“Tse Bōpiloeng Tsohle li Ntse li Feheloa”—Hobane’ng?
MONNA oa pele le mosali ba furalla Molimo. Empa hoba ba fumane “tokoloho” eo ba neng ba e batla, joale ba tlameha ho laola litaba hantle haholohali kamoo ba ka khonang. Kapele ba fumana hore ho hotlehali hoo ba neng ba ka ho etsa e ne e se letho. Ho hloka phihlelo le tsebo e fokolang tsa lebisa mathateng.
Ke ka lebaka leo boholo ba rōna re tšoenngoang ke khethollo le leeme. Ke ka lebaka leo kaofela ha rōna re keneng bokhobeng ba ho se phethahale hoa botho, re kulang, re hlokofatsoang ke mahloko a sa tloaelehang ’meleng le kelellong ’me re keleketlisa meokho ea matšoenyeho. Kapa, joalokaha ho beiloe ka puo ea Bibele, ke lona lebaka le etsang hore e be “tse bōpiloeng tsohle li ntse li feheloa, li bile li [le] tsietsing hammoho, ho fihlela joale.”—Ba-Roma 8:22.
Ka hona boiteko ba pele ba motho ba tokoloho ba fetoha bo mo kenyang bokhobeng. Ka makholo a 60 a lilemo ho fihlela joale, o ’nile a leka ho itokolla liphellong tsa bona tse mpe. Empa ka katleho efe?
Tokoloho ea Bopolotiki
Motho o lekile mefuta eohle ea puso. Eo e hatellang kapa e leeme, kapa e hlōtsoeng ho finyella seo batho ba se hlokang kapele, e ile ea nyahlatsoa kapa hona ho ketoloa ka likhoka ’me ea nkeloa sebaka ke e meng—empa ka liphello tse belaetsang.
Moqolotsi oa litaba Lance Morrow, ha a bua ka liphetoho tse khōlō tsa bopolotiki, o hlokometse: “Histori e fetile har’a letoto la liketsahalo tse ngata ho tlōla tsa liphetoho tseo ho neng ho thoe li tla tlisa maemo a phethahetseng tse ileng tsa fella ka ho ba tse hatellang, tse tletseng lipolao, joaloka mebuso eo li e fietseng—liphetoho tsena li bakiloe ke batho ba nang le tšepo ea ho tlisa maemo a phethahetseng ka ho hlōla mebuso e litulong le e nang le phihlelo.”
Ho tlosa ’muso o sa phethahalang hore o nkeloe sebaka ke o mong o sa phethahalang ho hang ha se tsela e molemohali ea ho tlisa tokoloho ea sebele. Ka hona, Morena ea bohlale Salomone o ile a bululeloa ke Molimo ho ngola: “Batho ba [rena] holim’a ba bang ho ba etsa hampe.” (Moeklesia 8:9) Ho totobetse hore ‘tse bōpiloeng tsohle li tla ’ne li feheloe, ’me li be tsietsing hammoho,’ ho fihlela ’muso o phethahetseng o tlisa tokoloho ea sebele pusong e sa phethahalang.
Tokoloho Khethollong ea Lichaba le ea Merabe
Khethollo ea merabe kapa ea lichaba ka ho toba e hanyetsana le linnete tsa Bibele tsa hore Molimo “o entse lichaba tsohle ka mali a motho a le mong,” le hore “Molimo ha a ee ka tšobotsi; empa, lichabeng tsohle, ea mo tšabang, ea etsang tōka, oa amoheleha ho eena.” (Liketso 17:26; 10:34, 35, TLP) Empa ba batlang ho tšoaroa joaloka ba bang hangata ba hlotsoe ho finyella seo, esita le lichabeng tse ipolelang hore ke tsa Bakreste.
Ka mohlala, nahana ka morabe oa batho ba batšo. Ba bang bao ho thoe’ng ke Bakreste ba bolela hore ’mala o motšo oa letlalo o bakiloe ke thohako ea bomolimo e filoeng Kanana le litloholo tsa hae, e ba beang boemong ba bokhoba. Ba’a fosa ka ho rialo. Morabe oa batho ba batšo ha o tsoe ho Kanana empa ho Kushe ’me mohlomong ho Puthe. ’Me ha ho le ea mong oa bona ea ileng a rohakoa.—Genese 9:24, 25; 10:6.
