Litšupiso Tsa Bukana ea Seboka sa Bophelo le Tšebeletso ea Rona
LA 7-13 DECEMBER
MATLOTLO A TSOANG BIBELENG | LEVITIKE 10-11
“Re Lokela ho Rata Jehova ho Feta ba Lelapa”
(Levitike 10:1, 2) Hamorao bara ba Arone Nadabe le Abihu ba nka ’me ba tlisa e mong le e mong pane ea hae ea mollo eaba ba beha mollo ka har’a eona ’me ba beha libano holim’a oona, eaba ba qala ho nyehela ka pel’a Jehova mollo oo e seng oa molao, oo a neng a sa ba laela hore ba o etse. 2 Mollo oa tsoa ka pel’a Jehova oa ba chesa, hoo ba ileng ba shoela ka pel’a Jehova.
it-1-E 1174
Tlolo ea Molao
Mollo le Libano Tse Seng Molaong. Ho Levitike 10:1, lentsoe la Seheberu e leng zar (leo ka botšehaling e leng za·rahʹ le bolela ntho e sa tloaelehang) le sebelisitsoe ha ho buuoa ka “mollo oo e seng oa molao, oo [Jehova ] a neng a sa laela [batho] hore ba o etse,” oo bara ba Arone eleng Nadabe le Abihu ba ileng ba o etsa ’me Jehova a ba felisa ka mollo. (Le 10:2; Nu 3:4; 26:61) Ka mor’a moo, Jehova o ile a re ho Arone: “U se ke ua noa veine kapa joala bo tahang, uena hammoho le bara ba hao, ha le kena ka tenteng ea pokano, hore le se ke la shoa. Ke taelo e hlomamisitsoeng ho isa nakong e sa lekanyetsoang bakeng sa meloko ea lona, e le hore ho khetholloe pakeng tsa ntho e halalelang le e silafetseng le pakeng tsa ntho e sa hloekang le e hloekileng, le hore ho rutoe bara ba Iseraele melao eohle ea tsamaiso eo Jehova a ba boleletseng eona ka Moshe.” (Le 10:8-11) Taba ena e bontša hore e ka ’na eaba Nadabe le Abihu ba ne ba tahiloe ’me ba ile ba qetella ba nyehetse mollo o seng molaong. E ka ’na eaba mollo o ne o se molaong hobane o hotelitsoe ka nako e fosahetseng, sebakeng se fosahetseng kapa ba o besitse ka tsela e fosahetseng. Kapa ho ka etsahala hore ba ne ba nyehetse libano tse ling ntle le tse hlalositsoeng ho Exoda 30:34, 35. Sebe sa bona ha sea ka lokafatsoa ke hore feela ba ne ba tahiloe.
(Levitike 10:4, 5) Kahoo Moshe a bitsa Mishaele le Elzafane, bara ba Uziele, mor’abo ntat’a Arone, ’me a re ho bona: “Atamelang, tlosang barab’abo lona ka pel’a sebaka se halalelang le ba ise ka ntle ho liahelo.” 5 Tumellanong le hoo ba atamela eaba ba ba nka ka liaparo tsa bona ho ba isa ka ntle ho liahelo, feela joalokaha Moshe a ne a buile.
(Levitike 10:6, 7) Ka mor’a moo Moshe a re ho Arone le ho bara ba bang ba hae Eleazare le Ithamare: “Le se ke la tlohela lihlooho tsa lona li le mahlantholla, ’me le se ke la tabola liaparo tsa lona, hore le se ke la shoa ’me a se ke a halefela phutheho eohle; empa barab’abo lona ba ntlo eohle ea Iseraele ba tla lla ka lebaka la ho chesoa, hoo Jehova a ho chesitseng. 7 Le se ke la tloha monyako oa tente ea pokano esere la shoa, hobane oli e tlotsang ea Jehova e holim’a lona.” Kahoo ba etsa ho ea ka taelo ea Moshe.
Na U Kene Phomolong ea Molimo?
16 Arone, ngoan’abo Moshe o ile a talimana le boemo bo thata mabapi le bara ba hae ba babeli. Nahana hore na e tlameha ebe o ile a ikutloa joang ha bara ba hae ba babeli, e leng Nadabe le Abihu ba nyehela ka pel’a Jehova mollo oo e seng oa molao ’me Jehova a ba bolaea. Ha e le hantle, ka mor’a moo banna bana ha baa ka ba hlola ba kopana le batsoali ba bona. Empa ha hoa ka ha fella moo. Jehova o ile a laela Arone le bara ba hae ba tšepahalang a re: “Le se ke la tlohela lihlooho tsa lona li le mahlantholla, ’me le se ke la tabola liaparo tsa lona [ka morero oa ho siama], hore le se ke la shoa ’me [Jehova] a se ke a halefela phutheho eohle.” (Lev. 10:1-6) Taba ena e hlakile. Lerato leo re ratang Jehova ka lona le tlameha ho ba matla ho feta lerato leo ka lona re ratang litho tsa malapa a rona tse sa tšepahaleng.
Batlisisa Matlotlo a Patiloeng
(Levitike 10:8-11) Jehova a bua le Arone, a re: 9 “U se ke ua noa veine kapa joala bo tahang, uena hammoho le bara ba hao, ha le kena ka tenteng ea pokano, hore le se ke la shoa. Ke taelo e hlomamisitsoeng ho isa nakong e sa lekanyetsoang bakeng sa meloko ea lona, 10 e le hore ho khetholloe pakeng tsa ntho e halalelang le e silafetseng le pakeng tsa ntho e sa hloekang le e hloekileng, 11 le hore ho rutoe bara ba Iseraele melao eohle ea tsamaiso eo Jehova a ba boleletseng eona ka Moshe.”
