Molimo o Hlohonolofatsa Batho ba Thusang ba Bang

Ho na le batho ba bangata lefatšeng ba hlokang lijo le bolulo. Batho ba bang bona ba itlhokela feela ho tseba hore lintho li tla loka. Molimo o batla hore re thuse batho ba hlokang ’me ha re etsa joalo o tla re hlohonolofatsa.

MANGOLO A HALALELANG A RE’NG?

“Ea bontšang mohau ho ea tlaase o alima Jehova, ’me O tla mo buseletsa tšoaro ea hae.”​—LIPROVERBIA 19:17.

HO THUSA BA HLOKANG HO BOLELA’NG?

Jesu o ile a pheta pale ea monna ea ileng a hlaseloa ke masholu eaba a mo siea a le makhatheng a lefu. (Luka 10:​29-37) Mofeta-ka-tsela o ile a thusa monna enoa ea neng a tsoile likotsi tse mpe. O ile a mo thusa le hoja e ne e ke le oa morabe o mong.

Monna enoa ea mosa o ile a thusa monna ea tsoileng likotsi ka ho mo fa thuso ea pele a ba a mo fa lintho tse ling tseo a li hlokang. Ha aa ka a fella moo kaha o ile a boela a mo khothatsa le ho mo imolla mathateng a hae.

Re ithuta’ng paleng ee? Jesu o ne a bontša hore re lokela ho thusa batho ba bang ka hohle kamoo re ka khonang. (Liproverbia 14:​31) Mangolo a halalelang a bontša hore haufinyane Molimo o tla felisa bofuma le mathata. Empa re ka ’na ra ipotsa hore na Molimo o tla etsa lintho tsena joang le hore na o tla li etsa neng. Sehlooho se latelang se tla hlalosa hore na ’Mopi oa hao ea lerato o tla u hlohonolofatsa joang.