Lebaka Leo re ke Keng ra Itšehla Thajana ka Lona
“Ba babeli ba molemo ho feta a le mong . . . Haeba a le mong oa bona a ka oa, e mong a ka emisa molekane oa hae.”—Morena Solomone
MORENA SOLOMONE oa Iseraele ea boholo-holo o ile a re: “Ba babeli ba molemo ho feta a le mong, hobane ba na le moputso o molemo bakeng sa mosebetsi oa bona o boima. Etsoe haeba a le mong oa bona a ka oa, e mong a ka emisa molekane oa hae. Empa ho tla ba joang ka a le mong feela ea oang ha ho se na e mong ea mo emisang?” (Moeklesia 4:9, 10) Moshebelli enoa ea bohlale oa boitšoaro ba batho o hatisa hore hoa hlokahala hore re be le metsoalle le hore re se ke ra itšehla thajana. Leha ho le joalo, maikutlo ana a ne a sa tsoe ho eena. Polelo ena ea Solomone e ne e le bohlale bo tsoang ho Molimo ’me e bululetsoe ke Molimo.
Hase bohlale ho itšehla thajana. Motho ke motho ka batho. Kaofela re hloka batho ba bang hore ba re matlafatse le ho re thusa. Maele a Bibele a re: “Ea itšehlang thajana o tla batla tabatabelo ea hae ea boithati; o tla phasoloha khahlanong le bohlale bohle bo sebetsang.” (Liproverbia 18:1) Kahoo, ha ho makatse ha litsebi tsa kahisano li khothalletsa batho hore ba ipope le hore ba thahasellane.
Har’a lintho tse ka etsoang ho tsosolosa kahisano, Moprofesa Robert Putnam o buella hore “ho matlafatsoe tšusumetso ea bolumeli.” Lipaki Tsa Jehova lia ipabola ntlheng ena hobane li thabela tšireletseho liphuthehong tse kang malapa tse lefatšeng ka bophara. Tumellanong le mantsoe a moapostola Petrose, li ‘na le lerato bakeng sa mokhatlo oohle oa bara ba motho,’ ba ‘tšabang Molimo’ ka tlhompho ea borapeli. (1 Petrose 2:17) Ntho e ’ngoe e etsang hore Lipaki li qobe ho itšehla thajana li be li qobe le likotsi tsa hona ke mesebetsi e mengata e molemo e amanang le borapeli ba ’nete eo li tšoarehang ho eona ha li thusa baahelani ba tsona ho ithuta ’nete e ka Lentsoeng la Molimo, Bibele.—2 Timothea 2:15.
Lerato le Botsoalle li Fetotse Bophelo ba Bona
Lipaki Tsa Jehova ke mokhatlo o momahaneng oo ho oona setho se seng le se seng se phethang karolo ea bohlokoa. Ka mohlala, nahana ka Miguel, Froylán le Alma Ruth bao e leng litho tse tharo tsa lelapa le le leng la Latin-America. Ba tsoetsoe ba e-na le lefu la masapo le sitisang motho ho hōla. Boraro ba bona ba tsamaea ka litulo tsa likooa. Ho kopanela le Lipaki ho amme bophelo ba bona joang?
Miguel o re: “Ke ne ke nyahama hangata, empa bophelo ba ka bo ile ba fetoha ha ke qala ho kopanela le batho ba Jehova. Ho itšehla thajana ho kotsi haholo. Ho kopanela le balumeli-’moho libokeng tsa Bokreste le ho ba le bona beke le beke, ho ile ha nthusa haholo hore ke khotsofale.”
Alma Ruth o phaella ka ho re: “Ka linako tse ling ke ne ke imeloa haholo kelellong; ke ikutloa ke saretsoe haholo. Empa hoba ke ithute ka Jehova, ke ile ka utloa hore nka ba le kamano e haufi le eena. Sena e ile ea e-ba ntho ea bohlokoahali bophelong ba ka. Lelapa labo rōna le re tšehelitse haholo, ’me sena se re momahantse haholo.”
