Na U sa Hopola?
Na u thabetse ho bala litokollo tsa morao tjee tsa Molula-Qhooa? Joale, bona haeba u ka araba lipotso tse latelang:
• Re ka rua molemo ofe ka ho ithuta ka lelapa la Shafane?
Shafane e ne e le mokopitsi le mongoli ea neng a sebeletsa Morena Josiase oa Juda. Shafane e ne e le monna ea nang le tšusumetso ’musong, ’me o ile a tšehetsa letšolo la morena la ho tsosolosa borapeli ba ’nete. Bara ba babeli ba Shafane ba ile ba tšehetsa moprofeta Jeremia. Mora e mong le litloholo tse peli tsa bashemane le bona ba ile ba sebelisa maemo a bona ho tšehetsa borapeli ba ’nete. Ka ho tšoanang, le rōna re ka sebelisa matlotlo a rōna le maemo hore re tšehetse borapeli ba ’nete.—12/15, leqepheng la 19-22.
• Irene Hochstenbach o ile a sebetsana ka katleho joang le bokooa e le hore a sebeletse Jehova?
Ha a le lilemo li supileng, e ile ea e-ba tsebe-tutu. Ho sa tsotellehe hore ke tsebe-tutu, o ithutile ho bua le ba bang ’me hona joale o tsamaea le monna oa hae (eo e leng molebeli ea tsamaeang) ha a ntse a sebeletsa liphutheho tsa Netherlands.—1/1, leqepheng la 23-6.
• Ke libuka life tse peli tse ncha tse thusang ho ithuta Bibele tse lokolotsoeng Kopanong ea Setereke ea “Baboleli ba ’Muso ba Chesehang”?
Lefatšeng lohle Bakreste ba ile ba thabela ho fumana buka ea Rapela Molimo a le Mong Feela oa ’Nete, e etselitsoeng ho ithutoa le ba bacha ’neteng ba qetileng ho ithuta buka ea Tsebo e Isang Bophelong bo sa Feleng; buka e ’ngoe e ncha ke ea Atamela ho Jehova, e buang ka litšoaneleho tsa Jehova le litšebelisano tsa hae le batho. E boetse e bontša hore na re ka mo etsisa joang ha re bontša litšoaneleho tsa hae.—1/15, leqepheng la 23-4.
• Liproverbia 12:5 e bolela’ng ha e re: “Menahano ea ba lokileng ke kahlolo”?
Menahano ea batho ba molemo e metle ’me e tobisoa ho se hlokang leeme le se lokileng. Kaha ba lokileng ba susumetsoa ke ho rata Molimo le batho ba bang, boikemisetso ba bona bo molemo.—1/15, leqepheng la 30.
• Ke eng e ka re thusang ho ba le pono e loketseng ka mosebetsi?
Ho hotle ho koetlisetsoa mosebetsi ho tloha bongoaneng. Bibele e re khothalletsa ho ba le mekhoa e metle ea ho sebetsa, re qobe botsoa. (Liproverbia 20:4) E boetse e khothalletsa Bakreste hore ba se ke ba tšoareha ho tlōla ka mosebetsi. Re lokela ho hlokomela hore ho sebeletsa Molimo ke ntho ea pele bophelong ba rōna. (1 Bakorinthe 7:29-31) Ho feta moo, Bakreste ba ’nete ba kholisehile hore Molimo a ke ke a ba lahla.—2/1, leqepheng la 4-6.
• Ke hokae Bibeleng moo ho buuoang ka lekhetlo la pele ka aletare?
Ke ho Genese 8:20, e buang ka aletare eo Noe a ileng a e haha ha a tsoa ka arekeng ka mor’a Moroallo. Leha ho le joalo, ho ka etsahala hore ebe Kaine le Abele ba ile ba nyehela mahlabelo a bona lialetareng. (Genese 4:3, 4)—2/15, leqepheng la 28.
• Bakreste ba bang ba ka sebelisa maemo a macha hamolemo joang?
Ba bang ba ’nile ba amohela, kapa ba bula menyetla ea liphetoho mesebetsing ea bona e le hore ba be le nako e eketsehileng tšebeletsong. Ba bang ba ekelitse nako ea bona le menyetla ea ho sebeletsa Molimo ha boikarabelo ba bona ba lelapa bo fokotseha, nakong e kang ha bana ba se ba hōlile kapa ba le lenyalong.—3/1, leqepheng la 19-22.
• Mohlala oa Jonase le oa moapostola Petrose e re thusa joang ho bona ba bang ka tsela eo Jehova a ba bonang ka eona?
Liphoso tse ileng tsa etsoa ke Jonase le Petrose tseleng eo ba neng ba nahana ka eona le eo ba neng ba etsa lintho ka eona ha ho ne ho lekoa tumelo ea bona le ho mamela ha bona li ne li tsebahala. Ho sa tsotellehe seo, Jehova o ile a bona ka ho hlaka makhabane a itseng ho bona ’me a tsoela pele ho ba sebelisa tšebeletsong ea hae. Ha ba bang ba re khopisa kapa ba re soabisa, re ka sheba makhabane a bona ao e ka ’nang eaba a ne a re khahla nakong e fetileng, hape re ka sheba molemo oo Molimo a o bonang ho bona.—3/15, leqepheng la 16-19.
• Ke hobane’ng ha liphetolelo tsa Bibele li sa tšoane ka palo ea Lipesaleme?
Ho na le palo e sa tšoaneng pakeng tsa buka ea mathomo ea puo ea Seheberu le phetolelo ea eona e ho Septuagint ea Segerike. Liphetolelo tse ngata tsa morao tjena li ka ’na tsa fapana, ho itšetlehile ka hore na li ne li thehiloe Seheberung kapa ho Septuagint.—4/1, leqepheng la 31.