Kotlo ya Leshome

Moshe o ile a tshepisa Faro hore a ke ke a hlola a tla ho yena. Empa pele a tsamaya a re ho Faro: ‘Bosiung bona matsibolo ohle a Baegepeta a tla shwa, ho akarelletsa le mora wa hao.’

Jehova o ile a bolella Baiseraele hore na ba je eng ka ho kgetheha letsatsing leo. A re ho bona: ‘Hlabang nku e nang le selemo kapa podi mme le tlotse dikosene tsa lona ka madi a yona. Le bese nama ya yona mme le e je ka bohobe bo se nang tomoso. Le itokisetse ho tsamaya. Bosiung bona ke tlo le lokolla.’ O ka inahanela hore na Baiseraele ba ne ba thabile hakaakang ha ba utlwa seo.

Bosiung bona boo, lengeloi la Jehova la ya matlong ohle a Baegepeta. Bana bohle ba matsibolo ba ka matlong ao dikosene tsa wona di sa tlotswang ka madi ba shwa. Empa lengeloi la feta matlong ao dikosene tsa wona di neng di tlotsitswe ka madi. Malapa ohle a Baegepeta a shwellwa ke bana ba matsibolo. Empa ba Baiseraele bona ha ba a ka ba shwa.

Mora wa Faro le yena o ile a shwa. Faro a utlwa bohloko haholo. Yaba hanghang o bitsa Moshe le Arone o re ho bona: ‘Tsamayang. Tswang mona. Tsamayang le yo sebeletsa Modimo wa lona. Nkang diphoofolo tsa lona le tsamaye!’

Baiseraele ba tloha Egepeta e le bosiu kgwedi e kgantshitse. E ne e le banna ba 600 000, basadi le bana ba bangata. Batho ba bang ba bangata ba tsamaya le bona hobane ba batla ho sebeletsa Jehova. Qetellong Baiseraele ba ne ba lokolohile.

E le hore ba ikgopotse ka moo Jehova a ileng a ba pholosa ka teng, selemo le selemo ba ne ba lokela ho ja dijo tseo ba di jeleng bosiung boo Jehova a ba pholositseng ka bona. Ketsahalo eo e ne e bitswa Paseka.