RE KA ETSANG HORE RE HLOLE LEHLOYO?
2 | O Se Ke Wa Iphetetsa
Seo Bibele e se Rutang:
“Ho se ke ha eba le eo le busetsang bobe ka bobe ho yena. . . . Haeba ho kgoneha, ho fihlela moo ho itshetlehileng ka lona, le be le kgotso le batho bohle. Le se ke la iphetetsa, . . . Ka ha ho ngodilwe: ‘“Phetetso ke ya ka; ke tla buseletsa, ho bolela Jehova.’”—BAROMA 12:17-19.
Seo Temana Ena e se Bolelang:
Ha motho a re utlwisa bohloko, ho tlwaelehile hore re kwate empa Modimo ha a batle hore re iphethetse. Ho ena le hoo, o batla hore re be le mamello hobane o tshepisa hore haufinyane o tla fedisa batho ba kgopo.—Pesaleme ya 37:7, 10.
Seo o ka se Etsang:
Ha batho ba baetsadibe ba iphetetsa, seo se etsa hore ba hloyane le ho feta. Ka hoo, ha motho a o utlwisa bohloko, o se ke wa iphetetsa. Leka ho laola maikutlo a hao mme o bue ka bonolo. Maemong a mang ho ka ba molemo hore o lebale ka se etsahetseng. (Liproverbia 19:11) Ka dinako tse ding ho ka hlokahala hore o tlalehe bothata. Ka mohlala, haeba o le lehlatsipa la tlolo ya molao, o ka kgetha ho tlaleha tlolo eo ya molao mapoleseng.
Ho iphetetsa ha ho re tswele molemo
O ka etsang haeba ho se na tsela e ka rarollang bothata boo ka kgotso? O tla etsang haeba o lekile sohle seo o ka se kgonang ho bo rarolla ka kgotso? O se ke wa iphetetsa hobane ha o etsa jwalo maemo a ka mpefala. O tla kgona ho hlola lehloyo haeba o sa iphethetse. Tshepa tsela eo Modimo a reng re rarolle bothata ka yona. “O itshetlehe ka yena, mme o tla nka bohato.”—Pesaleme ya 37:3-5.