Khaolong ea 5

Nka Etsa’ng ha Motsoali oa ka a Kena Lenyalong Hape?

E KA ’na eaba motsoali oa hao o thabile haholo ha a kena lenyalong hape. Empa e ka ’na eaba uena ha ua thaba ho hang! Hobane’ng? Ha motsoali a kena lenyalong hape, seo se felisa tšepo ea hore batsoali ba hao ba sa tla ke ba boelane. Ka lehlakoreng le leng, e ka ba ho utloisang bohloko haholo ha motsoali oa hao a kena lenyalong hape nakoana ka mor’a lefu la motsoali oa hao e mong eo u mo ratang.

U ile ua ikutloa joang ha motsoali oa hao a kena lenyalong hape? Tšoaea ✔ haufi le tlhaloso leha e le efe e loketseng.

Ke ile ka ikutloa . . .

□ Ke thabile

□ Ke sa sireletseha

□ Ke soetsehile

□ Ke honohela motsoali oa ka e mocha

□ Ke le molato oa ho se tšepahale ha ke qala ho rata motsoali e mocha

U ka ’na ua ikutloa ka tsela e hlalositsoeng qetellong hobane u tšepahala ho motsoali oa hao ea sieo. Ho sa tsotellehe hore na lebaka ke lefe, lintlha tse boletsoeng ka holimo li ka ’na tsa etsa hore u ntše bohloko ka litsela tse ka bang kotsi.

Ka mohlala, u ka ’na ua lula u sulafalletsa motsoali oa hao e mocha bophelo. U ka ba ua leka ho qabanya motsoali oa hao le molekane oa hae e mocha, u nahanne hore ba tla arohana. Leha ho le joalo, maele ana a bohlale aa lemosa: “Mang kapa mang ea tlisetsang ntlo [eabo] khathatso, o tla rua moea”—ke hore o tla qetella a se na letho. (Liproverbia 11:29) Ha ho hlokahale hore u oele lerabeng leo. Ho na le litsela tse ling tseo ka tsona u ka atlehang ho sebetsana le ho utloa bohloko maikutlong. Nahana ka mehlala e seng mekae.

Bothata ba Pele: Ho Ikokobelletsa Bolaoli ba Motsoali e Mocha

Ha ho bonolo ho ikokobelletsa bolaoli ba motsoali e mocha. Ha a u laela hore u etse ntho e itseng, u ka ’na ua utloa u batla ho phasoloha, u re, ‘Ha u ’Mè kapa ha u Ntate!’ Ho bua joalo ho ka ’na ha etsa hore u ikutloe u khotsofetse ka nakoana, empa ho bontša hore ha u e-s’o hōle kelellong.

Ka lehlakoreng le leng, ho amohela bolaoli ba motsoali e mocha ke tsela e ’ngoe ea ho bontša hore u mametse keletso ea Bibele ea hore “u hōle kelellong.” (1 Bakorinthe 14:20, The Holy Bible in the Language of Today, ea William Beck) Ha e le hantle, motsoali e mocha o phetha mesebetsi eo ’mè kapa ntate ea u tsoalang a e phethang ’me u lokela ho mo hlompha.—Liproverbia 1:8; Baefese 6:1-4.

Hangata ha motsoali e mocha a u khalemela, seo se bontša hore oa u rata ebile o amehile ka uena. (Liproverbia 13:24) Yvonne ea lilemo li 18 o re: “Ntate oa ka e mocha oa re khalemela, empa sena ke seo ka tloaelo bo-ntate ba lokelang ho se etsa. Ke nka hore haeba ke hlonama ha a nkhalemela, ke bontša hore ha ke ananele tsela eo a ’nileng a re hlokomela ka eona ’meleng le moeeng ho theosa le lilemo. Seo e tla be e le ho hloka kananelo.”

Leha ho le joalo, u ka ’na ua ba le mabaka a utloahalang a ho belaela. Haeba ho le joalo, bontša hore u ‘hōlile’ ka hore u etse seo Bakolose 3:13 e se khothalletsang: “Tsoelang pele le mamellana le ho tšoarelana ka bolokolohi haeba leha e le mang a e-na le sesosa sa pelaelo khahlanong le e mong.”

