Bolela Khanya ea Borena ba Molimo

“Ba tla bolela khanya ea ’muso oa hao, ba tumise matla a hao.”—PESALEME EA 145:11.

1. Lebaka-baka leo Jehova a re neileng puo ka lona ke lefe?

JEHOVA o ne a e-na le morero ha a re nea puo. (Exoda 4:11) Lebaka-baka e ne e le hore melomo ea rōna “e tsoe thoko” e lebang ho eena. (Pesaleme ea 119:171, 172) Joalokaha mopesaleme Davida a ile a re: “Jehova, mesebetsi ea hao kaofela e tla u rorisa, bakhethoa ba hao ba u boke. Ba tla bolela khanya ea ’muso oa hao, ba tumise matla a hao, ba tle ba tsebise bana ba batho liketso tsa hao tse phahameng, le boholo ba khanya ea borena ba hao. ’Muso oa hao ke ’muso oa kamehla eohle, ’me borena ba hao bo hlola ho isa melokong e sa feleng.”—Pesaleme ea 145:10-13.

2. Re tlameha ‘ho tsoa thoko’ e eang ho Molimo ka litsela life?

² Balateli ba tlotsitsoeng ba Jesu Kreste le metsoalle ea bona ea “bongata bo boholo ba batho” ba chesehela ho roka Jehova, ‘Morena oa ka ho sa feleng.’ (Tšenolo 7:9; 15:3) Ka ho ithuta Bibele ka masene ka thuso ea Molula-Qhooa le lingoliloeng tse ling tsa Bokreste, re ka tseba Molimo ka nepo ka tsela eo e kang ke mohloli oa metsi a hloekileng, a khathollang le a phelisang. Ka hona, tabeng ea rōna ‘seliba sa bohlale se fetoha nōka e phallang.’ (Liproverbia 18:4) Re tlameha ho ‘tsoa lithoko’ bopaking ba ntlo le ntlo le litšobotsing tse ling tsa tšebeletso ea tšimo. Empa ho boetse ho na le lebaka la Mangolo bakeng sa bopaki bo sa rereloang.

Mehlala ea Mangolo

3. Ak’u bolele mohlala oa bopaki bo sa rereloang bo ileng ba etsoa ke Jesu Kreste.

³ Lekhetlo la pele leo Jesu a ileng a bolela ka lona hoba a tlotsoe ka moea o halalelang e bile moo a neng a lula teng, moo a ileng a memela Johanne, Andrease, ’me ka ho hlakileng le Petrose. Ba qeta letsatsi moo, ka ho totobetseng ba fumana bopaki bo tomanyana boemong boo bo sa rereloang. (Johanne 1:35-43) Hape e bile tlas’a maemo a sa rereloang—‘ha a feta’—moo Jesu a ileng a bona Mattheu ofising ea lekhetho ’me a fumana liphello tse molemo ha A re: “Ntatele.”—Mattheu 9:9.

4. Jesu o ile a re’ng ha a pakela mosali oa Mosamaria, ’me hoo ha isa ho eng?

⁴ Jesu e ne e le mohlala o molemo ka ho fetisisa oa ‘nōka e phallang ea tsebo.’ Le hoja a ne a lutse a lapile a bile a khathetse selibeng sa Jakobo haufi le Sikare, o ile a pakela mosali oa Mosamaria ea ileng a tla ho tla kha metsi. Jesu a re: “E mong le e mong ea noang metsi ao ke mo neang oona, a ke ke a hlola a nyoroa le ka mohla o le mong, ’me metsi ao ’na ke mo neang oona, e tla ba ka ho eena seliba sa metsi a phallelang bophelong bo sa feleng.” Bopaki bona bo sa rereloang ba etsa hore Jesu a pakele sehlopha seo mosali enoa a ileng a se susumetsa hore se phuthehe ’me se utloe seo Jesu a se buang.—Johanne 4:6-42.

