“Ke Ipiletsa ho Sesare”

1, 2. (a) Pauluse o boemong bofe? (b) Ho ipiletsa ha Pauluse ho Sesare ho hlahisa potso efe?

PAULUSE o sa ntse a lebetswe ka thata Sesarea. Dilemo tse pedi pele ho moo ha a kgutlela Judea, ka mora matsatsi a seng makae feela Bajuda ba ile ba leka ka makgetlo a ka bang mararo hore ba mo bolaye. (Dik. 21:​27-36; 23:​10, 12-15, 27) Ho fihlela jwale, dira tsa hae di hlolehile empa ha di tele. Ha Pauluse a hlokomela hore o sa ntse a ka wela diatleng tsa bona, o re ho Mmusisi wa Moroma Festase: “Ke ipiletsa ho Sesare.”​—Dik. 25:11.

² Na Jehova o ile a tshehetsa qeto ya Pauluse ya ho ipiletsa ho moemphera eo wa Roma? Ke habohlokwa hore re tsebe karabo ya potso ena, ka ha re fana ka bopaki bo hlakileng ka mmuso wa modimo mehleng ena ya bofelo. Re tlameha ho tseba hore na re lokela ho latela mohlala wa Pauluse ha re “sebedisa molao ho fumana tokelo ya ho bolela ditaba tse monate.”​—Bafil. 1:7.

“Ke Eme ka Pela Setulo sa Kahlolo” (Diketso 25:​1-12)

3, 4. (a) Ke hobaneng ha Bajuda ba ile ba kopa hore Pauluse a tliswe Jerusalema mme o ile a phonyoha lefu jwang? (b) Jehova o tshehetsa bahlanka ba hae jwang kajeno, jwalo ka ha a ile a tshehetsa Pauluse?

³ Matsatsi a mararo ka mora hore Festase mmusisi e motjha wa Moroma wa Judea a qale ho busa, o ile a ya Jerusalema.a Ha a le moo o ile a mamela ha baprista ba ka sehloohong le banna ba ka sehloohong ba Bajuda, ba qosa Pauluse ka hore o entse tlolo e mpe ya molao. Ba ne ba tseba hore mmusisi eo e motjha o tlamehile hore a bope kgotso le bona hammoho le Bajuda kaofela. Yaba ba kopa hore Festase a ba etsetse mosa, ba re: Tlisa Pauluse Jerusalema mme nyewe ya hae e tshwarelwe teng. Le ha ho le jwalo, ba ne ba rerile bolotsana. Dira tseo di ne di entse mmommori wa ho bolaya Pauluse ha a tloha Sesarea a eya Jerusalema. Festase o ile a hana a re: “Ereng baetapele ba lona ba tsamaye le nna ba yo mo qosa haeba ehlile ho ena le ntho e phoso eo a e entseng.” (Dik. 25:5) Ka lebaka leo, le lekgetlong lena Pauluse o ile a phonyoha lefu.

⁴ Jehova o ile a sebedisa Jesu Kreste ho matlafatsa Pauluse ditekong tsohle tsa hae. Hopola hore Jesu o ile a re ho Pauluse ponong: “Eba sebete.” (Dik. 23:​11) Kajeno bahlanka ba Modimo ba tobana le mathata le mahloriso. Jehova ha a etse hore mathata ohle a re pote ka thoko empa o re fa bohlale le matla a ho a mamella. Re ka kgodiseha hore Modimo wa rona ya lerato o tla re fa “matla a sa tlwaelehang” ha re a hloka.​—2 Bakor. 4:7.

5. Festase o ile a sebetsa nyewe ya Pauluse jwang?

⁵ Matsatsi a seng makae ha morao, Festase o ile “a dula setulong sa kahlolo” Sesarea.b Pauluse le baqosi ba hae ba ne ba eme ka pela Festase. Pauluse o ile a araba diqoso tsa bona tse sa utlwahaleng ka ho re: “Ha ke a tlola Molao wa Bajuda kapa wa tempele ebile ha ke a sitelwa Sesare.” Pauluse o ne a se na molato mme o ne a lokela ho lokollwa. Festase o ne a tla etsa qeto efe? Ka ha o ne a batla ho iqekisetsa ho Bajuda, o ile a botsa Pauluse a re: “Na o batla ho ya Jerusalema o yo ahlolelwa dintho tsee o le hona teng?” (Dik. 25:​6-9) Potso ena e ne e sa utlwahale e le ka nnete. Ha Pauluse a ne a ka iswa Jerusalema, o ne a tla ahlolwa ke batho ba mo qosang mme ho ne ho tla be ho fedile ka yena. Lekgetlong lena, Festase o ne a batla ho ipeha ka botleng dipolotiking ho ena le ho sebedisa toka. Mmusisi wa pele ho yena e leng Ponse Pilato, o ile a etsa se tshwanang nyeweng ya Jesu. (Joh. 19:​12-16) Baahlodi ba kajeno le bona ba ka nna ba etsa diqeto tse hlokang toka e le ho iqekisetsa ho batho ba itseng. Ka lebaka leo, ha re a lokela ho makala ha makgotla a etsa diqeto tse hlokang toka dinyeweng tsa batho ba Modimo.

