Na Diabolose a ka Laola Batho?

Karabo ea Bibele

Diabolose le bademona ba susumetsa batho, ’me Bibele e re: “E Mobe o laola lefatše lohle.” (1 Johanne 5:​19, New Century Version) Bibele e bontša litsela tseo Diabolose a susumetsang batho ka tsona.

• Thetso. Bibele e khothalletsa Bakreste hore “ba loantše maqiti a khopo a diabolose.” (Baefese 6:​11, NCV) Le leng la maqiti a hae ke ho thetsa batho hore ba lumele hore ha e le hantle mahlahana a hae ke bahlanka ba Molimo.​—2 Bakorinthe 11:13-​15.

• Tšebelisano le meea. Diabolose o sebelisa linohe, ba buisanang le meea esita le balepi ba linaleli ho khelosa batho. (Deuteronoma 18:10-​12) Lintho tse ling tse ka pepesetsang motho hore a susumetsoe ke bademona ke ho sebelisa lithethefatsi, ho tšerehanngoa le ho thuisa ka tsela e etsang hore kelello e se ke ea nahana letho.​—Luka 11:24-​26.

• Bolumeli ba bohata. Malumeli a rutang lithuto tsa bohata a khelosa batho hore ba se ke ba mamela Molimo. (1 Bakorinthe 10:20) Bibele e re lithuto tseo tsa bohata ke “lithuto tsa bademona.”​—1 Timothea 4:1.

• Ho kenoa ke bademona. Bibele e bua ka batho ba ileng ba kenoa ke meea e litšila. Ka linako tse ling batho ba kenoeng ke bademona ba ne ba foufala, e e-ba limumu kapa ba itematsa.​—Matheu 12:22; Mareka 5:​2-5.

Kamoo re ka qobang ho susumetsoa ke Diabolose

Ha ho hlokahale hore u lule u tšohile ho laoloa ke bademona, kaha Bibele e bontša kamoo u ka atlehang ho hanyetsa Diabolose kateng:

• Ithute mekhoa eo Diabolose a e sebelisang e le hore ‘u tsebe merero ea hae.’—2 Bakorinthe 2:​11.

• Ithute Bibele, ’me u sebelise seo u ithutileng sona. Ho sebelisa melao-motheo ea Bibele ho tla u sireletsa hore u se ke ua susumetsoa ke Diabolose.​—Baefese 6:​11-​18.

• Lahla ntho leha e le efe e amanang le bademona. (Liketso 19:19) Lintho tseo li akarelletsa ’mino, libuka, limakasine, li-poster le livideo tse khothalletsang tšebelisano le meea.