KE HOBANE’NG HA BATHO BA HLOEANE HAKAALE?

1 | U Se Ke Oa Ba Leeme

Seo Bibele e se Rutang:

“Molimo ha a leeme, empa sechabeng se seng le se seng motho ea mo tšabang le ea sebetsang ho loka oa amoheleha ho eena.”—LIKETSO 10:34, 35.

Seo Temana Ena e se Bolelang:

Jehovaa Molimo ha a re ahlole ho ea ka morabe oa rona, ’mala, setso kapa hore na re tsoa hokae. Ho e-na le hoo, o ela hloko lintho tseo re li labalabelang le lintho tseo re li nahanang. Ke ’nete hore “motho o bona se bonahalang mahlong, empa ha e le Jehova, o bona seo pelo e leng sona.”—1 Samuele 16:7.

Seo o ka se Etsang:

Le hoja re ke ke ra tseba seo batho ba nahanang, re ka leka ho etsisa Jehova ka hore re se ke ra ba leeme. Leka ho bona batho ka bomong eseng e le sehlopha. Haeba u utloa u e-na le maikutlo a fosahetseng ka batho ba merabe e meng, rapela Molimo hore a u thuse ho loantša maikutlo ao. (Pesaleme ea 139:23, 24) Haeba u kopa Jehova hore a u thuse hore u tlohelle ho ba leeme, u ka kholiseha hore o tla mamela thapelo ea hao ’me a u thuse.— 1 Petrose 3:12.

a Jehova ke lebitso la Molimo.—Pesaleme ea 83:18.

“Ke ne ke e-s’o ka ke lula fatše le motho ea mosoeu ka khotso . . . Joale ke ne ke le setho sa mokhatlo oa ’nete oa bara ba motho.”—TITUS

Pale ea Bophelo—TITUS

O Ile a Hlola Lehloeo

Titus o ne a halefisitsoe ke khethollo ea morabe, kahoo o ile a ikopanya le banna ba bang ba kotsi ba neng ba ikutloa ka tsela e tšoanang. O re: “Re ne re ea libakeng tseo batho ba batšo ba neng ba sa lumelloa ho ea ho tsona, tse kang lihoteleng le libareng e le feela ho qholotsa ntoa.” Titus o re o ne a e-na le lehloeo, ’me le ile la etsa hore a be mabifi. O re: “Haeba ke ne ke phehisana khang le motho, ebang ke monna kapa ke mosali, e ne e le ’na ea mo otlang pele.”

Titus o ile a fetoha ha a ne ithuta Bibele le Lipaki Tsa Jehova. Ha a ntse a bala Bibele, o ile a qala ho nahana ka tsela e fapaneng. O ile a hlolloa ha a bala ka tšepiso ea hore “lefu ha le sa tla hlola le e-ba teng, ’me ho siama kapa ho bokolla kapa bohloko ha li sa tla hlola li e-ba teng. Lintho tsa pele li fetile.”—Tšenolo 21:3, 4.

Qalong Titus o ile a thatafalloa ke ho hlola lehloeo. O re: “Ho ne ho le thata haholo ho fetola tsela eo ke neng ke nahana ka eona le eo ke neng ke etsa lintho ka eona.” O ile a thusoa ke seo a ileng a ithuta sona lengolong la Liketso 10:34, 35, le bontšang hore Molimo ha a leeme.

Ho ile ha etsahala’ng ka mor’a moo? Titus oa hlalosa: “Ke ile ka kholiseha hore bolumeli ba Lipaki Tsa Jehova ke ba ’nete ha ke bona lerato leo li ratanang ka lona, ho sa tsotellehe hore na ke tsa morabe kapa ’mala ofe. Le pele ke e-ba Paki e kolobelitsoeng, motho e mong ea mosoeu eo e leng setho sa phutheho o ile a ’memela lijong ha hae. E ne eka kea lora. Le ka le baliloeng ke ne ke e-s’o ka ke lula fatše le motho ea mosoeu ka khotso, ke se ke sa re letho ka ho ja le eena ke le ha hae. Joale ke ne ke se ke le setho sa mokhatlo oa ’nete oa bara ba motho.”