Thuto 36

Sehlooho se Hōlisitsoe

Ke eng seo u lokelang ho se etsa?

Bua ka sehlooho sa hao ’me u se hōlise ka litsela tse sa tšoaneng puong eohle ea hao.

Ke Hobane’ng ha e le Habohlokoa?

Se momahanya nehelano ea hao le ho thusa bamameli ho utloisisa seo u se buang le ho se hopola.

LIBUI tse nang le phihlelo li tseba bohlokoa ba ho ba le sehlooho. Ha li lokisetsa puo, sehlooho se li thusa ho lebisa tlhokomelo karolong e khethehileng ea boitsebiso le ho bo nahana ka botebo. Sena se fella ka hore ho e-na le ho otla lintlha tse ngata mabalankoe, li hōlise boitsebiso ba tsona ka tsela e ruisang bamameli ba tsona molemo haholo. Ha ntlha ka ’ngoe e khōlō e amana le sehlooho ka ho toba ’me e thusa ho se hōlisa, bamameli le bona ba thusoa ho hopola lintlha tseo le ho hlokomela bohlokoa ba tsona.

Le hoja ho ka boleloa hore sehlooho sa hao ke eona taba eo u buang ka eona, u tla fumana hore boleng ba lipuo tsa hao boa ntlafala haeba u ka nka hore sehlooho sa hao ke pono e itseng eo u hōlisang taba ea hao ka eona. ’Muso, Bibele le tsoho ke litaba tse akaretsang. Ho ka etsoa lihlooho tse sa tšoaneng ka litaba tsena. Mehlala e meng ke ena: “’Muso, Puso ea Sebele,” “’Muso oa Molimo o Tla Etsa Lefatše Paradeise,” “Bibele e Bululetsoe ke Molimo,” “Bibele ke Tataiso e Sebetsang Bakeng sa Mehla ea Rōna,” “Tsoho e Fana ka Tšepo ho ba Saretsoeng” le “Tšepo ea Tsoho e re Thusa ho Lula re Tiile ha re Talimane le Tlhoriso.” Lihlooho tsena kaofela li hloka ho hōlisoa ka litsela tse fapaneng haholo.

Tumellanong le sehlooho se seholo sa Bibele, boboleli bo entsoeng ke Jesu Kreste tšebeletsong ea hae ea lefatšeng bo ile ba hatisa sehlooho se reng: “’Muso oa maholimo o atametse.” (Mat. 4:17) Sehlooho seo se ile sa hōlisoa joang? Ka makhetlo a fetang 110 Likosepeleng tse ’nè, ho buuoa ka ’Muso oo. Empa Jesu ha aa ka a sebelisa lentsoe “’muso” ka ho pheta-pheta feela. Ka seo a se rutileng le ka mehlolo eo a e entseng, Jesu o ile a hlakisa hore eena, ea neng a le teng, e ne e le Mor’a Molimo, Mesia, eo Jehova a neng a tla mo fa ’Muso. Hape Jesu o ile a bontša hore ka eena ho ne ho buloa tsela ea hore ba bang ba be le karolo ’Musong oo. O ile a bua ka litšoaneleho tse lokelang ho bontšoa ke ba neng ba tla fuoa tokelo eo. Ka lithuto tsa hae le ka mesebetsi e matla eo a ileng a e etsa, o ile a hlakisa seo ’Muso oa Molimo o neng o tla se bolela bophelong ba batho ’me a bontša hore ho leleka ha hae bademona ka moea oa Molimo e ne e le bopaki ba hore ‘ka sebele ’muso oa Molimo o ne o fihletse’ bamameli ba hae. (Luka 11:20) Ke oona ’Muso oo Jesu a ileng a laela balateli ba hae ho paka ka oona.—Mat. 10:7; 24:14.

Ho Sebelisa Sehlooho se Loketseng. Ha hoa lebelloa hore u hōlise sehlooho ho fihlela bohōleng bo tšoanang le boo Bibeleng e etsang ka bona, empa ho ba le sehlooho se loketseng e ntse e le habohlokoa ka tsela e tšoanang.

Haeba u ikhethela sehlooho, pele nahana ka sepheo sa nehelano ea hao. Joale ha u ntse u khetha lintlha tse khōlō tse tla theha kemiso ea hao, tiisa hore li hlile li tšehetsa sehlooho seo u se khethileng.

Haeba u abetsoe sehlooho, sekaseka ka hloko seo se se bontšang mabapi le tsela eo u lokelang ho hōlisa boitsebiso ba hao ka eona. Ho ka ’na ha hlokahala boiteko bo itseng hore u lemohe bohlokoa le matla a sehlooho se joalo. Haeba u tla be u ikhethela boitsebiso boo u tla hōlisa sehlooho seo u se abetsoeng ka bona, bo khethe ka hloko e le hore sehlooho se lule se totobetse. Ka lehlakoreng le leng, haeba ho fanoe ka boitsebiso, u sa ntse u lokela ho sekaseka kamoo u ka bo sebelisang kateng tumellanong le sehlooho seo. Hape u lokela ho nahana ka hore na ke hobane’ng ha boitsebiso boo e le ba bohlokoa ho bamameli ba hao le hore na sepheo sa hao e lokela ho ba sefe ha u nehelana ka bona. Sena se tla u thusa ho hlokomela hore na u lokela ho hatisa eng nehelanong ea hao.