5. Moevangeli Filipi le moapostola Pauluse ba fana ka mehlala efe ea bopaki bo sa rereloang?

⁵ Moevangeli Filipi o ile a hoehla koloi e fetang ka tsela ’me a paka ka mokhoa o sa rereloang ho motho ea ka ho eona ea neng a bala boprofeta ba Esaia. Ha a memeloa ho hloella koloing, Filipi a hlalosa “tsa Jesu” ho letona leo la Ethiopia, leo karabelo ea lona e ananelang e ileng ea fella ka hore le kolobetsoe. (Liketso 8:26-38) Eitse ha moapostola Pauluse a lokolloa litlamong tsa chankane tšisinyehong e khōlō ea lefatše Filippi, o ile a paka ka mokhoa o sa rereloang ho molebeli oa chankane. Phello ea e-ba efe? ‘A lumela eena le ba ntlo ea hae kaofela.’—Liketso 16:19-34.

6. Bopaki bo sa rereloang ho bonahala bo ile ba nka karolo efe liketsong tsa barutuoa ba Jesu kamor’a hore Setefane a tlepetsoe ka majoe?

⁶ Kajeno, bopaki bo sa rereloang ke o mong oa mekhoa ea ho bolela litaba tse molemo moo mosebetsi oa rōna oa Bokreste o thibetsoeng. Leha ho le joalo, le haeba re hlorisoa, lipelo tsa rōna li re susumeletsa hore re bue ka khanya ea borena ba Molimo. Hoba Setefane a tlepetsoe ka majoe hore a shoe, barutuoa ba bangata ba neng ba hlorisoa ba ile ba phasa-phasa. Empa, ba ’na ba bolela litaba tse molemo, ’me ha ho pelaelo hore bopaki bo sa rereloang bo ile ba akarelletsoa boitekong ba bona ba ho bolela ’Muso.—Liketso 8:4-8; 11:19-21.

7. Pauluse o ile a etsa’ng ha a ne a koaletsoe, hona ho mema potso efe?

⁷ Bopaki bo sa rereloang ke tsela e ’ngoe ea ho bolela khanya ea borena ba Molimo haeba re le litlamong kapa re sa tlohe malapeng a rōna ka lebaka la ho kula kapa boqhoala. Pauluse o ne a koaletsoe ka lilemo tse peli, a lebetsoe ke molebeli oa Moroma. Empa ho e-na le ho lulela ho ngongoreha, o ne a batla ba ka tlang ho tla mo mamela ’me o ne “a ntse a amohela bohle ba tlang ho eena. A ’na a bolela ’muso oa Molimo, a ruta le tsa Morena Jesu Kreste ka ho tiea hohle, a se ke a thibeloa ke motho.” (Liketso 28:16-31) Ke mohlala o motle hakaakang! Haeba u le paki e koaletsoeng ea Jehova, na u ka etsa ho hong ho tšoanang le hoo?

8. Bopaki bo sa rereloang ba Pauluse bo ile ba atleha hakae?

⁸ Kaha balebeli ba Pauluse ba ne ba fapana ka linako, ba fapa-fapaneng ba ne ba utloa ha a bolella ba bang ka khanya ea borena ba Molimo. Leha ho le joalo, re ka tiisa hore le balebeli bao o ne a ba pakela ka mokhoa o tobileng. Bopaki bona bo sa rereloang bo bile matla hoo Pauluse a neng a ka ngola: “Tse ntlhahetseng li thusitse haholo ho ntšetsa Evangeli pele. Ho tlangoa ha ka ka baka la Kreste ho bile ha tuma hohle tlung ea borena, le ka nģa tsohle tse ling. ’Me joale, ba bangata ho banab’abo rōna Moreneng ba ekelelitsoe matla a ho bolela lentsoe la Molimo, ba se na tšabo, ka ho khothahala ke litlamo tsa ka.” (Ba-Filippi 1:12-14) Joaloka Pauluse, haeba re ka kenngoa litlamong ’me ra amohuoa menyetla ea ho bolela ka mokhoa o reretsoeng, re sa ntsane re ka bua ka borena ba Molimo. ’Me hoo ho tla fana ka khothatso e kaakang ho baena ba rōna!

9, 10. Ho na le bopaki bofe ba lefatše ba hore Bakreste ba pele ba ne ba paka ka mokhoa o sa rereloang?