6, 7. Ke hobaneng ha Pauluse a ile a ipiletsa ho Sesare, hona o behetse Bakreste ba nnete mohlala ofe kajeno?

⁶ Festase o batlile a beha bophelo ba Pauluse kotsing hobane feela a batla ho iqekisetsa ho Bajuda. Ka hoo, Pauluse o ile a sebedisa tokelo ya hae e le moahi wa Roma. O ile a re ho Festase: “Ke eme ka pela setulo sa kahlolo sa Sesare moo ke tshwanelang ho ahlolelwa teng. Le wena o a bona hore ha ke a fosetsa Bajuda. . . . Ke ipiletsa ho Sesare.” Hangata ha motho a itse o ipiletsa ho Sesare, ho ne ho se motho ya ka mo hanelang. Festase o ile a totobatsa ntlha ena a re: “Ka ha o ipileditse ho Sesare, o tla ya ho Sesare.” (Dik. 25:​10-12) Pauluse o behetse Bakreste ba nnete kajeno mohlala ka ho ipiletsa ho ba nang le matla a phahameng molaong. Ha bahanyetsi ba leka ho “baka mathata ka ho loha mano, ba etsa eka ba latela molao,” Dipaki Tsa Jehova di sebedisa molao ho sireletsa ditaba tse monate.c​—Pes. 94:20.

⁷ Ka lebaka leo, ka mora hore Pauluse a tshwarwe dilemo tse fetang tse pedi bakeng sa ditlolo tseo a sa di etsang, o ile a fuwa monyetla wa hore a ipuelle Roma. Le ha ho le jwalo, ho na le mmusi ya neng a batla ho mo bona pele a tsamaya.

“Ke Ile ka Mamela Ditaelo” (Diketso 25:​13–26:23)

8, 9. Ke hobaneng ha Morena Agripa a ile a etela Sesarea?

⁸ Matsatsi a seng makae ka mora hore Festase a mamele boipiletso ba Pauluse ho Sesare, Morena Agripa le kgaitsedi ya hae Bernise ba ile ba nka leeto “ho tla dumedisa” mmusisi eo e motjha.d Mehleng ya puso ya Roma, ho ne ho tlwaelehile hore bahlanka ba mmuso ba etele babusisi ba sa tswa kgethwa. Ha ho pelaelo hore ha Agripa a thoholetsa Festase ka ho kgethwa ha hae, o ne a leka ho tiisa maqhama le yena, a ipulela dikgoro.​—Dik. 25:13.

⁹ Festase o ile a bolella Morena Agripa ka Pauluse mme morena a re a ka thabela ho utlwa seo Pauluse a se buang. Letsatsing le hlahlamang babusi bao ba babedi ba ile ba dula setulong sa kahlolo. Empa makoko le matla a bona e le babusi ha a ka a ipiletsa ho feta mantswe ao motshwaruwa ya ka pela bona a neng a tla tloha a a bua.​—Dik. 25:​22-27.

10, 11. Pauluse o ile a bontsha jwang hore o hlompha Agripa, hona Pauluse o ile a mo hlalosetsa dintlha dife tse amanang le bophelo ba hae ba nakong e fetileng?

¹⁰ Ka tlhompho Pauluse o ile a leboha Morena Agripa ka monyetla wa ho ipuella ka pela hae. O ile a re morena ke setsebi sa meetlo le dikgang tsohle tsa Bajuda. Yaba Pauluse o hlalosa bophelo ba hae ba nakong e fetileng. O ile a re: “Ke ne ke le hara lequlwana la Bafarisi e leng lequlwana le phethang Melao ya lona ka botlalo ho feta Bajuda ba bang.” (Dik. 26:5) Ka ha Pauluse e ne e le Mofarisi, o ne a ena le tshepo ya hore Mesia o tla tla. Ha e se e le Mokreste, ka sebete o ile a tsebahatsa hore Jesu Kreste ke yena eo e neng e le kgale a lebeletswe. Ka hoo baqosi ba Pauluse ba ne ba dumela hore Mesia o tla tla empa ba ile ba mo qosetsa ho paka ka hore Mesia eo ya neng a tla tla e ne e le Jesu. Sena se ile sa etsa hore Agripa a labalabele haholwanyane ho utlwa seo Pauluse a se buang.e

