Jehova—Molimo oa ’Nete le ea Phelang
FARO oa Egepeta o ne a bua ka ho phephetsa le ho se hlomphe ha a ne a botsa: “Jehova ke mang?” (Exoda 5:2) Joalokaha ho bontšitsoe sehloohong se ka pele, boikutlo boo bo ile ba tlisa likotlo le lefu ho Baegepeta, ho akareletsa le lebitla la metsi bakeng sa Faro le mabotho a hae a sesole.
Egepeta ea boholoholo, Jehova Molimo o ile a paka ho phahamela ha hae melimo ea bohata. Empa ho na le ho hongata ho ka ithutoang ka eena. Likarolo tse ling tsa botho ba hae ke life? ’Me o lebeletse eng ho rōna?
Lebitso la Hae le Botumo
Ha Moshe a ne a bolella Faro oa Egepeta seo a neng a se batla, ha aa ka a re: ‘Morena o re tjena le tjena.’ Faro le Baegepeta ba bang ba ne ba nahana hore melimo ea bona e mengata ke marena. Che, Moshe o ile a sebelisa lebitso la Molimo, Jehova. O ile a le utloa le boleloa ho tsoa holimo ha a ne a le sehlahleng se chang naheng ea Midiane. Tlaleho e bululetsoeng e re:
“Molimo oa bua le Moshe, oa re ho eena: Ke ’na Jehova. . . . Ke bile ke utloile ho lumaela ha bana ba Iseraele, kamoo ba-Egepeta ba ba entseng makhoba kateng, ’me ke hopotse selekane sa ka. Ka baka lena, e-reng ho bana ba Iseraele: Ke ’na Jehova, ke tla le jarolla boima ba ba-Egepeta, ke le loele litlamong tsa bona, ke le lopolle ka letsoho le otlolohileng, le ka likahlolo tse kholo. Ke tla inkela lōna le be sechaba sa ka, ke be Molimo oa lōna, ’me le tla tseba hobane ke ’na Jehova, Molimo oa lōna, ea le jarollang boima ba ba-Egepeta. Ke tla le isa naheng [ea Kanana] eo ke emisitseng letsoho la ka, ka re, ke tla e neha [bo-ntate-moholo ba lōna,] Abrahama le Isaaka le Jakobo; ke tla le nea eona, e be lefa la lōna; ke ’na Jehova.”—Exoda 6:1-8.
Jehova o hlile a etsa joalo. O ile a lokolla Baiseraele botlamuoeng Egepeta ’me a etsa hore ba hahe naheng ea Kanana. Joalokaha a tšepisitse, Molimo o ile a etsa hore sena sohle se etsahale. Ke ho tšoanelehang hakaakang! Lebitso la hae, Jehova, le bolela “Ea Etsang hore ho Etsahale.” Bibele e bitsa Jehova ka litlotla tse kang “Molimo,” “Morena ea Phahameng ka ho Fetisisa,” “’Mōpi,” “Ntate,” “Ea Matla ’Ohle,” le “Ea Phahameng ka ho Fetisisa.” Leha ho le joalo, lebitso la hae Jehova le khetholla Molimo oa ’nete joaloka eo ka ho tsoelang pele a phethahatsang merero ea hae e meholo.—Esaia 42:8.
Haeba re ne re bala Bibele ka puo ea pele, re tla fumana lebitso la Molimo ka makhetlo a likete. Ka Seheberu le emeloa ke lituma-nosi tse ’nè Yod He Waw He (יהוה), tse bitsoang Tetragrammaton, e baloang ho tsoa letsohong le letona ho ea ho le letšehali. Ba buang Seheberu ba ne ba fana ka melumo ea lituma-’moho, empa kajeno batho ha baa tiiseha hore na e ne e le life. Ha ba bang ba rata ho ngoloa ha Yahweh, Jehova e tloaelehile ’me e tsebahatsa ’Mōpi oa rōna hantle.
Tšebeliso ea lebitso Jehova e arohanya Molimo ho ea bitsoang “Morena oa ka” ho Pesaleme ea 110:1, moo phetolelo e ’ngoe e leng: “MORENA [Seheberu, יהוה] o itse ho Morena oa ka, Lula letsohong la ka le letona, ho fihlela ke beha lira tsa hao bonamelong ba maoto a hao.” (King James Version) Bibele ea Sesotho ha e bontša ho hlaha ha lebitso la Molimo mona lengolong la Seheberu, e re: “Jehova o itse ho Morena oa ka: Lula letsohong la ka le letona, ke tle ke be ke bee bao e leng lira ho uena bonamelo ba maoto a hao.” Mantsoe ao a Jehova Molimo a boprofeta a sebetsa ho Jesu Kreste, eo mongoli oa pesaleme ena a ’mitsang “Morena oa ka.”
