Ba Alosa Linku tse Nyenyane ka Kutloelo-bohloko
HAR’A liphoofolo tsohle tse ruuoang, ha ho tse tšoanang le nku ea lapeng. Liphoofolo tse ngata li na le matla le bohlale ba tlhaho tse hlokahalang ho batla lijo le ho qoba liphoofolo tse ka batlang ho li ja, empa nku e fapane. E ka hlaseloa habonolo ke liphoofolo tse jang tse ling, ’me e na le matla a fokolang a ho itšireletsa. Ka ntle ho molisa, nku e boi ’me ea fokola. Ha e ka arohana le mohlape, e lahleha habonolo. Ka lebaka leo linku tse laolehang habonolo li na le mabaka a mangata a ho ikutloa li na le kamano le molisa oa tsona. Ka ntle ho eena li ne li ka ba le monyetla o fokolang oa ho phela. Ka lebaka la litšoaneleho tsena, Bibele e sebelisa linku ho tšoantšetsa batho ba hlokang molato, ba tšoeroeng hampe, kapa ba sa khoneng ho itšireletsa.
Ka sebele, meputso ea molisa ke e loketseng. Bophelo ba hae hase bo bonolo. O pepesehela mocheso le serame, ’me ho na le masiu ao a sa robaleng ka ’ona. O lokela ho sireletsa mohlape liphoofolong tse jang tse ling, hangata e le ka ho ipeha kotsing. Kaha molisa o tlameha ho boloka mohlape hammoho, boholo ba nako ea hae o bo qeta a batla linku tse khelohang kapa tse lahlehang. O lokela ho oka tse kulang le tse tsoileng kotsi. Likonyana tse fokolang kapa tse khathetseng li lokeloa ho jaroa. Khafetsa o ameha ka ho fumana lijo tse lekaneng le metsi. Ho tloaelehile hore molisa a sese bosiu naheng e le hore a kholisehe ka tšireletseho ea mohlape. Kahoo, bolisa ke bophelo bo boima bo hlokang litšebeletso tsa monna ea sebete, ea mahlaha-hlaha, le ea khonang ho sebetsana le maemo. Ho feta tsohle, o tlameha ho ba le matla a ho bontša kameho ea sebele bakeng sa mohlape o behiloeng tlas’a tlhokomelo ea hae.
Ho Alosa Mohlape oa Molimo
Bibele e tšoantšetsa batho ba Molimo joaloka linku tse khonang ho laoloa habonolo ’me ba li hlokometseng joaloka balisa. Jehova ka boeena ke ‘molisa le molebeli oa liphefumolohi tsa rōna.’ (1 Petrose 2:25, NW) Jesu Kreste, “molisa ea molemo,” o ile a tsebahatsa takatso ea hae ea hore linku li hlokomeloe ka kutloelo-bohloko ha a ne a bolella moapostola Petrose: ‘Fepa likonyana tsa ka, alosa linku tsa ka tse nyenyane, fepa linku tsa ka tse nyenyane.’ (Johanne 10:11; 21:15-17, NW) Balisa ba Bakreste ka tieo ba fuoe boikarabelo ba ‘ho alosa phutheho ea Molimo.’ (Liketso 20:28, NW) ’Me mosebetsi oa bona joaloka balisa ba moea o hloka litšoaneleho tsa molisa ea molemo oa sebele—sebete, mahlaha-hlaha, ho khona ho sebetsana le maemo, ’me ka ho khethehileng, kameho e tsoang pelong ea boiketlo ba mohlape.
Mehleng ea moprofeta oa Molimo Ezekiele, boholo ba balisa ba neng ba khethiloe ho hlokomela litlhoko tsa batho ba Jehova Iseraele bo ile ba hlōleha ho phetha mosebetsi oa bona. Mohlape oa Molimo o ile oa utloa bohloko haholo, hoo boholo ba mohlape bo ileng ba lahla borapeli ba ’nete. (Ezekiele 34:1-10) Kajeno, baruti ba Bokreste-’mōtoana ba ipolela e le balisa ba seo ho boleloang hore ke phutheho ea Bokreste, empa boemo ba eona ba ho kula moeeng bo paka hore baruti bana ba tšoana le batho ba khopo ba neng ba ikhakanya ba neng ba sa tsotelle batho ’me ba ba tšoere hampe ha Jesu a le lefatšeng. Baeta-pele ba Bokreste-’mōtoana ba tšoana le “motho ea hiriloeng” ea “sa hlokomeleng linku.” (Johanne 10:12, 13, NW) Ho hang ha ba na boikemisetso, ha ba khone, kapa hona ho tšoanelehela ho alosa mohlape oa Molimo.