Ka tlaase mona, ngola tšobotsi e le ’ngoe kapa tse peli tse ntle tseo motsoali oa hao e mocha a nang le tsona.

․․․․․

Ho hopola litšobotsi tse ntle tseo a nang le tsona ho ka u thusa joang hore u mo hlomphe haholoanyane?

․․․․․

Bothata ba Bobeli: Ho Ithuta ho Arolelana Lintho le ho ba ea Tenyetsehang

Aaron ea lilemo li 24 o re: “Ntate o ile a nyala ka makhetlo a mang a mabeli. Ho ne ho se bonolo hore ke rate litho tsa lelapa ka leng le lecha. Qalong, ke ne ke nka hore ke batho feela bao ke sa ba tsebeng, empa ke ile ka bolelloa hore ke tlamehile ho ba rata. Boemo boo bo ne bo mpherekanya.”

Le uena u ka ’na ua tobana le maemo a thata. Ka mohlala, u ka ’na ua lokela ho tloha boemong ba hao ba ho ba ngoana e moholo kapa ngoana ea mong feela. Haeba u mora, e ka ’na eaba u qetile nako e telele u nka hore ke uena ea lokelang ho hlokomela lelapa—e leng boemo boo joale bo nkiloeng ke ntate e mocha. Kapa u ka ’na ua ikutloa joaloka Yvonne. O re: “Ntate ea ntsoalang o ne a sa fe ’Mè nako, kahoo ke ne ke tloaetse ho qeta nako e ngata ke e-na le eena. Empa ha ’Mè a nyaloa hape, ntate e mocha o ne a mo fa nako e ngata. Ba ne ba qeta nako ba le hammoho, ba buisana ’me ke ne ke utloa eka o nkamoha eena. Leha ho le joalo, qetellong ke ile ka khona ho ikamahanya le boemo boo.”

Joaloka Yvonne, u ka ikamahanya le boemo boo u leng ho bona joang? Bibele ea eletsa: “Ho ba le kahlolo e molemo ha lōna ho ke ho tsejoe ke batho bohle.” (Bafilipi 4:5) Lentsoe la qalong le fetoletsoeng e le “kahlolo e molemo” le ne le bolela “ho tenyetseha” ’me le ne le e-na le moelelo oa ho se tsitlelle litokelo tsohle tsa molao tseo motho a nang le tsona. U ka sebelisa keletso ee joang? (1) Qoba ho nahana haholo ka lintho tsa nakong e fetileng. (Moeklesia 7:10) (2) Ikemisetse ho arolelana lintho le motsoali oa hao e mocha le bana ba hae. (1 Timothea 6:18) (3) U se ke ua ba tšoara joalokaha eka hase karolo ea lelapa.

Lintlheng tsee tse ka holimo, ke efe eo ho hlokahalang hore u e ntlafatse haholo? ․․․․․

Bothata ba Boraro: Ho Sebetsana le ho Tšoaroa ka Leeme

Tara o re: “Ntate oa ka e mocha o ne a rata bana ba hae haholo ho feta ’na le ausi oa ka. O ne a ba rekela lijo leha e le life tseo ba li ratang a bile a ba hirela lifilimi tseo ba batlang ho li shebella. O ne a ba etsetsa ntho leha e le efe e tla ba thabisa.” Ho thata ho mamella tšoaro e joalo. Ke’ng se ka ’nang sa u thusa? Leka ho utloisisa hore na ke hobane’ng ha motsoali e mocha a ke ke a ikutloa ka tsela e tšoanang ka ngoana oa lenyalong le leng, le eo a mo tsoalang. Mohlomong hase feela hore ke ngoana oa hae ea mo tsoetseng empa ke hore ba phetse ’moho ka nako e telele. Etsoe, ho ka etsahala hore ebe u ikutloa u atamelane le motsoali oa hao ea u tsoalang ho feta motsoali e mocha.

Leha ho le joalo, ho na le phapang e khōlō pakeng tsa ho tšoaroa ka tsela e tšoanang le e seng leeme. Batho ha ba tšoane le litlhoko tsa bona ha li tšoane. Kahoo, ho e-na le ho ameha haholo ka hore na motsoali e mocha o u tšoara ka tsela e tšoanang le ba bang, leka ho bona hore na o loanela ho khotsofatsa litlhoko tsa hao kapa che.