Re Lokela ho Halalela Boitšoarong Bohle ba Rona
18 E le hore re be ba halalelang, re lokela ho hlahloba Mangolo ka hloko ’me re etse seo Molimo a re laelang sona. Nahana ka bara ba Arone, e leng Nadabe le Abihu, ba ileng ba bolaoa ka lebaka la ho nyehela “mollo oo e seng oa molao,” mohlomong hobane ba tahiloe. (Lev. 10:1, 2) Hlokomela seo Molimo a ileng a se bolella Arone ka mor’a moo. (Bala Levitike 10:8-11.) Na litemana tsee li bolela hore ha rea lokela ho noa lino tse tahang pele re ea libokeng tsa Bokreste? Nahana ka lintlha tsena: Ha re tlas’a Molao. (Bar. 10:4) Linaheng tse ling, balumeli-’moho le rona ba noa ka tsela e itekanetseng nakong ea lijo, pele ba ea libokeng. Ho ne ho e-na le linoelo tse ’nè tsa veine ka Paseka. Ha Jesu a theha Sehopotso, o ile a fa baapostola ba hae veine e emelang mali a hae. (Mat. 26:27) Bibele e nyatsa ho noa haholo le botahoa. (1 Bakor. 6:10; 1 Tim. 3:8) Matsoalo a Bakreste ba bangata a ba susumelletsa hore ba se ke ba noa ho hang pele ba kopanela mofuteng leha e le ofe oa tšebeletso. Empa maemo a fapana ho ea ka libaka, ’me ntho ea bohlokoa ke hore Bakreste ‘ba khetholle pakeng tsa ntho e halalelang le e silafetseng’ e le hore ba itšoare ka khalalelo ’me ba khahlise Molimo.
(Levitike 11:8) Le se ke la ja nama leha e le efe ea tsona, ’me le se ke la ama litopo tsa tsona. Ha lia hloeka bakeng sa lona.
it-1-E 111 ¶5
Liphoofolo
Ke batho ba neng ba le tlas’a Molao oa Moshe feela ba neng ba thibetsoe ho ja nama ea liphoofo tseo hobane Levitike 11:8 e re ‘ha lia hloeka bakeng sa Baiseraele.’ Sehlabelo sa Jesu Kreste se ile sa felisa Molao oa Moshe. Kahoo, ho tloha ka mor’a Moroallo, Noe le batho ba bang kaofela ba ne ba se ka ja nama ea liphoofolo tseo.—Kol 2:13-17; Gen 9:3, 4.
’Malo oa Bibele
(Levitike 10:1-15) Hamorao bara ba Arone Nadabe le Abihu ba nka ’me ba tlisa e mong le e mong pane ea hae ea mollo eaba ba beha mollo ka har’a eona ’me ba beha libano holim’a oona, eaba ba qala ho nyehela ka pel’a Jehova mollo oo e seng oa molao, oo a neng a sa ba laela hore ba o etse. 2 Mollo oa tsoa ka pel’a Jehova oa ba chesa, hoo ba ileng ba shoela ka pel’a Jehova. 3 Joale Moshe a re ho Arone: “Sena ke seo Jehova a se buileng, a re, ‘E-re ke halaletsoe har’a ba haufi le ’na, ’me ke tlotlisoe ka pel’a lifahleho tsa sechaba sohle.’ ” Arone a khutsa. 4 Kahoo Moshe a bitsa Mishaele le Elzafane, bara ba Uziele, mor’abo ntat’a Arone, ’me a re ho bona: “Atamelang, tlosang barab’abo lona ka pel’a sebaka se halalelang le ba ise ka ntle ho liahelo.” 5 Tumellanong le hoo ba atamela eaba ba ba nka ka liaparo tsa bona ho ba isa ka ntle ho liahelo, feela joalokaha Moshe a ne a buile. 6 Ka mor’a moo Moshe a re ho Arone le ho bara ba bang ba hae Eleazare le Ithamare: “Le se ke la tlohela lihlooho tsa lona li le mahlantholla, ’me le se ke la tabola liaparo tsa lona, hore le se ke la shoa ’me a se ke a halefela phutheho eohle; empa barab’abo lona ba ntlo eohle ea Iseraele ba tla lla ka lebaka la ho chesoa, hoo Jehova a ho chesitseng. 7 Le se ke la tloha monyako oa tente ea pokano esere la shoa, hobane oli e tlotsang ea Jehova e holim’a lona.” Kahoo ba etsa ho ea ka taelo ea Moshe. 8 Jehova a bua le Arone, a re: 9 “U se ke ua noa veine kapa joala bo tahang, uena hammoho le bara ba hao, ha le kena ka tenteng ea pokano, hore le se ke la shoa. Ke taelo e hlomamisitsoeng ho isa nakong e sa lekanyetsoang bakeng sa meloko ea lona, 10 e le hore ho khetholloe pakeng tsa ntho e halalelang le e silafetseng le pakeng tsa ntho e sa hloekang le e hloekileng, 11 le hore ho rutoe bara ba Iseraele melao eohle ea tsamaiso eo Jehova a ba boleletseng eona ka Moshe.” 12 Joale Moshe a bua le Arone le Eleazare le Ithamare, bara ba hae ba neng ba setse: “Nkang nyehelo ea lijo-thollo e setseng linyehelong tsa Jehova tse entsoeng ka mollo ’me le e jelle haufi le aletare e sa lomosoa, hobane ke ntho e halalelang ka ho fetisisa. 13 Le e jelle sebakeng se halalelang, hobane ke kabelo ea lona le kabelo ea bara ba lona linyehelong tsa Jehova tse entsoeng ka mollo; etsoe ke kamoo ke laetsoeng kateng. 14 Le tla jella sefuba sa nyehelo e tsokoang le leoto la karolo e halalelang sebakeng se hloekileng, lona le bara ba lona le barali ba lona, hobane li fanoe e le kabelo ea lona le kabelo ea bara ba lona mahlabelong a kopanetsoeng a bara ba Iseraele. 15 Ba tla tlisa leoto la karolo e halalelang le sefuba sa nyehelo e tsokoang hammoho le linyehelo tse entsoeng ka mollo, tsa likarolo tse mafura, e le hore ba tsokele koana le koana nyehelo e tsokoang ka pel’a Jehova; ’me e tla ba kabelo ho isa nakong e sa lekanyetsoang bakeng sa lona le bara ba lona, feela joalokaha Jehova a laetse.”
