Thusa ba Bang ho ba Hloahloa ha ba Sebelisa Lentsoe la Molimo
1 Jehova o entse litokisetso tse ngata-ngata bakeng sa ho re koetlisetsa hore re atlehe ho phethahatsa tšebeletso ea rōna ea botho. Ka ho sebelisa seo a faneng ka sona, ‘metsamao ea rōna ka boeona e tiisitsoe.’ (Pes. 37:23) Ka mohlala, ka lilemo tse ka bang 50 Sekolo sa Tšebeletso sa Puso ea Molimo se ’nile sa fana ka koetliso e tsoelang pele tsebong ea ho bua le ea ho ruta. Sena se ’nile sa tšehetsoa ke Seboka sa Tšebeletso sa beke le beke, hammoho le lipuo tsa sona tse sebetsang, lipontšo, le linako tsa puisano.
2 Re rua molemo liketelong tsa ka mehla tsa balebeli ba potoloho. Molebeli oa tšebeletso o etela sehlopha ka seng sa thuto ea buka ’me o fana ka khothatso e lerato ho re thusa ho ntlafatsa matla a rōna tšebeletsong ea phatlalatsa. Hammoho le sena sohle, nako le nako ha re kopana bakeng sa tšebeletso ea tšimo, metsotso e leshome e sebelisoang bakeng sa thupelo e sebetsang e fana ka khothatso le litlhahiso tsa bohlokoa bakeng sa letsatsi leo. (Ba-Heb. 10:23-25) Litokisetso tse joalo tse finyelloang ka mokhatlo o hlophisitsoeng oa Jehova li bontša kameho ea hae e lerato ho bao a ba romileng ho bolela litaba tse molemo.
THUSA BACHA LE LIITHUTI TSA BIBELE
3 Bahoeletsi ba bacha le ba sa tsoa kopanela ba hloka thuso ea ka mehla ea botho tšebeletsong ea phatlalatsa. Le hoja kaofela ha rōna re ka fana ka thuso nako le nako, boikarabelo ba sehlooho ke ba batsoali le ba khannelang ba joalo lithuto tsa Bibele. (Ba-Gal. 6:6, NW; Ba-Ef. 6:4) Ho atleha ho sebelisa Bibele ha ho itlise ka bohona ha nako e ntse e feta le ka tekanyo e itseng ea phihlelo. Ho fapana le hoo, ho hlokahala thuso e lerato ea botho le koetliso tse hlophisehileng.
4 Thuso ea botho e lokela ho qala pele motho eo a hlile a kopanela tšebeletsong. Hlahlobang Sehlooho sa Puisano. Thusa ba tšoanelehang ho kopanela tšebeletsong ho etsa nehelano e bonolo. Mohlomong ba ka sebelisa lengolo le le leng feela la mangolo a hlahisitsoeng ho fihlela ba fumana phihlelo e khōloanyane le kholiseho. Ha le ntse le sebetsa hammoho tšebeletsong, iphe nako ea ho fana ka pabatso le ho fana ka litlhahiso tse mosa tsa kamoo ho ka ntlafatsoang ka teng ha le tloha ntlong e ’ngoe le e-ea ho e ’ngoe. Hatisa tlhokahalo ea ho ba le boikutlo ba thapelo ka linako tsohle.—Ba-Ef. 6:18, 19.
5 Le hoja bo-pula-maliboho ba bangata ba ka mehla le bahoeletsi ba bang ba nang le phihlelo ba kopanela tšebeletsong haholo-holo har’a beke, ke hantle haholo ha bahoeletsi bana ba atlehang ba ka hlophisa likemiso tsa bona hape e le hore ba ka tšehetsa tšebeletso ea tšimo ea mafelo-beke nako le nako. Boitelo bo joalo ba bona bo tla ananeloa haholo ke ba bang ba ratang ho ntlafatsa ka ho sebetsa hammoho le bona tšebeletsong.—Moek. 4:9, 10.
6 Ka nako e ’ngoe kaofela ha rōna re kile ra ba bacha re bile re se na phihlelo tšebeletsong ea tšimo. Bongata ba rōna re ile ra fumana khothatso le koetliso ho bahoeletsi kapa bo-pula-maliboho ba nang le phihlelo e khōloanyane. Ho ba hloahloa ha rōna le thabo e eketsehileng tsa hona joale tšebeletsong ke phello e tobileng ea thuso eo. (Liprov. 27:17; Lik. 20:35) E se eka kananelo ea rōna ka seo Jehova a re etselitseng sona ka koetliso e mafolo-folo tšebeletsong e ka re susumelletsa ho itlhahisa hore re thuse ba bang ho ba hloahloa haholoanyane ha ba sebelisa Lentsoe la Jehova.