Thabisa Pelo ea Jehova ka ho Boloka Botšepehi!
“Leha re phela, re phelela Morena [Jehova], ’me leha re e-shoa, re shoela Morena [Jehova].”—BA-ROMA 14:8.
1, 2. (a) Ke hobane’ng ha Lipaki tsa Jehova li ikemiselitse ho boloka botšepehi ba tsona ho Molimo? (b) Empa ho phahama lipotso life?
MANTSOE ao a moapostola Pauluse a hlalosa hantle hakaakang maikutlo a bao e leng bona feela ba bolokang botšepehi kannete lekholong lee la bo20 la lilemo! Haeba re filoe tlotla ea ho phela le ho bona ha tsamaiso ea hona joale e khopo e oa ka pel’a mahlo a rōna, re tla thaba hakaakang! Empa haeba re tlameha ho thulana le lefu tšebeletsong ea Molimo, ha ho be joalo. Le haeba ho ka ba joang, re ikemiselitse ho ba lipaki tse tšepahalang tsa Molimo oa rōna, Jehova. Re tla ipoloka re tšepahala ho eena. Hobane’ng? Hobane re phela kapa re shoele, ka sebele re ba Jehova!
2 Leha ho le joalo, botšepehi ke eng? Bo re hloka eng? Hona na ho tšepahala hoa rōna ho hlile ho etsa phapang ea letho ho Molimo?
Botšepehi le Seo bo Se Hlokang
3. Ho latela Bibele, ho boloka botšepehi ho bolela eng?
3 Ka Lentsoeng la Molimo, botšepehi bo bolela boitšoaro bo botle le bo phethahetseng, ho hloka letheba le sekoli. Bo bolela ho inehela ho lokeng ka ho sa thekeseleng. Ha e le hantle, botšepehi bo hloka boinehelo bo sa sisinyeheng ho motho—ho Jehova Molimo. E, ho boloka botšepehi ho bolela ho tsoela pele re etsa thato e phahameng ka ho fetisisa ea Jehova.
4. Morobi oa pele oa botšepehi ke mang, ’me o ile a susumelletsa batho ba babeli ba pele hore ba etse eng?
4 Sebopuoa sa moea se ileng sa isa batho ba babeli ba pele tseleng ea borabele khahlanong le ’Mōpi oa bona, ke sona sa pele ho roba botšepehi. Adama le Eva ba ne ba e-na le monyetla oa ho bontša botšepehi ba bona ho Jehova ka hore ba hlomphe thibelo ea Molimo mabapi le sefate sa tsebo. Empa tlas’a khatello ea boipiletso ba Sera ea hore ba etse ka boithati, ba inehela ho se utloeng. Lipelo tsa bona ha lia ka tsa ipaka li se na letheba litaelong tsa Jehova, ’me ha baa ka ba boloka botšepehi ho eena.—Pesaleme ea 119:1, 80.
5. Borabele ba Satane bo hlahisitse tseko efe, ’me e pakoa joang ke liphihlelo tsa Jobo ea khabane?
5 Borabele ba Satane bo ile ba phahamisa tseko ea ho lokela hoa borena ba Molimo holim’a libopuoa tsohle tsa Oona le ea tokelo ea Jehova ea ho hloka kutlo e feletseng ea tsona. Kahoo taba ea botšepehi ba motho thatong e phahameng ka ho fetisisa ea Molimo ea fetoha karolo ea bohlokoa ea tseko ea borena ba bokahohle. Bopaki ba sena bo bonoa tabeng ea mohlanka oa Jehova Jobo, motho ea se nang molato, ea khabane, ea tšabang Molimo. (Jobo 1:1) Jobo ha a ka a fapoha tsela e loketseng ea Molimo. Boitšoaro bo bobe ba likamano tsa botona le botšehali bo ne bo sa mo manama. Ho ne ho se mohla a ahlolang ka tšobotsi kapa a le leqe ho nea bahlolohali, likhutsana, kapa bahloki. Ho e-na le ho tšepa maruo a bonahalang, Jobo O ile a tšepa ea Holimo-limo ka ho feletseng. (Jobo 31:7-40) Leha ho le joalo, Diabolose a tseka hore Jobo o sebeletsa Molimo ka mabaka a boithati. Le hoja Jehova a ile a lumella Satane hore a hlakole Jobo matlotlo a hae haesita le bona bana ba hae, Sera sena se seholo se ile sa hlōleha ho senya botšepehi ba monna eo ea khabane. Le lefu le bohloko le nyatso e nyotobetsang e tsoang ho batšelisi ba bohata ha lia ka tsa thusa letho, hobane Jobo o ile a ipaka hore ke ’moloki oa botšepehi.—Jobo 1:6–2:13; 27:5, 6; 31:6; 42:8, 9.
