Seno se Hlasimollang se Entsoeng ka Semela se sa Tloaelehang

KA MONGOLI OA TSOHA! NIGER

NA U thabela ho noa seno se pholileng ha ho chesa? Malapa a mangata a Afrika Bophirimela a thabela seno se hlasimollang se ’mala o khanyang, se hlabosehang, se matlafatsang le se sa hlokeng chelete e ngata—’me se etsoa ka semela. Seno sena se bitsoa bissap, ’me semela se thunyang seo seno sena se etsoang ka sona ke roselle e melang libakeng tse chesang, tse mongobo. Semela sena se ka hōla ho fihlela se e-ba bolelele ba limithara tse peli kapa ho feta. Se mela libakeng tse fapaneng tsa lefatše, haholo-holo libakeng tse se nang metsi a mangata tse kang linaheng tsa Niger, Mali le Senegal.

Kamoo Bissap e Etsoang Kateng

Khaba e le ’ngoe ea mahlaku a semela sena e tšeloa ka metsing a ka etsang lithara. Motsoako ona oa belisoa, ebe o tlohelloa metsotso e 15 ho ea ho e 20 hore o loee. Ho sefuoa mahlaku, ’me tee ena e ka nooa e chesa kapa e bata, e tšetsoe tsoekere kapa e sa tšeloa. Kajeno re batla ho etsetsa bana seno se pholileng hore ba se thabele, ka hona, re se tšela tsoekere. Malapa a mang a bile a se natefisa ka koena kapa ka vanilla. Bissap e pholileng, e bofubelu bo hlakileng, e tšeloa ka lipolasetiking tse nyenyane tse bonaletsang, ebe lia fasoa. Joale e se e ka fuoa bana ba e nyoretsoeng! Ka thabo, ba phunya polasetiki ena ntlheng ebe ba thabela seno sena seo ba se ratang haholo. Leha ho le joalo, ho na le ba se thabelang ha se tšetsoe ka khalaseng.

Ntle le hore bissap ea hlabosa, ho boetse ho thoe e ka u tsoela molemo. E na le k’halsiamo, phosphorus, tšepe, vithamine A le C le tse ling! Ba bang ba re bissap e boetse e hlephisa mala hamonate, e etsa hore motho a ntše metsi khafetsa ebile e matlafatsa sebete. Ka sebele, re thaba hakaakang hore ebe ntle le hore semela see sea boheha, se boetse se re hlahisetsa seno se matlafatsang, se bileng se re hlasimollang!

[Tlhaloso ea Moo Setšoantšo se Nkiloeng Teng e leqepheng la 31]

Photo by Kazuo Yamasaki