Balisa ba Tsotellang e le Kannete
Jesu o ile a beha mohlala o phethahetseng bakeng sa bohle ba neng ba tla alosa mohlape oa Jehova. Ka litsela tsohle o ne a e-na le lerato, a le mosa, a na le kutloelo-bohloko, ’me a thusa balateli ba hae. O ne a nka bohato ba pele ho batla ba hlokang. Le hoja Jesu a ne a phathahane ’me hangata a khathetse, ka linako tsohle o ne a ipha nako ea ho mamela mathata a bona le ho ba khothatsa. Boikemisetso ba hae ba ho nehela sephefumolohi sa hae molemong oa bona e ne e le pontšo e khōlō ka ho fetisisa ea lerato.—Johanne 15:13.
Kajeno, baholo bohle ba khethiloeng ba liphutheho, haesita le bahlanka ba sebeletsang, ba arolelana boikarabelo bona mabapi le mohlape. Kahoo, esita le menyetla ea lintho tse bonahalang eo ba ka bang le eona naheng e ’ngoe ha e etse hore boholo ba banna bana ba nang le boikarabelo ba fallele sebakeng seo ’me kahoo ba siee liphutheho tse se nang thuso le kaloso tse lekaneng. Ka lebaka la ho phela ‘linakong tse mahlonoko tseo ho leng thata ho sebetsana le tsona,’ mohlape o hloka khothatso le tataiso. (2 Timothea 3:1-5, NW) Ka mehla ho na le kotsi ea hore ba bang e tla ba liphofu tsa Satane, ea “joale ka tau e purumang, e batlang eo e ka mo jang.” (1 Petrose 5:8) Hona joale ho feta leha e le neng pele, ke habohlokoa hore balisa ba Bakreste ba ‘lokise ba sa eeng ka molao, ba tšelise ba lipelo li tepeletseng, ba tiise ba fokolang.’ (1 Ba-Thessalonika 5:14) Ho hlokahala hore ba lule ba falimehile hore ba sireletse ba fokolang ho se ikhule mohlapeng.—1 Timothea 4:1.
Molisa a ka lekanyetsa joang ha nku e hloka thuso? Matšoao a mang a bonahalang ka ho hlakileng ke ho hlōleha ho ba teng libokeng tsa Bokreste, ho se kopanele ka mehla tšebeletsong ea tšimo, le tšekamelo ea ho qoba ho tloaelana le ba bang. Bofokoli bo ka boela ba bonoa ka ho hlokomela boikutlo ba linku le tšekamelo ea meqoqo ea tsona. Li ka sekamela ho tšoaea tse ling liphoso, mohlomong ka ho bontša maikutlo a lehloeo. Meqoqo ea tsona e ka ama litaba-tabelo tsa tsona tsa lintho tse bonahalang haholo ho e-na le ho ama lipakane tsa moea. Ho haella ho akaretsang ha cheseho, ho ba le maikutlo a nepahetseng, le thabo li ka bolela hore tumelo ea tsona e se e fokola. Ponahalo ea ho nyahama e ka ba pontšo ea hore li hatelletsoe ke beng ka tsona ba hanyetsang kapa metsoalle ea lefatše. Ka ho hlokomela matšoao ana, molisa o tla lekanyetsa mofuta oa thuso e hlokahalang.
Ha balisa ba Bakreste ba etetse molumeli-’moho ho fana ka thuso, ho hlokahala hore ba hopole boikemisetso ba bona ba sehlooho. Hase feela ketelo ea botsoalle ea ho qoqa ka lintho tse fokolang. Pakane ea moapostola Pauluse ha a etela baena e ne e le hore ‘a tle a ba sitse ka molemo o mong oa Moea, ba tle ba tiisoe le hore ba tšelisane ka tumelo e leng ho bona.’ (Ba-Roma 1:11, 12) Ho finyella sena, ho hlokahala ho lokisetsa esale pele.
