Na Bafu Baa Phela? Seo Molimo o se Bolelang

SEFOFANE se senyenyane sa tloha motse-moholo o Afrika Boroa ho fofela toropong e ka bang lik’hilomithara tse 400 ho tloha moo. Ba neng ba palame e ne e le moqhobi le morali oa hae e monyenyane, ea lilemo li 12. Ha a leka ho se emisa ka tšohanyetso, sefofane sa soahlamana, se ba bolaea ka bobeli.

“Ke Jehova Molimo feela ea neng a tseba bohloko ba ka le tahlehelo, hammoho le ntoa eo ke neng ke tšoanela ho e loana ka katleho,” ho hopola Betty, mohats’a moqhobi le ’m’a ngoanana. O ile a khona joang? “Ke ile ka rapela nako le nako ke sa phetse bakeng sa sebete le matla ho tiea e le hore nka khona ho thusa ba bang hore le bona ba tiee.” Betty o boetse a fumana matšeliso a maholo ho seo Molimo o se bolelang ka boemo ba bafu le tšepo ea tsoho.

Molimo o re’ng ka bafu? Bibele e-ea arabela: “Bafu ha ba tsebe letho.” (Moeklesia 9:5) Ka hona bafu ha ba ikutloe. E bonolo joalo feela. Joale ke hobane’ng ha boholo ba batho bo lumela ho fapaneng le hoo? Hobane ba thetsitsoe ka kilibitla ea khale le e aparetseng lefatše lohle ea leshano!

Thetso ea Lefatše Lohle

Hona hohle ho qalisitse ka leshano la pele le kileng la boleloa. Tlaleho ea histori e bukeng ea Bibele ea Genese e fana ka lintlha tse shoelletseng. E re: “Empa ha e le sefate sa ho tseba botle le bobe, u se ke ua se ja, hobane mohla u se jang, u tla shoa.” (Genese 2:17) Eo e ne e le Jehova Molimo a bua le motho oa pele, Adama. Joale, bapisa sena le Genese 3:1-4, moo Satane, a bua ka noha, a khelositseng Eva ho se utloe Molimo, a re: “Ha e le ho shoa, le ke ke la shoa.” Ka hona Satane a hanyetsa seo Molimo o se buileng. Ka lebaka leo a bolela leshano la pele, a fetoha “raleshano.”—Johanne 8:44, TLP; Tšenolo 12:9.

Empa Adama le Eva ba ile ba shoa, ’me ho bile joalo le ka limillione tse ngata-ngata. Joale raleshano Satane a balehela taba eo joang? Ka hore hamorao a kenye khopolo ea hore, le hoja ’mele o shoa, ho na le ho hong ho tsoelang pele bophelong. Ena joale ea e-ba thuto ea malumeli a boholo-holo ’me ea hokelloa likhopolo-tabeng tsa Magerike. Ka hona, tumelo ea ho se shoe ha moea e batla e anetse lefatše lohle. ’Me ho ba bangata ba lumelang hore baratuoa ba bona ba shoeleng ba ntse ba phela kae-kae hona mohlomong ke khopolo e thobang pelo. Leha ho le joalo, potso ea bohlokoa ke ena: Na ke ’nete?

Na Moea Oa Hao ha o Shoe?

Poleloana “ho se shoe” e hlaha ka makhetlo a mararo ka Bibeleng, hohle moo e hlahang ke Mangolong a Bakreste a Segerike. Tlhahlobo ea tšebeliso ea eona e totobatsa ntho e le ’ngoe: Motho ha a futsa ho se shoe.

Ka mohlala, nahana ka mantsoe a moapostola Pauluse ho 1 Timothea 6:15, 16 moo a hlalosang Jesu Kreste e le “’Musi oa babusi le Morena oa marena; e leng eena a ’notši ea nang le ho se shoe.” Ka hona Jesu o fapane joang le “babusi” le “marena” a mang? Ke ea sa shoeng; bona ha ba joalo.

Ke ’nete, ho se shoe ho tšepisitsoe balateli bao ba Kreste ba bitselitsoeng ho busa le eena maholimong. (1 Petrose 1:3, 4) Ka hona, ho 1 Ba-Korinthe 15:53, 54, rea bala: “Ho shoang hona ho apare ho sa shoeng. ’me e tla re ha . . . ho shoang hona ho apere ho sa shoeng, ke moo polelo e ngoliloeng e tla phetheha, e itseng: Lefu le metsitsoe ke hlōlo.” Empa hlokomela hore ho se shoe ho’a ‘aparoa.’ Ke moputso oa Bakreste ba tšepahalang, ba khethiloeng. Hase ntho e ’ngoe eo batho bohle ba e jang lefa.