⁹ Bopaki bo sa rereloang bo ne bo tloaelehile har’a Bakreste ba pejana hoo lilemo hamoraonyana ho neng ho ka thoe: “Re fumana leseli ka sengoli sa Mokreste, mohlomong se ngotseng se le Carthage hoo e ka bang ka 200 . . . [le] amang batho ba neng ba rutehile haholo. Babuelli ba bararo ba molao ba banyenyane, metsoalle e haufi-ufi, ba ile ba qeta letsatsi la phomolo lebopong la leoatle. Ba babeli ke Bakreste, oa boraro ke mohetene. Puo ea bona ka potlako e fetohela bolumeling . . . Tlaleho ea khang e telele e qetella ka hore, ‘Ra khutlela hae re thabile, ka boraro ba rōna. E mong o ne a thabile hobane o ne a fetohetse tumelong ea Bokreste, ba bang hobane ba ne ba mo isitse ho eona.’ Se ngotsoeng ha se ikhakanye joalokaha eka ke histori ea sebele; ke buka ea Minucius Felix e ngoletsoeng ho bontša ho nepahala ha sena. Empa e hlile e tšoantšetsa ntho e neng e etsahala har’a batho ba maemong a khethehileng haholoanyane.” (Church History 1—The First Advance: AD 29—500, ea John Foster, maqephe 46, 48) E, ’me tlaleho ena e bontša hore bopaki bo sa rereloang bo ne bo sa fela har’a ba neng ba ipolela hore ke Bakreste ka nako eo.

¹⁰ Ho boetse hoa boleloa tabeng ea Bakreste ba pele: “Ho ne ho e-na le palo e sa khaotseng ea balumeli ka bomong ba Bakreste bao, kae le kae moo ba neng ba e-ea teng, e-bang e ne e le mosebetsing oa bona oa kamehla kapa ka lebaka la ho lelekoa ke ho hlorisoa, ba neng ba bolela Kreste . . . Ba bangata haholo ba ne ba entse hore khoebo ea bona, mosebetsi oa bona, liketso tsa bona tsa letsatsi le letsatsi, ho sa tsotellehe hore na ke tsa mofuta ofe, e be mokhoa oa ho atolosa tumelo ea bona.” (The Missionary Enterprise, ea Edwin Munsell Bliss, leqephe 14) E, baboleli ba pele ba ’Muso ba ne ba paka ka mokhoa o reriloeng le o sa rereloang.

Ho Lokisetsa le ho Itlhopha

11. Re ka ithuta eng ho Jesu mabapi le ho lebisa tlhokomelo ’neteng ea Molimo?

¹¹ Joaloka Jesu le balateli ba hae ba pele, re lokela ho paka ka mokhoa o reriloeng le o sa rereloang. Ho etsa joalo hamolemo ho hloka ho lokisetsa le ho itlhopha. Ho paka ka mokhoa o sa rereloang kapa ho fana ka taeo, Jesu o ne a bua ka bana, lijo, liaparo, linonyana, lipalesa, boemo ba leholimo le mesebetsi. (Mattheu 4:18, 19; 6:25-34; 11:16-19; 13:3-8; 16:1-4) Le rōna re ka sebelisa taba leha e le efe e le motheo oa ho lebisa tlhokomelo ’neteng ea Molimo.

12. Ha motho a lokisetsa leeto, a ka itlhophela bopaki bo sa rereloang joang?

¹² Re ka paka ka mokhoa o sa rereloang ho batho ba lutseng lirapeng tsa boikhathollo, ba emeng meleng ea litsi tsa mabenkele le libakeng tse ling tse joalo. Athene, Pauluse o ile a beelana mabaka “ka khotla ka matsatsi ’ohle le bao a neng a teana le bona teng.” (Liketso 17:17) Empa ho hlokahala hore re itlhophele bopaki bo sa rereloang. Ka mohlala, na u rera ho nka leeto ka sefofane, terene, kapa bese? Joale nka Bibele le lipampitšana tse itseng, limakasine, kapa libukana. Ho bala lingoliloeng tsa Bokreste linthong tse palangoang tsa sechaba kapa leha e le kae feela, hangata ho tsosa moqoqo.

