Armageddone—Ntoa e Isang Khotsong ea ’Nete
PUONG ea ba sebetsanang le likamano tsa machaba, mantsoe a sebelisitsoeng ho hlalosa boemo ba lefatše kajeno ke Tumellano e Tiisitsoeng ea ho Timetsana (MAD). Lentsoe leo ke le loketseng haholo. Lilemo tse 40 ho ba seqhomane sa pele sa athomiki se phatlohe ntoeng Hiroshima, Japane, pokello ea lefatše ea libetsa tsa “nuclear” e phahame ka ho ke keng ha lumeloa. Litlaleho tse ling li bolela hore li ka lekana litone tsa “TNT” tse limillione tse likete tse 12, kapa ho e ka bang litone tse 3 bakeng sa motho a le mong lefatšeng!
Joalokaha Ea ‘bōpileng lefatše, . . . a sa ka a le bōpela lefeela, a mpa a le bōpetse hore le ahuoe,’ Jehova Molimo a ke ke a lumella lichaba ho tsoela pele tseleng ea tsona ea ho ipolaea. (Esaia 45:18; bona le Pesaleme ea 104:5.) Pele lichaba li e-ba le monyetla oa ho nkhisetsana mahofi ka libetsa tsohle tsa tsona tse bolaeang, ’me ka ho etsa joalo li qetelle li iphelisitse le ho felisa tikoloho, Moetsi le Mong a lefatše le lintho tsohle tse ho lona o tla ema a nke bohato. O tšepisitse hore ena e tla ba “ntoa ea letsatsi le leholo la Molimo o matla ’ohle,” Armageddone ea Bibele!—Tšenolo 16:14, 16.
Kahoo, Armageddone e tla ba ntoa e fetang ntoa feela tjee e rarollang qaka e teng kajeno ea bopolotiki. E tla phetha seo motho a ’nileng a se lebella ka lilemo. E tla felisa lisosa tsohle tsa ntoa ea motho. E tla hloma khotso ea ’nete lefatšeng. Ho feta tsohle, e tla tsosolosa puso e lokileng ea Mong a lefatše, Jehova Molimo, holim’a pōpo eohle ea hae. Hoo hohle ho tla phethoa joang? A re boneng.
Khotso—Ka ho Felisa Mekhoa ea ho Loana Ntoa
Le leng la mabaka ao lichaba li hlōlehileng ho felisa ntoa ka Iona ke hore ha lia khona ho felisa mekhoa ea ho loana. Le hoja li tseba hore ho bokellana ho phahamang ka lihlomo ke ho ipolaea, ha lia ikemisetsa ho tela kapa ho fokotsa lihlomo. Ka sebele e tla ba ho ‘makatsang’ ha Jehova a nka bohato ’me a phetha seo lichaba li ke keng tsa se etsa: “O robile liqha, a robakanya marumo, a chesa makoloi a ntoa mollong.”—Pesaleme ea 46:8, 9, bapisa le NW.
Nakong e fetileng Jehova o bontšitse matla a hae a ho sitisa tšebeliso ea libetsa tse tsoetseng pele kapa tse tšosang tseo lichaba li neng li ka li tsokotsa. Ka mohlala, o ile a lokolla batho ba hae ba neng ba bonahala ba se na boitšireletso, Baiseraele, matleng a sesole sa ’muso oa pele oa lefatše, Egepeta, ka ho laola matla a tlhaho a metsi a Leoatle le Lefubelu. (Exoda 15:3-5) Ka ho tšoanang, libetsa tse tsoetseng pele tsa Morena Jabine oa Kanana, “makoloi a tšepe a makholo a robileng mono o le mong,” tlas’a taolo ea Sisera molaoli oa makhotla a Jabine, ha lia ka tsa sebetsa ho hang ha Jehova a etsa sekhohola ka molapo. Liphafa tsa sera tsa ferekanngoa ka ho feletseng, hoo ba ileng ba timela ho isa ho monna oa ho qetela. Phello e bile hore ‘lefatše le ile la phomola ka lilemo tse mashome a mane.’—Bona Baahloli, khaolo ea 4 le 5:21, 31.
Habohlokoahali, ntoa eo ea makhaola khang khahlanong le mabotho a Morena Jabine e etsahetse phuleng ea Kishone, “metsing a Megiddo.” (Baahloli 5:19-21) Kahoo e re fa e sa le pele pono e makatsang ea tlhōlo e feletseng ea Jehova ntoeng e tlang ea Armageddone.
Hore na Jehova o tla sebelisa mabotho afe a “mohlolo,” khahlanong le lira tsa hae ha re tsebe. Seo se re se tsebang ke hore o na le makhotla a hae a hlophisitsoeng ao ka ho feletseng a ka ripitlang mekhatlo ea sesole sa lichaba. Ka mohlala, bahlalefi ba hlokomela hore ho phalla ha matla a motlakase ho sa khaotseng—ntho eo le bona ba ka e fehlang ka ho phatloha ho phahameng haholo ha “nuclear”—ho ka khona ho khaola puisano le litsamaiso tse laolang sesole sa sechaba, kahoo ho ferekanye ntho e ’ngoe le e ’ngoe. Ka ho utloahalang, Jehova o tla felisa pokello ea libetsa tsohle tsa lichaba ho rala motheo bakeng sa khotso e feletseng.
