Ditshupiso Tsa Bukana ya Seboka sa Bophelo le Tshebeletso ya Rona
13-19 APRIL
MATLOTLO A TSWANG BIBELENG | GENESE 31
“Jakobo le Labane ba Etsa Selekane sa Kgotso”
(Genese 31:44-46) Jwale, tloo, a re hlabe selekane, nna le wena, mme e tla ba bopaki pakeng tsa ka le wena.” 45 Tumellanong le hoo Jakobo a nka lejwe mme a le hloma e le sefika. 46 Jwale Jakobo a re ho barababo: “Nkang majwe!” Yaba ba qala ho nka majwe le ho etsa mokolokotwane. Ka mora moo ba jella moo mokolokotwaneng.
it-1-E 883 ¶1
Galede
Jakobo le Labane ba ile ba etsa selekane e le hore ba etse kgotso pakeng tsa bona. Ho etsa seo, Jakobo o ile a nka lejwe a le hloma e le sefika mme a laela “barababo” hore ba bokelle majwe ho etsa ntho e kang tafole, eo ba tla jella dijo tsa selekane ho yona. Ka mora moo, Labane o ile a bitsa majwe ana a bokelletsweng “Jegare-sahadutha” ka Searame sa Syria, empa Jakobo a a bitsa ka lentswe le bolelang ntho e tshwanang ka Seheberu e leng “Galede”. Yaba Labane o re: “Mokolokotwane ona [ka Seheberu e leng gal] ke bopaki [ka Seheberu e leng ʽedh] pakeng tsa ka le wena kajeno.” (Ge 31:44-48) Mokolokotwane kapa majwe a bokelletsweng (le lejwe le entsweng sefika) e ne e le bopaki ho batho bohle ba neng ba feta ka tsela. E ne e le “Tora ya ho Lebela [ka Seheberu e leng mits·pahʹ],” feela jwalo ka ha temana ya 49 e bontsha, mme e ne e tiisa hore Jakobo le Labane ba ne ba dumellane hore ba tla boloka kgotso pakeng tsa bona le ba malapa a bona. (Ge 31:50-53) Ha morao majwe a ile a sebediswa ka tsela e tshwanang bakeng sa bopaki.—Jos 4:4-7; 24:25-27.
(Genese 31:47-50) Labane a qala ho o bitsa Jegare-sahadutha, empa Jakobo a o bitsa Galede. 48 Yaba Labane o re: “Mokolokotwane ona ke bopaki pakeng tsa ka le wena kajeno.” Ke ka lebaka leo a o rehileng lebitso la Galede, 49 le Tora ya ho Lebela, hobane a itse: “Jehova a ke a lebele pakeng tsa ka le wena ha re dutse re sa bonahale e mong ho e mong. 50 Haeba o hlorisa baradi ba ka le haeba o nka basadi ba bang ho phaella ho baradi ba ka, ha ho motho ya nang le rona. Bona! Modimo ke paki pakeng tsa ka le wena.”
it-2-E 1172
Tora ya ho Lebela
Jakobo o ile a bokella majwe mme a a bitsa “Galede” (e leng Majwe a Bokelletsweng a Fanang ka Bopaki) le “Tora ya ho Lebela.” Ka mora moo, Labane o ile a re: “Jehova a ke a lebele pakeng tsa ka le wena ha re dutse re sa bonahale e mong ho e mong.” (Ge 31:45-49) Majwe ana a neng a bokelleditswe a ne a bontsha hore Jehova o ntse a shebile Jakobo le Labane ho bona hore na ba ntse ba bolokile selekane sa bona sa kgotso.
(Genese 31:51-53) Yaba Labane o tswela pele ho re ho Jakobo: “Mokolokotwane ke ona le sefika ke sena seo ke se emisitseng pakeng tsa ka le wena. 52 Mokolokotwane ona ke bopaki, mme sefika sena ke ntho e pakang, hore nke ke ka feta mokolokotwane ona kgahlanong le wena le hore o ke ke wa feta mokolokotwane ona le sefika sena kgahlanong le nna ho nntsha kotsi. 53 Modimo wa Abrahama le modimo wa Nakore a ke a ahlole pakeng tsa rona, modimo wa ntata bona.” Empa Jakobo a hlapanya ka Tshabo ya ntatae Isaka.
