Ela Hloko Temoso!

THOATHOARA! Ka la 3 June 1991, Thaba ea Fugen, e Japane, ka ho luma ho kirietsang e ile ea ntša khase le molora tse tsoang ha ho foqoha seretse se chesang. Motsoako ona o chesang ka mokhoa o ke keng oa lekanngoa o ile oa tšoloha ho theosa thaba. Ho phatloha hoo ho ile ha bolaea batho ba 43. Ba bangata ba ileng ba phonyoha ka soba la nale ba ne ba chele hampe. Ba bang ba ile ba hooa: “Re kōpa metsi hle!” Bo-ralitima-mollo le mapolesa ba ile ba etsa mphete-ke-u-fete ho ea ba thusa.

LIBEKE tse ka bang peli pele ho moo, ho ne ho ile ha lemohuoa ’mōtōmōtō oa seretse se chesang tlhōrōng ea Thaba ea Fugen, ka hona, ba boholong le baahi ba ne ba falimehile. Hoo e ka bang beke pele ho koluoa ena, ho ne ho ile ha fanoa ka keletso ea hore ho suthoe sebakeng seo. Letsatsi pele ho ho phatloha hona, mapolesa a ne a kōpile ba khatiso ea litaba hore ba qobe ho ea sebakeng se thibetsoeng. Leha ho le joalo, motšehareng oo oa mantsiboea o mahlonoko, ba 43 ba ileng ba e-shoa ba ne ba le sebakeng se kotsi.

Ke hobane’ng ha ba bangata hakaale ba ile ba ipeha kotsing ka ho ba sebakeng seo kapa ka ho sala ho sona? Lihoai tse ling tse neng li ile tsa tloha mahaeng a tsona li ile tsa khutla ka morero oa ho ea lekola thepa ea tsona le masimo a tsona. Litsebi tse tharo tsa ho foqoha ha seretse se chesang li ne li leka ho atameha haufi le moo ho foqohang seretse se chesang ka hohle kamoo li ka khonang e le hore li ka khotsofatsa thahasello ea tsona ea thuto. Batlalehi ba litaba ba ’maloa le ba nkang lifoto ba ile ba iteta sefuba ’me ba tlōla moeli o neng o behiloe hobane ba ne ba batla ho ba le boitsebiso bo thahasellisang bo nakong ba ketsahalo eo ea ho foqoha ha seretse. Bakhanni ba bararo ba litekesi tse neng li hiriloe ke ba khatiso ea litaba ba ne ba le teng ketsahalong ena. Mapolesa le bo-ralitima-mollo ba baithaopi ba ne ba theohetse. E mong le e mong o ne a e-na le lebaka la hae la ho ea sebakeng se kotsi—’me phello e bile hore ba ile ba lahleheloa ke bophelo.

Na U Sebakeng se Kotsi?

Ho ke ke ha etsahala hore kaofela ha rōna re lule pel’a sebaka se foqohang seretse se chesang. Empa ho thoe’ng haeba re ne re tobane le koluoa ea lefatše lohle, e behang e mong le e mong oa rōna sebakeng se kotsi se akarelletsang lefatše lohle? Buka e ipakileng e le mohloli o tšepahalang oa boitsebiso ba boprofeta e re lemosa ka tlokotsi e tlelang lefatše lohle ’me e e hlalosa ka tsela ena: “Letsatsi le tla fifala, ’me khoeli ha e na ho fana ka leseli la eona, le linaleli li tla oa leholimong, ’me matla a maholimo a tla sisinyeha. . . . Meloko eohle ea lefatše e tla ikotla ka lebaka la ho lla.” (Matheu 24:29, 30) Mona limakatso tsa leholimo tsa bokahohle bo boholohali li hlalosoa e le tse amang “meloko eohle ea lefatše.” Ka mantsoe a mang, boprofeta bona bo bua ka koluoa e tla ama e mong le e mong oa rōna.

Buka ena ea boprofeta bo ka tšeptjoang ke Bibele. Ka ho thahasellisang, moelelo oa lengolo le boletsoeng ka holimo o fana ka tlhaloso e qaqileng ea lintho tse tla lebisa tlokotsing ea lefatše lohle. Joalokaha ’mōtōmōtō oa seretse se chesang le lipontšo tse ling tsa hore se tla foqoha li ile tsa fa ba boholong motseng oa Shimabara mabaka a hore ba qolle sebaka se itseng e le se kotsi, Bibele e re fa mabaka a hore re falimehe le ho itokisetsa pholoho. Re ka ithuta ho itseng tlokotsing e ileng ea etsahala Thabeng ea Fugen ’me ra lemoha botebo ba se larileng ka pele.

[Tlhaloso ea Moo Setšoantšo se Nkiloeng Teng e leqepheng la 2]

COVER: Yomiuri/Orion Press/Sipa Press

[Tlhaloso ea Moo Setšoantšo se Nkiloeng Teng e leqepheng la 3]

Yomiuri/Orion Press/Sipa Press