Lebaka Leo ka Lona ba Sebelisang Lireliki Borapeling
NAPLES, Italy. Ak’u inahane u le sebakeng sena mathoasong a lekholo la bo18 la lilemo la Mehla ea rōna e Tloaelehileng. Rafilosofi oa Ireland George Berkeley o eme ka pel’a reliki ea bolumeli e tsebahalang ka kerekeng ena. A tletse pelaelo, o talimme mali ao ho thoeng a fetoha mokeli-keli a “San Gennaro,” “mohalaleli” Januarius oa K’hatholike.
Naples ha e-ea fetoha hakaalo tabeng ena. Ka mohlala, ka lekhetlo le leng, ho sa tsotellehe boemo bo bobe ba leholimo lilemong tsa morao tjena, batho ba ne ba boetse ba subuhlellane kerekeng, ho ne ho etsahetse mohlolo. Batho ba ile ba amohela reliki ena le mokoloko o etelletsoeng pele ke moarekabishopo oa mok’hadinale ka litlatse tse mofuthu. E, lena e bile le leng la makhetlo a mangata ao ka ’ona ho ileng ha bonahala eka mali a “San Gennaro” a fetoha mokeli-keli. Ho tlalehoa hore mehlolo e amanang le lireliki tsena tsa bolumeli e ’nile ea etsahala ho tloha lekholong la bo14 la lilemo.
Ho latela neano ea K’hatholike, lentsoe la Senyesemane, relic (le tsoang Selatineng relinquere, le bolelang “ho siea ntho ka morao”) ke ntho eo motho ea nkoang e le mohalaleli a e siileng morao. Joalokaha Dizionario Ecclesiastico e hlalosa, ha e le hantle lireliki ke “’mele kapa karolo ea ’mele le molora oa Mohalaleli, ka kutloisiso e batsi, ke ntho e ileng ea thetsa ’mele oa mohalaleli ’me ka baka leo e tšoanela ho rapeloa.”
Tiiso ea Mopapa
Ntle ho pelaelo batho ba bangata ba hlompha lireliki tsa bolumeli ka baka la mehlolo e amahanngoang le tsona. Ho bonahala tiiso ea mopapa e le lebaka le leng le etsang hore li ratoe haholo. Bonyane lilemong tse 70 tse fetileng bapapa ba bane ba ile ba lebisa tlhokomelo e khethehileng ho lireliki. Koranta ea K’hatholike e senola hore Mopapa Pius XII ho tšoana le Pius XI ea tlileng pele ho eena, “o ile a ipolokela lireliki tsa mohalaleli Lisieux.” Paul VI “o ile a boloka monoana oa moapostola [Thomase] holim’a deske kamoo a ithutelang ka teng,” ’me John Paul II “ka kamoreng ea hae, o bolokile likotoana tsa . . . mesaletsa” ea “Mohalaleli Benedict” le “Mohalaleli Andrew.”—30 giorni, March 1990, leqephe 50.
Ka baka la tiiso e joalo ea mopapa, ha ho makatse hore ho rapela lireliki sephiring le pontšeng ho ntse ho eketseha. Empa na ho rapela lireliki tsa bolumeli ho thabisa Molimo?
[Setšoantšo se leqepheng la 3]
Sebaka seo ho bolokoang lireliki tsa bolumeli ho sona, tempele
[Tlhaloso ea Moo Setšoantšo se Nkiloeng Teng]
Courtesy of The British Museum