Batlisisa Matlotlo a Patilweng
(Genese 31:19) Jwale Labane o ne a ilo kuta dinku tsa hae. Ho sa le jwalo Ragele a utswa diterafime tsa ntatae.
it-2-E 1087-1088
Terafime
Dintho tseo baepolli ba dintho tsa kgale ba di fumaneng Mesopotamia le dibakeng tse haufi di bontsha hore motho ya neng a e na le diterafime ke yena ya neng a tla fumana lefa. Ho ya ka se ngotsweng letlapeng le fumanweng Nuzi, maemong a mang haeba mokgwenyana a ne a e na le medimo ya ka tlung ya habo mosadi, o ne a na le tokelo ya ho ya kgotla bakeng sa ho batla lefa la ntate matsale wa hae ya hlokahetseng. (Ancient Near Eastern Texts, edited by J. Pritchard, 1974, pp. 219, 220, and ftn 51) Mohlomong Ragele o ile a nahana ka sena mme a nka hore ho nepahetse hore a nke diterafime tsa ntate wa hae hobane a ile a qhekella monna wa hae e leng Jakobo. (Bapisa le Ge 31:14-16.) E ka nna yaba taba ya hore diterafime di ne di fa motho tokelo ya hore a fumane lefa ke lona lebaka le entseng hore Labane a di batle hakana, ho ya boholeng ba hore a nke barababo e le hore ba lelekise Jakobo “sebaka se bohole ba leeto la matsatsi a supileng.” (Ge 31:19-30) Ke nnete hore Jakobo o ne a sa tsebe letho ka seo Ragele a se entseng (Ge 31:32), mme ho ne ho se letho le bontshang hore Jakobo o ile a leka ho sebedisa diterafime ho fumana lefa la bara ba Labane. Jakobo o ne a sa sebedisane le medimo ya ditshwantsho. A ka be a ile a pata le diterafime ha a ne a pata melimo esele eo a ileng a e fuwa ke ba ntlo ya hae tlasa sefate se seholo se haufi le Shikeme.—Ge 35:1-4.
(Genese 31:41, 42) Ke dilemo tse mashome a mabedi ke le ka tlung ya hao. Ke o sebeleditse dilemo tse leshome le metso e mene bakeng sa baradi ba hao ba babedi le dilemo tse tsheletseng bakeng sa mohlape wa hao, mme o nnile wa fetola moputso wa ka ka makgetlo a leshome. 42 Hoja Modimo wa Ntate, Modimo wa Abrahama le Tshabo ya Isaka, a ne a sa ka a ba lehlakoreng la ka, o ka be o itse ke tsamaye ke sa nka letho. Modimo o bone ho sohlokeha ha ka le ho sehla ha matsoho a ka, mme ka hoo o o kgalemetse bosiung ba maobane.”
(1 Petrose 2:18) Bahlanka ba ntlo ba ke ba ipehe tlasa beng ba bona ka tshabo yohle e lokelang, eseng feela ba molemo le ba nang le kahlolo e molemo, empa le bao ho leng thata ho ba kgahlisa.
w13 3/15 21 ¶8
Jehova ke Sebaka sa Rona sa Bodulo
8 Ha Jakobo a fihla Harane, malome wa hae Labane o ile a mo amohela ka mofuthu, mme ha morao a mo fa Lea le Ragele hore e be basadi ba hae. Empa ha nako e ntse e ya, Labane o ile a leka ho hanyapetsa Jakobo, a fetola moputso wa hae ka makgetlo a leshome. (Gen. 31:41, 42) Le ha ho le jwalo, Jakobo o ile a mamella ho hloka toka hona, a kgodisehile hore Jehova o tla tswela pele ho mo hlokomela mme O ile a feela a mo hlokomela. Ha e le hantle, ha Modimo a bolella Jakobo hore a kgutlele Kanana, mopatriareka eo o ne a e na le “mehlape e mengata le makgabunyane le bahlanka le dikamele.” (Gen. 30:43) Jakobo o ile a rapela ka pelo e tletseng kananelo, a re: “Ha ke tshwanelwe ke mosa ohle o lerato le botshepehi bohle boo o bo bontshitseng mohlanka wa hao, etswe ke tshetse Jordane ena ke e na le lere la ka feela mme jwale ke fetohile dihlopha tse pedi.”—Gen. 32:10.
