Bibele e Re’ng ka Batho ba Hlokang Boikokobetso Hakaale Mehleng ee?

Batho ba bangata mehleng ena ha ba sa na boikokobetso. Ka mohlala, bakuli ba se ba halefela lingaka tsa bona, batho ba tlileng lireschurenteng ha ba hlomphe batho ba ba tlisetsang lijo, batho ba palamang lifofane ba hloka taolo, bana ba itšoere hampe likolong hobane ba soma matichere, baa ba tšosa ebile baa ba loantša. Bo-ralipolotiki ba bang ba hlahella linthong tse hlabisang lihlong ha ba bang bona ba ipolela hore ke batho ba lokileng.

Bibele ke buka eo re ka e tšepang ho re bolella hore na ho ba motho ea ikokobelitseng ho bolela’ng. E boetse e hlalosa hore na ke hobane’ng ha batho ba bangata ba se na boikokobetso mehleng ena.

Ke hobane’ng ha batho ba se ba se na boikokobetso?

Lefatšeng lohle, batho ha ba sa nka ho itšoara hantle le ho ikokobetsa e le lintho tsa bohlokoa.

• Lipatlisiso tsa morao tjena, li bontša hore Maamerika a lumela hore batho ba lulang United States ha ba sa na boitšoaro le boikokobetso hona joale ho feta lilemong tse 22 tse fetileng.

• Phuputsong e ’ngoe e sa tsoa etsoa morao tjena ho batho ba fetang 32 000 linaheng tse 28, ba etsang liphesente tse 65 ba boletse hore batho ha ba sa na mekhoa ebile ha ba sa na boikokobetso mehleng ena.

Lintho tsena ha li makatse hobane Bibele e ile ea bua ka tsona esale pele.

• “Tseba hore mehleng ea bofelo bophelo bo tla ba thata . . . Batho ba tla icheba bobona, ba rate chelete, ba ithorise, ba ikhohomose, ba bue hampe ka Molimo . . . Ba ke ke ba mamela batsoali, e tla ba batho ba sa leboheng . . . E tla ba batho ba se nang lerato, . . . ba bohale bo tšosang.”—2 Timothea 3:1-3.

Ho ithuta ho eketsehileng ka ho phethahala ha boprofeta bona, bala sehlooho se reng: “Na Bibele e Ile ea Bolela Esale Pele ka Tsela eo Batho ba Nahanang le ho Itšoara ka Eona Mehleng ee?”

Ke’ng e ka re thusang ho tseba hore re lokela ho bontša boikokobetso?

Ke ’nete hore batho mehleng ena ha ba sa na boikokobetso empa batho ba limilione ba fumane hore Bibele e ka ba thusa ho bona hore na ke joang ba ka bontšang boikokobetso. Lebaka ke hore likeletso tsa eona “re ka li tšepa kamehla, hona joale le ka ho sa feleng.” (Pesaleme ea 111:8) A re hlahlobeng mehlala e latelang:

• Seo Bibele e se rutang: “Lintho tsohle tseo le batlang hore batho ba le etse tsona, le lona le ba etse tsona.”—Matheu 7:12.

  Tlhaloso: Kaha le rona re batla ho hlomphuoa le ho bontšoa mosa, re lokela ho tšoara ba bang ka tsela e tšoanang.

• Seo Bibele e se rutang: “Kaha joale le tlohetse leshano, le bolellane ’nete.”—Baefese 4:25.

  Tlhaloso: Tsela eo re itšoarang ka eona le lintho tseo re li buang li lokela ho bontša hore re batho ba tšepahalang.

Ho ithuta ho eketsehileng ka taba ena, ka kopo bala:

• Makasine ea Molula-Qhooa e nang le sehlooho se reng: “Ke’ng e ka u Thusang ho Tseba se Nepahetseng le se Fosahetseng?”

• Sehlooho se reng: “Bibele e ka re Thusa ho Hlompha Maikutlo a Batho ba Bang.”