13. Etsa mohlala oa kamoo u ka qalisang ho pakela motho e moholo ha u le leetong.

¹³ Ho totobetse hore kenyeletso e botsoalle e tla pele. Buka e nyenyane ea litšupiso Ho Bea Mabaka ka Mangolo e fana ka likenyeletso tse ka sebelisoang tšebeletsong ea tšimo, empa tse ling tsa tsona li ka fetoleloa hore li sebelisoe bopaking bo sa rereloang. Ka mohlala, haeba ha u ntse u tsamaea u lutse pel’a motho e moholo, u ka ’na ua re: “’Na ke _____. Ke ’nile ka nahana haholo ka hore na morero oa bophelo ke ofe. Batho ba bangata ba tšoarehile haholo ka hore na ba tla phela joang hoo ba haelloang ke nako ea ho nahana ka morero oa bophelo. Leha ho le joalo, ha re ntse re hōla, re hlokomela hore bophelo bo batla bo le bokhutšoaane ’me re ka ’na ra ipotsa: ‘Na e be morero oa bophelo ke oona oo feela?’ Na u nahana hore Molimo o na le morero ka hore e be rea phela?” Emela karabo. Joale mohlomong u ka bua ka morero oa Molimo bakeng sa batho e be u hlalosa ka lintho tse khōlō tse tšepisitsoeng ho Tšenolo 21:3, 4. Bakeng sa bopaki bo molemo bo sa rereloang, u ka sebelisa lintlha tse ling tse ntle tseo u ithutileng tsona libokeng tsa phutheho le ho lingoliloeng tsa Bokreste.

Ho Ka Lebelloa Liphello Tse Molemo

14. Moena e mong o bile le katleho efe bopaking bo sa rereloang ha a le leetong?

¹⁴ Joaloka Jesu le balateli ba hae ba pele, re ka atleha ha re paka ka mokhoa o sa rereloang. Ka mohlala: Nakong ea leeto la sefofane, Paki e ’ngoe e ile ea bua le ofisiri ea sesole e neng e e-na le lilemo tse 20 e nyetse. Mosali oa monna eo o ne a sebelisa lithethefatsi, a ile a leka ho ipolaea ka makhetlo-khetlo, ’me o ne a le haufi le ho tlohela monna a e-ea ho mohlankana e mong. Ha Paki e bua ka thuso ea Mangolo eo e neng e e fumana ka Molula-Qhooa le koranta ea habo eona ea Tsoha!, ofisiri ea etsa peeletso ’me ea etsa hore limakasine li romelloe ho mosali oa eona. Baeti ba bang ba utloa hore na Paki e re’ng. Phello ea e-ba efe? E, ka lebaka la ho paka ka lekhetlo leo, o ile a fumana lipeeletso tse 22 ’me ea tsamaisa limakasine tse 45 le libuka tse 21!

15, 16. (a) Fana ka mehlala ea katleho bopaking bo sa rereloang ho mosebetsi-’moho le motho. (b) Liphello tsee li u fa maikutlo afe?

¹⁵ Ho thoe’ng ka ho paka ka mokhoa o sa rereloang ho bao u sebetsang le bona? Moena e mong o ile a tlohela likopi tsa likoranta tsa rōna sebakeng seo ho hlapeloang ho sona moo a sebetsang teng. E mong ea sebetsang le eena a bala limakasine tseo, a iteanya le moena ’me a etsa peeletso ea tsona. Monna eo a boetse a amohela thuto ea Bibele ’me a tlohela boitšoaro ba hae bo hlephileng, empa mosali oa hae o ne a tloha lapeng ka lekhetlo le leng le le leng ha ho bitsoa lebitso la Molimo. Eare ha monna eo a batla ho itokolla kerekeng ea moo, moruti a tla ho tla buisana le eena ka sena, a fumana e le mosali oa monna eo feela lapeng. Ho haelloa ha moruti ke tumelo le mashano a hae ka Lipaki tsa Jehova ha tšosa mosali eo, hobane o ne a bone ha monna oa hae a fetoha hore e be motho ea molemo. A re ho moruti eo: “U ka ngola lengolo le leng la bopaki la ho itokolla bakeng sa ka le bana!” Kamorao ho nako, monna enoa le mosali oa hae ba fetoha Lipaki tse kolobelitsoeng.