Mmalo wa Bibele
(Genese 31:1-18) Ka mora nako a utlwa mantswe a bara ba Labane, ba re: “Jakobo o nkile ntho e nngwe le e nngwe ya Ntate; mme o bokeletse leruo lena lohle la hae ka seo e leng sa Ntate.” 2 Ha Jakobo a tadima sefahleho sa Labane, bonang! o ne a se a se jwalo ka pele. 3 Qetellong Jehova a re ho Jakobo: “Kgutlela naheng ya bo ntatao le ho beng ka wena, mme ke tla tswela pele ke e na le wena.” 4 Jwale Jakobo a romeletsa mme a bitsetsa Ragele le Lea tshimong hore ba tle mohlapeng wa hae, 5 yaba o re ho bona: “Ke bona sefahleho sa ntata lona, hore ho nna ha a sa le jwalo ka pele; empa Modimo wa Ntate o na le nna. 6 Ka sebele le a tseba hore ke sebeleditse ntata lona ka matla a ka ohle. 7 Ntata lona o nkentse ka mano mme o fetotse moputso wa ka ka makgetlo a leshome, empa Modimo ha a a ka a mo dumella ho nketsa hampe. 8 Haeba ka lehlakoreng le leng a ne a re, ‘Tse thobosha e tla ba moputso wa hao,’ jwale mohlape ohle o ne o hlahisa tse thobosha; empa haeba ka lehlakoreng le leng a ne a re, ‘Tse metjhato e tla ba moputso wa hao,’ jwale mohlape ohle o ne o hlahisa tse metjhato. 9 Ka hoo Modimo o nnile a nka mohlape wa ntata lona mme a mpha wona. 10 Qetellong eitse nakong ya ha mohlape o palesa ka phahamisa mahlo mme ka bona pono torong mme bonang! diphooko tse tlolelang mohlape di ne di le metjhato, di le thobosha mme di le matheba. 11 Jwale lengeloi la Modimo wa nnete la re ho nna torong, ‘Jakobo!’ yaba ke re, ‘Ke nna enwa.’ 12 Yaba le tswela pele, ‘Ka kopo, phahamisa mahlo, o bone diphooko tsohle tse tlolelang mohlape hore di metjhato, di thobosha mme di matheba, etswe ke bone sohle seo Labane a o etsang sona. 13 Ke nna Modimo wa nnete wa Bethele, moo o tlotsitseng sefika le moo o entseng boitlamo ho nna. Jwale ema, tloha naheng ena mme o kgutlele naheng eo o tswaletsweng ho yona. ’ ” 14 Yaba Ragele le Lea ba a araba mme ba re ho yena: “Na ho sa ntse ho e na le karolo ya lefa la rona ka tlung ya Ntate? 15 Na ruri ha re nkwe re le basele ho yena ka ha o re rekisitse, hoo a ntseng a ja ka ho tswelang pele esita le tjhelete eo re e ntsheditsweng? 16 Etswe maruo ohle ao Modimo a a nkileng ho Ntate ke a rona le bana ba rona. Ka hoo jwale o etse ntho e nngwe le e nngwe eo Modimo a o boleletseng yona.” 17 Jwale Jakobo a ema mme a palamisa bana ba hae le basadi ba hae dikameleng; 18 yaba o qala ho kganna mohlape ohle wa hae le thepa yohle eo a e bokeletseng, mohlape oo a o fumaneng oo a o bokeletseng Padane-arame, e le hore a ye ho ntatae Isaka naheng ya Kanana.
20-26 APRIL
MATLOTLO A TSWANG BIBELENG | GENESE 32-33
“Na o Lwanela ho Fumana Tlhohonolofatso?”
(Genese 32:24) Qetellong Jakobo a sala a le mong. Jwale monna e mong a qala ho betana le yena ho fihlela ha mafube a hlaha.
w03 8/15 25 ¶3
Na o Batla Jehova ka Tiyo?
Mangolo a na le mehlala e mengata ya ba ileng ba ikitlaelletsa ho batla Jehova. E mong wa bona ke Jakobo, ya ileng a betana le lengeloi la Modimo le tlileng ka mmele wa motho ho fihlela mafube a hlaha. Ka lebaka leo, Jakobo o ile a rehwa Iseraele (Ya Lwantshanang le Modimo) ka ha o ile a ‘lwana,’ kapa a phehella, a ikitlaetsa, a qophella Modimo. Lengeloi le ile la mo hlohonolofatsa ka lebaka la ho ikitlaetsa ha hae.—Genese 32:24-30.