Khotso—Bakeng sa ba e Batlang Feela
Hangata ho ’nile ha boleloa hore lintoa li loanoa ke batho, e seng libetsa. Kahoo, le hoja ho hlokahala hore ho felisoe mekhoa ea ho loana ntoa, hoo ka bohona ho ke ke ha tiisa hore khotso e tla ba teng ka ho sa feleng. Ka nepo, haeba re batla ho bona khotso ea ’nete, lehloeo la bopolotiki, la morabe, le la bosechaba tse arotseng lefatše likoto tse ngata hakana le tsona li tlameha ho felisoa. Hona, Jehova Molimo o tla ho etsa ka ho tiisa seo batho ba limillione lefatšeng lohle ba ’nileng ba se rapella: “Ho tle ’muso oa hao.”—Mattheu 6:9, 10.
Le hoja boprofeta ba Bibele ho phethahalitsoeng ka ho hlakileng bo bontša hore ’Muso oa Messia matsohong a Jesu Kreste o hlomiloe maholimong ka selemo sa Ntoa ea Lefatše ea I ea 1914, ha o-oa ka oa amoheloa ke lichaba. Ha ho le se seng ho tsona se kileng sa nahana ho bea lihlomo tsa sona fatše le ho nehela borena ba sona. Ho e-na le hoo, ntoeng ea tsona e ferekaneng ea ho busa lefatše, li ile tsa kena pherekanong ntoeng e khōlōhali ho feta tsohle ho tla fihlela ka nako eo.
Ka boprofeta, Pesaleme ea bobeli e hlalosa boemo bono: “Na lichaba li luma-lumela’ng, ’me batho ba rerela’ng tsa lefeela? Marena a lefatše a phuthehetse’ng, le mahosana a bokanetse’ng ho tsohela Jehova le motlotsuoa oa hae matla?” Ke ka lebaka leo taelo ea Jehova ho Morena oa hae eo a mo khethileng, Jesu Kreste, e leng ena: “U tla li thumakanya ka molamu oa tšepe, u li silakanye joale ka pitsa ea letsopa.”—Pesaleme ea 2:1, 2, 9; 110:2.
Ho hlōla hona ha Morena ea tlotsitsoeng oa Molimo ho hlalositsoe ka ho qaqa ka tšoantšetso ho Tšenolo 19:11–20:3. Lentsoe la Molimo, Jesu Kreste, a tšehelitsoe ke makhotla a mangeloi, o bonoa a kaletse pere e tšoeu, “o ahlola, o loana ka ho loka. . . . Sabole e bohale e tsoa molomong oa hae, a tle a otle lichaba ka eona.” Ho bolaoa ha ba khopo ke ho hoholo haholo. Tlhōlong ea hae e akaretsang, Morena ea hlōlang joale o tla sebetsana le ea leng molato le ea bakang malimabe oohle le bohloko bohle lefatšeng. Pono e ho Tšenolo e hlalosa hona joalokaha eka ho se ho phethahetse, e re: “La tšoara drakone, noha ea khale, e leng Diabolose le Satane, ’me la e holehela lilemo tse sekete.”
Khotso—Lilemo tse Sekete le ka ’Nģ’ane
Na u ka nahana hore na lilemo tse sekete tsa khotso li tla bolela eng ho batho? Babusi kajeno ba bolela hore tlala, mafu le bofuma tse har’a lichaba li ka felisoa haeba feela karoloana ea liranta tse makholo a libillione e sebelisoang lihlomong e ne e ka sebelisetsoa lintho tsena. Nahana ka mosebetsi o tla etsoa ha maruo ’ohle a lefatše a sebelisoa ka tsela e molemo. E ne e se toro ha seboni Esaia a susumelletsoa ho profeta ka puso ea “Morena oa khotso,” Jesu Kreste: “Hore a holise ’muso, le ho tiisa khotso e sa feleng.”—Esaia 9:6, 7.
Potso ea bohlokoa ke ena: Na u tla pholoha timetso ea Armageddone ho ea thabela khotso e sa feleng? U ka ’na ua botsa, ‘Ke tlameha ho etsa’ng hore ke pholohe?’ Keletso ea Bibele ke ena: “Batlang Jehova, baikokobetsi bohle ba lefatše, ba etsang ka taelo ea hae; batlang ho loka, le batle boikokobetso; ekaba le ka tšoha le patoa tsatsing la bohale ba Jehova.” (Sofonia 2:2, 3) Lipaki tsa Jehova li tla thabela ho u thusa ho etsa joalo. Ka baka leo, ho uena Armageddone e ke ke ea e-ba ntoa e tlisang timetso e feletseng, empa ntoa e isang khotsong ea ’nete.
[Setšoantšo se leqepheng la 6]
Leoatleng le Lefubelu Jehova o ile a bontša matla a hae a ho sitisa tšebeliso ea libetsa tse tšosang tsa ntoa