Ho feta moo, Bibele ha e bolele hore motho o na le kapa o fuoe moea. Ho e-na le hoo, e re: “Jehova Molimo a bōpa motho ka lerole la lefatše, ’me a bululela linkong tsa hae phefumoloho ea ho phela, ’me motho ea e-ba moea o phelang.” (Genese 2:7; bapisa le 1 Ba-Korinthe 15:45.) Ho ba le ntho e ’ngoe ho fapane hōle le ho ba ntho e ’ngoe. Ha ho motho ea ka hanyetsang ’nete ea hore ho ba ntja ho fapape le ho ba le ntja! Ka mokhoa o tšoanang, ho ba moea ho fapane le ho ba le moea.

Hore hase batho bohle ba fumanang mpho ea ho se shoe ho totobetse litšupisong tse ngata tsa Bibele tsa ho shoa ha moea. Ka mohlala: “Moea o etsang sebe ke oona o tla shoa.” (Ezekiele 18:4, 20) “Ruri, moea ofe kapa ofe o sa mameleng Moprofeta eo o tla timetsoa ka ho feletseng har’a sechaba.”—Liketso 3:23, NW.

Kaha ha re na meea e sa shoeng, ho etsahala eng ha re shoa? Re ea “robala,” ka lebaka la sehlabelo sa Kreste sa topollo ho na le tšepo ea tsoho. (1 Ba-Korinthe 15:22) Ha Lazaro a e-shoa Jesu o itse: “Ke ea mo tsosa borokong.” Eaba o ea hlalosa: “Lazaro o shoele.” (Johanne 11:11-14) Le Pauluse o boetse o buile ka bao “ba ithobaletseng.” (1 Ba-Thessalonika 4:13, 14; 1 Ba-Korinthe 15:20) Joale haeba bafu ba robetse . . .

Na ho Tla ba le Tsoho?

Nahana ka pono ena e makatsang: Letšoele le khobokane ka pel’a lehaha Bethani haufi le Jerusalema. Jesu o moo le Maria le Maretha, likhaitseli tsa Lazaro ea sa tsoa shoa ’me eo ’mele oa hae o leng ka lehaheng le koetsoeng ka lejoe. Jesu oa laela, “TIosang lejoe leo!” Maretha o-oa hanyetsa: “Morena, o se a nkha; hobane e se e le labone a le mona.” Empa kamor’a thapelo e khutšoanyane Jesu o-oa hoeletsa: “Lazaro, tsoa moo!” ’Me motho eo Lazaro o-oa tsoa! (Johanne 11:38-44) Na u ka nahana makalo le thabo ea letšoele leo—haholo-holo Maria le Maretha?

Haeba Lazaro o ne a ntse a phela matsatsing ao a mane, na a ka be a sa ka a senolela motho e mong le e mong seo? Empa ha ho tlaleho ea hore o buile ka phihlelo leha le efe ea ha a shoele, ’me ha e tsoela pele ho tiisa seo, Bibele e re, “Bafu ha ba tsebe letho leha le le leng.”—Moeklesia 9:5.

Taba ea Lazaro e ne e se e ikhethang. Sebakeng se seng se bitsoang Naine, Jesu o ile a kopana le mokoloko oa phupu ea mohlankana ea neng a il’o ho patoa. Jesu a re: “Mohlankana, ke re ho uena: Tsoha!” ’Me ha etsahala’ng? “Eaba mofu oa lula, a qala ho bua.” (Luka 7:11-17) Empa, le mona hape, na mohlankana eo o buile letho ka sebaka seo batho ba eang ho sona lefung? Che, hobane ka ho totobetseng o ne a ichoeletse feela.

Jesu, Pauluse, Petrose, Elija le Elisha kaofela ba ile ba tsosa batho ba shoeleng. Ha ho le ea mong oa bao ba neng ba shoele ea buileng letho ka bophelo kamor’a lefu.

Mehlolo ena e tsotehang e fana e sa le pele ka tatso ea tsela e le ’ngoe feela eo letšoelehali leo la ba shoeleng le ka phelang hape—ka ho tsosetsoa bophelong lefatšeng tlas’a ’Muso oa Molimo. Jesu o itse: “Se makaleng ke hoo; hobane nako ea tla, eo bohle ba mabitleng ba tla utloa lentsoe la [ka]; ’me ba tla tsoa ho ’ona.” (Johanne 5:28, 29) Eo e tla ba phihlelo e hlollang ka ho fetisisa ho bao ba tla tlotloa ka ho phela tlas’a puso ea ’Muso oa Kreste ea lilemo tse sekete, eo hona joale e seng e atametse hakana. (Tšenolo 20:4, 6) Tšepo ea tsoho ka boeona e paka hore ho ke ke ha etsahala hore e be bafu baa phela. Haeba batho ba tla tsosoa, ba tlameha hore pele ba hloke bophelo.

Ba Bang ka ba ’Na ba Botsa . . .

