Na U Kile Ua Sebelisa Leqephe la ho Qetela?

Hangata ha batho ba nka makasine ba sheba leqephe la pele ebe ba sa nahana le ho nahana ba potlakela ho sheba leqephe la ho qetela. Leqepheng la ho qetela la khatiso ea batho ka kakaretso ea Molula-Qhooa ho na le lipotso le lipolelo tse ’maloa tse thahasellisang, ebile ho bontšoa maqephe ao boitsebiso bo hlahang ho ’ona.

Re ka sebelisa leqephe lena hore re fumane lintlha tsa bohlokoa tsa lipotso tseo re ka li sebelisang ho qala moqoqo. Haeba e le tšimo eo re e sebetsang khafetsa, khoeli e ka fela re ntse re feto-fetola molaetsa oa rōna ka hore re sebelise lipotso tse sa tšoaneng. Haeba mong’a ntlo a phathahane, re ka li otla mabala-nkoe ebe re mo bontša e ’ngoe ea lipotso tse leqepheng la ho qetela re nt’o re, “Haeba u batla ho tseba karabo, nka u siela limakasine tsena ’me re tla qoqa mohla u nang le nako.” Bahoeletsi ba bang ba ka ’na ba ikhethela ho qala moqoqo ka ho bontša mong’a ntlo leqephe la ho qetela ebe ba mo kōpa hore a ikhethele potso eo a ratang ho tseba karabo ea eona. Ka mor’a moo, ba ka mo bontša hore na karabo e fumanoa hokae ’me ba bala temana eo ba e khethileng esale pele. Mohlomong u ka nahana ka litsela tse ling tseo ka tsona u ka buellang Molula-Qhooa hamonate u sebelisa leqephe la ho qetela.