Bophelo bo Tla ba Joang Nakong e Tlang?
U kile oa ipotsa hore na re tla phela tjee ho fihlela neng? Bibele e bua ka lintho tse tla etsahala haufinyane le hore na li tla re ama joang.
Jesu o ile a hlalosa hore na re tla tseba joang hore “’Muso oa Molimo o haufi.” (Luka 21:31) Lintho tseo a buileng ka tsona rea li bona lia etsahala hona joale tse kang, lintoa, litšisinyeho tsa lefatše, khaello ea lijo le mafu a seoa.—Luka 21:10-17.
Ho na le nako eo lefatše le tla beng le sa busoe ke batho, Bibele e re ha nako eo e atamela batho ba tla ba mekhoa e mebe. Ha u ka bala 2 Timothea 3:1-5 u tla bona hore boprofeta boo boa phethahala.
Ha nako ea hore batho ba buse e felile ho tla etsahala’ng? ’Muso oa Molimo oa tla o tl’o felisa mathata ’ohle a rona. (Luka 21:36) Ka Bibeleng Molimo o tšepisa hore o tla fetola lefatše e le hore re ka thabela ho phela ho lona. Mehlala ea lintho tseo a tla li etsa ke ena:
’MUSO OO BATHO BA O HLOKANG
“[Jesu] a fuoa bobusi le ho hlompheha le ’muso, hore batho, lichaba le lipuo kaofela ba mo sebeletse. Bobusi ba hae ke bobusi bo hlolang ka nako e sa lekanyetsoang bo ke keng ba feta, ’me ’muso oa hae ke o ke keng oa senngoa.”—DANIELE 7:14.
Taba ee e u ama joang? U ka phela hamonate tlas’a ’Muso oa Molimo o tla busa lefatše lohle oo Molimo a khethileng hore mora oa hae e be morena oa oona.
BOPHELO BO BOTLE
“Ha ho moahi ea tla re: ‘Kea kula.’”—ESAIA 33:24.
Taba ee e u ama joang? Ha ho mohla u tla kula kapa u be le bokooa ebile ha ho mohla u tla shoa.
HO TLA RENA KHOTSO
“O felisa lintoa ho isa pheletsong ea lefatše.”—PESALEME EA 46:9.
Taba ee e u ama joang? U ke ke oa utloela feela le menyenyetsi ea ntoa kapa ntho leha e le efe e amanang le eona e bakelang batho mathata.
LEFATŠENG MONA HO TLA TLALA BATHO BA BATLANG HO SEBELETSA MOLIMO FEELA
“Ea khopo ha a sa tla hlola a e-ba teng . . . ba bonolo ba tla rua lefatše.”—PESALEME EA 37:10, 11.
Taba ee e u ama joang? Ho ke ke ha hlola ho ba le batho ba sa mameleng Molimo lefatšeng.
HO TLA BA MONATE LEFATŠENG
“Ba tla haha matlo ’me ba lule ho ’ona; ka sebele ba tla lema lirapa tsa morara ’me ba je litholoana tsa tsona.”—ESAIA 65:21, 22.
Taba ee e u ama joang? Motho e mong le e mong o tla thabela ho phela lefatšeng. Molimo o tla arabela thapelo ea rona ea hore ‘thato ea hae e ke e etsahale lefatšeng.’—Matheu 6:10.