Tabeng ea pele, hlahlobang motho eo, ’me le leke ho bona hore na boemo ba hae ba moea ke bofe. Ha seo se se se fumanoe, nahanelang hore ke mofuta ofe oa tataiso, khothatso, kapa keletso o ka bang molemo ka ho fetisisa. Lentsoe la Molimo, Bibele, e lokela ho ba mohloli o ka sehloohong oa boitsebiso hobane “le matla.” (Ba-Heberu 4:12) Limakasine tsa Molula-Qhooa le Tsoha!, li ka hlahlobjoa bakeng sa lihlooho tse sebetsanang le litlhoko tse tobileng tsa linku tse bileng le mathata a khethehileng. Ho ka fumanoa liphihlelo tse khothatsang le tse tsosolosang ho Yearbook of Jehovah’s Witnesses. Sepheo ke ho fana ka ntho e ’ngoe ea moea e tla ba ‘molemo kahong ea motho eo.’—Ba-Roma 15:2.
Kaloso e Ahang
Molisa oa linku tsa sebele oa tseba hore li itšetlehile ka eena bakeng sa tšireletso le tlhokomelo. Likotsi tse tloaelehileng haholo li bakoa ke ho lahleha, ho kula, mokhathala, kotsi le liphoofolo tse jang tse ling. Ka ho tšoanang molisa oa moea o tlameha ho hlokomela le ho sebetsana le likotsi tse tšoanang tse behang boiketlo ba mohlape kotsing. Ana ke mathata a tloaelehileng le litlhahiso tse seng kae tse ka buuoang ho fana ka boitsebiso ba moea bo ahang.
(1) Joaloka linku tse seng hlokolosi, Bakreste ba bang ba tsamaela thōko le mohlape oa Molimo hobane ba hoheloa ke lithahasello tse bonahalang li se kotsi le tse ipiletsang. Ba ka ’na ba khelosoa kapa ba suthela hōle ka lebaka la ho hahamalla lipakane tse amanang le lintho tse bonahalang, boikhathollo kapa boithabiso. (Ba-Heberu 2:1) Batho ba joalo ba ka hopotsoa ka ho potlaka ha linako, bohlokoa ba ho lula haufi le mokhatlo o hlophisitsoeng oa Jehova, le bohlokoa ba ho beha lithahasello tsa ’Muso pele bophelong. (Mattheu 6:25-33; Luka 21:34-36; 1 Timothea 6:8-10) Keletso e ka thusang e ka fumanoa sehloohong “U ka Boloka Teka-tekano ea Hao Joang?” ho Tsoha! ea March 8, 1985, maqephe 28-31.
(2) Ho hlokahala hore molisa a fane ka tlhokomelo ho linku tse kulang. Ka ho tšoanang, balisa ba moea ba tlameha ho thusa Bakreste ba kulang moeeng ka lebaka la maemo a mabe bophelong ba bona. (Jakobo 5:14, 15) E ka ’na eaba ba hloka mosebetsi, ba na le bothata bo tebileng ba bophelo, kapa mohlomong ba na le mathata a bophelo ba lelapa. Mohlomong batho ba joalo ba na le takatso e fokolang ea lijo tsa moea kapa ho tloaelana le batho ba Molimo. Sena se fella ka ho ikarola le ho nyahama. Ba lokela ho kholisoa hore Jehova oa ba tsotella ’me o tla ba tšehetsa linakong tse boima. (Pesaleme ea 55:22; Mattheu 18:12-14; 2 Ba-Korinthe 4:16-18; 1 Petrose 1:6, 7; 5:6, 7) Ho ka boela ha thusa ho hlahloba sehlooho “Tsepamisa Mahlo Pele Joaloka Mokreste,” se fumanoang ho Molula-Qhooa oa December 1, 1980, maqephe 25-29.
