Khatello ea Kelello—“’molai ea Khutsitseng”

“Letšoao la pele leo ke ileng ka le hlokomela e bile lehlaba le bohloko. Le ne le qala sefubeng; le chalametsa ho ea tsoa mahetleng, molaleng le mehlahareng; ’me le boela le chalametsa ho theosa le matsoho ka bobeli. E ne eka tlou e fihlile ea nkoela sefubeng. Ke ne ke hema ka thata. Ke ile ka qala ho fufuleloa. Ka qala ho tšoaroa ke mala ’me ka nyekoa ke pelo ka ho sithabetsang. . . . Hamorao, ha baoki ba ntse ba nthusa ho hloella betheng ea sepetlele, ke hopola ha ka makalo ke re, ‘Pelo ea ka e tsietsane.’ Ke ne ke le lilemo li mashome a mane a metso e mene.”

BUKENG ea hae e bitsoang From Stress to Strength, Dr. Robert S. Eliot o hlalosa ka ho khutla ha hae lintšing tsa lebitla lilemong tse fetang 20 tse fetileng. Hoseng ha letsatsi leo o ne a le sebokeng se seng seo a neng a bile a fana ka thupelo ho sona—ka ho makatsang, tabeng e buang ka ho tsietsana ha pelo. Ka tšohanyetso, Dr. Eliot, e leng ngaka ea mafu a pelo, o ile a iphumana a le ho seo a se bitsang “liphate tse chesang karolong ea tlhokomelo ea methapo ea pelo.” O hlalosa lebaka la maqakabetsi a hae a sa lebelloang e le lefe? Dr. Eliot o re: “Tsela eo ke itšoarang ka eona ha ke le tlas’a khatello ea kelello e ne e mpolaea.”a

Joalokaha phihlelo ea Dr. Eliot e bontša, khatello ea kelello e ka ba le liphello tse sokelang bophelo. Ha e le hantle, United States, e ’nile ea amahanngoa le lisosa tse ling tse itlhommeng pele tsa lefu. Liphello tse tlisoang ke khatello ea kelello li ka phaellana li sa hlokomelehe ha nako e ntse e feta ’me joale tsa hlahella ho se temoso. Kahoo, ke ka lebaka le utloahalang khatello ea kelello e ’nileng ea bitsoa “’molai ea khutsitseng.”

Ka ho makatsang, batho ba nang le botho ba mofuta oa A—ba tsebahalang ka ho ba lifela-peloana, ho ba leqhoko le ho rata tlhōlisano—hase bona feela ba pepesehetseng litlokotsi tse tsamaisanang le khatello ea kelello. Ba bonahalang eka ba na le botho bo bonolo le bona ba ka ’na ba e-ba kotsing, haholo-holo haeba bonolo ba bona e mpa e le ba ponahalo ea ka ntle feela, ba ka ’na ba tlakoloha ka bohale ho sa lebelloa. Dr. Eliot o nahana hore sena e ne e le ’nete boemong ba hae. Hona joale o lemosa ba bang: “U ka ’na ua shoa ka tšohanyetso hona letsatsing lena—u sa hlokomele hore ka lilemo-lemo u ’nile ua beha pelo ea hao kotsing.”

Empa ho tsietsana ha pelo le lefu la tšohanyetso hase ’ona mathata feela a ’nileng a amahanngoa le khatello ea kelello, joalokaha sehlooho se latelang se tla bontša.

[Mongolo o botlaaseng ba leqephe]