Tsoelang Pele le Tsamaea Leseling le Leratong

Lintlha tse Khōlō tsa Johanne oa Pele

JEHOVA ke Mohloli oa leseli le lerato. Re lokela ho talima ho Molimo bakeng sa leseli la moea. (Pesaleme ea 43:3) ’Me lerato ke e ’ngoe ea litholoana tsa moea oa oona o halalelang.—Ba-Galata 5:22, 23.

Leseli, lerato, le lintho tse ling li tšohloa lengolong la pele le bululetsoeng la moapostola Johanne, leo mohlomong le ngolletsoeng Efese kapa haufi le eona hoo e ka bang ka 98 C.E. Lebaka le leholo la ho le ngola e ne e le ho sireletsa Bakreste bokoenehing le ho ba thusa ho tsoela pele ba tsamaea leseling. Kaha re talimane le liphephetso leratong la rōna, tumelong, le botšepehi ’neteng, ho nahanisisa ka lengolo lena ka sebele ho tla re ruisa molemo.

‘Tsamaeang Leseling’

Johanne o hlakisitse hore Bakreste ba tšepahalang ba tlameha ho tsamaea leseling la moea. (1:1–2:29) O itse: “Molimo o leseli, ’me ha ho lefifi ho oona le hanyenyane [ha ho bokhopo, boitšoaro bo bobe, hoo e seng ’nete, kapa ho sa halaleleng].” Kahobane Bakreste ba tlotsitsoeng ka moea ‘ba tsamaea leseling,’ ba na le “kopano” le Molimo, Kreste, le e mong ho e mong. Ba boetse ba hlatsoitsoe sebeng ke mali a Jesu.

Ho sa tsotellehe hore na re Bakreste ba tlotsitsoeng ba nang le tšepo ea leholimo kapa re lebelletse bophelo bo sa feleng lefatšeng, re tla tsoela pele ho fumana molemo sehlabelong sa Jesu feela haeba re rata baena ba rōna empa re sa rate lefatše. Re boetse re lokela ho qoba ho susumetsoa ke bakoenehi, ba kang “bo-antikreste,” ba latolang Ntate hammoho le Mora. ’Me le ka mohla re se lebale hore bophelo bo sa feleng bo tla thabeloa feela ke ba itšoarellang ’neteng ’me ba etsa ho lokileng.

Bana ba Molimo ba Bontša Lerato

Ka mor’a moo, Johanne o ile a tsebahatsa bana ba Molimo. (3:1–4:21, NW) Taba ea pele, ba etsa ho lokileng. Ba boetse ba utloa molao oa Jehova Molimo ‘oa hore ba be le tumelo lebitsong la Mora oa hae, Jesu Kreste, le hore ba ratane.’

Motho ka mong ea nang le “tsebo ea Molimo” o tseba merero ea Jehova le hore na lerato la Hae le bonahatsoa joang. Sena se lokela ho thusa motho ho bontša lerato. Ha e le hantle, “ea sa rateng ha a e-s’o ka a tseba Molimo, hobane Molimo ke lerato.” Lerato la bomolimo le bontšitsoe ha Molimo “o romela Mora oa oona joaloka sehlabelo sa topollo bakeng sa libe tsa rōna.” Haeba Jehova a re ratile ho isa bohōleng boo, re tlameha ho ratana. E, e mong le e mong ea bolelang hore o rata Molimo o boetse o tšoanetse ho rata moena oa hae oa moea.

Tumelo e ‘Hlōla Lefatše’

Lerato le susumelletsa bana ba Molimo ho mamela melao ea oona, empa ke ka tumelo ba ‘hlōlang lefatše.’ (5:1-21) Tumelo ea rōna ho Molimo, lentsoeng la oona, le ho Mora oa oona e etsa hore re khone ho ‘hlōla lefatše’ ka ho hanela menahano le litsela tsa lona tse fosahetseng le ka ho boloka melao ea Jehova. Molimo o file ‘bahlōli ba lefatše’ tšepo ea bophelo bo sa feleng ’me o utloa lithapelo tsa bona tse lumellanang le thato ea oona. Kahobane mang kapa mang ea “tsoetsoeng ke Molimo” ha aa tloaela ho etsa sebe, Satane ha a tšoare motho ea joalo. Empa batlotsuoa hammoho le bahlanka ba Jehova ba nang le tšepo ea lefatšeng ba lokela ho hopola hore ‘lefatše le rapaletse ka tlase ho e mobe.’

[Lebokose/Setšoantšo se leqepheng la 29]

Sehlabelo sa Topollo: Jesu “ke sehlabelo sa topollo bakeng sa libe tsa rōna [tsa balateli ba hae ba tlotsitsoeng], leha ho le joalo eseng tsa rōna feela empa le tsa lefatše kaofela,” moloko oa batho kaofela. (1 Johanne 2:2, NW) Lefu la hae e ne e le “topollo” (hi·la·smosʹ, ka Segerike, e bolelang “tsela ea ho khotsofatsa,” “tefello”) empa eseng ka kutloisiso ea ho kokobetsa ho hlabeha maikutlo ka lehlakoreng la Molimo. Ho e-na le hoo, sehlabelo sa Jesu se khotsofatsa litlhokahalo tsa toka ea bomolimo e phethahetseng. Joang? Ka ho fana ka motheo o nang le toka feela oa ho tšoarela libe, hore Molimo ‘e be o lokileng le o beang ea nang le tumelo [motho ea futsitseng boetsalibe] ho Jesu ea lokileng.’ (Ba-Roma 3:23-26; 5:12) Ka ho nehelana ka tsela ea ho khotsofatsa ka ho phethahetseng se hlokahalang bakeng sa libe tsa batho, sehlabelo sa Jesu se entse topollo, kapa hore ho lumellehe, hore motho a batle le ho fumana ho khutlisetsoa likamanong tse lokileng le Jehova. (Ba-Efese 1:7; Ba-Heberu 2:17) Kaofela ha rōna re lokela ho leboha hakaakang ka sena!