Khanna Lithuto Tsa Bibele ka Buka Phela ka ho sa Feleng
1 Mosali e mong ha a bua ka buka Phela ka ho sa Feleng, o itse: “Ntle le Bibele, ke fumane hore buka ena ke sengoliloeng se nepahetseng ka ho fetisisa, se amang maikutlo, le se susumetsang ho feta sengoliloeng leha e le sefe seo nkileng ka se bala!” Kaofela ha rōna rea lumela hore buka ena ke e ’ngoe ea tse ntle ka ho fetisisa tse kileng tsa hatisoa ho thusa batho hore ba utloisise Bibele ’me haholo-holo ho ba susumeletsa hore ba fetohe barorisi ba mafolo-folo ba Jehova.
2 Ka 1982, e leng selemo seo buka ea Phela ka ho sa Feleng e ileng ea lokolloa ka sona, bahoeletsi ba 28 783 ba ne ba khanna lithuto tsa Bibele tse etsang kakaretso ea tse 17 791 Afrika Boroa. Hona joale, bahoeletsi ba 54 939 ba khanna lithuto tsa Bibele tse 53 352. Ho fihlela joale, likopi tse limillione tse 62 tsa buka ea Phela ka ho sa Feleng li hatisitsoe ka lipuo tse 115. Buka ee e na le tšusumetso e kaakang mosebetsing oa rōna oa lefatše ka bophara!
3 Ipeele Lipakane: Khōlō ena e ikhethang ke phello ea tlhohonolofatso ea Jehova chesehong e bontšitsoeng ke batho ba hae ho thusa ba tšepahalang ka molaetsa oa Bibele o bolokang bophelo. (Ba-Roma 10:13-15; 1 Tim. 2:4) Re hlokomela ho potlaka ha linako le tlhokahalo ea hore ho boleloe ka ’Muso oa Molimo ka mafolo-folo.
4 Ha mokhatlo o hlophisitsoeng o hatela pele, rōna re etsa joang re le motho ka mong? Na re ikemiselitse ho ba le karolo e feletseng mosebetsing oa bohlokoa oa ho etsa barutuoa? E le hore re finyelle sena, re lokela ho ipehela lipakane tsa botho. Na re ka ba mafolo-folo haholoanyane ho latella thahasello? Ke hobane’ng ha re sa ipehele pakane ea ho qalisa thuto e ncha ea Bibele khoeling ea February?
5 Ke Mang ea ka Khannang Thuto ea Bibele?: Bahoeletsi ba bangata ba nang le litso tse sa tšoaneng ba ile ba thabela ho khanna thuto ea Bibele ka buka Phela ka ho sa Feleng. Mokhoa o bonolo oo e ngotsoeng ka ’ona o etsa hore ho khanna thuto ho be bonolo haholoanyane, ’me sena se nolofaletsa bahoeletsi ba ntseng ba le bacha hore ba be le karolo mosebetsing ona oa bohlokoa. Ho phaella moo, re e balile re le bangata, ’me re tloaelane le litaba tsa eona tse kahare. Mohoeletsi e mong ea neng a e-s’o khanne lithuto tsa Bibele pele ka buka Phela ka ho sa Feleng o ile a ngola a bontša kananelo: “Ke na le lithuto tse tharo ’me ke se ke loketse ho qalisa ea bone. Ke haelloa ke mantsoe a ho leboha hore ebe le entse hore ho be bonolo haholoanyane ho khanna lithuto tsa Bibele.”
6 Le ba banyenyane ba na le karolo e mafolo-folo mosebetsing oa lithuto tsa Bibele ho sebelisoa buka Phela ka ho sa Feleng. Moena e mong e monyenyane o siea buka holim’a deske ea hae sekolong. Sena se betlile tsela bakeng sa puisano e ntle le lithuto tse ’maloa tsa Bibele. Bacha ba bang ba sebelisitse katamelo e tobileng ka ho kōpa tumello ho batsoali bao ba teanang le bona ha ba le tšebeletsong ea ntlo le ntlo hore ba be le thuto ea Bibele le bana ba bona. Ha ho mohla bana ba rōna ba leng banyenyane haholo hore ba ka bua ka tšepiso ea Jehova ea bophelo bo sa feleng paradeiseng lefatšeng.
7 Ebang re bacha kapa re batho ba baholo, thabo e ’ngoe e khōlō ka ho fetisisa eo motho leha e le mang a ka bang le eona tšebeletsong ke ea ho khanna thuto ea lehae ea Bibele. Kahoo e se eka e mong le e mong oa rōna a ka rapella thuso ea Jehova ’me a sebelisa monyetla o mong le o mong ho bua ka tšepo ea rōna phatlalatsa. Sebelisa buka Phela ka ho sa Feleng ho thusa ba bang hore ba ithute kamoo ba ka bang le karolo ho roriseng Molimo oa rōna, Jehova.—Pes. 148:12, 13.