(Genese 32:25, 26) Ha a bona hore ha a a mo hlola, jwale a ama komiki ya lenonyello la serope sa hae; mme komiki ya lenonyello la serope sa Jakobo ya tswa madulong nakong eo a ntseng a betana le yena. 26 Ka mora moo a re: “Ntlohele ke tsamaye, etswe mafube a se a hlahile.” Yaba o re: “Nke ke ka o tlohela ho fihlela o ntlhohonolofatsa pele.”
it-2-E 190
Ho Holofala
Jakobo o a Holofala. Ha Jakobo a le dilemo tse ka bang 97 o ile a lwana le lengeloi la Modimo bosiu kaofela. O ile a le thibela hore le se ke la tsamaya ho fihlela le mo hlohonolofatsa. Ha ba ntse ba lwantshana, lengeloi le ile la ama komiki ya lenonyello la serope sa Jakobo yaba e tswa madulong. Ka lebaka leo Jakobo o ile a hlotsa. (Ge 32:24-32; Ho 12:2-4) Le hoja lengeloi le ile la re Jakobo o ‘lwanne le Modimo [lengeloi la Modimo] le batho hoo qetellong a hlotseng’, sena se ile sa hopotsa Jakobo hore ha e le hantle ha a a ka a hlola lengeloi le matla la Modimo. Ho e na le hoo, Modimo o ile a mo dumella hore a lwane le lengeloi e le hore a bontshe hore o batla tlhohonolofatso ya Hae ka tiyo.
(Genese 32:27, 28) Ka hoo a re ho yena: “Lebitso la hao o mang?” yaba o re: “Ke Jakobo.” 28 Jwale a re: “Lebitso la hao ha e sa tla hlola e eba Jakobo empa e tla ba Iseraele, etswe o lwanne le Modimo le batho hoo qetellong o hlotseng.”
it-1-E 1228
Iseraele
1. Modimo o ile a fa Jakobo lebitso lena ha a le dilemo tse ka bang 97. Ha Jakobo a ilo kopana le morabo e leng Esau, o ile a tshela phula ya molapo wa Jaboke yaba o lwana le lengeloi bosiung boo. Ka ha Jakobo o ile a tiisetsa ha a lwana le lengeloi, le ile la fetola lebitso la hae hore e be Iseraele ho bontsha hore Modimo o mo hlohonolofaditse. Jakobo o ile a reha sebaka sena Peniele kapa Penuele e le hore a tle a hopole diketsahalo tsena. (Ge 32:22-31; sheba JACOB No. 1.) Ha morao ha a le Bethele, Modimo o ile a tiisa lebitso la hae le letjha mme ho tloha ka nako eo ho fihlela a hlokahala o ile a bitswa Iseraele. (Ge 35:10, 15; 50:2; 1Likr 1:34) Le ha ho le jwalo, ditloholo tsa Jakobo di bitswa Iseraele ka makgetlo a fetang 2 500 ka Bibeleng.—Ex 5:1, 2.
Batlisisa Matlotlo a Patilweng
(Genese 32:11) Ke a o rapela, ntopolle letsohong la moreso, letsohong la Esau, hobane ke tshaba hore o tla tla mme ka sebele a ntlhasele, Mme ha mmoho le bana.
(Genese 32:13-15) A nna a dula moo bosiung boo. A nkela Esau morabo mpho ho se neng se le letsohong la hae: 14 dipodi tse tshehadi tse makgolo a mabedi le diphooko tse mashome a mabedi, dinku tse tshehadi tse makgolo a mabedi le dipheleu tse mashome a mabedi, 15 dikamele tse mashome a mararo tse anyesang le manamane a tsona, dikgomo tsa dithole tse mashome a mane le dipoho tse leshome, diesele tse tshehadi tse mashome a mabedi le diesele tse hodileng ka ho feletseng tse leshome.
w10 6/15 22 ¶10-11
Ho Bua ka Mosa ho Tswala Kutlwano
10 Ha batho ba buisana ka mosa mme ba phetlelana difuba ba tla utlwana mme ba phedisane ka kgotso. Ha e le hantle, ha re ikitlaelletsa ho lokisa dikamano le batho ba bang, seo se tla re thusa hore re ntlafatse tsela eo re buisanang le bona ka yona. Ho ikitlaelletsa ho etsetsa ba bang dintho tse bontshang mosa, tse kang ho batla menyetla ya ho ba thusa, ho ba fa dimpho ka moya o motle, ho ba amohela ka mofuthu ha ba re etetse, ho ka etsa hore re phetlelane difuba. Re ka ba ra ba “bokella mashala a mollo,” e leng se ka nnang sa etsa hore makgabane a bona a matle a totobale, ka hoo ha eba bonolo hore re buisane le bona ka bolokolohi.—Bar. 12:20, 21.