Ka lerato ntat’a Miguel o ile a mo ruta ho bala le ho ngola. Ka mor’a moo Miguel eena a ruta Froylán le Alma Ruth. Sena se ne se hlokahala bakeng sa bomoea ba bona. Alma Ruth o re: “Ho ithuta ho bala ho ile ha re thusa haholo hobane joale re ne re ka iphepa moeeng ka ho bala Bibele le lingoliloeng tse thehiloeng Bibeleng.”
Hona joale, Miguel o sebeletsa e le moholo oa Mokreste. Froylán o balile Bibele kaofela ka makhetlo a robong. Ho tloha ka 1996, Alma Ruth eena o ekelitse tšebeletso eo a e etsetsang Jehova ka hore e be pula-maliboho, kapa ’moleli oa ’Muso oa nako e tletseng. O re: “Ke finyeletse pakane ena ka tlhohonolofatso ea Jehova hobane ke tšehelitsoe ke Lipaki tse nthusang boboleling le tse nthusang hore ke khanne lithuto tsa Bibele tse 11 tseo ke khonneng ho li qalisa.”
Mohlala o mong o motle ke oa Emelia, ea ileng a tsoa kotsi e entseng hore a tsamaee ka setulo sa likooa ka lebaka la ho lemala maotong le mokokotlong. Lipaki Tsa Jehova tsa Mexico City li ile tsa ithuta Bibele le eena, ’me o ile a kolobetsoa ka 1996. Emelia o re: “Pele ke tseba ’nete, ke ne ke batla ho ipolaea; ke ne ke se ke sa batle ho phela. Ke ne ke sa tsebe hore na ke phelela’ng, ’me ke lla bosiu le motšehare. Empa ha ke kopanela le batho ba Jehova, ke ile ka utloa lerato la mokhatlo oa bara ba motho. Ke khothalitsoe ke thahasello eo ba mpontšang eona. Moholo e mong o ikentse mor’eso le ntate. Eena le bahlanka ba bang ba sebeletsang ba nkisa libokeng le tšimong ka setulo sa ka sa likooa.”
José, ea ileng a kolobetsoa e le e mong oa Lipaki Tsa Jehova ka 1992, o lula a le mong. O na le lilemo tse 70, ’me o tlohetse mosebetsi ka 1990. José o ne a atisa ho imeloa kelellong, empa ka mor’a hore Paki e buisane le eena, kapele feela o ile a qala ho ba teng libokeng tsa Bokreste. O ile a rata seo a se utloang le ho se bona moo. Ka mohlala, o ile a bona botsoalle ba barab’abo rōna ’me a bona hore baa mo qenehela. Phuthehong, baholo le bahlanka ba sebeletsang baa mo hlokomela. (Bafilipi 1:1; 1 Petrose 5:2) Batho bana bao e leng balumeli-’moho le eena, ke “thuso e matlafatsang” ho eena. (Bakolose 4:11) Ba mo isa ngakeng, baa mo etela, ’me ba ’nile ba mo tšehetsa ka makhetlo a mane ha a ne a buuoe. O re: “Baa nqenehela. Ke banab’eso kannete. Ke thabela botsoalle ba bona.”
Ho Fana ho Thabisa Kannete
Ha Morena Solomone a ne a re “ba babeli ba molemo ho feta a le mong,” o ne a qeta ho bua ka lefeela la ho iqeta matla ka ho bokella maruo. (Moeklesia 4:7-9) Ke sona seo batho ba bangata ba chesehelang ho se etsa kajeno, ’me ka lebaka leo, ba itlhokisa botsoalle le malapa a bona le batho ba bang.
