RE KA ETSANG HORE RE HLOLE LEHLOYO?
4 | Modimo A Ka O Thusa Hore O Hlole Lehloyo
Seo Bibele e se Rutang:
“Ditholwana tsa moya ke lerato, thabo, kgotso, tiisetso, mosa, molemo, tumelo, bonolo, boitshwaro.”—BAGALATA 5:22, 23.
Seo Temana Ena e se Bolelang:
Re ka kgona ho hlola lehloyo ka thuso ya Modimo. Moya wa hae o halalelang o ka re thusa hore re be le makgabane ao re ke keng ra kgona ho ba le ona ka borona. Ho ena le ho leka ho hlola lehloyo ka matla a rona, ho molemo hore re kope thuso ya Modimo. Haeba re etsa jwalo, re tla ikutlwa ka tsela eo moapostola Pauluse a neng a ikutlwa ka yona. O ile a re: “Bakeng sa dintho tsohle ke na le matla ka lebaka la ya mphang bonatla.” (Bafilipi 4:13) Le rona re ka kgona hore re re: “Thuso ya ka e tswa ho Jehova.”—Pesaleme ya 121:2.
Seo o ka se Etsang:
“Jehova o fetotse bophelo ba ka, ha ke sa le motho ya mabifi empa ke se ke le motho wa kgotso.”—WALDO
Rapela Jehova ka tiyo mme o mo kope moya wa hae o halalelang. (Luka 11:13) Kopa hore a o thuse ho ba le makgabane a tshwanang le a hae. Ithute seo Bibele e se rutang ka makgabane a ka re thusang hore re se ke ra ba le lehloyo, a kang lerato, kgotso, tiisetso le boitshwaro. Leka ho bonahatsa makgabane ana bophelong ba hao. Eba motswalle wa batho ba lekang hore ba be le makgabane ana. Metswalle e jwalo e tla “[o] susumelletsa leratong le mesebetsing e metle.”—Baheberu 10:24.