SemaKhristu Lashadene
Injongo: Kuniketa bantfu labashadile kuceceshwa lokukhetsekile kute bakwati kumsebentela kakhulu Jehova kanye nenhlangano yakhe. Linyenti lalabo labaphotfulako litawabelwa kutsi liyewukhonta lapho kunesidzingo khona eveni labo. Labanye bangabelwa kuyewukhonta kulelinye live nangabe bakhona kwenta njalo. Labaphotfulile bangakhonta njengemahlahlandlela lakhetsekile esikhashana kute bacale nobe batfutfukise umsebenti wekushumayela etindzaweni letikhashane.
Sikhatsi Lesitsatfwako: Tinyanga letimbili.
Indzawo: Lesikolwa sichutjwa eMelika futsi kusukela ngaSeptember 2012, sitawuchutjelwa emasimini eligatja lakhetsiwe lasemhlabeni wonkhe, kungaba seHholweni Lemhlangano nobe eHholweni LeMbuso.
Loko Lokudzingekako: Kuba bantfu labashadile labasemkhatsini weminyaka lengu-25 nalengu-50 budzala, labanemphilo lenhle nalabanetimo letibavumela kutsi bakhonte lapho kunesidzingo khona futsi labatsi: “Nangu mine, tfuma mine!” (Isa. 6:8) Kufanele babe sebashade lokungenani iminyaka lemibili futsi babe semsebentini wasikhatsi sonkhe lokungenani iminyaka lemibili lelandzelanako. Umzalwane kufanele abe asakhonte njengalomdzala ebandleni nobe inceku lesebentako lokungenani iminyaka lemibili lelandzelanako.
Indlela Yekusingenela: Emhlanganweni wesigodzi kuba nemhlangano loniketa kwatiswa lokubanti kulabo labafisa kusingenela. Nangabe kute lomhlangano eveni lakho futsi wena unesifiso sekuya kulesikolwa, ungabhalela lihhovisi leligatja lakini kute utfole kwatiswa lokubanti.
Eric naCorina labaya ekilasini lekucala, nga-2011, batsi: “Kwaba ngemaviki lasiphohlongo lakushintja kuphila kwetfu futsi kwaba litfuba lelihle kubantfu labashadene labanesifiso sekwenta lokunyenti emsebentini waJehova. Sitimisele kuphila ngekulinganisela lokutawusenta sikwati kusisebentisa ngekuhlakanipha sikhatsi setfu.”
I-Watchtower Bible School of Gilead
Injongo: Kucecesha bafundzi kutsi bakhonte njengetitfunywa telivangeli etindzaweni letinebantfu labanyenti, babe babonisi labajikeletako nobe emalunga emndeni waseBethel. Umgomo waloku kucinisa nekutfutfukisa insimi nekuhleleka kwemagatja.
Sikhatsi Lesitsatfwako: Tinyanga letisihlanu.
Indzawo: EWatchtower Educational Center, lesePatterson, eNew York, eMelika.
Loko Lokudzingekako: Kuba bantfu labashadene labakhonta kunobe ngumuphi umsebenti wasikhatsi sonkhe lokhetsekile—kungaba titfunywa telivangeli letisengakayi kulesikolwa, emahlahlandlela lakhetsekile, babonisi labajikeletako nobe emalunga emndeni waseBethel. Kufanele babe sebakhonte ndzawonye emsebentini lonjalo lokungenani iminyaka lemitsatfu lelandzelanako. Kudzingeka bakwati kukhuluma, kufundza nekubhala siNgisi kahle.
Indlela Yekusingenela: Bantfu labashadene bangamenywa Likomidi Leligatja kutsi bafake ticelo.
Lade naMonique baseMelika nyalo bakhonta e-Afrika. Lade utsi: “Sikolwa saseGileyadi sisilungiselela kutsi sikwati kuya nobe ngukuphi emhlabeni, sisebente nebazalwane betfu ngekutimisela.”
Monique utsi: “Njengobe ngikusebentisa loko lengikufundze eVini laNkulunkulu, ngitfola injabulo lenkhulu esabelweni sami. Leyo njabulo ngiyitsatsa njengebufakazi lobengetiwe belutsandvo lwaJehova.”
Sikolwa Semalunga Emakomidi Emagatja Kanye Nemakhosikati Awo
Injongo: Kusita labo labasemaKomidini Emagatja kutsi banakekele imindeni yaseBethel, kunakekela tindzaba letitsintsa emabandla, kwengamela tifundza netigodzi letingephansi kweligatja labo. Baphindze bafundze ngekuhumusha, kushicilela, nekutfumela tincwadzi emabandleni.
Sikhatsi Lesitsatfwako: Tinyanga letimbili.
Indzawo: EWatchtower Educational Center, lesePatterson, eNew York, eMelika.
Loko Lokudzingekako: Umzalwane kufanele abe lilunga leKomidi yeLigatja nobe iKomidi yeLive nobe abelwe kutsi abe ngilo.
Indlela Yekusingenela: Sigungu Lesibusako simema bazalwane kanye nebafati babo.
Lowell naCara, labebasekilasini lesi-25, bakhonta eNigeria. Lowell utsi: “Ngakhunjutwa kutsi ngisho nobe ngimatasatasa kangakanani nobe nginiketwe muphi umsebenti, kufanele ngente tintfo ngendlela yaJehova kute ngimjabulise. Lemfundvo yaphindze yagcizelela kutsi kubaluleke kangakanani kulingisa lutsandvo Jehova lalukhombisa tinceku takhe.”
Cara utsi: “Lokunye lokwashiwo lengihlale ngicabanga ngako nguloku: ‘Nangabe ngingakhoni kuchaza lokutsite ngendlela lecacile, kudzingeka kutsi ngisitadishe leso sihloko ngembikwekutsi ngifundzise labanye.’”