Sebeletsa Jehova ka Botšepehi
“Ho ea tšepahalang, uena [Jehova] u tla nka bohato ka botšepehi.”—2 SAMUELE 22:26, NW.
1. Jehova o etsa joang ho ba tšepahalang ho eena?
JEHOVA a ke ke a lefuoa bakeng sa lintho tsohle tseo a li etsetsang batho ba hae. (Pesaleme ea 116:12) Limpho tsa hae tsa moea le tsa lintho tse bonahalang hammoho le mosa oa hae o bonolo li hlolla hakaakang! Morena Davida oa Iseraele ea boholo-holo o ne a tseba hore Molimo o boetse o nka khato ka botšepehi ho ba tšepahalang ho eena. Davida o buile sena pineng eo a ileng a e qapa “letsatsing leo Jehova a ileng a mo lopolla letsohong la lira tsohle tsa hae le letsohong la [Morena] Saule.”—2 Samuele 22:1, NW.
2. Lintlha tse ling tse boletsoeng pineng ea Davida e tlalehiloeng ho 2 Samuele khaolo 22 ke life?
2 Davida o ile a qala pina ea hae (e tšoanang le Pesaleme ea 18) ka ho rorisa Jehova joaloka “monamoleli” ha a arabela thapelo. (2 Samuele 22:2-7) Molimo a le teroneng ea hae ea leholimo, o ile a nka khato ho lopolla mohlanka oa hae ea tšepahalang lireng tse matla. (Litemana 8-19) Ka hona Davida o ile a putsoa bakeng sa ho phehella tsela e lokileng le ho boloka litsela tsa Jehova. (Litemana 20-27) Hamorao o ile a thathamisa liketso tseo a li entseng ka matla ao a a filoeng ke Molimo. (Litemana 28-43) Qetellong Davida a bua ka ho lopolloa ho batho ba sa khotsofaleng ba habo le lireng tsa lichaba tse ling ’me a leboha Jehova hobane e le “Ea etsang liketso tse khōlō tsa poloko ho morena oa hae le ea bontšang mosa o lerato ho motlotsuoa oa hae.” (Litemana 44-51, NW) Le rōna Jehova a ka re lopolla haeba re phehella tsela e lokileng ’me re itšetleha ka eena bakeng sa matla.
Seo ho Tšepahala ho se Bolelang
3. Ho tsoa ponong ea litaba ea Mangolo, ho tšepahala ho bolela eng?
3 Pina ea Davida ea topollo e re fa tiisetso e tšelisang: “Ho ea tšepahalang uena [Jehova] u tla nka khato ka botšepehi.” (2 Samuele 22:26, NW) Ke lekhethi la Seheberu cha·sidhʹ le bolelang “motho ea tšepahalang,” kapa “ea nang le mosa o lerato.” (Pesaleme ea 18:25 NW, mongolong o botlaaseng ba leqephe) Lereho cheʹsedh le na le khopolo ea mosa oo ka lerato o ikatametsang nthong e itseng ho fihlela ha morero oa oona mabapi le eona o phethahetse. Jehova o bontša mosa oa mofuta ona ho bahlanka ba hae, joalokaha le bona ba o bontša ho eena. Botšepehi bona bo lokileng, bo halalelang bo fetoleloa e le “mosa o lerato” le “lerato le tšepahalang.” (Genese 20:13, NW; 21:23, NW) Mangolong a Segerike, “botšepehi” bo na le khopolo ea khalalelo le tlhompho, tse bontšoang ke lereho ho·si·oʹtes le lekhethi hoʹsi·os. Botšepehi bo joalo bo akareletsa botšepehi le boinehelo ’me bo bolela ho tiea le ho phetha mesebetsi eohle ea Molimo ka hloko. Ho tšepahala ho Jehova ho bolela ho mo khomarela ka boinehelo bo matla hoo bo sebetsang joaloka sekhomaretsi se matla.
4. Botšepehi ba Jehova bo bontšoa joang?
4 Botšepehi ba Jehova bo bonahatsoa ka litsela tse ngata. Ka mohlala, o nka khato ea boahloli khahlanong le ba khopo ka baka la lerato le tšepahalang le bakeng sa batho ba hae le botšepehi tokeng le ho lokeng. (Tšenolo 15:3, 4; 16:5) Botšepehi selekaneng sa hae le Abrahama bo ile ba mo susumeletsa hore a bontše mamello ho Baiseraele. (2 Marena 13:23) Ba tšepahalang ho Molimo ba ka tšepa thuso ea hae ho fihlela qetellong ea tsela ea bona e tšepahalang ’me ba ka kholiseha hore o tla ba hopola. (Pesaleme ea 37:27, 28; 97:10) Jesu o ile a matlafatsoa ke ho tseba hore joaloka “motšepehi” ea ka sehloohong oa Molimo, sephefumolohi sa hae se ne se ke ke sa tlohelloa Sheol.—Pesaleme ea 16:10, NW; Liketso 2:25, 27, NW.
