Molaoli ea Phahameng oa Tsa Bophelo o Lemosa Batho ka Likotsi Tsa Inthanete—Bibele e Re’ng ka Taba Ee?

Ka la 23 May, 2023, molaoli ea phahameng oa tsa bophelo Amerika o ile a lemosa batho ka hore na Inthanete e ama bacha joang.

• “Le hoja Inthanete e ka thusa bana ba bangata ka litsela tse itseng, ho na le bopaki bo bongata bo supang hore e ka boela ea ama bana hampe kelellong le ’meleng.”—Ho ea ka mokhatlo oa Social Media and Youth Mental Health: The U.S. Surgeon General’s Advisory, 2023.

Mokhatlo ona o ile oa bua ka mabaka a bontšang hore na ke hobane’ng ha re lokela ho tšoenyeha ka taba ea bana ba sebelisang Inthanete.

• Bana ba lilemo li 12 ho ea ho 15 “ba qetang nako e fetang lihora tse tharo Inthaneteng ka letsatsi, ba kotsing e kholo ea ho ba le mathata a kelello a kang khatello ea maikutlo le ho tšoenyeha ho feta tekanyo.”

• Ha bana ba lilemo li 14 “ba sebelisa Inthanete haholo, hangata ha ba robale hantle, ba ka hlekefetsoa Inthaneteng, ba ikutloa ba se batle, ba ikhalala, ba ka ikutloa ba se na thuso hape ba na le menyetla e mengata ea ho tepella maikutlong. Lintho tsena li ka etsahalla banana ho feta bashanyana.”

Batsoali ba ka sireletsa bana ba bona joang? Bibele e fana ka likeletso.

Batsoali ba ka etsa’ng?

Etsa qeto. Joaloka motsoali, etsa lipatlisiso tsa hore na ho sebelisa Inthanete ho ka ama ngoana oa hao joang ebe u etsa qeto ea hore na a ka e sebelisa kapa che.

• Molao-motheo oa Bibele: “Ruta ngoana tsela eo a lokelang ho e nka.”—Liproverbia 22:6.

• E le ho ithuta ka ho eketsehileng, bala sehlooho se reng “Should My Child Use Social Media?”

Haeba u lumella ngoana oa hao ho sebelisa Inthanete, hlokomela likotsi tse ka bang teng ’me u lule u sheba hore na o etsa’ng ho eona. U ka etsa seo joang?

Sireletsa ngoana oa hao hore a se ke a shebella lintho tse kotsi. Ruta ngoana oa hao hore a bone lintho tse kotsi le hore a li qobe.

• Molao-motheo oa Bibele: “Boitšoaro bo bobe bo amanang le thobalano, ntho e ’ngoe le e ’ngoe e litšila le meharo li se ke tsa buuoa le ho buuoa har’a lona . . . Hape har’a lona ha hoa lokela ho ba le boitšoaro bo soabisang, lipuo tse se nang kelello le mesoaso e litšila.”—Baefese 5:3, 4.

• E le hore u fumane likeletso, bala sehlooho se reng “Teaching Your Teenager Social Media Safety.”

Beha meeli. Ka mohlala, etsa melao ea hore na ngoana oa hao a sebelise Inthanete neng ka nako e kae.

• Molao-motheo oa Bibele: “Le ichebe hore na le itšoere joang. Le itšoare joaloka ba bohlale. Le sebelise nako ea lona hantle.”—Baefese 5:15, 16.

• Sheba video e reng E-ba Bohlale ha u Etsa Metsoalle Inthaneteng ho thusa ngoana oa hao ho bona bohlokoa ba ho beha meeli ha a sebelisa Inthanete.