(3) Molisa o lokela ho hlokomela linku tse khathalang. Ba bang ba ’nile ba mamella ka botšepehi tšebeletsong ea Jehova ka lilemo tse ngata. Ba entse boiteko bo matla hore ba fete nakong ea liteko tse ngata. Joale ba bontša matšoao a ho khathala ho etsa hantle ’me ba ka boela ba belaela mabapi le mosebetsi oa ho ruta ka matla. Ho hlokahala hore moea oa bona o tsosolosoe, ho nchafatsoe kananelo ea bona le thabo le litlhohonolofatso tse tlisoang ke tšebeletso ea pelo e felletseng ea Molimo ho latela mohlala oa Jesu Kreste. (Ba-Galata 6:9, 10; Ba-Heberu 12:1-3) Mohlomong ba ka thusoa ho bona hore Jehova o ananela tšebeletso ea bona e tšepahalang ’me a ka ba matlafatsa bakeng sa tšebeletso ea nakong e tlang ea ho mo rorisa. (Esaia 40:29, 30; Ba-Heberu 6:10-12) Ho ka boela ha ba molemo ho arolelana likhopolo tse tsoang sehloohong “U se ke Ua Khathala ke ho Etsa Hantle,” se hlahang ho Molula-Qhooa oa July 15, 1988, maqephe 9-14.
(4) Joaloka linku tse tsoang kotsi, Bakreste ba bang ba lemalitsoe ke seo e ka ’nang eaba ba se hlokomela e le boitšoaro bo khopisang. Leha ho le joalo, haeba re tšoarela ba bang, Ntate oa rōna oa leholimo o tla re tšoarela kamoo re hlokang ka teng. (Ba-Kolosse 3:12-14; 1 Petrose 4:8) Baena ba bang kapa bo-khaitseli mohlomong ba ile ba fumana keletso kapa khalemelo eo ba ileng ba ikutloa hore ha ea ba lokela. Leha ho le joalo, kaofela ha rōna re ka fumana molemo keletsong le taelong tsa moea, ’me hoa khothatsa ho tseba hore Jehova o laea bao a ba ratang. (Ba-Heberu 12:4-11) Ka lebaka la ho se fuoe litokelo tsa tšebeletso tseo ba utloang hore ba tšoanela ho li fuoa, ba bang ba ’nile ba lumella lehloeo ho baka lekhalo lipakeng tsa bona le phutheho. Empa haeba re ikarola mokhatlong o hlophisitsoeng oa Jehova, ha ho moo re ka eang bakeng sa pholoho le thabo ea ’nete. (Bapisa le Johanne 6:66-69.) Boitsebiso bo thusang tabeng ena bo ka fumanoa sehloohong “Ho Boloka Bonngoe ba Rōna ba Bokreste,” se ho Molula-Qhooa oa August 15, 1988, maqephe 28-30.
(5) Linku li tlameha ho sireletsoa liphoofolong tse jang tse ling. Ka tsela e tšoanang, ba bang ba ka ’na ba hanyetsoa le ho sokeloa ke beng ka bona ba sa lumelang kapa basebetsi-’moho. Botšepehi ba bona bo ka hlaseloa ha likhatello li hlahisoa tsa ho etsa hore ba khaotse tšebeletso ea bona ho Molimo kapa ba khaotse ho kopanela tšebeletsong ea Bokreste. Leha ho le joalo, baa matlafala ha ba thusoa ho hlokomela hore khanyetso e lokela ho lebelloa ’me ha e le hantle ke karolo ea bopaki ba hore re balateli ba sebele ba Jesu Kreste. (Mattheu 5:11, 12; 10:32-39; 24:9; 2 Timothea 3:12) Ho ka ba molemo ho ba bontša hore haeba ba tšepahala, Jehova a ke ke a ba lahla ’me o tla putsa mamello ea bona. (2 Ba-Korinthe 4:7-9; Jakobo 1:2-4, 12; 1 Petrose 5:8-10) Sehlooho “Ho Mamella ka Thabo Har’a Mahloriso” ho Molula-Qhooa oa October 1, 1982, maqephe 15-21, se fana ka khothatso e eketsehileng.
