Ho Ntlafatsa Tsebo ea Rōna Boboleling—Ha re Tsamaisa Buka ea Seo Bibele e se Rutang

Ke Hobane’ng ha e le Habohlokoa: Buka ea Seo Bibele e se Rutang ke e ka sehloohong eo re e sebelisang ho ruta batho Bibele. Leha ho le joalo, pele re ithuta buka ena le motho, re lokela ho mo tsamaisetsa eona. Ka lebaka leo, kaofela ha rōna re lokela ho ithuta ho tsamaisa buka ea Seo Bibele e se Rutang tšebeletsong ea tšimo. (Liprov. 22:29) Re ka etsa seo ka litsela tse ngata ’me bahoeletsi ba lokela ho sebelisa mokhoa oo ba bonang o atleha.

Kamoo re ka ho Etsang Kateng:

Botsa mong’a ntlo potso e thahasellisang eo u ka e arabang ka khaolo eo u e khethileng. U ka ’na ua khetha ho botsa e ’ngoe ea lipotso tse hlahang qalong ea khaolo. Ka mor’a hore mong’a ntlo a arabe, mo balle lengolo le loketseng ebe u mo bontša serapa se arabelang potso eo ’me mohlomong le ka buisana ka sona.
U ka boela ua botsa lipotso tse hlahang leqepheng la pele la buka ena ho tsosa thahasello ea mong’a ntlo ebe u mo bontša hore na a ka fumana karabo e hlahang Bibeleng leqepheng lefe. Ka mohlala, u ka bua ka koluoa e sa tsoa hlaha litabeng ’me u hlalose hore batho ba bangata ba ipotsa lipotso tse hlahang leqepheng la 3. Kapa u ka ’na ua re re ntse re buisana le baahelani ka bokamoso bo thabisang. Ebe u mo bontša litšoantšo tse leqepheng la 4-5 ’me u re, “U ka thabela ho bona ho phethahala tšepiso efe?” Kapa mohlomong u ka re re ntse re buisana le batho ho ba thusa ho fumana likarabo tsa lipotso tsa bohlokoa bophelong. Ebe u bontša mong’a ntlo lipotso tse hlahang tlaase leqepheng la 6 ’me u mo botsa hore na ke efe eo a e thahasellang.
Qala thuto ea Bibele ka ho toba. U ka ’na ua re: “Re ntse re bontša baahisani ba rōna buka ena e re thusang ho utloisisa Bibele. Na u qala ho e bona? [Emela karabo.] Haeba u na le metsotso e seng mekae, nka thabela ho u bontša hore na u ka ithuta eona joang hammoho le Bibele ea hao.”

Leka Sena Khoeling Ena:

Etsang pontšo ea ho tsamaisa buka ena nakong ea borapeli ba lelapa.
Ha u le tšebeletsong ea tšimo, bolella bahoeletsi ba bang hore u lokiselitse ho tsamaisa buka ena joang. (Liprov. 27:17) Fetola kenyelletso ea hao haeba e sa atlehe.