LA 14-20 DECEMBER
MATLOTLO A TSOANG BIBELENG | LEVITIKE 12-13
“Ithute Melaong ea Lepera”
(Levitike 13:4, 5) Empa haeba sebato se le sesoeu letlalong la ’mele oa hae ’me se bonahala se phobetse letlalong ’me mohoete oo se leng ho oona o se mosoeu, joale moprista a behelle ea nang le lefu leo ka thoko ka matsatsi a supileng. 5 Moprista a mo talime letsatsing la bosupa, ’me haeba kamoo ho shebahalang kateng lefu le khaolitse, lefu ha lea namela letlalong, hape moprista a mo behelle ka thoko ka matsatsi a mang a supileng.
Bibele E Bua Litaba Le Pele Batho Ba Li Tseba
• Mafu a tšoaetsanoang.
Molao oa Moshe o ne o re motho ea nang le lepera ha aa lokela ho lula le batho ba bang. Ka selemo sa bo-800 ka mor’a hore Jesu a tle lefatšeng, e ne e le hona lingaka li ithutang hore motho ea tšoeroeng ke lefu le tšoaetsanoang ha aa lokela ho ba har’a batho ba bang.—Levitike, khaolo ea 13 le ea 14.
(Levitike 13:45, 46) Ha e le ea nang le lepera eo lefu le leng ho eena, liaparo tsa hae li lokela ho taboloa, le hlooho ea hae e lokela ho ba mahlantholla, ’me a koahele litelu tse holim’a molomo ’me a hoeletse, ‘Ha kea hloeka, ha kea hloeka!’ 46 E tla ba ea sa hloekang ka matsatsi ’ohle ao ka ’ona lefu le leng ho eena. Ha aa hloeka. O lokela ho lula a ikarotse. Sebaka sa hae sa bolulo se ka ntle ho liahelo.
Re U Lome Tsebe?
Mehleng ea Jesu, Bajuda ba ne ba tšaba lepera. Lepera le ne le senya motho litšobotsi ’me le senya le methapo ea kutlo hoo a neng a ka qetella a sa utloe. Le ne le se na pheko. Motho ea tšoeroeng ke lepera o ne a sa lokela ho lula le batho ba bang hape o ne a lokela ho ba hlokomelisa hore o tšoeroe ke lefu lena.—Levitike 13:45, 46.
(Levitike 13:52) A chese seaparo kapa litšoele tse theosang kapa litšoele tse tšekaletseng tsa boea kapa line, kapa ntho leha e le efe ea letlalo eo lefu le ka hlahang ho eona, hobane ke lepera le bolaeang. Se lokela ho chesoa ka mollo.
(Levitike 13:57) Leha ho le joalo, haeba le ntse le bonahala seaparong kapa litšoeleng tse theosang kapa litšoeleng tse tšekaletseng kapa nthong leha e le efe ea letlalo, lea siphoha. U lokela ho chesa mollong eng kapa eng eo lefu le leng ho eona.
it-2-E 238 ¶3
Lepera
Liaparong le matlong. Lefu la lepera le ka ba liaparong tse entsoeng ka boea, lesela kapa matlalo. Lepera le ne le ka fela ha liaparo tseo li ne li hlatsuoa ebile ho ne ho na le litlhophiso tse entsoeng e le hore lintho tseo li behelloe hole le batho. Empa haeba ntho eo le ka mor’a hore e hlatsuoe e ntse e na le ’mala o botala bo bosehla kapa e le khubelu, lepera le ne le ntse le le teng ’me ntho eo e ne e lokeloa ho chesoa. (Le 13:47-59) Haeba lebota la ntlo le ba le ’mala o botala bo bosehla kapa le ba lekhubelu, moprista o ne a laela hore batho ba se ke ba kena ka tlung eo. Ho ne ho ka ’na ha hlokahala hore lebota le lihuoe le majoe a nang le lepera a qhebolloe ntlong, ebe ka mor’a moo a lahleloa sebakeng se sa hloekang ka ntle ho motse. Haeba lepera le ne le le teng hape ntlong eo, ho ne ho thoe ha ea hloeka ebe ea heletsoa ebe thepa e neng e le kamoo e lahleloa sebakeng se sa hloekang. Empa ntlo eo ho neng ho thoe lepera le se le felile ho eona, e ne e lokela ho hloekisoa. (Le 14:33-57) Batho ba nahana hore lepera le neng le lula liaparong kapa matlong e ne e le mofuta o mong oa hlobo, empa ha ho na bopaki bo kholisang hore taba ena ke ’nete.
Batlisisa Matlotlo a Patiloeng
(Levitike 12:2) “Bua le bara ba Iseraele, u re, ‘Haeba mosali a emola peo ’me a tsoala ngoana e motona, e tla ba ea sa hloekang ka matsatsi a supileng; e tla ba ea sa hloekang joaloka matsatsing a ho se hloeke nakong ea ha a ilela khoeli.
(Levitike 12:5) “ ‘Joale haeba a tsoala ngoana e motšehali, joale e tla ba ea sa hloekang ka matsatsi a leshome le metso e mene, joaloka nakong ea ha a ilela khoeli. O tla lula maling a tlhoekiso ka matsatsi a eketsehileng a mashome a tšeletseng a metso e tšeletseng.
Lintlha-kholo Tsa Buka ea Levitike
12:2, 5—Ke hobane’ng ha ho belehoa ha ngoana ho ne ho etsa hore mosali e be “ea sa hloekang”? Litho tsa pelehi li ne li etselitsoe ho hlahisa bophelo bo phethahetseng ba motho. Leha ho le joalo, ka lebaka la liphello tse futsitsoeng tsa sebe, bophelo bo sa phethahalang le bo nang le sebe bo ile ba fetisetsoa baneng. Linako tse khutšoanyane tsa ‘ho se hloeke’ ho amanang le ho beleha ngoana, hammoho le lintho tse ling, tse kang ho ilela khoeli le ho tsoa ha peo, li ne li hopotsa Baiseraele hore ba ne ba e-na le sebe se futsitsoeng. (Levitike 15:16-24; Pesaleme ea 51:5; Baroma 5:12) Litaelo tsa ho itlhoekisa tseo ho neng ho hlokahala hore li lateloe li ne li tla thusa Baiseraele ho utloisisa hore ho ne ho hlokahala sehlabelo sa thekollo bakeng sa ho koahela sebe sa moloko oa batho le ho khutlisetsa batho phethehong. Kahoo Molao o ile oa fetoha “motataisi . . . ea isang ho Kreste.”—Bagalata 3:24.