Kamoo U ka Hatisang Sehlooho Kateng. E le hore u hatise sehlooho ka tsela e loketseng, u lokela ho rala motheo ha u khetha boitsebiso ba hao le ho bo hlophisa. Haeba u sebelisa boitsebiso bo tšehetsang sehlooho sa hao feela ’me u latela melao-motheo e amehang ha ho lokisetsoa kemiso e molemo ea puo, u tla etsa hore sehlooho se hatisehe habonolo feela.

Ho pheta-pheta ho ka thusa ho hatisa sehlooho seo. ’Minong oa classic, sehlooho ke lehlaso la ’mino le pheta-phetoang hangata hoo le khonang ho khetholla ’mino oohle. Lehlaso leo la ’mino ha le hlahe ka tsela e tšoanang ka linako tsohle. Ka linako tse ling ho hlaha polelo e le ’ngoe kapa tse peli feela, ka linako tse ling ho etsoa motsoako o itseng ’minong oo, empa ka tsela e itseng, ka bohlale moqapi o etsa hore lehlaso la ’mino oa hae le hlahelle nako le nako ho fihlela le utloahala ’minong kaofela. Sehlooho sa puo le sona se lokela ho ba joalo. Ho pheta-pheta mantsoe a bohlokoa a sehlooho ho tšoana le lehlaso la ’mino le ipheta-phetang ’minong o qapiloeng. Moelelo o tšoanang oa mantsoe ana kapa sehlooho se behiloeng ka mantsoe a mang li sebetsa joaloka motsoako sehloohong seo. Ho sebelisa mekhoa e joalo ho tla etsa hore sehlooho e be eona khopolo ea bohlokoa eo bamameli ba hao ba tla e hopola.

Melao-motheo ena ha e sebetse feela lipuong tse fanoang sethaleng empa e sebetsa le lipuisanong tšebeletsong ea tšimo. Puisano e khutšoanyane e hopoleha haholoanyane haeba sehlooho se khethollehile. Thupelo e fanoang thutong ea Bibele e tla hopoleha habonolo haeba sehlooho se hatisitsoe. Boiteko boo u bo etsang ha u khetha le ha u hōlisa lihlooho tse loketseng bo tla etsa ho hoholo ho ntlafatsa ho atleha ha hao joaloka sebui le mosuoe oa Lentsoe la Molimo.

KAMOO U KA HO ETSANG KATENG

Ha u lokisetsa puo ea hao, khetha lintlha tse khōlō le boitsebiso bo li tšehetsang bo tla tlatsetsa hantle ho hōlisoeng ha sehlooho sa hao.

Ha u itlhakisetsa ho nehela puo ea hao, nahana ka hore na u tla hatisa sehlooho hokae hona joang. U ka ’na ua tšoaea libaka tseo u rerang ho etsa sena ho tsona kemisong ea hao.

Nako le nako ha u ntse u nehela puo ea hao, pheta mantsoe a bohlokoa kapa mehopolo ea bohlokoa ea sehlooho sa hao.

BOITLHAKISO: Bakeng sa tšebeletso ea tšimo, khetha taba e lumellanang le sehlooho se tobileng se hlahileng ho Molula-Qhooa kapa ho Tsoha! ea morao-rao. Leka ho tsosa thahasello ka sona kenyelletsong ea hao, se hōlise ka ntlha e le ’ngoe kapa tse peli puisanong ea hao ’me u totobatse molemo oa sona sephethong sa hao.

[Lebokose le leqepheng la 211]

SEHLOOHO SE HLAHELLETSENG BUKENG E KHŌLŌ

Bakeng sa ho utloisisa tšebeliso ea sehlooho, ho molemo ho ithuta kamoo Jehova Molimo, le hoja a ne a sebelisa bangoli ba batho, a ileng a kenyelletsa sehlooho se hlahelletseng kateng libukeng tse 66 tse bōpang Bibele. Sehlooho seo ke ho tlosa qoso tokelong ea Jehova ea ho busa batho le ho finyelloa ha morero oa hae o lerato ka ’Muso oa hae.

Sehlooho sena se qala ho senoleha likhaolong tsa pele tsa Genese ’me litšobotsi tsa sona li hlahella hamorao Bibeleng eohle. Ho lebisitsoe tlhokomelo lebitsong la Molimo ka makhetlo-khetlo, ka makhetlo a fetang 7 000. Tokelo ea bobusi ba Jehova e bonahala tlalehong ea pōpo. Ho phephetsoa ha bobusi ba hae ho tlalehiloe, hammoho le liphello tse bohloko tsa ho se mamele. Lerato la Jehova le fetisisang, bohlale ba hae, toka ea hae le matla ’ohle a hae li bonahatsoa litšebelisanong tsa hae le libōpuoa tsa hae. Melemo ea ho mamela Molimo le mahlomola a tlang ka lebaka la ho se mamele li bontšitsoe mehlaleng e mengata haholo. Tokisetso ea Jehova ka Jesu Kreste ea ho felisa sebe le lefu ka ho feletseng e hlalositsoe le ho bontšoa. Ho fanoe ka makolopetso bakeng sa ’muso oa leholimo o tla timetsa meea e khopo le batho ba hanang ho amohela bobusi bo lokileng ba Jehova holim’a pōpo ea hae. Ho boletsoe ka ho hlaka hore ’Muso oo o tla phethahatsa morero oa Jehova oa hore lefatše e be paradeise e tletseng batho ba ratang le ba rapelang Molimo a le mong feela oa ’nete le ba ratanang.