Dijo Tsa Shwalane Tsa Morena

Bajuda ba ne ba keteka Paseka selemo se seng le se seng ka la 14 Nisane. E ne e le hore ba hopole ka moo Jehova a ileng a ba thusa hore ba tswe bokgobeng ba Egepeta mme a ba isa Lefatsheng le Tshepisitsweng. Ka selemo sa 33 mehleng ya Kreste, Jesu le barutuwa ba hae ba ile ba keteka Paseka Jerusalema ka kamoreng e ka hodimo ya ntlo. Ha ba qeta ho ja, Jesu o ile a re ho bona: “E mong wa lona o tlo nthekisa.” Baapostola ba ne ba maketse mme ba botsa Jesu ba re: “Morena, na ke nna?” Jesu a re: ‘Ke eo ke tla mo fa bohobe bona.’ Yaba o fa Judase Iskariota bohobe. Hanghang, Judase a ema mme a tsamaya.

Jesu o ile a rapela, ka mora moo a fa baapostola ba hae ba setseng bohobe. A re ho bona: “Nkang, le je. Bohobe bona bo emela mmele wa ka.” Ka mora moo a rapella veine mme a e fa baapostola ba hae. Yaba Jesu o re: ‘Nkang le nwe kaofela ha lona. E emela madi a ka ao ke tla fana ka ona e le hore dibe tsa lona di ka tshwarelwa. Ke a le tshepisa hore le tla ba marena ha mmoho le nna lehodimong. Etsang sena selemo le selemo ho nkgopola.’ Balatedi ba Jesu ba ntse ba kopana mantsiboyeng a la 14 Nisane selemo le selemo. Hona jwale mokete oo o bitswa Dijo Tsa Shwalane Tsa Morena.

Ka mora ho ja, baapostola ba neng ba setse ba ile ba buisana ka hore na e moholo ke mang. Empa Jesu o ile a re ho bona: ‘Ya inkang e le e monyenyane hara lona, ke yena e moholo.

‘Le metswalle ya ka hobane ke le boleletse dintho tsohle tseo ke di utlwileng ho Ntate. Haufinyane ke tla ya ho Ntate lehodimong. Le tla sala mona mme haeba le ratana, bohle ba tla tseba hore le barutuwa ba ka. Le lokela ho ratana feela jwalo ka ha ke le rata.’

Qetellong, Jesu o ile a rapela mme a kopa Jehova hore a sireletse barutuwa ba hae bohle. A boela a mo kopa hore a ba thuse ho sebetsa ha mmoho ka kgotso. A rapella hore lebitso la Jehova le halaletswe. Ka mora moo, Jesu le baapostola ba hae ba binela Jehova mme ba tswela ka ntle. Nako ya hore Jesu a tshwarwe e ne e se e le haufi.