5. Kaha Jehova oa tšepahala, o hloka eng ho bahlanka ba hae, hona ho tla nahaneloa potso efe?
5 Kaha Jehova Molimo oa tšepahala, o hloka hore bahlanka ba hae ba tšepahale. (Ba-Efese 4:24) Ka mohlala, banna ba tlameha ho tšepahala hore ba tšoanelehe ho khethoa joaloka baholo ba phutheho. (Tite 1:8) Ke mabaka afe a lokelang ho susumeletsa batho ba Jehova hore ba mo sebeletse ka botšepehi?
Kananelo Bakeng sa Lintho Tse Ithutiloeng
6. Re lokela ho ikutloa joang ka lintho tsa Mangolo tseo re ithutileng tsona, hona re tlameha ho hopola eng ka tsebo e joalo?
6 Kananelo bakeng sa lintho tsa Mangolo tseo re ithutileng tsona e lokela ho re susumeletsa ho sebeletsa Jehova ka botšepehi. Moapostola Pauluse o ile a phehella Timothea: “U eme ho tseo u ithutileng tsona, tseo u li tiiselitsoeng, u ntse u tseba eo u ithutileng tsona ho eena; etsoe le bonyenyaneng ba hao u hlile ua tseba Mangolo a Halalelang, a lokelang ho u hlalefisetsa ho bolokeha, ka ho lumela ho Jesu Kreste.” (2 Timothea 3:14, 15) Hopola hore tsebo e joalo e ne e tsoa ho Molimo ka “mohlanka ea khabane, ea bohlale.”—Mattheu 24:45-47.
7. Baholo ba lokela ho ikutloa joang ka lijo tsa moea tse fanoang ke Molimo ka mohlanka ea khabane?
7 Ka ho khetheha baholo ba lokela ho ananela lijo tsa moea tse ōtlang tse fanoang ke Molimo ka mohlanka ea khabane. Lilemong tse fetileng baholo ba ’maloa ba ne ba haelloa ke kananelo e joalo. Mosali e mong o ile a hlokomela hore banna bana ba ne “ba nyatsa-nyatsa lihlooho tse ho Molula-Qhooa, ba sa batle ho o nka joaloka . . . mocha oo Molimo a fetisang ’nete ka ’ona, ba leka ka linako tsohle ho susumetsa ba bang ka mokhoa oa bona oa ho nahana.” Leha ho le joalo, baholo ba tšepahalang ha ho mohla ba lekang ho susumeletsa ba bang ho re ba hane lijo tsa moea tse fanoang ke Molimo ka mohlanka ea khabane.
8. Ho thoe’ng haeba re sa utloisise hantle ntlha e itseng ea Mangolo e fanoeng ke mohlanka ea khabane le ea bohlale?
8 Joaloka Lipaki tse inehetseng tsa Jehova, kaofela ha rōna re tlameha ho tšepahala ho eena le ho mokhatlo oa hae o hlophisitsoeng. Le ka mohla ha rea lokela le ho nahana feela ho fapoha leseling le hlollang la Molimo, re phehelle tsela ea bokoenehi e ka isang lefung la moea hona joale ’me qetellong ea fella ka timetso. (Jeremia 17:13) Empa ho thoe’ng haeba ho le thata hore re amohele kapa re utloisise ka ho felletseng ntlha e itseng ea Mangolo e fanoeng ke mohlanka ea khabane? Ka boikokobetso re hlokomele hore na re ithutile ’nete hokae ’me re rapelle bohlale ba ho sebetsana le teko ena ho fihlela e fela ha ho phatlalatsoa lintlha tse e hlakisang.—Jakobo 1:5-8.
