Kamoo re ka Pakang ka Toroli ea Lingoliloeng

Ho bonahala ho paka ka litafole kapa litoroli tsa lingoliloeng ho le molemo haholo bakeng sa ho hulela batho ba tšepahalang ’neteng. (Joh. 6:44) Kahoo, baholo ba khothalelitsoe ho hlophisa bopaki ba phatlalatsa libakeng tseo batho ba phetheselang ho tsona tšimong ea phutheho. Kaha hase tlamo hore litoroli li emisoe sebakeng se le seng, hangata ha ho hlokahale hore re kōpe tumello ho ba boholong. Ke bo-mang ba ka pakang ka tsona? Ke bahoeletsi ba nang le temoho, ba buang ka seriti le ba nang le bokhoni ba ho qoqa. Lintho tse latelang ke tseo re ka li etsang le tseo re sa lokelang ho li etsa e le hore re atlehe.

Seo re ka se Etsang:

Re ka ba botsoalle ’me ra thusa batho ba fetang ka tsela. Bahoeletsi ba bang ba lumelisa ba ntse ba bososela. Ha motho a sheba toroli, re ka ’na ra re, “Haeba ho na le sengoliloeng se u khahlang, u ka se nka.”
Etsa qeto ea hore na u tla emella hōle hakae le toroli. Libakeng tse ling bahoeletsi ba bone ho le molemo hore ba eme haufi le toroli. Ba bang ba re sena se etsa hore batho ba fetang ka tsela ba be leqe ho ema, ka lebaka lena ba emella hojana ho fihlela motho ea fetang ka tsela a ema pel’a toroli. Hang ha motho a atamela toroli, leka ho qoqa le eena, mohlomong u ka re ho eena, “Na u kile ua ipotsa potso eo?”
Sebelisa Bibele hangata kamoo ho khonehang.
Haeba motho a nka sengoliloeng seo ho ithutoang Bibele ka sona, se kang buka ea Seo Bibele e se Rutang, u ka mo hlalosetsa ka tokisetso ea thuto ea Bibele. Ithaopele ho mo bontša video ea sehlooho se reng, Ke Hobane’ng ha U Lokela ho Ithuta Bibele?
Ha ho khoneha kōpa nomoro ea ntlo kapa ea fono ho motho ea thahasellang.