Litlaleho Tse Tsoang Lefatšeng Lohle

Batho ba Canada ba Bolelloa Litaba Tse Molemo

Video e reng Ke Hobane’ng ha U Lokela ho Ithuta Bibele? e se e fetoletsoe ka lipuo tse fetang tse robeli tsa Canada, ho thusa batho ba lulang moo hore ba ithute Bibele. Letšolong la matsatsi a leshome le ileng la etsoa Nunavik Arctic, ka October 2014, ho ile ha bontšoa hoo e ka bang lelapa le leng le le leng video eo ka Seinuktitut metseng e 14 e nang le baahi ba fetang 12 000.

Boitšoaro ba Lipaki bo Khahla Mookameli

Ka September 2014, ho ile ha e-ba le kopano ea machaba lebaleng la Sangam leo ho neng ho tšoaretsoe lipapali tsa mohope oa lefatše ho lona, toropong ea Seoul, Korea Boroa. Ho ile ha e-ba le batho ba fetang 56 000 kopanong eo. Mookameli oa lebala leo la lipapali o ile a khahloa ke tsela e ntle eo Lipaki li ileng tsa itšoara ka eona nakong ea kopano. O ile a re: “Batho bohle ba ne ba itšoere hantle haholo. Ke ile ka hlolloa ha ke bona Lipaki li hloekisa lebala hantle ho feta basebetsi ba rōna. Ekare basebetsi bana ba ka be ba sebetsa ka thata joaloka lōna. Haeba malumeli a batla ho etsa lintho hantle, kaofela a lokela ho etsisa Lipaki Tsa Jehova.”

Jehova o Ile a re Koetlisa

Ka May 2012, ’muso oa Sweden o ile oa hana kōpo ea Lipaki Tsa Jehova ea hore li fumane molemo o itseng oa lichelete o fuoang mekhatlo e meng ea bolumeli naheng eo. Sehlopha se Busang se ile sa lumella Lipaki tsa sebakeng seo hore li ipiletse Lekhotleng le Phahameng ka ho Fetisisa la Tsamaiso ka qeto eo ’muso o e entseng.

Lekhotla le ile la etsa qeto ea ho hloma barab’abo rōna lipotso pele le ka liha kahlolo. Barab’abo rōna ba ’maloa ba tsoang linaheng tse sa tšoaneng ba ile ba kopana ho tla buisana ka hore na ba tla araba lipotso joang. Ba ile ba kopana Holong ea ’Muso e Stockholm e le ho itokisetsa lipotso tseo.

Ha ba ntse ba buisana, ho ile ha e-ba le motho ea kokotang monyako. Ha mor’abo rōna e mong a bula, o ile a fumana banana ba babeli, ba lilemo tse pakeng tsa 13 le 14, eaba ba ipolela mabitso. Ba ile ba re ba na le lipotso tseo ba ratang ho li botsa mabapi le Lipaki Tsa Jehova. Mor’abo rōna o re, “Ho ne ho re ke ba bolelle hore ba tle ka letsatsi le leng, kaha re ne re phathahane ebile re bona eka ba tla re sitisa.”

Leha ho le joalo, mora eo oabo rōna o ile a etsa qeto ea hore a bue le bona. Banana bao ba ne ba hlile ba e-na le lipotso tse ngata, ’me tse ling tsa tsona li ne li le mabapi le tsela eo re etsang lintho ka eona esita le ho vouta likhethong. Ka mor’a moo, mora eo oabo rōna o ile a khutlela ho ba bang ’me a ba bolella lipotso tseo banana bao ba li botsitseng le kamoo a ba arabileng kateng.