Ananela Mokhatlo oa Bokreste oa Baena
9. Johanne oa Pele khaolo 1:3-6 e bontša joang hore Bakreste ba lokela ho ba le moea oa botsoalle?
9 Kananelo e tsoang botebong ba pelo bakeng sa moea oa botsoalle o teng ka mokhatlong oa rōna oa Bokreste oa baena e boetse e fana ka tšusumetso e ’ngoe ea hore re sebeletse Jehova ka botšepehi. Ha e le hantle, kamano ea rōna le Molimo le Kreste e ke ke ea ba e tiileng moeeng ha moea ona o le sieo. Moapostola Johanne o ile a bolella Bakreste ba tlotsitsoeng hore: “See re se boneng, see re se utloileng ke sona seo re le bolellang sona, hore le lōna le tle le be le kopano [“botsoalle,” Diaglott] le rōna; ’me kopano ea rōna re na le eona le Ntate, le Mora oa hae Jesu Kreste. . . . Ha re bolela hore re na le kopano le oona, athe re tsamaea lefifing, teng re leshano, ’me ha re etse ka ’nete.” (1 Johanne 1:3-6) Molao-motheo ona o sebetsa ho Bakreste bohle, ebang tšepo ea bona ke ea leholimo kapa ea lefatše.
10. Le hoja Evodia le Syntyke kamoo ho bonahalang ka teng ba ne ba na le bothata ba ho rarolla bothata ba botho, Pauluse o ile a talima basali baa joang?
10 Ho hlokahala boiteko ho boloka moea oa botsoalle. Ka mohlala, basali ba Bakreste Evodia le Syntyke kamoo ho bonahalang ka teng ba ile ba thatafalloa ke ho rarolla bothata boo ba neng ba na le bona. Ka hona Pauluse o ile a ba khothatsa hore “ba be le pelo e le ’ngoe Moreneng.” O ile a eketsa: “Le uena, molekan’a ka oa sebele jokong, kea u rapela, ke re, u thuse basali bao ba ntlatsitseng Evangeling, ba e-na le Klemense, le ba-ntšebelisi ba bang, bao mabitso a bona a ngoliloeng bukeng ea bophelo.” (Ba-Filippi 4:2, 3) Basali bao ba tšabang Molimo ba ne ba ile ba loana ba bapile le Pauluse le ba bang “evangeling,” ’me o ne a kholisehile hore ba ne ba le har’a “bao mabitso a bona a ngoliloeng bukeng ea bophelo.”
11. Haeba Mokreste ea tšepahalang a hlaheloa ke bothata ba moea, e ka ba ho loketseng ho hopola eng?
11 Bakreste ha ba behe matšoao liaparong tsa bona a bontšang litokelo tseo ba nang le tsona mokhatlong o hlophisitsoeng oa Jehova le kamoo ba mo sebelelitseng ka botšepehi ka teng. Haeba ba e-na le bothata ba moea, e ne e tla ba ho hloka lerato hakaakang ho hlokomoloha lilemo tseo ba li qetileng ba sebeletsa Jehova ka botšepehi! Ho ka etsahala hore ea neng a bitsoa “molekan’a ka oa sebele jokong” e ne e le moena ea tšepahalang ea neng a chesehela ho thusa ba bang. Haeba u moholo, na u ‘molekane oa sebele,’ ea ikemiselitseng ho thusa ka tsela e bontšang kutloelo-bohloko? E se eka bohle re ka hlokomela molemo o etsoang ke balumeli-’moho, joalokaha Molimo a o hlokomela, ’me ka lerato re ba thuse hore ba jare meroalo ea bona.—Ba-Galata 6:2, NW; Ba-Heberu 6:10.
Ha ho Moo re ka Eang
12. Ha lipolelo tsa Jesu li ne li etsa hore ‘barutuoa ba bangata ba khutlele linthong tse neng li setse morao,’ Petrose o ile a nka boemo bofe?
12 Re tla susumeletseha ho sebeletsa Jehova ka botšepehi le mokhatlo oa hae o hlophisitsoeng haeba re hopola hore ha ho moo re ka eang bakeng sa bophelo bo sa feleng. Ha lipolelo tsa Jesu li ne li etsa hore ‘barutuoa ba bangata ba khutlele linthong tse neng li setse morao,’ o ile a botsa baapostola ba hae: “Na le lōna le rata ho ikela na?” Petrose o ile a araba: “Morena, re ka ea ho mang? ke uena ea nang le mantsoe a bophelo bo sa feleng. ’Me re lumetse, ra ba ra tseba hobane ke uena Kreste, Mokhethoa oa Molimo.”—Johanne 6:66-69.
