Seo Bo-rasaense ba sa se Tsebeng
Le hoja bo-rasaense ba ithutile lintho tse ngata, ba ntse ba sa khone ho araba lipotso tsa bohlokoa tseo re ipotsang tsona.
Na bo-rasaense baa tseba hore bophelo le lintho tsohle li bile teng joang? Karabo ke che. Batho ba bang ba re bo-rasaense ba ithutang ka hore na lintho li bile teng joang ba ka khona ho hlalosa hore na bophelo bo qalile joang. Leha ho le joalo Moprofesa e mong ea bitsoang Marcelo Gleiser ea tsoang Dartmouth College ea ithutang ka linaleli, o re: “Ha re e-s’o ka re khona ho hlalosa hore na maholimo le lefatše li bile teng joang.”
Sehlooho se hlahang makasineng ea Science News ha se bua ka hore na bophelo bo bile teng joang le sona se re: “E ka ’na ea e-ba ntho e sa khoneheng ho hlalosa hore na bophelo bo qalile joang mona lefatšeng. Boholo ba mesaletsa ea lintho tsa khale e neng e ka re bolella hore bophelo bo qalile joang, ha e sa fumaneha.” Ho latela litlhaloso tsena rea hlokomela hore saense ha e-s’o ka e khona ho hlalosa hore na lintho tsohle le bophelo li bile teng joang. Haeba ho na le motho ea entseng hore bophelo bo be teng, ke mang?
E ka ’na eaba u ile oa ipotsa lipotso tsena tse latelang: haeba ho na le ’Mopi ea bohlale le ea lerato, ke hobane’ng ha a lumella batho hore ba utloe bohloko? Ke hobane’ng ha ho e-na le malumeli a mangata hakaale? Ke hobane’ng ha a lumella batho ba mo rapelang hore ba etse lintho tse mpe hakaale?
Saense e ke ke ea khona ho araba lipotso tsena. Empa seo ha se bolele hore u ke ke oa khona ho fumana likarabo tse khotsofatsang tsa lipotso tsena. Ha e le hantle, batho ba bangata ba ile ba fumana likarabo tse khotsofatsang ka hare ho Bibele.
Ho na le bo-rasaense ba ileng ba ipha nako ea ho ithuta Bibele ’me ba lumela hore ho na le ’Mopi. E le ho utloa maikutlo a bona, kena ho jw.org/st ebe u batla Lintlha tsa Qaleho ea Bophelo.