Letsatsi le latelang ha ba le lekhotleng, barab’abo rōna ba ile ba makala ha Lekhotla le botsa lipotso tse ngata tse tšoanang le tseo banana bao ba ileng ba li botsa. Mor’abo rōna ea neng a emetse mokhatlo lekhotleng o re: “Ke ne ke sa tšoha, le hoja ho ne ho ka ba bonolo hore ke tšohe kaha ke ne ke eme ka pel’a babuelli ba molao ba hlaheletseng ka mahetla naheng eo. Empa ke ile ka hlokomela hore Jehova o na le rōna ka hore ebe o ile a re koetlisa letsatsi pele ho moo.”

Lekhotla le ile la lumellana le kōpo ea rōna, ’me taba ena ea khutlisetsoa ’musong hore o e sebetse bocha.

Mokotla oa Ken oa Raese

Ken, ea lilemo li tšeletseng o lula Haiti. O ile a thaba ha a utloa hore haufinyane phutheho ea habo e tla haheloa Holo ea ’Muso. O ile a iketsetsa lebokose la monehelo le tsejoang ke eena a le mong ’me a le pata ka kamoreng ea hae. Ho e-na le hore a sebelise chelete eo batsoali ba hae ba neng ba mo fa eona ha a ea sekolong, o ne a e tšela ka lebokoseng leo. O ile a etsa joalo ka botšepehi ho fihlela basebetsi ba tl’o haha Holo ea ’Muso ba fihla. O ile a ba fa lebokose leo, ’me le ne le e-na le chelete e ka rekang mokotlana o moholo oa raese. Basebetsi ba ile ba ja raese eo e rekiloeng ka monehelo oa Ken ka matsatsi a mangata.

Taelo ea Mookameli oa Sesole

Selemong se fetileng batho ba ne ba lokela ho kōpa tumello e khethehileng ha ba batla ho ea libakeng tse ling tseo ho neng ho e-na le Ebola ho tsona Sierra Leone. Ka mohlala, balebeli ba potoloho ba ne ba lokela ho kōpa libeche le mangolo a lumellang likoloi ho kena sebakeng seo, ’me batho ba neng ba isa lingoliloeng ba ne ba lokela ho etsa se tšoanang. Litho tsa Komiti ea Liphallelo li ne li lokela ho tla le lijo, li-thermometer le k’hemik’hale e bolaeang likokoana-hloko. Ka lehlohonolo barab’abo rōna ba ne ba lula ba fumana lipampiri tse hlokahalang.

Ho ile ha etsahala ntho e ’ngoe e ileng ea matlafatsa tumelo ea rōna. Barab’abo rōna ba ile ba kōpa libeche tse 34 le mangolo a likoloi a 11, empa ba ne ba lokela ho kopana le mookameli oa sesole hore a chaele kōpo ea bona monoana. Barab’abo rōna ba tsoang lekaleng ba ile ba kopana le mookameli eo, ’me ba tšepile hore ba tla fuoa libeche le mangolo a likoloi letsatsing leo. Leha ho le joalo, foromo ea bona ea kōpo e ne e nyametse. Ho ile ha thoe barab’abo rōna ba e shebe har’a liforomo tse ling, empa ha baa ka ba e fumana. Ka nako eo, mookameli o ile a bolella mongoli oa hae hore o koala ofisi le hore o tla sebetsana le likōpo ka mor’a libeke tse peli. Barab’abo rōna ba ile ba rapella ka pelong hore Jehova a ba thuse. Mookameli eo o ile a sheba barab’abo rōna, eaba o re, “Le hloka libeche le mangolo a makae?” Ha ba mo bolella hore na ba hloka tse kae, o ile a raoha setulong a halefile, eaba o re, “Le hloka tse ngata hakaakang!”

Barab’abo rōna ba ile mo hlalosetsa ka mosebetsi oo re o etsang le hore liphallelo tseo re fanang ka tsona li thusa batho ho loantša Ebola. Mookameli eo o ile a thōla hanyenyane, a sheba mongoli oa hae, eaba o re, “Ba fe ntho e ’ngoe le e ’ngoe eo ba e hlokang.”