Khaolo ea 52

Jesu O Fepa Likete Ka Mohlolo

BAAPOSTOLA ba 12 ba thabetse leeto la boboleli le tsotehang ho pholletsa le Galilea. Joale, nakoana ka mor’a polao ea Johanne, ba khutlela ho Jesu ’me ba pheta liphihlelo tsa bona tse monate. Ha a bona hore ba khathetse le hore ho tla batho ba bangata ha ba bang ba tsamaea hoo ba hlokang le nako ea ho ja feela, Jesu o re: ‘A re eeng e le rōna feela sebakeng se khutsitseng le ke le phomole hanyenyane.’

Ha ba kena seketsoaneng sa bona, mohlomong haufi le Kapernauma, ba leba sebakeng se potelletseng, seo ka ho totobetseng se leng ka bochabela ho Jordane ka ’nģane ho Bethsaida. Leha ho le joalo, batho ba bangata baa ba bona ha ba tloha, ’me ba bang ba tseba ka hona. Bana kaofela ba mathela pele ba iphaphathile ka lebōpo, ’me ha seketsoana se fihla lebōpong, batho ba se ba le moo ho ba khahlanyetsa.

Ha a tsoa ka seketsoaneng ’me a bona letšoele le leholo joalo, Jesu o susumetsoa ke qenehelo hobane batho bao ba joaloka linku tse se nang molisa. Kahoo o folisa ba kulang ’me o qala ho ba ruta lintho tse ngata.

Nako e feta ka potlako, ’me barutuoa ba Jesu ba tla ho eena ba re: “Mona ke feelleng, hape e se e le mantsiboea; ba khutlise, ba ee metsaneng le metseng e re teetseng hare, ba ithekele seo ba ka se jang.”

Leha ho le joalo, ha a ba araba Jesu o re: “Ba fepeng e le lōna.” Kaha Jesu a ne a se a ntse a tseba seo a tla se etsa, a leka Filippi ka ho ’motsa: “Na re tla reka mahobe kae, batho bana ba tle ba je?”

Ho ea ka pono ea litaba ea Filippi bothata ke bo ke keng ba rarolloa. Ho na le banna ba ka bang 5 000, kapa mohlomong ho na le batho ba ka holimo ho 10 000 ha ho baloa basali le bana! Filippi o arabela ka hore “Mahobe a lidenare tse makholo a mabeli [denare e ne e le moputso oa letsatsi] a ke ke a ba lekana, hore e mong le e mong oa bona a nke ho honyenyane.”

Mohlomong e le ho bontša hore hase ntho e ka etsahalang hore ho feptjoe batho ba bangata hakaalo, Andrease oa ithaopa: “Moshanyana o teng mona, ea nang le mahobe a mahlano a harese, le lihlatsoana tse peli,” ’me oa eketsa: “Empa hoo e ka ba eng, ha ba le bangata hakalo?”

Kaha ke nakong ea selemo, pelenyana feela ho Paseka ea 32 C.E., ho na le joang bo botala bo bongata. Kahoo Jesu a laela barutuoa ba hae hore ba bolelle batho hore ba lule holim’a joang ka lihlopha tsa ba 50 le tsa ba 100. A nka mahobe a mahlano le litlhapi tse peli, a boka. Joale a qala ho ngoatha bohobe le ho arola litlhapi. Eaba o li neha barutuoa ba hae, ’me bona ba li abela batho. Ka ho hlollang, batho bohle ba ja ho fihlela ba khotše!

Ka mor’a moo Jesu o bolella barutuoa ba hae: “Bokellang lingoathoana tse setseng, ho tle ho se ke ha senyeha letho.” Ha ba etsa joalo, ba tlatsa lirōtō tse 12 ka lijo tse setseng ha ho jeoa! Mattheu 14:​13-21; Mareka 6:​30-44; Luka 9:​10-17; Johanne 6:​1-⁠13.

▪ Ke hobane’ng ha Jesu a batla sebaka se siretseng bakeng sa baapostola ba hae?

▪ Jesu o nkela barutuoa ba hae hokae, ’me ke hobane’ng ha ba sa khone ho phomola kamoo ba hlokang kateng?

▪ Ke eng seo barutuoa ba se tsitlallelang ha e e-⁠ba mantsiboea, empa ke joang Jesu a hlokomelang batho?