Batho ba Khotso ba Loanela Lebitso la Bona

KA December 2009 le January 2010, makhotla a mabeli a phahameng ka ho fetisisa Russia a ile a phatlalatsa hore tumelo ea Lipaki Tsa Jehova e fetelletsa litaba. Ntho e neng e kile ea etsahala e ile ea bonahala e ipheta. Ha Russia e ne e le tlas’a puso ea Masoviet, Lipaki tse likete li ile tsa qosoa ka leshano la hore ke lira tsa ’muso. Li ile tsa lelekeloa ka ntle ho naha, tsa hlahleloa lichankaneng le ho isoa ka sheshe likampong tsa mosebetsi o boima. Ka mor’a hore puso eo e oe, ho ile ha hlakoloa melato eohle eo Lipaki Tsa Jehova li neng li nyetuoe ka eona. ’Muso o mocha o ile oa khutlisa botumo ba tsona bo botle.a Joale ho bonahala ho boetse ho e-na le batho ba ikemiselitseng ho senya Lipaki lebitso.

Mathoasong a 2009, ba boholong ba ile ba hlasela tokoloho ea bolumeli eo Lipaki Tsa Jehova li nang le eona. Ka February feela, bachochisi ba ile ba etsa lipatlisiso tse fetang 500 naheng ka bophara. E ne e le ka sepheo sefe? E ne e le ho fumana lintho tseo ho thoeng Lipaki li tlōla molao ka tsona. Likhoeling tse latelang tseo, mapolesa a ile a hlasela liboka tsa borapeli tse renang khotso, tse tšoareloang Liholong Tsa ’Muso le malapeng a batho. A ile a nka lingoliloeng le thepa e ’ngoe ea batho. Ba boholong ba ile ba leleka liakhente tse tsoang ka ntle ho naha tse neng li thusa Lipaki ba ba ba li hanela ho khutlela ka har’a naha.

Ka la 5 October, 2009, basebeletsi ba ’muso ba lekhetho la thepa ba ile ba tšoara lingoliloeng tse thehiloeng Bibeleng tse neng li rometsoe ka sekepe haufi le moeli oa St. Petersburg. Lingoliloeng tseo li ne li hatisitsoe Jeremane ’me li ne li leba liphuthehong tse ngata tse Russia. Sehlopha se khethehileng se hlahlobang thepa e seng molaong e kenang le e tsoang Russia se ile sa hlahloba lingoliloeng tseo. Ka lebaka lefe? Tokomane ea ’muso e ile ea re “ho ka ’na ha etsahala hore ebe lingoliloeng tseo li na le boitsebiso bo reretsoeng ho baka moferefere bolumeling.”

Kapele ka mor’a moo, tšoaro ena e mpe e ile ea mpefala le ho feta. Makhotla a Phahameng a ’Muso oa Russia le Rephabliki ea Altay (karolo ea Russia) a ile a phatlalatsa hore lingoliloeng tse ’maloa tsa Lipaki, ho akarelletsa le eona makasine ena eo u ntseng u e bala, li fetelletsa litaba. Lipaki Tsa Jehova li ile tsa ipiletsa molaong, batho ba linaha tse ling le bona ba bontša hore ba tšoenyehile ka seo, empa ha ho letho le ileng la fetoha. Hona joale Russia ho ntse ho lateloa qeto eo ’me ho nkoa e le ntho e seng molaong ho kenya lingoliloeng tseo tse thehiloeng Bibeleng ka har’a naha kapa ho li fa batho ba bang.

Lipaki li entse’ng ka boiteko boo ba ho li senya lebitso le ho thibela mosebetsi oa tsona? Hona qeto ee ea Makhotla e bontša’ng ka tokoloho ea bolumeli ea baahi bohle ba Russia?

Boemo bo Ntseng bo E-ba Kotsi bo Nkeloa Khato ka Potlako

Ka Labohlano la la 26 February, 2010, Lipaki Tsa Jehova tse ka bang 160 000 naheng eohle ea Russia li ile tsa qala ho aba lipampitšana tse khethehileng tse limilione tse 12, tse nang le sehlooho se reng Could It Happen Again? A Question for the Citizens of Russia (Na ho ka Etsahala Hape? Potso e Tjametseng Baahi ba Russia). Ka mohlala, motseng o mong oa Siberia o bitsoang Usol’ye-Sibirskoye, Lipaki tse makholo li ile tsa kopana literateng ka 5:30 hoseng. Har’a tsona ho ne ho e-na le batho ba ileng ba lelekelloa Siberia ka 1951 ka lebaka la tumelo ea bona. Ba ile ba mamella serame sa likhato tse 40 tsa Celsius tlas’a ntlha ea khoamo e le hore ba abe lipampitšana tse 20 000 tseo ba neng ba e-na le tsona.