13, 14. (a) Ke hobane’ng ha tsamaiso ea Sejode ea lekholong la pele la lilemo e ne e sa amoheloe ke Molimo? (b) Paki e ’ngoe ea Jehova ea nako e telele e ile ea re’ng ka mokhatlo o hlophisitsoeng o bonahalang oa Molimo?
13 “Mantsoe a bophelo bo sa feleng” ha a ka a fumanoa tsamaisong ea Sejode ea lekholong la pele la lilemo C.E. Sebe sa eona se seholo e bile ho latola hore Jesu ke Messia. Mekhoeng eohle tsamaiso ea Sejode e ne e sa thehoa Mangolong a Seheberu ka ho feletseng. Basadduci ba ne ba latola boteng ba mangeloi hape ba sa lumele tsoho. Le hoja Bafarisi ba ne ba sa lumellane le bona tabeng ena, ba ile ba etsa sebe ka ho etsa Lentsoe la Molimo lefeela ka lineano tsa bona tseo eseng tsa Mangolo. (Mattheu 15:1-11; Liketso 23:6-9) Lineano tsena li ile tsa etsa Bajode makhoba ’me tsa thatafaletsa ba bangata hore ba amohele Jesu Kreste. (Ba-Kolosse 2:8) Ho chesehela ‘mekhoa ea bo-ntat’ae’ ho ile ha etsa hore Saule (Pauluse) ka baka la ho hloka tsebo a hlorise ka sehlōhō balateli ba Kreste.—Ba-Galata 1:13, 14, 23.
14 Tsamaiso ea Sejode e ne e sa amoheloe ke Molimo, empa Jehova o ile a hlohonolofatsa mokhatlo o hlophisitsoeng o neng o entsoe ka balateli ba Mora oa hae—‘batho ba chesehelang mesebetsi e metle.’ (Tite 2:14) Mokhatlo oo o hlophisitsoeng o sa ntse o le teng, ’me Paki ea Jehova ea nako e telele e ile ea re ka ’ona: “Haeba ho bile le ntho e leng bohlokoa ho ’na, e bile taba ea ho lula haufi le mokhatlo o hlophisitsoeng oa Jehova. Phihlelo ea ka ea pejana e nthutile kamoo ho seng molemo ka teng ho itšetleha ka monahano oa motho. Hang feela ha ke etsa qeto eo khopolong ea ka, ke ile ka ikemisetsa ho lula ka mokhatlong o hlophisitsoeng. Ke joang motho a ka fumanang kamohelo ea Jehova le tlhohonolofatso ea hae ha e se hore a etse joalo?” Ha ho moo re ka eang teng bakeng sa ho fumana kamohelo ea Molimo le bophelo bo sa feleng.
15. Ke hobane’ng ha re lokela ho sebelisana-’moho le mokhatlo o hlophisitsoeng o bonahalang oa lefatšeng oa Jehova le ba fuoeng boikarabelo ka ho ’ona?
15 Lipelo tsa rōna li lokela ho re susumeletsa ho sebelisana-’moho le mokhatlo o hlophisitsoeng oa Jehova hobane rea tseba hore ke oona feela o tataisoang ke moea oa hae le o tsebahatsang lebitso la hae le merero ea hae. Ha e le hantle, ba nang le boikarabelo ka hare ho oona ha baa phethahala. (Ba-Roma 5:12) Empa ‘khalefo ea Jehova e ile ea tukela’ Aarone le Miriame ha ba tšoaea Moshe liphoso ’me ba lebala hore eena, eseng bona, o ne a filoe boikarabelo ke Molimo. (Numere 12:7-9) Kajeno, Bakreste ba tšepahalang ba sebelisana-’moho le “ba etelletseng pele” hobane ke se hlokoang ke Jehova. (Ba-Heberu 13:7, 17, NW) Bopaki ba botšepehi ba rōna bo akareletsa ho ba teng ka mehla libokeng tsa Bokreste le ho fana ka litlhaloso tse ‘susumeletsang ba bang leratong le mesebetsing e metle.’—Ba-Heberu 10:24, 25, NW.
