Jesu o Tsamaya Hodima Metsi

Ha se feela hore Jesu o ne a kgona ho fodisa batho ba kulang le ho tsosa bafu empa o ne a kgona le ho laola difefo le pula. Ha Jesu a qeta ho rapela thabeng, o ile a sheba tlase Lewatleng la Galilea a bona sefefo. Baapostola ba hae ba ne ba le ka sekepeng mme maqhubu a matla a se isa kwana le kwana. Jesu o ile a theoha a tla lewatleng mme a qala ho tsamaya hodima metsi a ya sekepeng sa barutuwa ba hae. Ha ba bona motho a tsamaya hodima metsi, ba ile ba tshoha haholo. Empa Jesu a re ho bona: “Le se ke la tshoha, ke nna.”

Petrose a re: ‘Morena, haeba ka nnete ke wena, ere ke tle ho wena ke tsamaya hodima metsi.’ Jesu a re ho Petrose: ‘Tloo.’ Hara sefefo seo, Petrose o ile a tswa ka sekepeng mme a qala ho tsamaya hodima metsi a lebile ho Jesu. Empa eitse ha a ntse a atamela ho Jesu, Petrose a sheba sefefo yaba o a tshoha mme o qala ho teba. Petrose a hweletsa: “Morena, mpholose!” Jesu a otlolla letsoho a mo tshwara mme a re ho yena: “Tumelo ya hao e fokola hakaakang! Ke hobaneng ha o ile wa belaela?”

Jesu le Petrose ba kena ka sekepeng mme kapelepele sefefo sa thola. O nahana hore baapostola ba ne ba ikutlwa jwang? Ba ile ba re ho Jesu: “Ka nnete o Mora Modimo.”

Lena e ne e se lekgetlo la pele Jesu a laola boemo ba lehodimo. Ka lekgetlo le leng, o ne a tsamaya ka sekepe lewatleng le baapostola ba hae yaba Jesu o ya karolong e ka morao ya sekepe o a robala. Ha a ntse a kgalehile, ho ile ha e ba le sefefo se matla haholo. Maqhubu a lewatle a ne a otla sekepe mme metsi a qala ho kena ka hare. Baapostola ba tsosa Jesu, ba hweletsa ba re: ‘Mosuwe, re a shwa! Re thuse!’ Jesu a tsoha mme a bua le lewatle a re: “Kgutsa!” Ka yona nako eo, lewatle le sefefo tsa thola tu! Jesu a botsa baapostola a re: “Ke hobaneng ha le se na tumelo?” Ba qala ho buisana ba le bang ba re: “Esita le sefefo le lewatle di a mo mamela.” Baapostola ba ile ba ithuta hore haeba ba ne ba tshepile Jesu, ba ne ba sa lokela ho tshaba.