Balisa—Phethang Boikarabelo ba Lōna
Litlhoko tsa mohlape oa Molimo li ngata, ’me ho fana ka tlhokomelo e loketseng ke mosebetsi o boima. Ka lebaka leo balisa ba Bakreste ba tlameha ho ba le kutloelo-bohloko, kameho ea sebele, ’me ba thahaselle ho fana ka thuso. Mamello le bohlale ke tsa bohlokoa. Le hoja batho ba bang ba hloka keletso le taeo, ba bang ba fumana molemo haholo ka ho khothatsoa. Liketelo tse ’maloa tsa botho e ka ba tse lekaneng maemong a mang, ha ho a mang ho ka hlokahala thuto ea ka mehla ea Bibele. Boemong bo bong le bo bong sepheo sa motheo ke ho fana ka tataiso e hahang ea moea kapa keletso e lerato e tla susumeletsa motho ho ba le mekhoa e molemo ea ho ithuta, ho qala ho ba teng kapa ho tsoela pele ho ba teng libokeng tsa phutheho ka mehla, le ho thabela ho kopanela tšebeletsong ea Bokreste ka mafolo-folo. Tsena ke litsela tsa sehlooho tsa ho thusa balumeli-’moho le ho ba thusa ho bula tsela bakeng sa ho phalla ha moea o halalelang oa Jehova ka bolokolohi.
Balisa ba fanang ka tšehetso e joalo ba phetha tšebeletso ea bohlokoa bo boholo molemong oa mohlape oa Molimo. (Bona Molula-Qhooa oa November 15, 1985, maqephe 23-7.) Mohlape o ananela seo balisa ba moea ba se etsang. Ka mor’a ho fumana thuso e joalo, hlooho e ’ngoe ea lelapa e ile ea re: ‘Ka mor’a hore re be linneteng ka lilemo tse 22, re ile ra huleloa lefatšeng ke ho rata lintho tse bonahalang. Hangata re ne re batla ho ba teng libokeng, empa ho ne ho bonahala re hlōleha. Re ne re sa tšoanelehe tsamaisong ea Satane, kahoo re ne re arohile ka ho feletseng. Sena se ile sa re siea re khathatsehile ’me re tepeletse maikutlong. Re ne re hloka mantsoe a khothatso. Ha moholo e mong a re etela, ka thabo re ile ra amohela tokisetso ea thuto ea Bibele lehaeng la rōna. Joale kaofela ha rōna re khutletse mokhatlong oa Jehova o hlophisitsoeng o sireletsehileng. Ke sitoa ho hlalosa kamoo ke thabileng ka teng!’
Ho na le lebaka la ho thaba haholo haeba baena ba rōna ba khelohileng kapa ba tšoenyehileng le bo-khaitseli ba tsosolosoa moeeng le ho boela ba kenella tšebetsong. (Luka 15:4-7) Morero oa Jehova mabapi le batho ba hae o hlokomeloa ha ba le bonngoeng “joale ka linku tse har’a lesaka.” (Mikea 2:12) Setšabelong sena se sireletsehileng, ba ‘fumana khatholoho bakeng sa liphefumolohi tsa bona’ ka thuso ea Molisa ea Molemo, Jesu Kreste. (Mattheu 11:28-30, NW) Mohlape o leng bonngoeng oa lefatše lohle o amohela tataiso, khothatso, le tšireletseho hammoho le lijo tsa moea ka bongata.
Kajeno, ka mosebetsi ona oa ho alosa, Jehova o na le mosebetsi o lerato o etsoang tumellanong le tšepiso ea hae ea boholo-holo: “Ke tla batla linku tsa ka ’me ke li hlokomele. . . . Ke tla li lopolla libakeng tseo li hasaneng ho tsona . . . Ke tla li fepa makhulong a matle . . . Ke tla batla e lahlehileng, . . . ’me e robehileng ke tla e tlamisa ’me e kulang ke tla e matlafatsa.” (Ezekiele 34:11-16, NW) Ho khothatsa hakaakang ho tseba hore Jehova ke Molisa oa rōna!—Pesaleme ea 23:1-4.
Ka lebaka la litokisetso tsa bomolimo tsa ho alosa mohlape oa Molimo, joaloka basebeletsi ba Jehova re ka arolelana maikutlo a Davida, ea ileng a re: “Ke tla kakalla le ho robala khotsong, hobane uena ka bouena, Oho Jehova, o nkahisa tšireletsehong.” (Pesaleme ea 4:8, NW) E, batho ba Jehova ba ikutloa ba sireletsehile tlhokomelong ea hae e lerato ’me ba leboha hore baholo ba Bakreste ba alosa linku tse nyenyane ka kutloelo-bohloko.
[Tlhaloso ea Moo Setšoantšo se Nkiloeng Teng e leqepheng la 20]
Potter’s Complete Bible Encyclopedia