Ke litlhoko life tsa hao tseo motsoali e mocha a li khotsofatsang?

․․․․․

Ke litlhoko life tseo u nkang hore ha a li khotsofatse?

․․․․․

Haeba u nka hore ho na le litlhoko tse ling tseo a sa li khotsofatseng, ke hobane’ng ha u sa buisane le eena ka seo ka tlhompho?

Mamello e Tsoala Katleho!

Ka tloaelo, ho nka lilemo tse ’maloa pele litho tsa lelapa le lecha li ka tšepana hoo li ka ikutloang li phutholohile. Ke ka tsela eo feela li ka fetolang litloaelo le mekhoa e sa tšoaneng e le hore lelapa le phelisane hammoho ka kutloano. Kahoo e-ba le mamello! U se ke ua lebella hore le tla ratana hang-hang kapa hore le tla ikutloa le le lelapa ka ho panya ha leihlo.

Thomas o ne a sa phutholoha ha ’mè oa hae a nyaloa hape. ’Mè oa hae o ne a e-na le bana ba bane, ’me a nyaloa ke monna ea nang le ba bararo. Thomas o re: “Re ne re loana, re ngangisana, re sitisana re bile re utloisana bohloko.” Ke’ng se ileng sa etsa hore qetellong ba atlehe? O re: “Re ile ra rarolla mathata a rōna ka hore re sebelise melao-motheo ea Bibele.”

LENGOLO LA SEHLOOHO

“Qetello ea taba hamorao e molemo ho feta tšimoloho ea eona. Ea sa feleng pelo o molemo ho feta ea ikhohomosang moeeng.”—Moeklesia 7:8.

LENGOLO LA SEHLOOHO

KELETSO

Ho lula le banab’eno ba motsoali e mocha ba bong bo fapaneng le ba hao ho ka ’na ha u bakela khatello ea ho kopanela boitšoarong bo bobe. Kahoo, leka hore u se ke ua nahana ka lintho tse ka u tsosetsang takatso ea ho kopanela liphate ’me u tiise hore tsela eo u aparang ka eona kapa u itšoarang ka eona ha e tsosetse ba bang takatso.

NA U NE U TSEBA . . . ?

E ka ’na eaba banab’eno ba motsoali e mocha le bona ba thatafalloa ho ikamahanya le boemo lelapeng le lecha.

SEO KE RERANG HO SE ETSA!

Ke tla leka ho hlompha motsoali oa ka e mocha haholoanyane ka hore ke ikhopotse lintho tse latelang tse molemo tseo a li etselitseng lelapa (ngola lintho tse peli tse ntle): ․․․․․

Haeba banab’eso ka motsoali e mocha ba ntlhokomoloha, nka sebelisa molao-motheo o ho Baroma 12:21 ka hore ke etse lintho tse latelang: ․․․․․

Lintlha tseo ke tla rata ho li botsa motsoali oa ka kapa motsoali e mocha tabeng ena ke ․․․․․

U NAHANA’NG KA SEE?

● Ke lintho life tseo motsoali e mocha kapa bana ba hae ba ka ’nang ba li tšoha ka hore ebe ba tl’o phela le lelapa leno?

● Ke hobane’ng ha e le habohlokoa ho nahana ka kamano eo lelapa leno le lecha le tlang ho ba le eona ka nako e telele?

[Ntlha e Qolotsoeng e leqepheng la 38]

“’Mè o ile a hlalana le monna oa hae oa lenyalong la bobeli. Empa le kajeno ke ntse ke e-na le kamano e haufi le banab’eso ba lenyalo leo la bobeli. Hore ebe ke phetse le bona, ke e ’ngoe ea lintho tse nthabisang ka ho fetisisa bophelong.”—Tara

[Setšoantšo se leqepheng la 39]

Ho kopanya malapa a mabeli ho tšoana le ho kopanya metsi le samente—ho nka nako ebile ho hloka boiteko, empa qetellong ho ka hlaha lelapa le matla le le tšoarellang