Na U ka Eketsa Thoriso ea Hao ho Jehova ka April?
1 Mopesaleme Davida o bile le takatso e tsoang botebong ba pelo ho rorisa Jehova ka ho amohelehang, ’me kahoo o ile a re: “Ke tla rorisa Jehova ka molomo oa ka le ka lentsoe le phahameng; ke tla mo roka har’a bongata.” (Pes. 109:30) April ke nako e loketseng ea ho ‘eketsa thoriso ea hae’ ka ho eketsa ho kopanela ha rōna tšebeletsong ea tšimo. (Pes. 71:14, BPN) Na u rerile ho ba har’a ba bangata ba etsang joalo ka ho kopanela mosebetsing oa bopula-maliboho bo thusang?
2 Lokisetsa Hona Joale: Ho Liproverbia 21:5 (NW) rea hopotsoa: “Merero ea motho ea khothetseng ka sebele e tla mo tsoela molemo.” Sena se hloka ho isa taba ho Jehova ka thapelo, u mo eteletse pele mererong ea hao. (Liprov. 3:5, 6) Joale hlahloba kemiso ea hao ea nakong ea joale ho bona moo ho ka etsoang liphetoho bakeng sa ho sebetsa karolelano ea lihora tse peli ka letsatsi tšebeletsong. “Ho reka” ha hao nako mesebetsing e meng ho tla u lumella ho qeta nako e eketsehileng mosebetsing oa boboleli.—Ba-Ef. 5:16, NW.
3 Puisano le Tšebelisano-’moho: Moapostola Pauluse o buile ka ba bang bao e neng e le “thuso e matlafatsang” ho eena ho phethahatsa tšebeletso ea hae. (Ba-Kol. 4:11, NW ) Buisana le ba bang ba batlang ho ngolisa ka April ka merero ea hao. Tšehetso ea bona le botsoalle li ka tlisa melemo ea moea. Molebeli oa tšebeletso a ka u thusa haeba u e-na le lipotso ka litokisetso tsa tšebeletso kapa tšimo e tla sebetsoa. Na re ka boela ra ipehela pakane ea ho finyella tlhōrō e ncha ea bo-pula-maliboho ba thusang ka April?
4 Tšebelisano-’moho le tšehetso tse tsoang lelapeng li ka thusa litho ka bomong tsa lelapa ho ba pula-maliboho ea thusang. Mohlomong ho ka hlokahala hore mesebetsi ea lelapa e arolelanoe. Mohlomong kemiso ea mesebetsi ena le eona e ka fetoloa. Seboka sa lelapa bakeng sa ho buisana ka litlhoko tsena e ka ba sa bohlokoa ho finyella morero ona. Puisano e molemo le tšebelisano-’moho ke tsa bohlokoa bakeng sa katleho.
5 E-ba le Pono e Ntle: U se potlakele ho qhela monyetla oa ho ba pula-maliboho ea thusang ka lebaka la maemo a seng matle. Bacha ba leng sekolong, batho ba leng pensheneng, bo-’mè ba malapa ba nang le bana, lihlooho tsa malapa tse sebetsang ka linako tsohle, kaofela ha bona ba tsebile ho itela—’me e le ka thabo—ho ba bo-pula-maliboho ba thusang ka April. Ba lumellana le mopesaleme hore “thoko e tšoanela batho ba lokileng,” ’me ha baa ho nka e le ho bitsang haholo ho ikitlaetsa ka ho eketsehileng ho sebetsa lihora tse 60 tšebeletsong. (Pes. 33:1) Haeba u hlōleha ho ngolisa, ke hobane’ng ha u sa kopanele thabong ka ho eketsa mosebetsi oa hao joaloka mohoeletsi oa phutheho?
6 Ho ba bangata, ho ba pula-maliboho ea thusang ka April e bile mohato o lebisang tšebeletsong ea bopula-maliboho ba ka mehla. Ka lebaka la ho eketsa mosebetsi oa bona, ba hlokometse hore ho fetela mosebetsing oa bopula-maliboho ba ka mehla ho ipakile ho le bonolo haholo. Liithuti tsa Bibele tse finyellang litlhoko tse thathamisitsoeng maqepheng 98 le 99 a buka Tšebeletso ea Rōna le tse lakatsang ho kopanela ka mehla tšebeletsong ea phatlalatsa li lokela ho thusoa ho ba bahoeletsi ba sa kolobetsoang. Haeba kaofela re kopanela tšebeletsong ka April, ho thusa ba bacha ho kopanela le rōna, le ho tlaleha mosebetsi oa rōna oa tšimo kapele bofelong ba April, ha re bone lebaka leo re ke keng ra finyella tlhōrō e ncha ea bahoeletsi ka April.
7 E, nako ea lumela bakeng sa mosebetsi o eketsehileng oa puso ea Molimo ka April. Bahoeletsi ba bangata ba tla be ba le matsatsing a phomolo ea sekolo. Ho boetse ho na le matsatsi a mangata a phomolo ea sechaba. April 9 ke Letsatsi la Limakasine le khethehileng le tla nolofaletsa ba bangata ho qeta letsatsi lohle kabong ea limakasine, ka ntlo le ntlo le bopaking ba seterateng. Re batla ho etsa sohle seo re ka se khonang ho rorisa Molimo oa rōna, Jehova. Bopula-maliboho bo thusang ka April ke tsela e babatsehang ho bontša kananelo ea rōna bakeng sa liketso tsa hae tse ngata tsa mosa o sa tšoanelang ho rōna.