11 Mopatriareka Jakobo o ne a utlwisisa hore ke ha bohlokwa ho etsetsa ba bang dintho tse bontshang mosa. Lefahla la hae e leng Esau, le ne le mo halefetse hoo Jakobo a ileng a baleha a tshaba hore Esau o tla mo bolaya. Jakobo o ile a kgutla ka mora dilemo tse ngata. Yaba Esau o mo kgahlanyetsa a e na le banna ba 400. Jakobo o ile a rapela Jehova hore a mo thuse. Ka mora moo a romela Esau mpho ya mohlape o moholo. Mpho eo e ile ya finyella morero wa yona. Ha Jakobo le Esau ba kopana Esau o ne a se a fetohile, ka hoo o ile a mathela Jakobo mme a mo haka.—Gen. 27:41-44; 32:6, 11, 13-15; 33:4, 10.
(Genese 33:20) Ka mora moo a hloma aletare moo mme a e bitsa Modimo, Modimo wa Iseraele.
it-1-E 980
Modimo, Modimo wa Iseraele
Jakobo o ile a fuwa lebitso la Iseraele ka mora ho lwana le lengeloi la Jehova Peniele mme ka mora ho etsa kgotso le morabo e leng Esau, o ile a dula Sukothe yaba o dula Shikeme. O ile a fumana tshimo ho bara ba Hamore yaba o hloma tente ya hae moo. (Ge 32:24-30; 33:1-4, 17-19) “Ka mora moo a hloma aletare moo mme a e bitsa Modimo, Modimo wa Iseraele.” kapa “Modimo ke Modimo wa Iseraele.” (Ge 33:20) Jakobo o ile a reha aletare eo Modimo, Modimo wa Iseraele ho bontsha hore o ananela lebitso la hae le letjha le ho leboha hore Modimo o ile a mo sireletsa ho fihlela a kgutlela Naheng e Tshepisitsweng. Lebitso la aletare ena le hlaha hangwe feela ka Bibeleng.
Mmalo wa Bibele
(Genese 32:1-21) Ha e le Jakobo, a tsamaya, yaba jwale mangeloi a Modimo a kopana le yena. 2 Kapelepele Jakobo a re, ha a a bona: “Lena ke lebotho la Modimo!” Ka hoo a reha sebaka seo lebitso la Mahanaime. 3 Jwale Jakobo a romela mangosa hore a mo etelle pele ho ya ho Esau morabo naheng ya Seire, naha ya Edomo, 4 a a laela, a re: “Le tle le re ho morena ka, Esau, ‘Mohlanka wa hao Jakobo o itse: “Ke dutse le Labane ke le mojaki mme ke dutse ka nako e telele ho fihlela jwale. 5 Ke na le dipoho le diesele, dinku, bahlanka le makgabunyane, mme ke rata ho romeletsa ho tsebisa morena ka, e le hore nka fumana kamohelo mahlong a hao. “’” 6 Ka mora nako mangosa a kgutlela ho Jakobo, a re: “Re fihlile ho moreno Esau, mme le yena o tseleng ho o kgahlanyetsa, hammoho le banna ba makgolo a mane.” 7 Yaba Jakobo o tshoha haholo mme wa tshwenyeha. Ka hoo a arola batho bao a nang le bona, le mehlape ya dikgutshwane le dikgomo le dikamele ka dihlopha tse pedi, 8 yaba o re: “Haeba Esau a ka tla sehlopheng se seng a se hlasela, jwale ka sebele ho tla ba le sehlopha se setseng se tla pholoha.” 9 Ka mora moo Jakobo a re: “Modimo wa Ntate Abrahama le Modimo wa Ntate Isaka, Jehova, ya reng ho nna, ‘Kgutlela naheng ya heno le ho beng ka wena mme ke tla sebetsana hantle le wena,’ 10 ha ke tshwanelwe ke mosa ohle o lerato le botshepehi bohle boo o bo bontshitseng mohlanka wa hao, etswe ke tshetse Jordane ena ke e na le lere la ka feela mme jwale ke fetohile dihlopha tse pedi. 11 Ke a o rapela, ntopolle letsohong la moreso, letsohong la Esau, hobane ke tshaba hore o tla tla mme ka sebele a ntlhasele, Mme ha mmoho le bana. 12 Wena, o itse, ‘Ntle ho pelaelo ke tla sebetsana hantle le wena mme ke tla etsa hore peo ya hao e be jwalo ka lehlabathe la lewatle, le ke keng la balwa