(Levitike 12:3) Ka letsatsi la borobeli nama ea ntlha ea letlalo la setho sa hae sa botona e tla bolotsoa.
Bibele E Bua Litaba Le Pele Batho Ba Li Tseba
• Nako ea ho bolotsa.
Molao oa Molimo o ne o laela hore ngoana a bolotsoe ka letsatsi la borobeli a hlahile. (Levitike 12:3) kMali a ngoana a hoama ha a se a e-na le beke a hlahile. Le hoja mehleng ea ha ho ne ho ngoloa Bibele batho ba ne ba sa tsebe hakaalo ka mekhoa ea phekolo, Bibele eona e ne e se ntse e boletse esale pele hore bana ba bolotsoe ha ba se ba qetile beke ba phela.
’Malo oa Bibele
(Levitike 13:9-28) “Haeba lefu la lepera le hlaha ho motho, joale a tlisoe ho moprista. 10 Moprista a shebe; haeba ho e-na le lekhopho le lesoeu letlalong ’me le soeufalitse mohoete ’me karolo e sa folang ea nama e phelang e le lekhophong, 11 ke lepera le sa foleng letlalong la ’mele oa hae; moprista a bolele hore ha aa hloeka. Ha aa lokela ho mo behella ka thoko, etsoe ha aa hloeka. 12 Joale haeba ntle ho pelaelo lepera le siphoha letlalong, ’me lepera le koahela letlalo la ea nang le lefu ho tloha hloohong ho ea maotong moo mahlo a moprista a bonang ka ho feletseng; 13 moprista a talimile ’me lepera le koahetse ’mele oohle oa hae, joale o tla phatlalatsa hore lefu le hloekile. Kaofela ha lona le fetohile le lesoeu. O hloekile. 14 Empa letsatsing leo ka lona nama e phelang e hlahang holim’a lona, e tla ba ea sa hloekang. 15 Moprista a shebe nama e phelang, ’me a bolele hore ha aa hloeka. Nama e phelang ha ea hloeka. Ke lepera. 16 Kapa haeba nama e phelang e khutla ’me e soeufala, joale a tle ho moprista. 17 Moprista a mo talime, ’me haeba lefu le soeufetse, joale moprista a phatlalatse hore lefu le hloekile. O hloekile. 18 “Ha e le ’mele, haeba lethopa le hlaha letlalong la oona ’me o fola, 19 ’me sebakeng sa lethopa ho hlaha lekhopho le lesoeu kapa sebato se bosoeu bo bofubelu, joale a iponahatse ho moprista. 20 Moprista a talime, ’me haeba le bonahala le phobetse letlalong ’me mohoete oa lona o soeufetse, joale moprista a bolele hore ha aa hloeka. Ke lefu la lepera. Le siphohile lethopeng. 21 Empa haeba moprista a le talima, ’me joale ho se mohoete o mosoeu ho lona ’me le sa phobela letlalong ’me le le lerootho, joale moprista a mo behelle ka thoko ka matsatsi a supileng. 22 Haeba ntle ho pelaelo le namela letlalong, joale moprista a bolele hore ha aa hloeka. Ke lefu. 23 Empa haeba sebakeng sa lona ho hlaha sebato, ha lea nama, ke ho ruruha ho bohloko ha lethopa; ’me moprista a phatlalatse hore o hloekile. 24 “Kapa haeba ho hlaha lebali letlalong la ’mele ka lebaka la mollo, ’me nama e ka hare ea lebali e e-ba sebato se bosoeu bo bofubelu kapa se sesoeu, 25 joale moprista a le talime; haeba mohoete o soeufetse sebatong ’me se bonahala se phobetse letlalong, ke lepera. Le siphohile lebaling, ’me moprista a bolele hore ha aa hloeka. Ke lefu la lepera. 26 Empa haeba moprista a le talima, ’me, joale ho se mohoete o mosoeu sebatong ’me le sa phobela ’me le le lerootho, joale moprista a mo behelle ka thoko ka matsatsi a supileng. 27 Moprista a mo talime ka letsatsi la bosupa. Haeba ntle ho pelaelo le nametse letlalong, joale moprista a bolele hore ha aa hloeka. Ke lefu la lepera. 28 Empa haeba ho e-ba le sebato sebakeng sa lona, ha le sa namela letlalong ’me le le lerootho, ke lekhopho la lebali; moprista a phatlalatse hore o hloekile, hobane ke ho ruruha ho bohloko ha lebali.
LA 21-LA 27 DECEMBER
MATLOTLO A TSOANG BIBELENG | LEVITIKE 14-15
“Barapeli ba ’Nete ba Lokela ho Hloeka”
(Levitike 15:13-15) “ ‘Joale haeba ea nang le mohlapo o lutlang a ka hloeka mohlapong oa hae o lutlang, joale a ipalle matsatsi a supileng bakeng sa tlhoekiso ea hae, ’me a hlatsoe liaparo tsa hae le ho hlatsoa ’mele oa hae metsing a phallang; ’me o tla hloeka. 14 Letsatsing la borobeli o lokela ho inkela maebana-khoroana a mabeli kapa maebana a mabeli, ’me a tle ka pel’a Jehova monyako oa tente ea pokano ’me a a fe moprista. 15 Moprista a a nyehele, le leng e le nyehelo ea sebe ’me le leng e le nyehelo ea secheso; ’me moprista a koahele libe tsa hae ka pel’a Jehova malebana le mohlapo oa hae o lutlang.
it-1-E 263
Ho Itlhatsoa
Baiseraele ba ne ba ne ba lokela ho itlhatsoa ka mabaka a fapaneng hape e ne e le karolo ea moetlo oa bona. Motho eo lepera la hae le neng le sa tsoa fola, mang kapa mang ea thetsitseng ntho eo motho ea nang le “mohlapo o lutlang” a e thetsitseng, monna ea ntšitseng peo, mosali ea qetang ho ea matsatsing kapa motho ofe kapa ofe ea eang sekateng o ne a sa “hloeka,” kahoo, o ne a lokela ho itlhatsoa. (Le 14:8, 9; 15:4-27) Mang kapa mang eo ka tenteng ea hae ho neng ho na le setopo kapa ea neng a tšoara setopo o ne a sa “hloeka” kahoo, o ne a lokela ho hloekisoa ka metsi. Empa haeba motho a ne a sa mamele melao eo, o ne a lokela “o felisoa har’a phutheho, hobane o silafalitse sehalalelo sa Jehova.” (Nu 19:20) Ka hona, lentsoe “hlatsoa” le sebelisitsoe ka nepo bakeng sa ho bontša hore motho o hloekile ka pel’a Jehova. (Pes 26:6; 73:13; Esa 1:16; Eze 16:9) Lentsoe la Molimo le tšoantšoang le metsi le na le matla a ho hloekisa.—Ef 5:26.
