Ho Nehelana ka Litaba Tse Molemo—Ho Qalisa Lithuto ka Katamelo e Tobileng
1 Jesu o re laetse hore re “etse barutuoa.” (Matt. 28:19, BPN) Hangata ho finyella sena ho hloka hore re qalise lithuto tsa Bibele le batho ba thahasellang. Ho sebelisa katamelo e tobileng bakeng sa ho qalisa lithuto tsa Bibele tšebeletsong ea ntlo le ntlo ho ka re thusa ho finyella sena kapele. Ho boetse ho bontša ka ho hlakileng morero oa leeto la rōna.
2 Re ka re’ng ha re sebelisa katamelo e tobileng bakeng sa ho qalisa lithuto tsa Bibele? Katamelo e bonolo haholo e molemo. Mohlomong re ka re: “Ke thahasella ho thusa batho ho utloisisa Bibele ’me nka thabela ho ithuta eona le uena hammoho le lelapa la hao, lapeng la hao ntle ho tefo. Re ka sebelisa Bibele ea hao. Haeba u se na eona, nka u fumanela eona.”
3 Katamelo e ’ngoe e ka ba ena: “Morero oa ka oa ho u etela kajeno ke ho khothalletsa thuto ea lehae ea Bibele, e tla u thusa ho utloisisa hore na lefatše lena le habile hokae le hore na Molimo o re boloketse eng. Nka thabela ho u bontša hore na ke joang u ka ruang molemo o moholo ka ho fetisisa Bibeleng ea hao. Ha ho hlokahale hore u lefe.” Haeba mong’a ntlo a lumela, mohlomong u ka sebelisa pampitšana ea Bophelo Lefatšeng le Lecha la Khotso kapa buka ea Phela ka ho sa Feleng, mohlomong u ka qala leqepheng 10, serapa 11. Sehlooho sena se totobatsa tšepiso ea Jehova ea ho tsosolosa Paradeise.
4 Sebelisa Lipampitšana tsa Bibele: Ba bangata ba fumane hore lipampitšana lia thusa ha ba sebelisa katamelo e tobileng. Ha mong’a ntlo a bula monyako, mo fe pampitšana ea Bophelo Lefatšeng le Lecha la Khotso u e phuthollotse e le hore a ka bona setšoantšo ka ho felletseng. Nka pampitšana e ’ngoe, ’me u bale kapa u qanolle lipotso tse leng lirapeng tse peli tse qalang. Buisana le eena ka likarabo, ’me u bale lengolo le le leng kapa a mabeli a tšehetsang taba. Joale bolela hore u thabetse puisano eo, ’me u etse tokisetso ea ho khutla. Haeba ho loketse, ka bokhutšoanyane hlalosa lenaneo la rōna le sa lefelloeng la thuto ea lehae ea Bibele, kapa u etse tokisetso ea ho khutla le ho buisana ka lintlha tse eketsehileng pampitšaneng eo.
5 Ha u etsa tokisetso ea ho khutlela ho mong’a ntlo, ho ka ba hotle hore u bolele ntho e itseng eo u nahanang hore e tla hapa thahasello ea hae. Mohlomong u ka sebelisa potso. E tla siea mong’a ntlo a lebelletse ketelo e tlang ka cheseho ha u tlil’o arabela potso eo.
6 Buka ea Phela ka ho sa Feleng ke kofuto e tsotehang ea ho thusa ba sa tsebeng seo merero ea Molimo e leng sona le seo o se hlokang. E ruta hore litlhokahalo tsa Molimo li akarelletsa ho utloa melao ea oona, ho kopanela le mocha oa oona kapa mokhatlo o hlophisitsoeng le ho buella puso ea oona ea ’Muso ka botšepehi ho ba bang, e be ka ho etsa joalo motho o fetola bophelo ba hae hore bo lumellane le litlhokahalo tsa boitšoaro tse boletsoeng ka Bibeleng. E fa batho tsebo ka Jehova Molimo, Jesu Kreste, merero ea Molimo ka lefatše le karolo eo Kreste a e phethang joaloka Morena e mocha oa lefatše. Litšoantšo tse leng khaolong ea 19 li tla hapa tlhokomelo ea batho ba lipelo li tšepahalang, li tsose thahasello ea bona Bibeleng le mererong ea Jehova. Kahoo kaofela ha rōna a re sebeliseng hamolemo monyetla o mong le o mong oa ho qalisa lithuto le ho kopanela thōmong ea hore re “etse barutuoa.”—Matt. 24:14; 28:19, 20, BPN; Mar. 13:10.