6. Ke eng e hlokoang ho ‘bao e leng ba Jehova’?
6 Ka hona, batho ba na le tokelo e ke keng ea lekanngoa ea ho tlatsetsa ho khetheng lebitso le halalelang la Molimo. Joang? Ka ho boloka botšepehi, ba bontša hore ka botšepehi ba tšehetsa borena ba Jehova ba bokahohle. E be joale ke eng e hlokoang ho ‘bao e leng ba Jehova’? Re tlameha ho sebeletsa Molimo ka boinehelo bo feletseng, ho se mohla re lebalang hore Jehova ke “Molimo o boulelang.”—Exoda 20:5.
Re ka Thabisa Pelo ea Jehova
7, 8. (a) Kaha ha rea phethahala, re ka boloka botšepehi ba rōna ho Molimo joang? (b) Haeba re le baboloki ba botšepehi, Liproverbia 27:11 e tla sebetsa joang ho rōna?
7 Kaha bohle ha rea phethahala, re sitoa ho finyella ka ho phethahetseng litekanyetso tse lokileng tsa Molimo. Ka hona, ho boloka hoa rōna botšepehi ha ho bolele liketso kapa lipuo tse phethahetseng. Ho e-na le hoo, ho bolela ho ba ka pelo eohle, kapa boinehelo ba pelo bo phethahetseng. Kahoo, le hoja Davida a ile a etsa libe tse tebileng, o ‘tsamaile ka pelo e tšepehang.’ (1 Marena 9:4, NW) Ha a amohela khalemelo, o ile a lokisa litsela tsa hae ’me kahoo a paka hore pelo ea hae e tletse lerato la ’nete bakeng sa Jehova. (Pesaleme ea 26:1-12) Le rōna, re ka bontša lerato le joalo, re etsa ‘ka pelo e tšepehang.’—Pesaleme ea 78:72, NW.
8 Tsela ea ho boloka botšepehi e nolofatsoa ke hore re na le tumelo e tebileng ho Jehova Molimo le hore re mo tšepa ka ho feletseng le matla a hae a ho re boloka. (Pesaleme ea 25:21; 41:12, NW) Ha ho bonolo ho boloka botšepehi ba rōna, hobane Satane Diabolose—sera se seholo haholo sa Jehova, le sa rōna—o foufatsa likelello tsa ba sa lumelang ’me o ‘thetsa lefatše lohle leo ho ahiloeng ho lona.’ (Tšenolo 12:9; 2 Ba-Korinthe 4:4) Empa, re ka ba baboloki ba botšepehi joaloka Jobo. Le hoja re sa phethahala, re ka ’na ra thabisa pelo ea Molimo oa rōna o lerato. Joalokaha Liproverbia 27:11 e ho bolela: “Mora oa ka, hlalefa, u nthabise pelo, ’me ke tla ba le puo ho fetola ba nkomanyang.” Ka thabo, joaloka bahlanka ba tšepahalang ba Jehova, re ka mo nea karabelo e molemo hore a arabele Sera sa hae se mo somang. Ka hona, ha re boloka botšepehi ho hlile ho etsa phapang. Joaloka ba bolokang botšepehi, re ka thabisa pelo ea Jehova. ’Me hoo ho re thabisa hakaakang!