Jehova o ile a iketsetsa lebitso mehleng ea Faro. A sebelisa Moshe, Molimo o ile a bolella ’musi eo ea pelo e thata: “Hobane ka lekhetlo lena ke tla romela likotsi tsohle tsa ka pelong ea hao, le holim’a bahlanka ba hao, le holim’a sechaba sa hao, hore u tle u tsebe hobane ha ho ea tšoanang le ’na lefatšeng lohle. Hobane hojane ke otlolotse letsoho la ka, ka u otla, uena le sechaba sa hao, ka lefu le akaretsang, u ka be u timetse lefatšeng. Empa ke u tloheletse hona hoo, ke bonahatse matla a ka ka uena, le hore lebitso la ka le tume lefatšeng lohle.”—Exoda 9:14-16.
Mabapi le phallo ea Baiseraele Egepeta le ho hlōloa ha marena a itseng a Bakanana, Rahaba mosali oa Jeriko o ile a re ho lihloela tse peli tsa Baheberu: “Kea tseba hobane Jehova o le [Baiseraele] neile lefatše, ’me letsoso la lōna le re oetse holimo, ’me bohle ba ahileng lefatšeng lena ba tepeletse pel’a lōna. Hobane re utloile kamoo Jehova a omisitseng metsi a Leoatle le Lefubelu pel’a lōna, mohla le tsoang Egepeta, le kamoo le entseng ho marena a mabeli a ba-Amore, ba mose oane oa Jordane, e leng Sihone le Oge, bao le ba timelitseng. Eitse hobane re utloe, ra nyahama lipelo; meea ea rōna kaofela ea khathala pel’a lōna, hobane Jehova, Molimo oa lōna, ke Molimo holimo leholimong, le tlase lefatšeng.” (Joshua 2:9-11) E, botumo ba Jehova bo ne bo tletse hohle.
Jehova le Litšoaneleho tsa Hae
Mopesaleme o ile a hlahisa takatso ea hae e tsoang pelong: “Ba tle ba tsebe hore uena, eo lebitso la hao e leng Jehova, u rena u ’notši lefatšeng lohle.” (Pesaleme ea 83:18) Kaha bobusi ba Jehova ke ba bokahohle, balateli ba Jesu ba hlorisoang ba ne ba ka rapela: “Oho, Morena, ke uena Molimo o entseng leholimo, le lefatše, le leoatle, le tsohle tse ho ’ona.” (Liketso 4:24) ’Me ho khothatsa hakaakang ho tseba hore Jehova ke “Ea utloang merapelo”!—Pesaleme ea 65:2.
Tšoaneleho e khōlō ea Jehova ke lerato. Ka sebele, “Molimo ke lerato”—mothofatso oa tšoaneleho ena. (1 Johanne 4:8, NW) Ho feta moo, “ho oona . . . ho lutse bohlale le matla.” Jehova o bohlale bohle ’me o matla ’ohle, empa ha ho mohla a sebelisang matla a hae hampe. (Jobo 12:13; 37:23) Le rōna re ka kholiseha hore ka mehla Jehova o tla sebetsana le rōna ka toka, hobane “ho loka le kahlolo ke motheo oa terone ea hae.” (Pesaleme ea 97:2) Haeba re etsa phoso empa re baka, re ka khothatsoa ke tsebo ea hore Jehova ke “Molimo o mohau, o lereko, o liehang ho halefa, o tletseng mohau le ’nete.” (Exoda 34:6) Ha ho makatse hore re ka thaba ha re sebeletsa Jehova!—Pesaleme ea 100:1-5.
Morena oa Leholimo ea ke Keng a Lekanngoa
Mor’a Jehova, Jesu Kreste, o itse: “Molimo ke Moea.” (Johanne 4:24) Kahoo, Jehova ha a bonahale mahlong a batho. Ha e le hantle, Jehova o ile a bolella Moshe: “U ke ke ua bona sefahleho sa ka, hobane ha ho motho ea ka mponang, ’me a phela.” (Exoda 33:20) Morena enoa oa leholimo o khanya hoo ho seng motho ea ka mamellang phihlelo ea ho ’mona.