(Levitike 15:28-30) “ ‘Leha ho le joalo, haeba a hloekile mohlapong oa hae o lutlang, a boele a ipalle matsatsi a supileng, ’me ka mor’a moo o tla hloeka. 29 Letsatsing la borobeli o lokela ho inkela maebana-khoroana a mabeli kapa maebana a mabeli, ’me a a tlise ho moprista monyako oa tente ea pokano. 30 Moprista a etse le leng nyehelo ea sebe ’me le leng e be nyehelo ea secheso; moprista a koahele libe tsa hae ka pel’a Jehova malebana le mohlapo oa hae o lutlang o sa hloekang.
it-2-E 372 ¶2
Ho ea Matsatsing
Mosali o ne a nkoa a sa hloeka nakong eo a eang matsatsing ka tsela e sa tloelehang kapa a ea nako e telele ho feta e tloelehileng ’me ntho efe kapa efe eo a neng a thetsa le eona e ne e sa hloeka hammoho le batho ba neng ba thetsa lintho tseo. Kamor’a matsatsi a supileng a qetile ho ea matsatsing, joale ho ne ho ka thoe o hloekile. Ka letsatsi la borobeli, o ne a lokela ho isa maebana a mabeli kapa maebana-khoroana a mabeli ho moprista e le hore a ka mo etsetsa tšebeletso ea ho koahela libe. Moprista o ne a hlahisa linonyana tsena e ’ngoe e le bakeng sa ho koahela libe, e ’ngoe e le bakeng sa nyehelo ea secheso.—Le 15:19-30; bona le HO HLOEKA.
(Levitike 15:31) “ ‘Le boloke bara ba Iseraele ba arohile ho se hloekeng ha bona, e le hore ba se ke ba shoela ho se hloekeng ha bona ka lebaka la ho silafatsa tabernakele ea ka, e har’a bona.
it-1-E 1133
Sebaka se Halalelang
2. Tente ea pokano eo hamorao e ileng ea bitsoa tempele. Tente ea pokano kapa tempele, ho akarelletsa le lebala la tabernakele le mabala a tempele e ne e le karolo ea sebaka se halalelang. (Ex 38:24; 2Likr 29:5; Lik 21:28) Lintho tse neng li le ka sehloohong tse neng li le teng ka lebaleng e ne e le aletare ea nyehelo le beisine ea koporo. Lintho tsena li ne li halalela. Ke batho ba hloekileng feela ba neng ba ka kena ka lebaleng la tabernakele nako eohle ’me ho ne ho le joalo le ka mabala a tempele. Mohlala, mosali ea neng a sa hloeka o ne a ke ke a tšoara eng kapa eng e halalelang kapa a kena sebakeng se halalelang. (Le 12:2-4) Le haeba Moiseraele a ne a qeta nako e telele a sa hloeka, o ne nkoa a silafatsa tabernakele. (Le 15:31) Batho ba neng ba se ba folile lepera joale ba tlisa nyehelo bakeng sa ho hloekisoa, ba ne ba fella keiting ea lebala. (Le 14:11) Motho ea sa hloekang o ne a sa lokela ho kenella ha ho jeoa sehlabelo se kopanetsoeng tabernakeleng le tempeleng hobane o ne a tla bolaoa.—Le 7:20, 21.
Batlisisa Matlotlo a Patiloeng
(Levitike 14:14) “Moprista a nke mali a mang a nyehelo ea molato, ’me moprista a a tlotse ntlheng ea tsebe e tona ea ea itlhoekisang le monoaneng o motona oa letsoho la hae le letona le monoaneng o motona oa leoto la hae le letona.
(Levitike 14:17) Ha e le oli e ’ngoe kaofela e seatleng sa hae moprista o tla tlotsa e ’ngoe ea eona ntlheng ea tsebe e tona ea ea itlhoekisang le monoaneng o motona oa letsoho la hae le letona le monoaneng o motona oa leoto le letona holim’a mali a nyehelo ea molato.
(Levitike 14:25) A hlabe pheleu e nyenyane ea nyehelo ea molato, ’me moprista a nke mali a mang a nyehelo ea molato ’me a a tlotse ntlheng ea tsebe e tona ea ea itlhoekisang le monoaneng o motona oa letsoho la hae le letona le monoaneng oa hae o motona oa leoto le letona.
(Levitike 14:28) Moprista a tlotse oli e ’ngoe seatleng sa hae ntlheng ea tsebe e tona ea ea itlhoekisang le monoaneng o motona oa letsoho la hae le letona le monoaneng o motona oa leoto le letona sebakeng sa mali a nyehelo ea molato.
it-1-E 665 ¶5
Tsebe
Ha ho ne ho hlomamisoa baprista Iseraele, Moshe o ile a laeloa hore a tlotse tsebe e tona ea Arone le tsa bara ba hae ka mali a pheleu ea tlhomamiso. O ne a boetse a lokela ho ba tlotsa ka mali ao letsohong le letona le leotong le letona. O ne a ba tlotsa ka mali tsebeng e tona ho bontša hore ba lokela ho mamela melao le litaelo tsa Jehova, letsohong le letona ho bontša hore ba lokela ho phetha mosebetsi oo ba o filoeng le leotong le letona hore ba se ke ba kheloha litaelo tsa Jehova. (Le 8:22-24) Ka tsela e tšoanang, Molao o ne o tlama moprista hore a tlotse tsebe e tona ea molepera ea neng a tlile hore a tlo hloekisoa ka mali a pheleu ea nyehelo ea molato le oli e neng e nyehetsoe. (Le 14:14, 17, 25, 28) Tokisetso e batlang e tšoana le ena ke ea lekhoba le batlang ho tsoela pele le sebeletsa mong’a lona ka nako e telele a sa khaotse. Boemong bona teng, lekhoba le ne le ema koseneng ea lemati ebe mong’a lona o le phunya tsebe ka elese. Letšoao lena le hlakileng, le neng le etsoa tsebeng le ne le bontša hore lekhoba le batla ho tsoela pele le mamela le ho hlompha mong’a lona.—Ex 21:5, 6.
