“Maikutlo a ka Mabapi le Mosebetsi oa Ngaka a Fetohile”

AKANE, ngoanana ea lilemo li ’nè oa Osaka, Japane, o ne a e-na le bokooa bo rarahaneng pelong—ho koaleha ha mothapo oa pelo le bofokoli ba lebota la pelo—tse ileng tsa mo tlama ho feta tlas’a tšebetso e khōlō ea ho buuoa pelo. Batsoali ba hae ba ile ba kōpa lingaka ka tieo ho etsa tšebetso ntle ho mali.a

Ho thata ho etsa tšebetso ea ho bula pelo le ho e buoa ho sa akareletsoe mali baneng ka lebaka la tekanyo ea bona e tlaase ea mali. Tabeng ea Akane, lingaka li ile tsa lumela ho sebetsa ntle ho mali. Ho sebetsoa ha Akane ho ile ha atleha, ha bontša tsebo ea bona e hloahloa ea meriana. O ile a hlaphoheloa kapele-pele ’me hona joale o thabela bophelo bo botle bo matla.

’Mè oa Akane o ile a ngolla lingaka tse ileng tsa kenya letsoho tšebetsong ea ho buoa, a tšela le foto ea morao-rao ea Akane. Ngaka e robatsang ka lithethefatsi e ile ea araba ’mè oa Akane. Karolo ea lengolo leo e baleha tjena:

“Ho hlaphoheloa ho makatsang ha Akane hoa re hlasimolla. Ha ke bona setšoantšo se setle seo u se tšetseng ka lengolong, ke ile ka sitoa ho ithiba ho tšolla meokho. Bothata bo ileng ba ntšoenya haholo e ne e se ho buoa empa phapang pakeng tsa litumelo tsa lōna le tsa ka. Hona joale, ka lebaka la phihlelo ena, maikutlo a ka mabapi le mosebetsi oa ngaka a fetohile. Lingaka li lokela ho sebelisa kutloisiso ea tsona e tiileng ea tsebo ea meriana ho boloka bophelo, empa hape li lokela ho hlompha seriti le litakatso tsa mokuli.”

[Mongolo o botlaaseng ba leqephe]