“Khaotsang ho Tšoenyeha”

“Chelete eohle ea rōna e bankeng e ile ea ea hammoho le eo re neng re e boloketse bana ba rōna. Re ile ra qeta likhoeli tse ngata re se na chelete e kenang.”

● Ke ne ke e-na le sekolo sebakeng sa mahaeng India, ’me lintho li ne li tsamaea hantle. Ka nako e ’ngoe ke ne ke e-na le bana ba ka bang 500 sekolong seo. Eaba sekolo se seng se tummeng sa toropong se qala ho romela libese motseng oa habo rōna ’me sa amohela bana habonolo. Ka ho utloahalang, bana ba bangata ba ile ba ea sekolong seo sa toropong. Ha e le hantle, palo ea bana ba kenang sekolong sa ka e ile ea tloha ho ba ka bang 500 ea theohela ho ba ka bang 60. Ho ileng ha mpefatsa boemo le ho feta ke hore e mong ea boholong moo sekolong o ile a ikhula tumellanong ea lichelete eo re neng re e entse, ’me o ne a ntse a nkolota. Ka lebaka la matichere a mangata ao ke neng ke tlameha ho a lefa, ke ile ka ba mathateng a lichelete.

Re ile ra lula fatše re le lelapa ’me ra tšohla boemo bona. Kaofela re ile ra bontša moea oa boitelo ha re ntse re leka ho latela keletso ea Jesu ea hore re lule re ‘talimile nģa e le ’ngoe’ litabeng tsa lichelete—ka mantsoe a mang, re se ke ra ikimetsa ka lintho tseo re ke keng ra li khona. (Matheu 6:22, 25) Ka nakoana re ile ra tlameha ho khaotsa ho sebelisa koloi ka lebaka la litšenyehelo tsa peterole le tsa ho e lokisa. Re ile ra fokotsa litšenyehelo tsa lijo ka hore re li reke mantsiboea, ha theko ea tse setseng e se e theohile. Re ile ra boela ra fokotsa ho ja lijo tsa mefuta e mengata ka nako e le ’ngoe.

Re Lipaki Tsa Jehova, kahoo re nka hore ke habohlokoa hore re kopane le balumeli-’moho le rōna libokeng tsa Bokreste. (Baheberu 10:25) Le hoja re ne re e-na le mathata a lichelete, re ile ra ikemisetsa ho se fetoe ke liboka le likopano—esita le haeba hoo ho ne ho bolela hore re lokela ho tsamaea sebaka se selelele. Tšebeletso ea rōna—e kopanyelletsang ho ruta batho Bibele—e akarelletsa ho ea libakeng tse hōle. Re ne re tsamaea ka sethuthuthu ha re ea mosebetsing ona ho e-na le hore re tsamaee ka koloi. Ke ’nete hore sethuthuthu se ne se nka batho ba babeli feela ka nako e le ’ngoe.

Empa seo se ne se sa bolele hore re qeta nako e nyenyane re le tšebeletsong. Ho fapana le moo, mosali oa ka le morali oa rōna ba ile ba qala ho qeta nako e eketsehileng ba bua le ba bang ka Bibele. Ka linako tse ling ba ne ba tsamaea lik’hilomithara tse tšeletseng ho isa ho tse robeli ho ea khannela batho ba thahasellang lithuto tsa lehae tsa Bibele. ’Na le mora oa ka re ile ra etsa boiteko ba ho qeta nako e eketsehileng re ruta ba bang ka Bibele.

Hona joale, maemo a rōna a lichelete a batla a ntlafatse. Leha ho le joalo, phihlelo ena e bohloko e re rutile re le lelapa hore re se ke ra nka lintho tse bonahalang e le tsa bohlokoa haholo. Re boetse re ithutile hore re se ke ra tšoenyeha haholo ka lintho tseo re ke keng ra li laola. Pesaleme ea 55:22 e ’nile ea re khothatsa ka ho khetheha. E re: “Lahlela moroalo oa hao ho Jehova, o tla u tšehetsa. Le ka mohla a ke ke a lumella ea lokileng hore a therekele.” Mantsoe ana a phethahetse ka ho feletseng nakong eo re neng re e-na le mathata a lichelete!—Se nehetsoe.