Letoto la Baboloki ba Botšepehi
9. Ba bang ba “leru” le leholo la Lipaki tsa Jehova tse bolokang botšepehi e ne e le bafe, ’me ba ile ba mamella liteko life tsa botšepehi?
9 Ha e le hantle, Lipaki tsa Jehova kajeno ke karolo ea letoto la baboloki ba botšepehi. Le saroloha ho ea fihla morao ho Abele ea tšepahalang ’me le akarelletsa banna le basali ba kang Abele, Henoke, Noe, Abrahama, Sara, Isaaka, Jakobo, Josefa, Moshe, Rahaba, Gideone, Barake, Samsone, Jafeta, Davida, le Samuele. Baboloki ba botšepehi Shadrake, Meshake le Abede-Nego, ba ileng ba hana ho rapela setšoantšo se neng se emisitsoe ke Morena Nebukadnezare oa Babylona ’me ba akheloa seboping se besitsoeng ka ho fetisisa, ho totobetse hore ho buuoe ka bona e le ‘ba timileng matla a mollo.’ Lipaki tse ling tsa Jehova tsa pele ho Bokreste li ile tsa ‘tšoenyeha ke litšomo, ho shapuoa, litlamo, literonko, ho tlepetsoa ka majoe, ho sehloa ka lisaga, ho lekoa, ho bolaoa ka bohale ba lerumo, ho phaila hohle, ho apara matlalo a linku le a lipōli, ho lahleheloa ke tsohle, ho hlorisoa, ho etsoa hampe.’ Ka sebele re lumellana le Pauluse ea itseng: “Lefatše le ne le sa tšoanele ho ba le batho ba joalo.” Ke ho thabisang hakaakang ho koaheloa ke leru le leholo hakaalo la lipaki tse bolokileng botšepehi!—Ba-Heberu 11:1–12:1; bona hape Daniele, khaolo 3.
10. Moapostola Pauluse o ile a thabisa pelo ea Jehova joang?
10 Ka sebete le ka matla tse fanoeng ke Molimo, moapostola Pauluse o ile a mamella lichankane, ho shapuoa, ho robeheloa ke sekepe, likotsi tse ngata, ho se robale bosiu, tlala, lenyora, serame, ho hlobola le ho ba “ntšing tsa lefu” hangata. (2 Ba-Korinthe 11:23-27, TLP) O fetile mathateng a joalo ka lebaka la tšebeletso, ’me ho sena sohle a thabisa pelo ea Jehova e le ’moloki oa botšepehi ea sebete. Le rōna re ka ho etsa.
11. Jesu Kreste o beile mohlala ofe ka botšepehi?
11 Ea hlahelletseng har’a baboloki ba botšepehi ke “Moemeli e Moholo le Mophethahatsi oa tumelo ea rōna,” Jesu Kreste. Ha a ne a lekoa ke Diabolose lefeelleng, Jesu o ile a tšoarella botšepehing ba hae, qetellong a re: “Tloha, Satane, hobane ho ngoliloe, ho thoe: Khumamela Morena, Molimo oa hao, ’me u sebeletse eena feela.” Ka ho hlakileng a feletsoe ke matla har’a boikemisetso bo joalo bo fanoeng ke Molimo, Diabolose a tlohela Jesu. Eo ha e-ea ba tlhaselo ea ho qetela ea Satane ho Jesu, empa Diabolose o ne a se na matla a ho roba botšepehi ba Mora oa Molimo. ‘Ka baka la thabo eo a e beetsoeng, Jesu o ile a mamella sefapano,’ ho se mohla a fetohang morobi oa botšepehi. E se eka kamehla re ka latela mohlala o phahameng oa hae e be re thabisa pelo ea Jehova re le baboloki ba botšepehi.—Ba-Heberu 12:2, 3; Mattheu 4:1-11.
12, 13. Bakreste ba pele ba bile le hona ho talimana le liteko life tsa botšepehi?