Ke Hobane’ng ha re Lokela ho Halalela?
7 Ha ho ne ho hlomamisoa baprista Iseraele, Moprista ea Phahameng Arone le bara ba hae ba ile ba tlotsoa ka mali a pheleu tsebeng e tona, monoaneng o motona oa letsoho le monoaneng o moholo oa leoto. (Bala Levitike 8:22-24.) Ho tlotsoa ha bona ka mali ho ne ho bontša hore baprista ba lokela ho etsa sohle se matleng a bona ho phetha mosebetsi oa bona. Ka ho tšoanang, Moprista ea Phahameng Jesu o behetse batlotsuoa le linku tse ling mohlala o phethahetseng. O ile a latela tataiso ea Molimo. Jesu o ile a sebelisa matsoho a hae ho phetha thato ea Jehova, ’me ha ho mohla maoto a hae a kileng a kheloha tseleng e halalelang.—Joh. 4:31-34.
(Levitike 14:43-45) “Leha ho le joalo, haeba lefu le khutla ’me le siphoha ka tlung ka mor’a hore majoe a ntšoe le ka mor’a hore ntlo e qhebolloe ’me e liloe, 44 joale moprista a kene ’me a shebe; haeba lefu le namme ka tlung, ke lepera le bolaeang ka tlung. Ha ea hloeka. 45 A heletse ntlo hammoho le majoe a eona le lifate tsa eona le seretse sohle sa letsopa sa ntlo ’me a li ntšetse ka ntle ho motse sebakeng se sa hloekang.
g 1/06 14, Lebokose
Hlobo—Ke Motsoalle Ebile ke Sera!
HO THOE’NG KA HLOBO MEHLENG EA BIBELE?
Bibele e bua ka “lefu la lepera ntlong,” ho bolelang mohahong ka booona. (Levitike 14:34-48) Ho ’nile ha boleloa hore e ka ’na eaba boemo bona, boo ka linako tse ling bo neng bo bitsoa “lepera le bolaeang,” e ne e le mofuta oa hlobo, empa le teng ha ho ea tiisehang hore ho fela ho le joalo. Ho sa tsotellehe hore na boemo e ne e le bofe, Molao oa Molimo o ne o laela beng ba matlo hore ba tlose majoe a amehileng, ba fefe ntlo eohle ka hare, ’me lintho tsohle tse belaetsang ba li lahlele ka ntle ho motse “sebakeng se sa hloekang.” Haeba lefu leo le ne le khutla, ntlo eohle e ne e nkoa e sa hloeka, ’me e ne e heletsoa ka ho feletseng. Tataiso e hlakileng ea Jehova e bontša lerato la hae le tebileng ho batho ba hae le bakeng sa boiketlo ba bona.
’Malo oa Bibele
(Levitike 14:1-18) Jehova a tsoela pele ho bua le Moshe, a re: 2 “Ona e tla ba molao oa molepera letsatsing la ho tiisa ho hloeka ha hae, ha a tlisoa ho moprista. 3 Moprista a ee ka ntle ho liahelo, ’me moprista a talime; haeba lefu la lepera le phekotsoe ho ea nang le lepera, 4 joale moprista a fane ka taelo; bakeng sa ho itlhoekisa a nke linonyana tse peli tse hloekileng tse phelang le lehong la kedare le khoele e ’mala o sekareleta oa kokase le hysopa. 5 Moprista a fane ka taelo, ’me nonyana e ’ngoe e bolaeloe ka har’a sejana sa letsopa se tšetseng metsi a macha. 6 Ha e le nonyana e phelang, o lokela ho e nka le lehong la kedare le khoele e ’mala o sekareleta oa kokase le hysopa, ’me a li inele hammoho le nonyana e phelang ka har’a mali a nonyana e ileng ea bolaeloa ka har’a metsi a macha. 7 Joale a a fafatse ka makhetlo a supileng holim’a ea itlhoekisang lepera ’me a phatlalatse hore o hloekile, ’me a tlohele nonyana e phelang hore e ee naheng. 8 “Ea itlhoekisang a hlatsoe liaparo tsa hae ’me a beole moriri oohle oa hae a itlhatsoe metsing a hloeke, ’me ka mor’a moo a ka kena liahelong. A lule ka ntle ho tente ea hae ka matsatsi a supileng. 9 Letsatsing la bosupa o tla beola moriri oohle oa hlooho ea hae le selelu sa hae le lintši tsa hae. E, o lokela ho beola moriri oohle oa hae, ’me a hlatsoe liaparo tsa hae le ho hlatsoa ’mele oa hae metsing; a hloeke. 10 “Letsatsing la borobeli o tla nka lipheleu tse peli tse nyenyane tse phetseng hantle le konyana e le ’ngoe e phetseng hantle e tšehali, e selemong sa eona sa pele, le likarolo tse tharo tsa leshome tsa efa ea phofo e thumisehileng e le nyehelo ea lijo-thollo e kolobisitsoeng ka oli le tekanyo ea loge e le ’ngoe ea oli; 11 ’me moprista ea phatlalatsang hore o hloekile a hlahise motho ea itlhoekisang, le lintho tseo, ka pel’a Jehova monyako oa tente ea pokano. 12 Moprista a nke pheleu e le ’ngoe e nyenyane ’me a e nyehele bakeng sa nyehelo ea molato hammoho le tekanyo ea loge ea oli ’me a li tsokele koana le koana e le nyehelo e tsokoang ka pel’a Jehova. 13 A hlabe pheleu e nyenyane sebakeng seo nyehelo ea sebe le nyehelo ea secheso li hlabeloang ho sona kamehla, sebakeng se halalelang, hobane, joaloka nyehelo ea sebe, nyehelo ea molato ke ea moprista. Ke ntho e halalelang ka ho fetisisa. 14 “Moprista a nke mali a mang a nyehelo ea molato, ’me moprista a a tlotse ntlheng ea tsebe e tona ea ea itlhoekisang le monoaneng o motona oa letsoho la hae le letona le monoaneng o motona oa leoto la hae le letona. 15 Moprista a nke tekanyo ea loge ea oli ’me a e tšele seatleng sa moprista se setšehali. 16 Moprista a qopetse oli e seatleng sa hae se setšehali ka monoana o motona ’me a fafatse oli e ’ngoe ka monoana ka makhetlo a supileng ka pel’a Jehova. 17 Ha e le oli e ’ngoe kaofela e seatleng sa hae moprista o tla tlotsa e ’ngoe ea eona ntlheng ea tsebe e tona ea ea itlhoekisang le monoaneng o motona oa letsoho la hae le letona le monoaneng o motona oa leoto le letona holim’a mali a nyehelo ea molato. 18 Oli e setseng seatleng sa moprista o tla e tlotsa hloohong ea ea itlhoekisang, ’me moprista a koahele libe tsa hae ka pel’a Jehova.
