Pauluse o Iswa Roma

Ha Pauluse a fihla Jerusalema, o ile a tshwarwa mme a lahlelwa teronkong. Leeto la hae la boraro la ho ruta batho ditaba tse monate le ile la fella moo. Jesu a hlaha ho yena torong, a re: ‘O tla ya Roma o yo ruta batho moo.’ Pauluse o ile a tloswa Jerusalema a iswa Sesarea, moo a qetileng dilemo tse pedi teronkong. Ha a le ka pela Mmusisi Festase, Pauluse o ile a kopa ho ahlolwa ke Sesare, Roma. Festase a re: “O ipileditse ho Sesare, o tla ya ho Sesare.” Pauluse a iswa Roma ka sekepe mme a tsamaya le badumedimmoho le yena ba bitswang Luka le Aristakase.

Ha ba ntse ba tsamaya ka sekepe, lewatle le ile la befa hoo ba neng ba bona hantle hore ba tlo shwa. Empa Pauluse a bolella banna ba ka sekepeng hore lengeloi le itse ho yena a se ke a tshoha, ba tla fihla Roma ba ntse ba phela.

Lewatle le ile la befa ka matsatsi a 14 ho fihlela ba bona sehlekehleke sa Malta. Sekepe se ile sa kgitla fatshe mme sa robeha dikotwana. Empa banna bohle ba 276 ba neng ba le ka sekepeng ba pholoha. Ba bang ba ile ba sesa ha ba bang ba itshwarella ka dikotwana tsa sekepe ho ya lebopong. Baahi ba Malta ba ile ba ba hlokomela mme ba ba besetsa mollo hore ba futhumale.

Ka mora dikgwedi tse tharo, masole a palamisa Pauluse sekepeng se yang Roma. Ha a fihla, badumedimmoho le yena ba ile ba mo kgahlanyetsa. Eitse ha a ba bona, Pauluse a leboha Jehova mme a matlafala. Le hoja Pauluse a ne a tshwerwe, o ne a dumelletswe ho dula ntlong e katilweng ke lesole. O ile a dula moo dilemo tse pedi. Ha batho ba tlo mo bona, o ne a ba ruta ka Mmuso wa Modimo le ka Jesu. Pauluse o ile a ngolla diphutheho tsa Asia Minor le Judea mangolo. Ka nnete Jehova o ile a sebedisa Pauluse hore a rute batho ditaba tse monate ditjhabeng tsohle.