ka bongata. ’” 13 A nna a dula moo bosiung boo. A nkela Esau morabo mpho ho se neng se le letsohong la hae: 14 dipodi tse tshehadi tse makgolo a mabedi le diphooko tse mashome a mabedi, dinku tse tshehadi tse makgolo a mabedi le dipheleu tse mashome a mabedi, 15 dikamele tse mashome a mararo tse anyesang le manamane a tsona, dikgomo tsa dithole tse mashome a mane le dipoho tse leshome, diesele tse tshehadi tse mashome a mabedi le diesele tse hodileng ka ho feletseng tse leshome. 16 Yaba o neha bahlanka ba hae mehlape ka ho latellana mme ka ho phetapheta a re ho bahlanka ba hae: “Tshelang pele ho nna, mme le siye sebaka pakeng tsa mohlape ka mong.” 17 Ho ekelletsa moo a laela wa pele, a re: “Haeba moreso Esau a ka kopana le wena mme a o botsa, a re, ‘O wa mang, mme o ya hokae mme tsena tse ka pela hao ke tsa mang?’ 18 jwale o re, ‘Ke tsa mohlanka wa hao, Jakobo. Ke mpho, e rometsweng ho morena ka, ho Esau, mme bona! le yena o ka mora rona. ’” 19 Yaba o tswela pele ho laela le wa bobedi, le wa boraro, le bohle ba latelang mehlape, o re: “Le bue ho ya ka lentswe lena le Esau ha le teana le yena. 20 Hape le re, ‘Mohlanka wa hao Jakobo ke enwa ka mora rona. ’” Etswe o ile a ipolella ho re: “Nka bopa kgotso le yena ka mpho e nketellang pele, mme ka mora moo ke tla bona sefahleho sa hae. Mohlomong o tla nkamohela ka mosa.” 21 Ka hoo mpho ya tshela pele ho yena, empa a dula diahelong bosiung boo.
27 APRIL–3 MAY
MATLOTLO A TSWANG BIBELENG | GENESE 34-35
“Ditlamorao Tse Bohloko Tsa ho ba le Metswalle e Fosahetseng”
(Genese 34:1) Jwale Dina moradi wa Lea, eo a mo tswaletseng Jakobo, o ne a ye a tswe ho ya bona banana ba naha eo.
w97 2/1 30 ¶4
Shikeme—Motse o Phuleng
Bahlankana ba motse oo ba ne ba tla tadima morwetsana eo jwang ya neng a tjhakela motse wa ha bo bona ka mehla, eo ho bonahalang hore o ne a tsamaya a le mong? Mora wa morena o ile a “mo bona a ntano mo nka a robala le yena mme a mo beta.” Ke hobaneng ha Dina a ile a ipeha kotsing ka ho kopana le Bakanana ba boitshwaro bo ditshila? Na ke hobane a ne a ikutlwa a hloka metswalle ya banana ba lekanang le yena? Na o ne a le manganga mme a itaola jwalo ka tse ding tsa dikgaitsedi tsa hae? Bala tlaleho ya Genese, mme o leke ho utlwisisa bohloko le sekgobo tseo Jakobo le Lea ba tlamehang ba ile ba di utlwa ka lebaka la ditlamorao tse bohloko tse ileng tsa hlahela moradi wa bona Shikeme.—Genese 34:1-31; 49:5-7; hape bona Molula-Qhooa, June 15, 1985, leqepheng la 31.
(Genese 34:2) Yaba Shikeme mora wa Hamore Moheve, morenana wa naha, o a mo bona a ntano mo nka a robala le yena mme a mo beta.
“Balehelang Bohlola!”
14 Shikeme o entse ntho e neng e tlwaelehile haholo ka nako eo ho Bakanana. Ka ha o ne a rata Dina hona hoo a neng a sa tsebe taba tsa hae, o ile a “mo nka” mme “a mo beta.” (Bala Genese 34:1-4.) Sena sohle e ile yaba qaleho ya mahlomola a maholo ho Dina le lelapa lohle labo.—Genese 34:7, 25-31; Bagalata 6:7, 8.
(Genese 34:7) Bara ba Jakobo ba kgutla naheng hang ha ba utlwa ka hona; mme banna bana ba utlwa bohloko mme ba halefa haholo, hobane a entse bowatla bo nyedisehang kgahlanong le Iseraele ka ho robala le moradi wa Jakobo, athe ha hwa tshwanela hore ho etswe ntho e jwalo.