Le hoja Jehova a sa bonahale mahlong a rōna, ho na le bopaki bo bongata ba ho ba teng ha hae e le Molimo ea Matla ’Ohle. Ka sebele, “litšoaneleho tsa hae tse sa bonahaleng li bonahala ka ho hlaka pōpong ea lefatše ho ea pele, hobane li bonahala ka lintho tse entsoeng, esita le matla a hae a ka ho sa feleng le Bomolimo ba hae.” (Ba-Roma 1:20, NW) Lefatše—ka joang ba lona, lifate, litholoana, meroho, le lipalesa—li pakela Bomolimo ba Jehova. Ho fapana le melimo ea litšoantšo e se nang molemo, Jehova o fana ka pula le linako tsa selemo tse behang. (Liketso 14:16, 17) Sheba linaleli leholimong ha e le bosiu. Ke bopaki bo boholo hakaakang ba Bomolimo ba Jehova le matla a hae a ho hlophisa!
Hape Jehova o hlophisitse libōpuoa tsa hae tsa moea tse halalelang, tse bohlale leholimong. E le mokhatlo o hlophisitsoeng o utloanang, li etsa thato ea Molimo, joalokaha mopesaleme a bolela: “Bokang Jehova, lōna mangeloi a hae, bahale ba matla, ba phethang lentsoe la hae, ba mamelang molomo oa hae! Bokang Jehova, lōna makhotla a hae kaofela, lōna bahlanka ba hae kaofela, ba etsang ho ratoang ke eena!” (Pesaleme ea 103:20, 21) Jehova o boetse o hlophisitse batho ba hae lefatšeng. Sechaba sa Iseraele se ne se hlophisitsoe hantle, le balateli ba pele ba Mor’a Molimo. Ho tšoanang le kajeno, Jehova o na le mokhatlo o hlophisitsoeng oa lefatše lohle oa Lipaki tse chesehang, tse bolelang litaba tse molemo tsa ’Muso oo o leng haufi.—Mattheu 24:14.
Jehova ke Molimo oa ’Nete le ea Phelang
Bomolimo ba Jehova bo bontšitsoe ka litsela tse ngata haholo! O ile a tlotlolla melimo ea bohata ea Egepeta ’me a fihlisa Baiseraele ba sireletsehile Naheng e Tšepisitsoeng. Pōpo e fana ka bopaki bo bongata ba Bomolimo ba Jehova. ’Me ho hang a ke ke a bapisoa le melimo ea litšoantšo e se nang molemo ea bolumeli ba bohata.
Moprofeta Jeremia o ile a bontša phapang e khōlō pakeng tsa Jehova, Molimo ea phelang, le litšoantšo tse sa pheleng tse entsoeng ke batho. Phapang eo e bontšitsoe hantle ho Jeremia khaolo 10. Har’a lintho tse ling, Jeremia o ngotse: “Jehova ke Molimo oa ’nete, ke Molimo o phelang, ke Morena oa ka mehla le mehla.” (Jeremia 10:10) Molimo ea phelang le oa ’nete, Jehova, o bōpile lintho tsohle. O ile a pholosa Baiseraele ba neng ba le botlamuoeng Egepeta. Ha ho letho le ke keng la etsahala ka eena.
Jehova, “Morena ea se nang ho fela,” o tla araba thapelo ena: “Ntat’a rōna ea maholimong, lebitso la hao a le ke le khethehe; ho tle ’muso oa hao; thato ea hao e etsoe lefatšeng, joale ka ha e etsoa leholimong.” (1 Timothea 1:17; Mattheu 6:9, 10) ’Muso oa leholimo oa Bomessia, o seng o le matsohong a Jesu Kreste, haufinyane o tla nka khato khahlanong le bobe ’me o timetse lira tsohle tsa Jehova. (Daniele 7:13, 14) ’Muso oo o tla boela o tlise lefatše le lecha la litlhohonolofatso tse sa feleng bakeng sa batho ba bontšang kutlo.—2 Petrose 3:13.
Ho na le ho hongata ho ka ithutoang ka Jehova le merero ea hae. Ke hobane’ng ha u sa ikemisetse ho amohela tsebo e joalo le ho nka khato tumellanong le eona? Haeba u etsa sena, u tla ba le tokelo ea ho thabela bophelo bo sa feleng lefatšeng la paradeise tlas’a puso ea ’Muso. U tla phela ha masoabi, bohloko, esita le lefu li se li fetile ’me tsebo ea Jehova e tletse lefatšeng. (Esaia 11:9; Tšenolo 21:1-4) Ena e ka ba phello ea bokamoso ba hao haeba u batla, u fumana, ’me u nka khato tumellanong le likarabo tse thehiloeng Bibeleng tsa potso ena, “Jehova ke mang?”
[Tlhaloso ea Moo Setšoantšo se Nkiloeng Teng e leqepheng la 7]
Pictorial Archive (Near Eastern History) Est.