Moea ona oa meharo le boithati o entse hore ba bangata ba itšehle thajana. Empa sena ha se etse hore ba thabe ebile ha se ba khotsofatse, hobane ho tsieleha le ho felloa ke tšepo li tloaelehile bathong ba inehellang moea oa mofuta ona. Ho fapana le seo, litlaleho tse sa tsoa boleloa li bontša liphello tse molemo tsa ho kopanela le ba sebeletsang Jehova le ba susumetsoang ke ho mo rata le ho rata baahelani ba bona. Lintlha tsa bohlokoa tse ileng tsa thusa batho bana ho hlōla maikutlo a mabe a amanang le ho itšehla thajana ke ho ba teng kamehla libokeng tsa Bokreste, ho tšehetsoa ke Bakreste ba bang ba amehileng ka bona le ho chesehela tšimo.—Liproverbia 17:17; Baheberu 10:24, 25.
Kaha motho ke motho ka batho, ho hlakile hore ha re thusana rea khotsofala. Albert Einstein, eo batho ba unang melemo ea mesebetsi ea hae, o ile a re: “Hore motho ke lefisoana le letle . . . ho lokela ho bonahala ka seo a se etsetsang ba bang eseng ka seo a se amohelang.” Sena se lumellana le mantsoe ana a Morena oa rōna Jesu Kreste a reng: “Ho fana ho tlisa thabo e khōlō ho feta ho amohela.” (Liketso 20:35) Ka lebaka leo, le hoja ho ratoa ho le molemo, ho rata ba bang le hona ho etsa hore motho a phele hantle.
Molebeli ea tsamaeang ea etetseng liphutheho ka lilemo tse telele a li thusa moeeng ebile a thusitse hore ho haheloe Bakreste ba futsanehileng Liholo Tsa ’Muso, o itlhalosa tjena: “Thabo ea ho sebeletsa barab’eso le ho bona lifahleho tsa bona li tletse kananelo e nketsa hore ke ’ne ke batle menyetla e meng ea ho thusa. Ke ithutile hore ho rata batho ba bang ke senotlolo sa thabo. ’Me kea tseba hore joaloka baholo re lokela ho ba joaloka ‘sebaka sa ho ipatela moea . . . , joaloka melapo ea metsi naheng e se nang metsi le joaloka moriti oa lefika le leholo naheng e phophothehileng.’”—Esaia 32:2.
Ho Khahlisa Hakaakang ho Lula Hammoho Bonngoeng!
Ke ’nete hore ho thusa ba bang le ho batla botsoalle ba batho ba sebeletsang Jehova ho na le molemo o moholo le thabo ea ’nete. Mopesaleme o ile a bua ka thabo a re: “Bonang! Kamoo ho leng hotle le kamoo ho khahlisang kateng ha bara ba motho ba lula hammoho bonngoeng!” (Pesaleme ea 133:1) Bonngoe ba lelapa ke ba bohlokoa bakeng sa ho tšehetsana, joalokaha ho bontšoa tabeng ea Miguel, Froylán le Alma Ruth. ’Me ke tlhohonolofatso e kaakang ho ba bonngoeng borapeling ba ’nete! Ha moapostola Petrose a qeta ho eletsa banna le basali ba Bakreste, o ile a ngola a re: “Qetellong, kaofela ha lōna le be le kelello e joalo, le bontša ho utloelana bohloko, le e-na le boikutlo bo mofuthu ba bara ba motho, le e-na le qenehelo e bonolo, le ikokobelitse kelellong.”—1 Petrose 3:8.
Setsoalle sa ’nete se na le melemo, maikutlong le moeeng. Ha moapostola Pauluse a ne a bua le metsoalle ea hae tumelong, o ile a e eletsa a re: “Le bue ka mokhoa o tšelisang le meea e tepeletseng maikutlo, le tšehetse ba fokolang, le be le tiisetso ho bohle. . . . Kamehla e mong a phehelle se molemo ho e mong le ho ba bang kaofela.”—1 Bathesalonika 5:14, 15.