LA 28 DECEMBER–LA 3 JANUARY
MATLOTLO A TSOANG BIBELENG | LEVITIKE 16-17
“Letsatsi la ho Koahela Libe le u Ama Joang?”
(Levitike 16:12) “A nke pane ea mollo e tletseng mashala a tukang a mollo a tsoang aletareng ka pel’a Jehova, ’me liatla tsa hae ka bobeli li tlale libano tse tšesaane tse nkhang hamonate, ’me a li tlise ka har’a lesira.
Re Ithuta’ng Bukeng ea Levitike?
4 Bala Levitike 16:12, 13. Ak’u nahane ka hore na ho ne ho etsahala’ng ka Letsatsi la ho Koaheloa ha Libe. Moprista ea Phahameng o qala pele ka ho kena ka tabernakeleng. Lekhetlo lena ke la pele ho a mararo ao ka ’ona a tla kena ka Sehalalelisisong letsatsing leo. Ka letsohong le leng o nkile libano tse nkhang hamonate ha ka ho le leng a nkile pane e entsoeng ka khauta e tšetseng mashala a hlenneng. O ema hanyane pele a bula lesira le koahelang Sehalalelisiso. Ka tlhompho eohle, o kena ka Sehalalelisisong ’me o ema ka pel’a areka ea selekane. Ka tsela ea tšoantšetso, moprista eo o eme ka pel’a Jehova Molimo! Joale o tšela libano tse halalelang holim’a mashala a hlenneng ’me ntlo eohle e tlala monko o nkhang hamonate. O tla boela a kena hape ka Sehalalelisisong ha a tlisa mali a sehlabelo. Na u hlokometse hore moprista o chesa libano pele a tlisa mali a sehlabelo?
(Levitike 16:13) A boele a tšele libano holim’a mollo ka pel’a Jehova, ’me leru la libano le koahele sekoahelo sa Areka, se holim’a Bopaki, hore a se ke a shoa.
Re Ithuta’ng Bukeng ea Levitike?
5 Re ithuta’ng ka hore ebe ho ne ho sebelisoa libano ka Letsatsi la ho Koaheloa ha Libe? Bibele e bontša hore lithapelo tsa bahlanka ba Jehova ba tšepahalang tseo a li amohelang li tšoana le libano. (Pes. 141:2; Tšen. 5:8) U hopole hore ka tlhompho eohle Moprista ea Phahameng o ne a tlisa libano ka pel’a Jehova. Ka tsela e tšoanang, ha re rapela Jehova re bua le eena ka tlhompho eohle. Re mo fa tlhompho e mo lokelang. Re ananela hore ebe ’Mopi oa lintho tsohle o re lumella ho bua le eena le ho mo atamela joalokaha ngoana a atamela ntate oa hae. (Jak. 4:8) O re nka re le metsoalle ea hae. (Pes. 25:14) Re ananela tokelo ena hoo re sa batleng ho etsa eng kapa eng e ka utloisang Jehova bohloko.
(Levitike 16:14, 15) “A nke mali a mang a poho ’me a a fafatse ka monoana ka pel’a sekoahelo se lehlakoreng le ka bochabela, ’me o tla fafatsa mali a mang ka monoana ka makhetlo a supileng ka pel’a sekoahelo. 15 “A hlabe poli ea nyehelo ea sebe, bakeng sa sechaba, ’me a tlise mali a eona ka har’a lesira ’me a etse ka mali a eona ka tsela e tšoanang le kamoo a entseng kateng ka mali a poho; a a fafatse nģ’a sekoahelo le ka pel’a sekoahelo.
Re Ithuta’ng Bukeng ea Levitike?
6 U hopole hape hore Moprista ea Phahameng o ne a chesa libano pele a ka etsa mahlabelo. Ka ho etsa joalo, o ne a etsa bonnete ba hore Molimo oa mo amohela nakong eo a etsang mahlabelo. Re ithuta’ng tabeng ee? Pele Jesu a ka fana ka bophelo ba hae e le sehlabelo ha a ntse a le lefatšeng, o ne a lokela ho etsa ntho ea bohlokoa eo e leng hore e ne e le bohlokoa le ho feta ho pholosa moloko oa batho. E ne e le eng ntho eo? O ne a lokela ho mamela le ho tšepahalla Jehova bophelo bohle ba hae ha a le lefatšeng e le hore Jehova a amohele sehlabelo sa hae. Ka tsela eo, Jesu o ne a tla bontša hore ho etsa lintho kamoo Jehova a batlang ke tsela e molemo ka ho fetisisa ea ho phela. O ne a tla fana ka bopaki bo totobetseng ba hore tsela eo Jehova busang ka eona e nepahetse.