12 Jesu O ile a re ho barutuoa ba hae: “Le tla hlouoa ke bohle ka baka la lebitso la ka.” (Mattheu 10:22) Hoo e bile ’nete hakaakang kamehla bakeng sa Bakreste ba ’nete! Bukeng ea hae Christianity and the Roman Government, E. G. Hardy o ngotse: “Ho bonahala ho se khang ka mangolo a Pliny le seo Trajan a ileng a se kopitsa ho oona, hore Bakreste ba ne ba ka otleloa lebitso feela, kapa hona ho ipolela feela hore motho ke Mokreste, ntle ho hore ho qaqisoe kapa ho pakoe hore ho na le tlōlo ea molao e tiileng.”
13 Bakreste bao ba pele ba ile ba talimana le liteko tse kaakang tsa botšepehi ka katleho ka matla a fanoeng ke Molimo! Ka mohlala, ho itsoe mabapi le bona: “Ka linako tse ling ba ne ba hlokofatsoa ’me ba akheloa libataneng tse lapileng mabaleng a lipapali ho thabisa matšoele.” Leha ho le joalo, ho sa tsotellehe mahlomola a joalo, ho hlokomelehile hore “ho hlorisoa ho ne ho sebeletsa feela ho matlafatsa tumelo ea bona le ho hlahisa ba bangata ba sokolohelang tseleng ea bona.” (From the Old World to the New, ea Eugene A. Colligan le Maxwell F. Littwin, 1932, maqephe 90-1) Ho joalo le ka Lipaki tsa Jehova tse bolokang botšepehi lekholong lena la bo20 la lilemo. Baemeli ba Diabolose ba ipakile hore hase letho ho tsona.
14, 15. “Lipaki tse peli” ke life, ’me li bile le phihlelo efe ka 1918 le 1919?
14 Nahana ka seo bahlanka ba tlotsitsoeng ba Jehova, “lipaki tse peli” tsa tšoantšetso, ba ileng ba feta ho sona ka 1918 le 1919, ha lira tsa bona ‘li qapa bobe ka molao.’ (Tšenolo 11:3, 7-10; Pesaleme ea 94:20) J. F. Rutherford (ka nako eo e le mookamali oa Watch Tower Society) le metsoalle e meng e supileng ba kenngoa litlamong ka leeme. Ka nako eo, “lipaki tse peli,” li ile tsa bolaoa mabapi le mosebetsi oa tsona oa ho profeta, ’me lira tsa tsona tsa thaba. Bukeng ea hae Preachers Present Arms, Ray H. Abrams o ile a hlokomela: “Ho seka-seka taba eohle [e amang Rutherford le metsoalle ea hae] ho isa qetong ea hore likereke le baruti e bile tsona bahlohlelletsi ba bohata ba ho felisa [Liithuti tsa Bibele]. . . . Ha litaba tsa ho ahloleloa lilemo tse mashome a mabeli li fihla ho bahlophisi ba likhatiso tsa bolumeli, hoo e ka bang e ’ngoe le e ’ngoe ea likhatiso tsena, tse khōlō le tse nyenyane, li ile tsa thabela ketsahalo eo. Ke ’nile ka sitoa ho fumana mantsoe leha e le afe a kutloelo-bohloko likoranteng tsa bolumeli bo boholo.”
15 Leha ho le joalo, kamorao ho nako, Liithuti tsa Bibele tse robeli tse kentsoeng litlamong li ile tsa lokolloa ’me tsa hlakoloa molato ho hang, ho soabeng ho hoholo hoa Satane le mahlahana a hae. Li hlasimollotsoe ke moea oa Molimo, “lipaki tse peli,” lebotho leo le lenyenyane la batlotsuoa, la ema hape ka maoto a lona e le baboleli ba ’Muso. (Tšenolo 11:11) ’Me ha e sa le ho tloha ka nako eo lira tsa Jehova li ’nile tsa loana ntoa e se nang thuso khahlanong le baboloki ba joalo ba botšepehi.