E-ba ea Hahang
16. Ke takatso ea ho etsetsa ba bang eng e boetseng e tla re susumeletsa ho sebeletsa Jehova ka botšepehi?
16 Takatso ea ho haha ba bang e boetse e lokela ho re susumeletsa ho sebeletsa Jehova ka botšepehi. Pauluse o ile a ngola: “Tsebo e baka boikhohomoso, empa lerato lea haha.” (1 Ba-Korinthe 8:1, NW) Kaha tsebo ea mofuta o itseng e ile ea etsa hore ba nang le eona ba ikhohomose, e tlameha ebe Pauluse o ne a bolela hore lerato le lona le haha ba bontšang tšoaneleho eo. Buka e ngotsoeng ke Liprofesa Weiss le English e re: “Motho ea nang le boikutlo ba ho bontša lerato hangata oa ratuoa. Boikutlo ba ho atolosetsa molemo le ho nahanela litšobotsing tsohle tsa bophelo . . . bo na le phello e hahang ho motho ea atolosang maikutlo a joalo haesita le ho motho ea a amohelang ’me ka hona a ba tlisetsa thabo ka bobeli.” Ka ho bontša lerato, rea ikaha ebile re haha le ba bang, joalokaha ho bontšitsoe ke mantsoe a Jesu: “Ho nea ke leseho le fetisang la ho fuoa.”—Liketso 20:35.
17. Lerato le haha joang, hona ke eng eo le tla re thibela ho e etsa?
17 Ho 1 Ba-Korinthe 8:1 Pauluse o sebelisitse lentsoe la Segerike a·gaʹpe, le bolelang lerato le laoloang ke melao-motheo. Lea haha, hobane lea mamella ’me le mosa, le jara lintho tsohle, le mamella lintho tsohle, ’me ha le hlōlehe le ka mohla. Lerato lena le tlosa maikutlo a senyang, a kang boikhohomoso le mōna. (1 Ba-Korinthe 13:4-8) Lerato le joalo le tla re boloka hore re se belaele ka baena ba rōna, ba sa phethahalang joaloka rōna. Le tla re thibela hore re se tšoane le “batho ba sa tšabeng Molimo” ba ileng ba “khukhunela” har’a Bakreste ba ’nete ba lekholong la pele la lilemo. Batho bana ba ne ba “nyefola ba beiloeng boholong,” ’me ba nyelisa ba khanyang, ka ho totobetseng ba bua hampe batho ba kang balebeli ba tlotsitsoeng ba Bakreste ba neng ba fuoe khanya e itseng. (Juda 3, 4, 8, NW) E le ha re bontša botšepehi ho Jehova, le ka mohla re se ke ra inehela tekong ea ho etsa leha e le eng e tšoanang.
Hanela Diabolose!
18. Satane o rata ho etsa eng ka batho ba Jehova, empa ke hobane’ng ha a ke ke a etsa joalo?
18 Tsebo ea hore Satane o batla ho senya bonngoe ba rōna kaha re le batho ba Molimo e lokela ho eketsa boikemisetso ba rōna ba ho sebeletsa Jehova ka botšepehi. Satane a ka rata le ho felisa batho bohle ba Molimo, ’me bahlanka ba Diabolose ba lefatšeng ka linako tse ling ba bolaea barapeli ba ’nete. Empa Molimo a ke ke a lumella hore Satane a ba bolaee kaofela. Jesu o ile a shoa “hore a felise ka lefu la hae ea nang le ’muso oa lefu, ke ho re, Diabolose.” (Ba-Heberu 2:14) Sebaka seo Satane a sebelisang matla a hae ho sona se ile sa fokotseha haholo-holo ho tloha ha a lelekoa leholimong ka mor’a hore Kreste e be Morena ka 1914. ’Me ka nako e loketseng ea Jehova, Jesu o tla felisa Satane le mokhatlo oa hae.
19. (a) Ke temoso efe ka boiteko ba Satane eo makasine ona o ileng oa fana ka eona lilemong tse ngata tse fetileng? (b) E le ho qoba maraba a Satane, re lokela ho hlokomela eng ha re sebelisana le balumeli-’moho?
19 Makasine ona o kile oa lemosa: “Haeba Satane, diabolose, a khona ho baka pherekano har’a batho ba Molimo, a khona ho etsa hore ba be le phapang ’me ba loantšane, kapa ba bonahatse boikutlo ba boithati bo ka etsang hore lerato le fele har’a baena, ka hona o tla atleha ho ba harola.” (The Watch Tower, May 1, 1921, leqephe 134) Re se ke ra lumella hore Diabolose a felise bonngoe ba rōna, mohlomong ka ho re etsa hore re bue hampe ka ba bang kapa re loantšane. (Levitike 19:16) E se eka le ka mohla Satane a ke ke a re thetsa ka tsela e joalo hoo re ka utloisang ba sebeletsang Jehova ka botšepehi bohloko kapa ra etsa hore ba thatafalloe ke bophelo. (Bapisa le 2 Ba-Korinthe 2:10, 11.) Ho e-na le hoo, a re sebeliseng mantsoe a Petrose: “Le tsohe masene, le falimehe; hobane Diabolose, e leng sera sa lōna, o ntse a lika-lika joale ka tau e purumang, e batlang eo e ka mo jang. Hanang ho eena ka ho tiea tumelong.” (1 Petrose 5:8, 9) Ka ho nka khato e tiileng khahlanong le Satane, re ka boloka bonngoe ba rōna bo hlohonolofetseng joaloka batho ba Jehova.—Pesaleme ea 133:1-3.