¹¹ Ha Pauluse a hopola ka moo a neng a sotla Bakreste ka teng, o ile a re: “Le nna ke ne ke nahana hore ho nepahetse ho lwantsha mang kapa mang ya rutang ka lebitso la Jesu wa Monazaretha. . . . Ke ne ke ba halefetse hoo ke neng ke ba hlorisa le metseng e meng.” (Dik. 26:​9-11) Pauluse o ne a sa feteletse ditaba. Batho ba bangata ba ne ba tseba ka moo a ileng a sotla Bakreste ka teng. (Bagal. 1:​13, 23) E ka nna yaba Agripa o ne a ipotsa hore na motho ya jwalo o fetotswe ke eng.

12, 13. (a) Pauluse o hlalositse ho sokoloha ha hae jwang? (b) Pauluse o ne a ntse a “raha ditsenene” jwang?

¹² Agripa o ile a fumana karabo ha Pauluse a tswela pele a re: “Ke ne ke eya Damaseka ke fuwe matla le taelo ya ho etsa jwalo ke baprista ba baholo. Jwale Morena, hara mpa ya motshehare ha ke le tseleng, ka bona kganya e fetang ya letsatsi e tswang lehodimong e mpotoloha le batho bao ke neng ke tsamaya le bona. Ra wela fatshe kaofela yaba ke utlwa lentswe le re ho nna ka puo ya Seheberu: ‘Saule, Saule, ekaba o ntlhorisetsang? O ithatafaletsa bophelo ka ho ntwantsha.’ Ka re: ‘O mang Morena?’ Yaba o re: ‘Ke nna Jesu eo o mo hlorisang.’ ”f​—Dik. 26:​12-15.

¹³ Pele Pauluse a bona pono ena ya mohlolo, ka tsela ya tshwantshetso o ne a ntse a “raha ditsenene.” Jwalo ka ha pelesa e ne e ka intsha kotsi ka ho raha tsenene, Pauluse o ne a senya kamano ya hae le Modimo ha a ne a sitisa thato ya Modimo hore e phethahale. Ka mora hore Jesu a tsoswe bafung, o ile a hlaha ho Pauluse tseleng e yang Damaseka. Sena se ile sa etsa hore monna enwa ya pelo e ntle, ya mpang a sa tsebe seo a se etsang, a fetole maikutlo a hae.​—Joh. 16:​1, 2.

14, 15. Pauluse o ile a reng mabapi le diphetoho tseo a ileng a di etsa bophelong ba hae?

¹⁴ Ruri Pauluse o ile a fetola bophelo ba hae haholo. Ha a bua le Agripa o ile a re: “Ke ile ka mamela ditaelo tseo Jesu a mphileng tsona ha a hlaha ho nna a le lehodimong. Ke ile ka qala Damaseka, ha ke tloha ka ya Jerusalema yaba ke tsamaya hohle Judea ka ba ka fihla le ho batho ba ditjhaba, ke ntse ke bolella batho hore ba bake le ho sebeletsa Modimo mme ba bontshe ka diketso hore ba bakile.” (Dik. 26:​19, 20) Ka dilemo tse ngata, Pauluse o ne a ntse a phetha mosebetsi oo Jesu Kreste a mo fileng wona ponong eo ya hara motshehare. Diphello e ile ya eba dife? Ba ileng ba amohela ditaba tse monate tse bolelwang ke Pauluse, ba ile ba bakela boitshwaro ba bona bo bobe ba ho se tshepahale mme ba sokolohela ho Modimo. E ile ya eba baahi ba molemo, ba bolokang molao le ba laolehileng.

¹⁵ Le ha ho le jwalo Bajuda ba neng ba hanyetsa Pauluse, ba ne ba se na taba le melemo eo. Pauluse o ile a re: “Ke yona ntho e entseng hore Bajuda ba ntshware ka tempeleng ba be ba leke ho mpolaya. Empa Modimo o nthusitse hore ebe ho fihlela kajeno ke ntse ke bolella batho ba maemo a tlase le a hodimo.”​—Dik. 26:​21, 22.