¹⁶ Lilemong tsa ho feta, moena e mong ea phelang United States hona joale, o ile a paka ka mokhoa o sa rereloang ho eo a neng a sebetsa le eena Engelane ’me a isa mohlankana eo baesekopong e neng e lokiselitsoe ke Lipaki tsa Jehova. Lilemo tse mashome a mararo a motso o mong hamorao, moena eo o ile a amohela lengolo lena: “Ke lakatsa ho u bolella hona joale hore bopaki boo u ileng ua bo fa [mohlankana eloa] bo bile le liphello tse molemo, hobane hoo e ka bang lilemo tse peli hamorao moena e mong o ile a buisana le eena, a mo siela limakasine, ’me a ea le eena Holong ea ’Muso ea habo . . . Ea e-ba Paki, o ile a kolobetsoa ka 1959, ’me hona joale ke moholo phuthehong ea habo . . . Kamorao ho lilemo tse ka bang 14 mosali oa hae ea e-ba Paki ’me le eena o ile a kolobetsoa. Lilemo tse peli hamorao morali oa hae o ile a kolobetsoa ’me hona joale ke pula-maliboho oa kamehla North Derbyshire . . . Ka bopaki boo bo bonyenyane boo u ileng ua bo etsa khale koana Ashford, monna eo, mosali oa hae le morali, motsoal’ae le morali oa hae, monna le bana ba bahlano, le ngoana e mong oa morali oa motsoala e mong oa hae, kaofela e bile Lipaki. . . . Ted, ke lakatsa ho u leboha haholo ka sebele, hobane ke ’na sehahi sa litšiea tsa tšepe seo u ileng ua buisana le sona, ’me pale eo ke sa tsoa e pheta ke pale ea ka ea ho mpakela ha hao le litholoana tsa hona.”

17. Ke menyetla efe ea bopaki bo sa rereloang eo bahlanka ba banyenyane ba Jehova ba nang le eona?

¹⁷ Lōna bahlanka ba banyenyane ba Jehova, le lōna le na le tšimo e ntle ea ho paka—bao le kenang sekolo le bona le matichere a lōna. Na le fana ka bopaki bo sa rereloang meqoqong eo le e ngolang, lipuisanong tseo le li etsang le linthong tse ling tse joalo? Seithuti se seng sa Ecuador sa sekolo se phahameng seo ho neng ho tsamaisoa thuto ea lehae ea Bibele le sona se ile sa thea moqoqo oa sona o ngotsoeng letotong la lihlooho tsa Tsoha! ea la 22 Phato, 1985 (ka Senyesemane) le neng le re “Hiroshima—Na Se Ithutiloeng ka Eona se Lebetsoe?” Moqoqo oa sona o ile oa hapa moputso tlhōlisanong ea machaba ’me oa fella ka leeto le sa lefelloeng la ho ea Japane. Ha e le hantle, lingoliloeng tsa Bokreste ha lia rereloa ho hlōla litlhōlisano. Empa hona ho bontša bohlokoa ba lingoliloeng tse joalo le molemo oa ho fana ka bopaki thorisong ea Molimo sekolong.

18. Ho fana ka bopaki bo bokhutšoaane ho motho ea neng a batla ho hira kamore ho ile ha fella ka eng?

¹⁸ Ka lebaka la maemo a lichelete, khaitseli e mong o ile a lokela ho hirisa kamore. Hoba a fumane motho ea botsang ka eona ka thelefono, o ile a bolella motho oa mosali ea neng a letsitse hore eena ke e mong oa Lipaki tsa Jehova ’me o ne a ke ke a lumella bootsoa lapeng la hae. Baeti ba ne ba tla tlameha ho tloha nako e sa le teng, ’me baeti ba banna ba ne ba tla tlameha ho ba moo ba bonoang ka linako tsohle. Motho ea neng a letsitse a tsila-tsila, eaba o re: “Ke ile ka ithuta ha ke sa le mocha, empa ha kea ka ka khahloa. Eaba ke ikela kolecheng.” Ha a botsoa hore na a ka lakatsa ho tsosa ho ithuta Bibele hape, o ile a arabela, “E.” Kamorao ho nako, motho ea neng a letsitse, ’m’ae le moen’ae, ba ile ba fetoha bahlanka ba ineetseng ba Jehova—hona hohle hobane khaitseli eo a ile a paka ka mokhoa o sa rereloang.