Ho sa tsotellehe ’nete ena, batho ba batšo hangata ba iphumane ba hatelloa sechabeng le moruong ke batho ba habo bona ba batšo. Ba labalabetse tokoloho. Empa mekhatlo ea bona ea tokoloho, ho sa tsotellehe mekoloko ea nyatso le ho lula libakeng tse thibetsoeng e le pontšo ea nyatso, e tlisitse katleho e sekametseng ka nģa e le ’ngoe feela. E sitoa ho fetola lipelo ka ho feletseng, e hlōtsoe ho tlosa khethollo ea merabe, ho hloka tsebo hoa bolumeli le khaello ea lerato ho baahelani.
Ka hona ‘tse bōpiloeng tsohle li tla ’ne li feheloe, ’me li be tsietsing hammoho’ ho fihlela khethollo ea moloko e felisoa ka ’Muso oa Molimo matsohong a Kreste.
Tokoloho ea Basali
Ho theosa le makholo a lilemo, basali ba ’nile ba tšoaroa hampe ’me hangata ba nkoa e le batho ba tlaasana. Hona hase molato oa ’Mōpi oa bona. Ha a ka a bōpa mosali e le hore monna a ka mo talima feela e le sesebelisoa sa ho kopanela liphate. Leha e le hore monna o ile a laeloa hore a mo buse ka khatello. E le mosali oa monna, o ne a tlameha ho ba “mothusi” oa hae, ho sebeletsa e le “motlatsi oa hae,” ho ba “nama e le ’ngoe” le eena.—Genese 1:26-28; 2:18-24, NW.
Takatso ea Eva ea ho ipusa taolong e lerato ea Molimo ha e-ea ka ea fella ka tokoloho, empa ka bokhoba bo khahlapetsang. Ha o bonela sena pele, Molimo oa profeta: “Litakatso tsa hao li tla ba ho monna oa hao, ’me u tla busoa ke eena.” (Genese 3:16) Ho basali ba bangata, puso e sa phethahalang ea banna e bile e bohloko ka ho fetisisa, ’me mekhatlo e ’maloa ea basali e lekile ho e hlohlora.
Empa Mokhatlo oa Tokoloho ea Basali, leha o hlahisa liphetoho tse itseng ka morero oa ho tlisa ho molemonyana, o hlōlehile hobane o khahlanong le tokoloho e leka-lekaneng eo Molimo o e tšepisang. ‘Tse bōpiloeng tsohle li tla ’ne li feheloe, ’me li be tsietsing hammoho’ ho fihlela ’Muso oa Molimo o ruta banna bohle ho “rata basali ba bona joale ka ’mele [ea] bona” ’me ba tšoara “basali ba hōlileng joale ka hoja ke [bo-’m’a bona], ba bacha joale ka hoja ke bo khaitselie, ka hloeko eohle.”—Ba-Efese 5:28; 1 Timothea 5:2.
Pele re hlalosa hore na letsatsi leo le tla tla joang, re tlameha ho buisana ka potso e ’ngoe ea bohlokoa. Ha e le hantle Bakreste ba lokela ho talima mekhatlo ea kajeno ea tokoloho joang?
[Ntlha e qolotsoeng e leqepheng la 4]
Ho tlosa ’muso o mong o sa phethahalang hore o nkeloe sebaka ke o mong o sa phethahalang ho hang ha se tharollo ea ho tlisa tokoloho ea sebele
[Ntlha e qolotsoeng e leqepheng la 5]
Ho tlōla melao e beiloeng, ho lula libakeng tse thibetsoeng e le pontšo ea nyatso le mekoloko ea nyatso, ha li fetole lipelo
[Ntlha e qolotsoeng e leqepheng la 5]
Mokhatlo oa Tokoloho ea Basali o hlōlehile hobane o hanyetsana le tokoloho e leka-lekaneng eo Molimo o e tšepisang