(Genese 34:25) Le ha ho le jwalo, eitse ka letsatsi la boraro, ha ba opelwa, bara ba babedi ba Jakobo, Simeone le Levi, dikgaitsedi tsa Dina, ba nka e mong le e mong sabole ya hae ba ya motseng ba sa belaellwe mme ba bolaya e mong le e mong e motona.
w09 9/1 21 ¶1-2
Haeba o Utlwisitswe Bohloko
Hangata batho ba iphetetsa e le hore feela ba ntshe bohloko boo ba bo utlwileng. Ka mohlala, Bibele e re bolella hore ha bara ba mopatriareka wa Moheberu, Jakobo, ba utlwa hore Shikeme wa Mokanana o betile kgaitsedi ya bona Dina, ba ile ba “utlwa bohloko mme ba halefa haholo.” (Genese 34:1-7) Bara ba babedi ba Jakobo ba ile ba lohela Shikeme le ba ntlo ya hae leano e le hore ba iphetetse ka kgaitsedi ya bona. Simeone le Levi ba ile ba loha leqheka le ileng la etsa hore ba kgone ho kena motseng wa Kanana mme ba bolaye monna e mong le e mong, ho akarelletsa le yena Shikeme.—Genese 34:13-27.
Na ditaba di ile tsa loka ka mora hore ba tsholle madi? Ha Jakobo a utlwa ka se entsweng ke bara bao ba hae, o ile a ba kgalemela a re: “Le ntliseditse kgathatso ka ho nketsa seputa ho baahi ba naha, . . . ka sebele ba tla mpokanela ba ntlhasele mme ke tla fediswa, nna le ba ntlo ya ka.” (Genese 34:30) Ho e na le hore dintho di loke, ho iphetetsa ha bona ho ile ha senya ditaba le ho feta; jwale lelapa la Jakobo le ne le tla lokela ho dula le itebetse e le hore le se hlaselwe ke baahisani ba halefileng. Mohlomong e le ho qoba hore lelapa la Jakobo le hlaselwe, Modimo o ile a mo laela hore a tlohe le lelapa la hae sebakeng seo mme ba ye Bethele.—Genese 35: 1, 5.
Batlisisa Matlotlo a Patilweng
(Genese 35:8) Ha morao Debora mosadi ya hlokomelang Rebeka a shwa mme a patwa mosikong wa Bethele tlasa sefate sa setonanahadi. Ka hoo a se reha lebitso la Alone-bakuthe.
it-1-E 600 ¶4
Debora
1. E ne e le mohlokomedi wa Rebeka. Debora o ile a tsamaya le Rebeka, ha Rebeka a tloha ntlong ya ntate wa hae Bethuele a e ya Palestina ho ya nyalana le Isaka. (Ge 24:59) Ka mora ho sebeletsa Isaka ka dilemo tse ngata, ho ka etsahala hore Debora o ile a ba karolo ya lelapa la Jakobo ka mora hore Rebeka a hlokahale. Ka mora dilemo tse ka bang 125 Rebeka a nyalane le Isaka, Debora o ile a hlokahala mme a patwa tlasa sefate se seholo se Bethele. Lebitso le ileng la rehuwa sefate le bontsha ka moo Debora a neng a ratwa ke Jakobo le lelapa la hae.—Ge 35:8.
(Genese 35:22-26) Eitse ha Iseraele a sa ntse a dutse ka nakwana naheng eo ka lekgetlo le leng Rubene a ya mme a robala le Bilha serethe sa ntatae, yaba Iseraele o utlwa ka hona. Ka hoo bara ba Jakobo ba ne ba le leshome le metso e mmedi. 23 Bara ba Lea e ne e le Rubene letsibolo la Jakobo le Simeone le Levi le Juda le Isakare le Zabulone. 24 Bara ba Ragele e ne e le Josefa le Benjamine. 25 Bara ba Bilha, lekgabunyane la Ragele, e ne e le Dane le Nefthali. 26 Bara ba Zilpa, lekgabunyane la Lea, e ne e le Gade le Ashere. Bana ke bara ba Jakobo bao a ba tswaletsweng Padane-arame.
Dipotso Tse Tswang Ho Babadi
Iseraeleng ya boholoholo, na motho o ne a lokela ho ba letsibolo hore e be e mong wa leloko leo Mesia a tla hlaha ho lona?
Nakong e fetileng dingolwa tsa rona di ne di bua jwalo. Ho ne ho bonahala eka di dumellana le se ngotsweng ho Baheberu 12:16. Temana eo e re Esau o ne a ‘sa ananele dintho tse halalelang’ mme o ile “a fana ka ditokelo tsa hae jwalo ka letsibolo [ho Jakobo] e le phapanyetsano bakeng sa sejo se le seng.” Ho ne ho bonahala eka ha Jakobo a fumana ‘ditokelo tsa ho ba letsibolo,’ o ile a ba karolo ya leloko leo Mesia a neng a tla hlaha ho lona.—Mat. 1:2, 16; Luka 3:23, 34.