E le hore li phatlalatse ka letšolo leo la matsatsi a mararo, Lipaki Tsa Jehova li ile tsa e-ba le seboka le baqolotsi ba litaba Moscow, motse-moholo oa Russia. Har’a ba neng ba menngoe hore ba tl’o bua e ne e le Monghali Lev Levinson, eo e leng setsebi Mokhatlong oa Litokelo Tsa Botho. O ile a pheta ka bokhutšoaane hore na mehleng ea puso ea Manazi Jeremane, le ea Soviet Union, Lipaki Tsa Jehova li ile tsa tšoaroa hampe ka tsela e hlokang kelello hakaakang tsa ba tsa hlorisoa, a ba a bontša hore ka mor’a moo ’muso o ile oa hlakola melato eohle eo Lipaki li neng li nyetuoe ka eona. O ile a boela a re: “Mopresidente Yeltsin o ile a laela hore malumeli ’ohle a ileng a hlorisoa nakong ea puso ea Soviet Union a khutlisetsoe litokelo tsa ’ona. Ntho e ’ngoe le e ’ngoe eo a neng a ile a e nkeloa e ne e lokela ho khutlisetsoa ho ’ona. Lipaki Tsa Jehova li ne li se na thepa e ikhethang mehleng ea puso ea Soviet Union, empa lebitso la tsona le letle le ile la khutlisoa.”

Hona joale lebitso leo le letle le boetse le kotsing. Monghali Levinson o ile a re: “Hona naheng ena e ileng ea ikoahlaea, batho bana ba se ba boetse ba hlorisoa ntle ho mabaka.”

Letšolo le Ama ba Bangata

Na letšolo la ho aba lipampitšana le ile la finyella sepheo? Monghali Levinson o ile a re: “Ha ke e-tla sebokeng sena, ke bone batho liteisheneng tsa terene ba lutse ’me ba bala pampitšana eo Lipaki Tsa Jehova li e fang batho naheng eohle ea Russia kajeno. . . . Batho ba lula fatše ho e bala, le hona ba e bala ka kelo-hloko eohle.”b Ka mohlala, hlokomela liketsahalo tse latelang.

Nkhono e mong ea lulang Russia bohareng moo Mamosleme a leng mangata haholo o ile a amohela pampitšana eo ’me a botsa hore na e bua ka eng. Ha a bolelloa hore e tšohla litokelo tsa batho le tokoloho ea bona Russia, o ile a re: “Qetellong, ha ka ha e-ba le motho ea phunyang seso sena! Ke bona eka Russia e khutlela mehleng ea Soviet Union. Ke leboha haholo. Le tšoare tsoho leo!”

Ha ’mè e mong oa Chelyabinsk a fuoa pampitšana eo, o ile a re: “Ke se ke e fumane ebile ke e balile. Ke lumellana le lōna hantle. Ha ke e-s’o bone bolumeli bo tsebang ho emela tumelo ea bona ka tsela e hlophisehileng joaloka bona ba lōna. Ke rata tsela eo le aparang ka eona, ebile ka linako tsohle le bua le batho ka tsela e mosa. Ho hlakile hore le na le tumelo e matla. Molimo o tlameha a e-na le lōna.”

St. Petersburg teng, ntate e mong ea ileng a re o se a fumane pampitšana eo o ile a botsoa hore na o ratile seo a se balileng kapa che. Ha a araba, o ile a re: “Ke ratile seo ke se balileng. Ke ile ka ameha haholo ka ba ka lla ha ke ntse ke e bala. Nkhono oa ka ke e mong oa ba ileng ba hatelloa [pusong ea Masoviet] ’me o ne a mpolelle lintho tse ngata ka batho bao a neng a tšoeroe le bona. Ho ne ho e-na le ba bangata bao e neng e le litlokotsebe, empa hape ho ne ho e-na le ba se nang molato ba neng ba mpa ba tšoaretsoe tumelo ea bona. Ke nahana hore motho e mong le e mong o lokela ho tseba se etsahetseng, le hlile le etsa hantle.”

Bokamoso ke Bofe Russia?

Lipaki Tsa Jehova li ananela haholo tokoloho eo li ’nileng tsa e-ba le eona Russia lilemong tse mashome a mabeli tse fetileng. Leha ho le joalo, li tseba hantle hore na ho bonolo joang hore li nkeloe tokoloho eo. Ho se ho tla bonahala ha nako e ntse e-ea hore na tlhaselo e matla e senyang Lipaki lebitso e bontša hore Russia e khutlela mehleng ea bohatelli kapa che.

Leha ho le joalo, Lipaki Tsa Jehova li ikemiselitse ho tsoela pele ka mosebetsi oa tsona oa ho bolela molaetsa oa Bibele o tlisang khotso le o fanang ka tšepo, ho sa tsotellehe hore na ho etsahala’ng. Pampitšana eo e khethehileng e phetha ka qeto ena eo li e entseng: “Khatello e ke ke ea atleha le ka mohla. Re ke ke ra khaotsa ho bua ka mosa le ka tsela e hlomphang ka Jehova Molimo le ka Lentsoe la hae, Bibele. (1 Petrose 3:15) Ha rea ka ra khaotsa ha re ne re tšoeroe ka tsela e sehlōhō haholo ke Jeremane ea Bonazi, ha rea ka ra khaotsa nakong eo naha ea rōna e neng e re hateletse ’me le kajeno re ke ke ra khaotsa.—Liketso 4:18-20.”