Kahoo, batla litsela tseo u ka thusang ba bang ka tsona. ‘Sebetsa se molemo ho bohle, empa haholo-holo ho ba amanang le [uena] tumelong,’ etsoe sena se tla u thusa hore u phele bophelo bo nang le morero oa sebele ’me se tla u khotsofatsa ka ho eketsehileng. (Bagalata 6:9, 10) Morutuoa oa Jesu Jakobo o ile a ngola a re: “Haeba mor’abo rōna kapa morali’abo rōna a le boemong ba tlhobolo ’me a haelloa ke lijo tse lekaneng letsatsi, empa leha ho le joalo e mong ho lōna a re ho bona: ‘Tsamaeang ka khotso, le futhumale ’me le khore,’ empa le sa ba fe tse hlokoang ke ’mele ea bona, ho na le molemo ofe?” (Jakobo 2:15, 16) Karabo ea potso ena e totobetse. Ha ho hlokahale hore re ‘hlokomele lithahasello tsa litaba tsa rōna feela, empa hape [ho hlokahala] re hlokomele lithahasello tsa ba bang.’—Bafilipi 2:4.
Ntle ho ho thusa batho ba bang ka lintho tse bonahalang ha ho hlile ho hlokahala kapa ha ho e-na le koluoa e itseng, Lipaki Tsa Jehova li tšoarehile haholo ka ho ba thusa ka tsela e khethehileng haholo ea ho ba bolella litaba tse molemo tsa ’Muso oa Molimo. (Matheu 24:14) Ho kopanela ha Lipaki tse fetang 6 000 000 mosebetsing oa ho bolela molaetsa oa tšepo le matšeliso ke bopaki ba hore li rata batho ba bang kannete. Empa ho fana ka thuso e tsoang Mangolong a Halalelang ho khotsofatsa batho tlhokong e ’ngoe ea bohlokoa. Tlhoko efe?
Ho Khotsofatsa Tlhoko ea Bohlokoa
E le hore re thabe kannete, re lokela ho ba le kamano e loketseng le Molimo. Ho ’nile ha thoe: “’Nete ea hore haesale motho a susumelletseha ho itšetleha ka ntho e ’ngoe eo a nahanang hore e mo phahametse ebile e matla ho mo feta, e bontša hore bolumeli ke karolo ea motho ’me saense e lokela ho ela sena hloko. . . . Ho bona kamoo ka kakaretso batho ba batlang motho e mong ea phahameng ka ho fetisisa le kamoo ba lumelang ho eena kateng, ho lokela ho re tlatsa tlhompho, ho hlolloa le tšabo.”—Man Does Not Stand Alone, ea A. Cressy Morrison.
Jesu Kreste o ile a re: “Ho thaba ba elang hloko tlhoko ea bona ea moea.” (Matheu 5:3) Litaba tsa batho ha li tsamaee hantle ha ba itšehla thajana ka nako e telele. Leha ho le joalo, ke ntho e kotsi haholo ha re ikarola ho ’Mōpi oa rōna. (Tšenolo 4:11) Ho fumana “tsebo ea Molimo” le ho e sebelisa e lokela ho ba ntho ea bohlokoa bophelong ba rōna. (Liproverbia 2:1-5) Ka sebele, a re ikemisetseng ho khotsofatsa tlhoko ea rōna ea moea, hobane re ke ke ra itšehla thajana eaba re emella thōko le Molimo! Bophelo ba thabo le bo putsang kannete bo fumanoa ka kamano e ntle le Jehova, “Ea Phahameng ka ho Fetisisa holim’a lefatše lohle.”—Pesaleme ea 83:18.
[Setšoantšo se leqepheng la 5]
Miguel: “Ke ne ke nyahama hangata, empa bophelo ba ka bo ile ba fetoha ha ke qala ho kopanela le batho ba Jehova”
[Setšoantšo se leqepheng la 5]
Alma Ruth: “Hoba ke ithute ka Jehova, ke ile ka utloa hore nka ba le kamano e haufi le eena”
[Setšoantšo se leqepheng la 6]
Emelia: “Pele ke tseba ’nete, . . . ke ne ke sa tsebe hore na ke phelela’ng”
[Setšoantšo se leqepheng la 7]
Ho kopanela le barapeli ba ’nete ho re thusa ho khotsofatsa tlhoko ea rōna ea moea