19. Bopaki bo sa rereloang bo ile ba fella ka eng tabeng ea mosali e mong oa Bahamas?

¹⁹ Bahamas mosali e mong oa Mok’hatholike o ne a tšoenngoa ke letsoalo la hae hobane o ne a sa ka a ea kerekeng ka lilemo tse hlano. Joale hoseng ho hong ka Sontaha, o ile a kena pula ho leba kerekeng. Eaba ho tla Lipaki tse tharo, tse ileng tsa mo palamisa koloi—tsa ba tsa mo pakela. Eare ha ba fihla kerekeng, o ne a batla ho utloa haholoanyane ’me a lula le bona ha ba fetela pele ho ea nka seithuti sa Bibele. Ba boela ba feta kerekeng, empa o ne a batla ho utloa haholoanyane eaba joale o ea Holong ea ’Muso. Puo ea phatlalatsa e ne e bua ka eona taba eo ba neng ba ntse ba buisana ka eona ka koloing. Ha qalisoa thuto ea Bibele le mosali enoa, ea ileng a leleka monna eo a neng a phela le eena (ntate oa bana ba hae ba bane), ’me mosali enoa o ile a kolobetsoa kopanong Nassau ka 1986. O ne a thabile hakaakang hore e be e mong o ile a mo pakela ka mokhoa o sa rereloang!

U Se Phetse ho Bua ka Borena ba Molimo

20. (a) Bopaki bo sa rereloang bo lokela ho talingoa joang kamanong le tšebeletso ea tšimo? (b) Ho fanoa ka keletso efe haeba motho a le monyebe ho paka ka mokhoa o sa rereloang?

²⁰ Ho paka ka mokhoa o sa rereloang hase ntho e ka emang sebakeng sa tšebeletso ea kamehla ea tšimo ea Lipaki tsa Jehova. Ho hlakile hore ho bolela ka ntlo le ntlo ho emeloa ke Mangolo ho bile ho molemo. (Liketso 5:42; 20:20, 21) Leha ho le joalo, bopaki bo sa rereloang bo na le litholoana, ’me bahlanka ba Jehova ba lokela ho nka karolo ho bona. Kae le kae moo ho nang le batho—beng ka motho, liithuti le motho, basebetsi-’moho le ba bang—ho na le menyetla ea ho bolela khanya ea borena ba Molimo. Ka hona u se ke ua lumella tšabo kapa lihlong hore li u sitise. (Liproverbia 29:25; 2 Timothea 1:6-8) Haeba u le monyebe ho paka ka mokhoa o sa rereloang, ke hobane’ng ha u sa rapele joaloka barutuoa ba neng ba hlorisoa ba Jesu? Ba ile ba ithapella: “Morena . . . u nee bahlanka ba hao matla a ho bolela lentsoe la hao, ba sa tšabe letho.” Na thapelo ea bona e ile ea arabeloa? E, hobane “nģalo eo ba phuthehetseng ho eona [e ile] ea sisinyeha, ’me bohle ba tlala Moea o Halalelang, ’me ba bolela lentsoe la Molimo ka matla.”—Liketso 4:23-31.

21. Ke eng e tla susumeletsa motho hore a fane ka bopaki tlas’a maemo ’ohle?

²¹ Kahoo, he, hlaolela boikutlo bo nang le tšepo tabeng ea bopaki bo sa rereloang. Lumella lerato bakeng sa Molimo le u susumeletse ho fana ka bopaki tlas’a maemo a mefuta eohle. Cheseha, u bolele ’nete ka thabo ka monyetla o mong le o mong. Ka sebele, u ’ne u bolele borena ba Molimo.

Likarabelo Tsa Hao ke Life?

◻ Ho paka ka mokhoa o sa rereloang ho na le motheo ofe oa Mangolo?

◻ Tse ling tsa litsela tsa ho itlhophela ho paka ka mokhoa o sa rereloang ke life?

◻ Haeba re paka ka mokhoa o sa rereloang, ho ka lebelloa liphello life?

◻ Re lokela ho talima ho paka ka mokhoa o sa rereloang joang kamanong le tšebeletso ea kamehla ea tšimo?

[Setšoantšo se leqepheng la 23]

Haeba u koaletsoe, na u paka joalokaha Pauluse a ile a paka litlamong?

[Setšoantšo se leqepheng la 25]

Ho itlhopha e sa le pele ho tla re nolofaletsa ho paka ka mokhoa o sa rereloang ka tsela e molemo