16. ’Moloki e mong e monyenyane oa botšepehi o ile a itlhalosa joang?
16 Mohlala: Nahana ka mantsoe a khothatsang ao mohlankana e mong a ileng a a ngolla lelapa labo ha a emetse lefu matsohong a bahlorisi ba Nazi. O ile a ngola: “E se e le kamorao ho khitla. Ke sa ntsane ke e-na le nako ea ho fetola maikutlo a ka. Na nka boetse ka ba motho ea thabileng hape lefatšeng lee kamor’a hore ke latole Morena oa rōna? Le hanyenyane! Empa joale le na le tiiso ea hore ke siea lefatše lena ka thabo le khotso.” Na hoo ho utloahala joaloka ’moloki oa botšepehi ea fokolang, oa lekoala, le ea hlōtsoeng? Che!
17. Ho tšoaroa hoa Lipaki tsa Jehova Soviet Union ho bile le phello efe liketsong tsa tsona tsa ho bolela ka ’Muso?
17 Boiteko ba ho roba botšepehi ba bahlanka ba Jehova bo ntse bo tsoela pele. Ka mohlala, bukeng ea hae Religion in the Soviet Union, sengoli Walter Kolarz o boletse ka ho tšoaroa hoa Lipaki tsa Jehova tse ngata mathoasong a 1951 ’me o re: “Lipaki ka botsona li hakanya hore batho kaofela ba 7 000 ba ile ba lelekeloa ntle, ba isoa Urals, Siberia, Leboea le Hole (Vorkuta) le Kazakhstan.” A phaella: “Hona ha e-ea ba moo ‘Lipaki’ li fellang teng Russia, empa e bile ho phetla khaolo e ncha liketsong tsa tsona tsa ho sokolla. Li bile tsa leka le ho jala tumelo ea tsona ha li emisitse liteisheneng tseleng ea tsona e eang botlamuoeng. Ha ho letho le molemo ho feta moo leo ’muso oa Soviet o neng o ka le etsa ho jala tumelo ea tsona. Ho tloha metseng eo li neng li aroletsoe ho eona ‘Lipaki’ li ile tsa isoa lefatšeng le sabaletseng haholoanyane, le haeba lena e ne e le lefatše le sisimosang la likampo tsa mahloriso le tsa bokhoba.” Mono bahlanka ba Jehova ba ile ba fumana ba bangata ba ileng ba amohela molaetsa o khothatsang oa ’Muso.—Bapisa Liketso 11:19-21.
Joaloka Lebotho le Hlōlang
18, 19. Ho bonolo joang ho hlōla joaloka baboloki ba botšepehi?
18 Ho hlorisoa hoa batho ba Molimo ho ntse ho tsoela pele le kajeno. Ka hona Lipaki tsa Jehova li nolofalloa joang hore li hlōle e le baboloki ba botšepehi? Hona re ka ho etsa hobane re utloa Lentsoe la Molimo, ’me ‘likelello tsa rōna li lemaletse ho khetha ho hotle ho ho hobe.’ Joaloka lipaki tse tšepehang tsa Jehova, ha rea ‘ipapisa le lefatše lena empa re fetotse likelello tsa rōna.’ Ka thabo re etsa se khahlisang Jehova, ’me o etsa hore re hlōle lira tsa rōna, tsa bademona le tsa batho.—Ba-Heberu 5:12-14; Ba-Roma 12:1, 2.
19 Rōna ‘bao re leng ba Jehova’ re ka tšoantšoa le lebotho le hlōlang. Ha e le hantle, ntoa ea rōna ke ea moea, ’me ‘re tiea Moreneng le matleng a hae a sa sitoeng ke letho.’ Re apere lihlomo tse feletseng tsa moea tse tsoang ho Molimo, ’me re tšehelitsoe ke moea oa oona o halalelang. Ke ka lebaka leo re ‘tsebang ho hlōla lihlōhō tsohle tsa Diabolose.’ (Ba-Efese 6:10-20; 2 Ba-Korinthe 10:3, 4) E, ’me ke ka lebaka leo re tla tsoela pele ho hlōla re le baboloki ba botšepehi.