Itšetlehe ho Molimo ka Thapelo
20, 21. Ho itšetleha ho Jehova ka thapelo ho amana joang le ho mo sebeletsa ka botšepehi?
20 Ho itšetleha ho Molimo ka thapelo ho tla re thusa ho tsoela pele re sebeletsa Jehova ka botšepehi. Ha re hlokomela hore o araba lithapelo tsa rōna, re atametsoa haholoanyane ho eena. Ho itšetleha ho Jehova Molimo ka thapelo ho ile ha khothaletsoa ke moapostola Pauluse ha a ne a ngola: “Ke fela ke rata hoba banna ba rapele kahohle, ba phahamise matsoho a masoeu, ho se bohale le khang.” (1 Timothea 2:8) Ka mohlala, ho bohlokoa hakaakang hore baholo ba itšetlehe ho Molimo ka thapelo! Pontšo e joalo ea botšepehi ho Jehova ha ba kopane ho buisana ka litaba tsa phutheho e tla ba thusa ho qoba likhang tse sa feleng le ho halefelana ho ka ’nang ha ba teng.
21 Ho itšetleha ho Jehova Molimo ka thapelo ho re thusa ho hlokomela litokelo tšebeletsong ea hae. Monna ea ileng a sebeletsa Jehova ka mashome a lilemo o ile a re: “Ho amohela ha rōna ka ho rata kabelo leha e le efe eo re e fuoang mokhatlong oa Molimo o hlophisitsoeng oa lefatše ka bophara, le ho lula likabelong tsa rōna, re sa sisinyehe, ho etsa hore Molimo a amohele boiteko ba rōna bo tiileng. Esita le haeba mosebetsi oo re o abetsoeng o ka bonahala o le tlaase, hangata ho fumaneha hore ha e ne e se ka ho phethoa ha mosebetsi oo o tlaase, mesebetsi e meng e ne e ke ke ea phethoa. Ka hona, haeba re ikokobelitse ’me re thahasella ka ho tobileng ho tlotlisa lebitso la Jehova eseng la rōna, re ka kholiseha hore ka mehla re tla ‘tiea, re sa sisinyehe, re e-na le ho eketsehileng hoo re ka ho etsang mosebetsing oa Jehova.’”—1 Ba-Korinthe 15:58, NW.
22. Tlhohonolofatso e ngata ea Jehova e lokela ho ama botšepehi ba rōna joang?
22 Ha e le hantle, ho sa tsotellehe hore na re etsa eng tšebeletsong ea Jehova, re ke ke ra mo buseletsa letho bakeng sa sohle seo a re etselitseng sona. Re sireletsehile hakaakang ka mokhatlong o hlophisitsoeng oa Molimo, re pota-potiloe ke batho bao e leng metsoalle ea hae! (Jakobo 2:23) Jehova o re hlohonolofalitse ka bonngoe bo tsoang leratong la boena le tebileng hoo le Satane a ke keng a le tsomula. Ka hona, a re khomareleng Ntate oa rōna ea tšepahalang oa leholimo ’me re sebetse ’moho joaloka batho ba hae. Hona joale le ka ho sa feleng, a re sebeletseng Jehova ka botšepehi.
U ne U Tla Arabela Joang?
◻ Ho tšepahala ho bolela eng?
◻ Ke lintho life tse ling tse lokelang ho re susumeletsa ho sebeletsa Jehova ka botšepehi?
◻ Ke hobane’ng ha re tlameha ho hanela Diabolose?
◻ Thapelo e ka re thusa joang hore re be bahlanka ba tšepahalang ba Jehova?
[Setšoantšo se leqepheng la 23]
Bahlanka ba tšepahalang ba Jehova ha ba lumelle hore Sera sa bona se kang tau, Diabolose, se senye bonngoe ba bona