Empa ho thoe’ng ka linohe le ba bang ba bolelang hore ba amohela melaetsa e tsoang ho bafu? Na hoo ha ho pake hore bafu baa phela? Che. Satane o masene haholo, moqhekelli ea ka sehloohong eo hangata “a ikhakanyang joalo ka lengeloi la leseli.” (2 Ba-Korinthe 11:14, The New English Bible) Eena le mademona a hae baa khona, ’me hangata ba ikhakanya joaloka meea ea batho ba shoeleng! Ka hona, molao oa Jehova ho Iseraele o ile oa bolela ka ho hlakileng: “Leha e le ea botsang balimo . . . leha e le ea botsang bafu; hobane bohle ba etsang litaba tseo ba manyala ho Jehova.” (Deuteronoma 18:10-12) Jehova o boetse o bolela hore bao ba etsang bonohe “ba ke ke ba ba ba rua ’muso oa Molimo” empa ba tla felisoa.—Ba-Galata 5:19-21; Tšenolo 21:8.a

Ho thoe’ng ka bao ba bolelang hore ba bile le liphihlelo tsa lintšing tsa lefu? Na hoo ha ho pake hore moea (spirit) kapa moea (soul) o tsoa ’meleng lefung? George Gallup, e Monyenyane, mohlophisi oa boitsebiso ba likhetho tsa maikutlo a sechaba oa U.S., o hlahlobisitse taba ena ’me a hatisa seo a se fumaneng ho Adventures in Immortality. Lingaka le boramahlale bao ho ileng hoa buisanoa le bona ba ne ba belaella bonnete ba litlaleho tsa lintšing tsa lefu. Setsebi tharollong ea mathata a ’mele sa Maryland se itse: “Tsena ke liphihlelo tsa kelello boemong bo sa tloaelehang ba tšebetso ea eona . . . Boko ke setho se rarahaneng haholo ’me bo ka hlahisa lintho tse ngata tse thetsang ha u bo sebelisa hampe—talima liphihlelo tsa lithethefatsi tse susumetsang lipono tseo e seng tsa sebele.” Ngaka ea mafu a kelello ea Ohio: “Litlaleho tsena ke litoro kapa lipono tseo e seng tsa sebele.” Ramahlale oa Michigan: “Tsena ke litoro tse bakiloeng ke bohloko kapa khatello ea kelello.”

Gallup a fihlela qeto ea hore litlaleho tsa lintšing tsa lefu “ho hang ha li hlomamise ho ka nkoang e le bopaki ba ho se shoe kapa ba bophelo kamor’a lefu.” O’a eketsa: “E ka ’na ea ba feela lipono tse hlakileng tsa kelello tse bapaloang ka ho feletseng likelellong tsa bao ba opeloang ’meleng.” O boetse a hlahisa hore ba bang bao mehopolo ea bona e likolohang bolumeling ba ne ba ka hlalosa liphihlelo tse joalo e le “karolo ea boiteko ba bodemona ba ho qhekella batho.” Seo Jehova Molimo a se boletseng khale se ntse se lutse se le joalo: “Empa bafu ha ba tsebe letho leha le le leng.”—Moeklesia 9:5.

U Tšoanela ho Etsa Joang?

Hlokomela likhopolo le lithuto tse theiloeng leshanong la pele la Satane—“Ha e le ho shoa, le ke ke la shoa.” (Genese 3:1-5) Amohela seo Lentsoe la Molimo le se rutang, hore ha motho a e shoa “merero ea [hae] e felile.” (Pesaleme ea 146:4) Amohela hape hore bafu ba robetseng ba tla tsoha pusong e khanyang ea ’Muso oa Molimo, oo ba bangata ba o rapellang, moo “tsoho ea bafu e tla ba teng, ea ba lokileng le ea ba sa lokang.”—Liketso 24:15; Mattheu 6:9, 10.

Mosali ea neng a bonahala a kula ea boletsoeng sehloohong sa rōna sa pele o ile a thaba ha a bolelloa seo Molimo o se bolelang ka bafu le ka meea ea bademona e thetsang. O ile a senya lithatho tsa hae le lintho tse ling tse amanang le bonohe ’me kamor’a matsatsi a se makae a ikutloa a le molemonyana. Hona joale o thusa ba bang ho itokolla borapeling ba bodemona.

Mohlolohali ea ileng a lahleheloa ke baratuoa ba hae ho soahlamaneng ha sefofane o ile a tšelisoa ke khopolo ena: Kaha bafu ha ba tsebe letho, ho bona ha ho sa le nako. Ka hona ho ea ka bona ba tsoha hang paradeiseng ea lefatšeng tlas’a ’Muso oa Molimo! O thabela ho thusa ba bang ho tseba hore kapele “Jehova o tla felisa meokho lifahlehong tsohle.” (Esaia 25:8) O lebelletse letsatsi la ha, ka tsoho, baratuoa ba hae ba tla phela.

[Mongolo o botlaaseng ba leqephe]