Baboleli ba ’Muso Baa Tlaleha

Ho Finyella Metsana e Hōle ea Greenland

LIPAKI TSA JEHOVA li ’nile tsa sebelisa limakasine tsa Molula-Qhooa le Tsoha! ka lilemo tse mashome-shome bakeng sa ho bolela litaba tse molemo. Likoranta tsena li phahamisa bohlale ba Jehova joalokaha bo hlalosoa ka Lentsoeng la hae, Bibele. Li lula li alositse liketsahalo tsa lefatše tse amanang le boprofeta ba Bibele, ’me li fana ka keletso e utloahalang ea Bibele mathateng a etsahalang ka nako e le ’ngoe le liketsahalo tsena.—Jakobo 3:17.

Ka 1994, Lipaki Greenland li ile tsa etsa boiteko bo khethehileng ba ho fana ka Molula-Qhooa le Tsoha! ho batho ba bangata kamoo ho ka khonehang. Nakong ea lehlabula, li ile tsa etsa litokisetso tsa ho etela e meng ea metsana e hōle ka ho fetisisa ea Greenland. Sehlopha sa baboleli ba ’Muso se ile sa tsamaea ka seketsoana lik’hilomithara tse fetang 4 000 ho nyolosa lebōpong le ka bophirimela ho ea Qaanaaq (Thule), tsa fihla metseng e hōle ka ho fetisisa ka leboea ho lefatše. Leeto la tsona le ile la nka libeke tse supileng. Lebōpong le ka bochabela, banyalani ba bang ba Lipaki ba ile ba fihla motsaneng oa Ittoqqortoormiit ’me ka lekhetlo la pele o ile oa akaretsoa ka mokhoa o phethahetseng ka litaba tse molemo.

Pejana selemong seo, ka khoeli ea April, likopi tse 7 513 tsa Molula-Qhooa le Tsoha! li ile tsa tsamaisetsoa batho ba Greenland. Seo se bolela hore ka karolelano, e mong le e mong oa bahoeletsi ba ’Muso ba 127 o ile a tsamaisa limakasine tse 59—makasine e le 1 bakeng sa baahi ba 7. Khoeling eo, Tsoha! e ile ea hlahisa letoto la lihlooho tlas’a sehlooho se seholo se reng: “Kankere ea Matsoele—Tšabo ea Mosali e Mong le e Mong.” Paki e ’ngoe, e ileng ea tsamaisa limakasine tse 140, e ile ea siela motlalehi e mong oa thelevishene likopi tsa Tsoha! eo. Matsatsi a seng makae hamorao, lenaneo la litaba la thelevishene le ile la bontša lihlooho tse buang ka kankere ea matsoele. Motlalehi o ile a hlahisa makasine thelevisheneng, a bontša maqephe a ’maloa ha a ntse a rorisa boleng ba phetolelo ea Segreenland. O ile a boela a totobatsa litlhahiso tse sebetsang tse fanoeng ke Tsoha! joaloka mehato ea thibelo tlhokomelong ea bophelo bo botle ba ’mele.

Lenaneong lona leo la TV ho ile ha buisanoa ka lipotso le Paki eo qalong e neng e ile ea tsamaisetsa motlalehi limakasine. E ile ea araba lipotso tse ngata mabapi le Lipaki tsa Jehova ea ba ea bua ka kabo e pharaletseng ea limakasine khoeling eo. E ile ea boela ea hlalosa bohlale bo sebetsang bo fumanoang ka Bibeleng ’me ea supa hore keletso e joalo e utloahalang e ka re thusa ho sebetsana ka katleho le mathata a mehleng ena.

Lenaneo le ile la qetella ka puisano ka lipotso e ileng ea etsoa ke mopresidente oa Mokhatlo oa Kankere oa Greenland. O ile a bontša hore ha ho mohla a kileng a bona boitsebiso bo botle hakaalo mabapi le taba ena bo le ka puo ea habo. O ile a mema bohle ba thahasellang sehlooho se buang ka kankere ea matsoele ho bala lihlooho tsa Tsoha! O ile a re ho na le lebaka le letle la ho leboha Lipaki tsa Jehova bakeng sa ho nka bohato ba pele.

Joaloka Greenland, Lipaki tsa Jehova ho potoloha lefatšeng lohle li tsoela pele li bolela litaba tse molemo ho “babōpuoa bohle ba tlas’a leholimo.” (Ba-Kolosse 1:23; Liketso 1:8) Ka thuso ea lingoliloeng tsa Bibele, ho akareletsa Molula-Qhooa le Tsoha!, li thusa batho ba mefuta eohle ho sebetsana ka katleho le mathata a kajeno hammoho le ho ba neha tšepo ea bokamoso bo molemo.

[’Mapa o leqepheng la 8]

(Ha u batla ho bona boitsebiso bo hlophisitsoeng hantle, sheba sengoliloeng)

Qaanaaq (Thule)

Ittoqqortoormiit

Nuuk (Godthåb)