Batlisisa Matlotlo a Patiloeng
(Levitike 16:10) Empa poli eo lotho e oetseng ho eona bakeng sa Azazele e lokela ho emisoa e phela ka pel’a Jehova ho koahela libe tsa eona, e le hore e romeloe lefeelleng bakeng sa Azazele.
w09 8/15 7 17
Tšepo ea Bophelo bo sa Feleng Lefatšeng—Re e Filoe ke Molimo
17 Hape, nahana ka mokhoa o hlalositsoeng ka ho hlaka Molaong oa Moshe mabapi le poli ea Azazele. Hang ka selemo, ka Letsatsi la ho Koaheloa ha Libe, moprista ea phahameng o ne a ‘beha matsoho a hae a mabeli hloohong ea poli e phelang ’me a bolele holim’a eona liphoso tsohle tsa bara ba Iseraele, a li behe hloohong ea poli ’me poli eo e ne e jara liphoso tsohle tsa bona ho li isa naheng ea lehoatata.’ (Lev. 16:7-10, 21, 22) Esaia o ile a profeta hore ho ne ho tla tla Mesia, ea neng a tla etsa mosebetsi o tšoanang, a jare “maloetse,” “bohloko” le “libe tsa batho ba bangata” ’me ka tsela eo a bule tsela e eang bophelong bo sa feleng.—Bala Esaia 53:4-6, 12.
(Le 17:10, 11) “ ‘Motho leha e le ofe oa ntlo ea Iseraele kapa mojaki ea itseng ea lulang e le mojaki har’a lona ea jang mali a mofuta leha e le ofe, ka sebele ke tla tjamela moea o jang mali, ’me ruri ke tla mo felisa har’a batho ba habo. 11 Etsoe moea oa nama o maling, ’me ke a behile aletareng hore le koahele libe tsa meea ea lona, hobane mali a koahela libe ka lebaka la moea o ho ’ona.
Ke Hobane’ng ha re Lokela ho Halalela?
10 Bala Levitike 17:10. Jehova o ile a laela Baiseraele hore ba se ke ba ja “mali a mofuta leha e le ofe.” Bakreste le bona ba laetsoe hore ba ile mali a liphoofolo le a batho. (Lik. 15:28, 29) Ha re batle hore Molimo a re halefele ’me a re tlose phuthehong ea hae. Rea mo rata ebile re batla ho mo mamela. Esita le haeba bophelo ba rona bo le kotsing, re ikemiselitse ho se mamele batho ba sa tsebeng Jehova ba bileng ba sa batleng ho mo mamela. Ha e le hantle, rea tseba hore batho ba tla re soma ka lebaka la ho ila mali, empa re khetha ho mamela Molimo. (Juda 17, 18) Ke’ng e tla re thusa tabeng ee hore re “ikemisetse ka tieo” ho se je mali kapa ho amohela tšelo ea mali?—Deut. 12:23.
’Malo oa Bibele
(Levitike 16:1-17) Jehova a bua le Moshe ka mor’a lefu la bara ba babeli ba Arone ka lebaka la ho atamela ha bona ka pel’a Jehova hoo ba ileng ba shoa. 2 Jehova a re ho Moshe: “Bua le moholoane oa hao Arone, hore ha aa lokela ho tla ka linako tsohle sebakeng se halalelang ka har’a lesira, ka pel’a sekoahelo se holim’a Areka, hore a se ke a shoa; hobane ke tla hlaha holim’a sekoahelo ka leru. 3 “Arone a kene sebakeng se halalelang le tse latelang: pohoana bakeng sa nyehelo ea sebe le pheleu bakeng sa nyehelo ea secheso. 4 A apare seaparo se selelele sa ka holimo se halalelang sa line, ’me leqapa la line le lokela ho ba ’meleng oa hae, a itlame ka leqhama la line ’me a ithatele ka tuku ea line. Ke liaparo tse halalelang. A itlhatsoe ’mele metsing ebe oa li apara. 5 “O lokela ho nka lipotsanyane tse peli tse tona phuthehong ea bara ba Iseraele bakeng sa nyehelo ea sebe le pheleu e le ’ngoe bakeng sa nyehelo ea secheso. 6 “Arone a hlahise poho ea nyehelo ea sebe, bakeng sa hae, ’me a koahele libe molemong oa hae le oa ntlo ea hae. 7 “A nke lipoli tse peli ’me a li emise ka pel’a Jehova monyako oa tente ea pokano. 8 Arone a lahle lotho bakeng sa lipoli tse peli, lotho e ’ngoe bakeng sa Jehova le lotho e ’ngoe bakeng sa Azazele. 9 Arone a hlahise poli eo lotho e oetseng ho eona bakeng sa Jehova, ’me a e etse nyehelo ea sebe. 10 Empa poli eo lotho e oetseng ho eona bakeng sa Azazele e lokela ho emisoa e phela ka pel’a Jehova ho koahela libe tsa eona, e le hore e romeloe lefeelleng bakeng sa Azazele. 11 “Arone a hlahise poho ea nyehelo ea sebe, bakeng sa hae, ’me a koahele libe molemong oa hae le oa ntlo ea hae; ’me a hlabe poho ea nyehelo ea sebe, bakeng sa hae. 12 “A nke pane ea mollo e tletseng mashala a tukang a mollo a tsoang aletareng ka pel’a Jehova, ’me liatla tsa hae ka bobeli li tlale libano tse tšesaane tse nkhang hamonate, ’me a li tlise ka har’a lesira. 13 A boele a tšele libano holim’a mollo ka pel’a Jehova, ’me leru la libano le koahele sekoahelo sa Areka, se holim’a Bopaki, hore a se ke a shoa. 14 “A nke mali a mang a poho ’me a a fafatse ka monoana ka pel’a sekoahelo se lehlakoreng le ka bochabela, ’me o tla fafatsa mali a mang ka monoana ka makhetlo a supileng ka pel’a sekoahelo. 15 “A hlabe poli ea nyehelo ea sebe, bakeng sa sechaba, ’me a tlise mali a eona ka har’a lesira ’me a etse ka mali a eona ka tsela e tšoanang le kamoo a entseng kateng ka mali a poho; a a fafatse nģ’a sekoahelo le ka pel’a sekoahelo. 16 “A koahele libe tsa sebaka se halalelang malebana le ho se hloeke ha bara ba Iseraele le malebana le bofetoheli ba bona libeng tsohle tsa bona; ke tsela eo a tla etsa ka eona bakeng sa tente ea pokano, e lutseng le bona ka har’a ho se hloeke ha bona. 17 “Ha ho motho e mong ea lokelang ho ba ka har’a tente ea pokano ha a kena ho ea koahela libe sebakeng se halalelang ho fihlela a tsoa; ’me a koahele libe molemong oa hae le molemong oa ntlo ea hae le molemong oa phutheho eohle ea Iseraele.