Empa ditlaleho tsa Bibele di bontsha hore ho ne ho sa hlokahale hore motho e be letsibolo hore e be karolo ya leloko la Mesia. A re hlahlobeng tse ding tsa ditlaleho tseo:
Hara bara bao Lea a ileng a ba tswalla Jakobo (kapa Israele), Rubene e ne e le yena letsibolo. Athe ho Ragele, letsibolo e ne e le Josefa. Empa eitse ha Rubene a etsa boitshwaro bo bobe, tokelo ya letsibolo e ile ya fetisetswa ho Josefa. (Gen. 29:31-35; 30:22-25; 35:22-26; 49:22-26; 1 Likron. 5:1, 2) Ho ntse ho le jwalo, Rubene le Josefa ha e ya ka ya ba karolo ya leloko la Mesia. Empa e ile ya ba mora wa bone wa Lea e leng Juda, ya ileng a ba karolo ya leloko leo Mesia a neng a tla hlaha ho lona.—Gen. 49:10.
Mmalo wa Bibele
(Genese 34:1-19) Jwale Dina moradi wa Lea, eo a mo tswaletseng Jakobo, o ne a ye a tswe ho ya bona banana ba naha eo. 2 Yaba Shikeme mora wa Hamore Moheve, morenana wa naha, o a mo bona a ntano mo nka a robala le yena mme a mo beta. 3 Moya wa hae wa qala ho kgomarela Dina moradi wa Jakobo, a qala ho rata morwetsana eo mme a nna a bua le morwetsana ka mokgwa o susumetsang. 4 Qetellong Shikeme a re ho ntatae Hamore: “Mphumanele mofumahatsana enwa hore e be mosadi wa ka.” 5 Yaba Jakobo o a utlwa hore o silafaditse moradi wa hae Dina. Bara ba hae ba ne ba le naheng le mohlape wa hae; Jakobo a kgutsa ho fihlela ba kena. 6 Ha morao Hamore, ntata Shikeme, a ya ho Jakobo ho ya bua le yena. 7 Bara ba Jakobo ba kgutla naheng hang ha ba utlwa ka hona; mme banna bana ba utlwa bohloko mme ba halefa haholo, hobane a entse bowatla bo nyedisehang kgahlanong le Iseraele ka ho robala le moradi wa Jakobo, athe ha ho a tshwanela hore ho etswe ntho e jwalo. 8 Hamore a bua le bona, a re: “Ha e le mora wa ka Shikeme, moya wa hae o kgomaretse moradi wa lona. Ka kopo, mo feng yena hore e be mosadi wa hae, 9 mme le etse selekane sa lenyalo le rona. Le re fe baradi ba lona, mme le tla inkela baradi ba rona. 10 Le tla dula le rona, mme le tla fuwa naha. Dulang le hwebe ho yona mme le ahe ho yona.” 11 Jwale Shikeme a re ho ntata Dina le ho dikgaitsedi tsa hae: “A nke ke fumane kamohelo mahlong a lona, mme ke tla fana ka eng kapa eng eo le tla mpolella yona. 12 Nyollang tjhelete ya bohadi haholo le mpho e batlwang ho nna, mme ke itokiseditse ho fana ho ya ka seo le tla mpolella sona; feela le mphe morwetsana enwa hore e be mosadi wa ka.” 13 Bara ba Jakobo ba qala ho araba Shikeme le ntatae Hamore ka thetso le ho bua jwalo hobane a silafaditse kgaitsedi ya bona Dina. 14 Yaba ba tswela pele ho re ho bona: “Re ke ke ra etsa ntho e jwalo, ho fana ka kgaitsedi ya rona ho monna ya nang le ntlha ya letlalo la setho sa botona, hobane hona ke nyediso ho rona. 15 Ke feela ka tumellano ena re ka dumelang, hore le be jwalo ka rona, ka hore e mong le e mong e motona ho lona a bolle. 16 Jwale ka sebele re tla le fa baradi ba rona, mme re tla inkela baradi ba lona, mme re tla dula le lona re fetohe setjhaba se le seng. 17 Empa haeba le sa re mamele hore le bolle, jwale re tla nka moradi wa rona re tsamaye.” 18 Mantswe a bona a bonahala a le molemo mahlong a Hamore le mahlong a Shikeme, mora wa Hamore, 19 mme mohlankana ha a a ka a dieha ho etsa ho ya ka tumellano, hobane a kgahlilwe ke moradi wa Jakobo mme mohlankana e ne e le ya hlomphehang ka ho fetisisa ho bohle ba ntlo ya ntatae.