16. Re ka etsisa Pauluse jwang ha re hlalosetsa baahlodi le babusi seo re se dumelang?

¹⁶ Ka ha re Bakreste ba nnete, re tlameha hore re “dule [re] itokiseditse ho ikarabella” bakeng sa tumelo ya rona. (1 Pet. 3:​15) Ha re bolella baahlodi le babusi seo re se dumelang, ho ka nna ha eba molemo ho latela mokgwa oo Pauluse a ileng a o sebedisa ha a bua le Agripa le Festase. Ha re hlalosetsa balaodi ba phahameng ka tlhompho hore na dinnete tsa Bibele di ntlafaditse bophelo ba rona jwang hammoho le ba batho ba bang ba amohelang molaetsa wa rona, re ka nna ra etsa hore ba fetole maikutlo a bona.

“O ka Ntshusumeletsa ho ba Mokreste” (Diketso 26:​24-32)

17. Festase o ile a reng ha Pauluse a ipuella, hona batho ba etsa se tshwanang jwang kajeno?

¹⁷ Ha babusi bao ba babedi ba ntse ba mametse bopaki bo matla ba Pauluse, ba ile ba sitwa ho iphapanyetsa bona. Hlokomela se ileng sa etsahala: “Ha Pauluse a ntse a ipuella, Festase a phahamisa lentswe a re: ‘O a hlanya Pauluse! Thuto ena e ngata ya o hlantsha!’ ” (Dik. 26:​24) Festase o ile a halefa ka tsela eo batho ba halefang ka yona kajeno. Batho ba bangata ba nka hore ba rutang seo Bibele e hlileng e se buang ba tjheseha ka ho feteletseng. Hangata bahlalefi ba lefatshe lena ha ba dumele seo Bibele e se rutang mabapi le tsoho ya bafu.

18. Pauluse o ile a reng ha a araba Festase mme seo se ile sa etsa hore Agripa a reng?

¹⁸ Empa Pauluse o ile a araba mmusisi eo a re: “Ha ke hlanye Mohlomphehi ya Kgabane Festase, ke bua nnete ebile ke bua ditaba tse nang le kelello. Le yena morena o di tseba hantle ditaba tsena mme ke mo bolella tsona ke sa tshabe letho . . . Morena Agripa, na o dumela Baprofeta? Ke a tseba hore o a ba dumela.” Agripa a araba a re: “Dipuo tsa hao di matla hoo o neng o ka ntshusumeletsa ho ba Mokreste ka nako e kgutshwanyane.” (Dik. 26:​25-28) Ho sa tsotellehe hore na morena o ne a bua mantswe ana a tiile kapa tjhe, a bontsha hore bopaki boo Pauluse a ileng a fana ka bona bo ile ba mo ama pelo haholo.

19. Festase le Agripa ba ile ba etsa qeto efe mabapi le Pauluse?

¹⁹ Ka mora moo Agripa le Festase ba ema, yaba ba bontsha letshwele hore nyewe e fedile. “Yare ha ba tloha ba buisana ba re: ‘Motho enwa ha a etsa letho le tshwanelwang ke lefu kapa teronko.’ Agripa a re ho Festase: ‘Hoja monna enwa ha a ipiletsa ho Sesare, a ka be a lokolotswe.’” (Dik. 26:​31, 32) Ba ne ba tseba hore monna ya neng a eme ka pela bona ha a na molato. Mohlomong ba ne ba se ba tla ba le maikutlo a matle ka Bakreste.

20. Diphello e bile dife ha Pauluse a pakela balaodi ba phahameng?

²⁰ Ha ho bonahale eka le ya mong wa babusi bana ba hlaheletseng o ile a amohela ditaba tse monate tsa Mmuso wa Modimo. Na e ne e le bohlale hore moapostola Pauluse a hlahe ka pela banna bao? Ho jwalo. Hore ebe Pauluse o ile a “iswa ka pela babusisi le marena” Judea, ho ile ha etsa hore a pakele babusi ba Roma bao ho neng ho ka nna ha eba thata ho ba pakela ka nako eo. (Luka 21:​12, 13) Hape, botshepehi ba hae le se ileng sa mo hlahela ha a lekwa se ile sa matlafatsa tumelo ya bara le baradi babo.​—Bafil. 1:​12-14.

21. Haeba re tswelapele ho bolela ditaba tse monate, re tla fumana ditlhohonolofatso dife?

²¹ Ho a tshwana le kajeno. Haeba re tswelapele ho bolela ditaba tse monate ho sa tsotellehe diteko le kganyetso, re tla fumana ditlhohonolofatso tse ngata. Re ka nna ra fumana monyetla wa ho pakela balaodi bao ho neng ho ka ba thata ho ba pakela. Ha re mamella ka botshepehi re ka kgothatsa bara le baradi babo rona ba Bakreste, ra ba susumelletsa hore ba be sebete haholwanyane mosebetsing ona wa ho fana ka bopaki bo hlakileng ka Mmuso wa Modimo.