Imifanekiso Lesekelwe Etimeni Letetayelekile

KUBALULEKILE kutsi nobe ngumiphi imifanekiso loyisebentisako ivumelane naloko lococa ngako. Nobe kunjalo, kuze iphumelele kahle, kubalulekile nekutsi ifanelane nalabo lokhuluma nabo.

Luhlobo lwebantfu labakulalele lungayitsintsa njani indlela lokhetsa ngayo imifanekiso lotayisebentisa kulelo cembu? Yini leyentiwa nguJesu Khristu? Ngisho nobe akhuluma nesicumbi sebantfu nobe bafundzi bakhe, Jesu akazange asebentise tibonelo tendlela yekuphila lengasiyo yaka-Israyeli. Labo lakhuluma nabo bebangeke batati tibonelo letinjalo. Nasi sibonelo: Jesu akazange akhulume ngendlela yaseGibhithe yekuphila kwasebukhosini nobe ngetinkholo taseNdiya. Nobe kunjalo, imifanekiso yakhe beyikhuluma ngetintfo letetayelekile kubantfu kuto tonkhe tindzawo. Wakhuluma ngekuchibela tingubo, kuchuba libhizinisi, kulahlekelwa yintfo leligugu, kanye nekuya edzilini lemshado. Abeyicondza indlela bantfu lebebatsintseka ngayo ngephansi kwetimo letehlukehlukene, futsi abelusebentisa lolo lwati. (Mak. 2:21; Luk. 14:7-11; 15:8, 9; 19:15-23) Njengobe kushumayela kwakhe bekucondziswe kakhulu kubantfu baka-Israyeli, imifanekiso yaJesu leminyenti beyivame kukhuluma ngetintfo nobe ngemisebenti lebebayenta malanga onkhe. Ngako-ke, abekhuluma ngetintfo letifana nekulima, indlela timvu letimlalela ngayo umelusi wato, kanye nekusetjentiswa kwesikhumba kuze kugcinwe liwayini. (Mak. 2:22; 4:2-9; Joh. 10:1-5) Waphindze wakhuluma ngetibonelo tasendvulo letetayelekile​—kudalwa kwendvodza nemfati wekucala, Zamcolo wangesikhatsi saNowa, kubhujiswa kweSodoma neGomora, kanye nekufa kwemkaLoti, nasibala nje letibalwa. (Mat. 10:15; 19:4-6; 24:37-39; Luk. 17:32) Uyayinakisisa yini imisebenti leyetayelekile kulabo lokhuluma nabo kanye nemasiko abo nawukhetsa imifanekiso?

Kutsiwani nangabe ungakhulumi nelicembu lelikhulu, kodvwa ukhuluma nemuntfu munye nobe mhlawumbe labambalwa? Timisele kukhetsa umfanekiso lofanelana nalabo bantfu labambalwa. Ngesikhatsi Jesu afakaza kumfati waseSamariya emtfonjeni edvute neSikhari, wakhuluma ‘ngemanti ekuphila,’ wakhuluma nangekutsi lomfati “ngeke aphindze ome,” kanye ‘nangemtfombo lophuphumako, lonika kuphila lokuphakadze.’ Konkhe loku kwakutinongo tenkhulumo letihlobene naloko lobekwentiwa ngulomfati. (Joh. 4:7-15) Nakakhuluma nemadvodza labegeza emanethi awo, sinongo senkhulumo lasisebentisa sasihambisana nemsebenti wekudweba. (Luk. 5:2-11) Kuto totimbili letibonelo, kungenteka abengakhuluma ngekulima, njengobe kwakulinywa kulendzawo lebebakuyo, kodvwa kusebentisa kwakhe tintfo lebebatenta labo bantfu kwasita ekutseni bayibone lentfo labekhuluma ngayo. Wena uyakwenta yini loko?

Ngisho nobe Jesu abetfunywe “etimvini letilahlekile taka-Israyeli,” umphostoli Pawula yena akatfunywanga kuma-Israyeli kuphela kodvwa nakubeTive. (Mat. 15:24; Imis. 9:15) Loko kwawenta yini umehluko endleleni Pawula labekhuluma ngayo? Yebo. Nakabhalela emaKhristu aseKhorinte, wakhuluma ngemincintiswano yekugijima, ngekudla lokunikelwe ethempelini letitfombe, kanye nangeludvwendvwe lwekuncoba, lokutintfo bantfu beTive labebatetayele.​—1 Khor. 8:1-10; 9:24, 25; 2 Khor. 2:14-16.

NjengaJesu naPawula, uyanaka yini nawukhetsa imifanekiso netibonelo lotawutisebentisa nawufundzisa? Uyayinaka yini indzawo bantfu lokhuluma nabo labahlala kuyo kanye nemisebenti yabo yamalanga onkhe? Kuliciniso kutsi kusukela ekhulwini lekucala leminyaka kunelushintjo lolunyenti lolwentekile emhlabeni. Bantfu labanyenti bayakhona kubona tindzaba letenteka emhlabeni wonkhe kuma-TV. Ngako batetayele timo letikulamanye emave. Nangabe kunjalo, ungatisebentisa leto tindzaba nawenta imifanekiso. Nobe kunjalo, tintfo letitsintsa bantfu kakhulu kuvamise kuba nguleto letitsintsa kuphila kwabo, kungaba ngemakhaya abo, imindeni yabo, imisebenti yabo, kudla labakudlako kanye nesimo selitulu sendzawo yakubo.

Nangabe umfanekiso wakho udzinga kutsi uchaze kakhulu, kungenteka usuke ukhuluma ngentfo labangakayetayeli labo labakulalele. Kumelula kutsi umfanekiso lonjalo wente liphuzu lococa ngalo lingasabonakali. Umphumela waloko ungaba kutsi labo lokhuluma nabo bawukhumbule umfanekiso wakho kodvwa bangawakhumbuli emaciniso lasemBhalweni lobewufuna kuwendlulisela.

Kunekutsi acatsanise ngetintfo letilukhuni, Jesu wasebentisa tintfo letimelula letenteka ekuphileni kwamalanga onkhe. Wasebentisa tintfo letincane kuze achaze tintfo letinkhulu kanye netintfo letimelula kuze ente tintfo letilukhuni ticace. Ngekutsi avete kuhlobana lokukhona emkhatsini wetintfo letenteka ekuphileni kwamalanga onkhe kanye nemaciniso eliBhayibheli, Jesu wasita bantfu kutsi basheshe bawacondze lamaciniso labebafundzisa wona futsi bawakhumbule. Leso sibonelo lesihle kakhulu!