20. Ke thuso efe le tiiso tseo re nang le tsona ha re sebeletsa ho boloka botšepehi ba rōna?
20 Ka sebele re lebotho la sesole le sa tloaelehang. Har’a rōna “basali ba tsebisang hlōlo ke lekhotla le leholo”! (Pesaleme ea 68:11) Le hoja re talimane le lira tse matla, “ba nang le rōna ba feta ba nang le bona ka bongata.” (2 Marena 6:16) Mangeloi a na le rōna ha re bolella baahi ba lefatše litaba tse molemo. (Tšenolo 14:6) ’Me joaloka baboloki ba botšepehi, re na le tšepo ea hore ha ho ‘sehlomo se teetsoeng ho re loantša se tla atleha.’—Esaia 54:17.
21. Ho sa tsotellehe mahloriso ao re fetang ho oona, ke eng e tsoelang pele?
21 Ha ho pelaelo, mela ea ntoa e sehiloe. Mabotho a Satane a ikemiselitse ho thibela mosebetsi oa rōna oa bopaki. Ka baka leo, ho ho rōna hore ‘re ’ne re loane ntoa e molemo.’ (1 Timothea 1:18) Ka Jesu Kreste ea tlotlisitsoeng e le Molaoli le Moeta-pele oa rōna, e mong le e mong ho rōna a sebeletse joaloka “mohlabani ea molemo oa Jesu Kreste.” (2 Timothea 2:3, 4) Le hoja re khahleloa kahohle, re tlamehile—’me ka mosa o sa tšoanelang oa Molimo—re tla ema re tiile re le baboloki ba botšepehi. Lifahleho tsa rōna lia khanya ha re bona keketseho e ntseng e hloellana holimo. Palo e ntseng e eketseha ka ho fetisisa ea “tse lakatsehang tsa lichaba tsohle” e-ea kena ’me e tlatsa ntlo ea Jehova ka khanya. (Haggai 2:7) Ho sa tsotellehe mahloriso, litlamo, lichapo, ho thibeloa hoa mosebetsi oa rōna linaheng tse fapa-fapaneng, le boiteko bo matla ba ho re thiba melomo, mosebetsi o moholo oa ho etsa barutuoa o tsoela pele ’me o ntse o hōla.—Mattheu 24:14; 28:19, 20.
22. Joaloka ba Jehova, re lokela ho etsa joang?
22 Ha molumo oa thoriso e eang ho Jehova o ntse o phahama, ena ke nako ea hore e mong le e mong ea lefatšeng a etse qeto. Re filoe tokelo e kaakang ea ho jala litaba tse molemo le ho ruta ba amohelang borapeli ba ’nete! Ka baka leo, ha “bongata bo boholo” bo ntse bo hōla, e se eka re ka tsoela pele re le bahlanka ba matla ba Molimo o Holimo-limo. (Tšenolo 7:9) ‘Re phela kapa re shoele, re ba Jehova.’ Kahoo a re tsoeleng pele pakaneng ea bophelo, kamehla re ntse re leboha tokelo ea rōna e khōlō ea ho thabisa pelo ea Jehova ka ho boloka botšepehi!
Na U ka Arabela?
◻ Botšepehi ke eng?
◻ Ho boloka botšepehi ho hloka eng ho batho ba Jehova?
◻ Ho ka bontšoa joang hore ho boloka hoa rōna botšepehi ho etsa phapang ho Molimo?
◻ Ba bang ba iponahalitse joang nakong e fetileng hore ke baboloki ba botšepehi?
◻ Lipaki tsa Jehova li nolofalloa kajeno hore e be baboloki ba botšepehi joang?
[Setšoantšo se leqepheng la 13]
Bahlanka ba Jehova kajeno ke karolo ea letoto la lipaki tsa hae tse bolokang botšepehi. Na u har’a bona?
Henoke
Sara
Jafeta
Pauluse