Masea, Mali, le AIDS

HAUFINYANA The New York Times e ne e e-na le tlaleho ena e tšosang leqepheng la pele: “Romania e sokeloa ke lefu la seoa le sa tloaelehang la bana la AIDS le lengata libakeng tse penyaneng tsa tlhokomelo ea likhutsana le likliniki, le jaloa ke mokhoa oa boholo-holo oa ho tšela masea a sa tsoa tsoaloa mali.”—February 8, 1990.

Ka ho hlakileng lingaka tse ling tsa Romania ka tloaelo li ne li entela mali a manyenyane mokhubung oa ngoana ea sa tsoa tsoaloa ka tšepo ea hore “tšelo ena e nyenyane ea mali” e tla potlakisa khōlo ea ngoana. Mokhoa ona o ipakile e le tsela e tšosang e sebetsang ea ho jala AIDS; mali a fokolang a silafetseng a ka etsang halofo ea lithara a na le tšoaetso e lekaneng bakeng sa masea a mangata.

Mokhatlo oa Lefatše oa Bophelo bo Botle, o ileng oa romela sehlopha sa lingaka tsa pholoso Romania, o lekanyetsa hore bana ba 700 ba Romania ba fumanoe ba se ba na le kokoana-hloko ea AIDS, le ba eketsehileng ba 50 ba hlokofatsoang ke AIDS. Moeta-pele oa lenaneo la mokhatlo oa AIDS o ile a bolella Times hore tekanyo ea tšoaetso ea AIDS har’a masea ke e ’ngoe e phahameng ka ho fetisisa lefatšeng.

Tlas’a ’muso o sa tsoa lihoa oa Ceausescu, Romania ha ea ka ea e-ba le tšokelo ea AIDS ka molao. Litaba leha e le life tse jalang lefu lena li ile tsa bolokoa ka matla e le sephiri sa ’muso. Batho ba fanang ka mali ba ne ba sa hlahlojoe ho tiisa hore ba na le AIDS. Hona joale seo se fetohile. Empa nakong ea selemo le halofo pele ho phetohelo ea ’muso, lingaka tse ngata tsa Romania li ne li sa nahane ka AIDS ha li ne li qala ho bona bana ba eketsehileng ba e-na le tšoaetso e sa phekoleheng. Ho joalokaha e mong oa bona a boletse: “Haeba u bolelletsoe hore ha ho na kokoana-hloko e joalo Romania, ke hobane’ng ha le ithuta ka eona?”